ᓄᓇᕗᑦ ᑐᓐᖓᕕᒃ ᑎᒥᖓᑦᑕ ᐊᖓᔪᖅᑳᖓᑦ ᑳᑎ ᑕᐅᑐᓐᖏ ᐅᓪᓗᒥ ᑐᓴᖅᑎᑦᓯᔪᖅ ᑐᓂᔭᐅᔪᓂᒃ ᑖᒃᑯᓂᖓ ᔫᓯ ᐊᒪᐅᔭᖅ ᑯᓱᒐᖅ ᐃᓕᓐᓂᐊᒃᑲᓐᓂᕈᑎᒃᓴᑦ ᐊᕐᕌᒍᐊᓄᑦ 2015. ᑳᓚᐃ ᐊᐃᐱᓕ-ᕿᐊᑦᓱᒃ ᐃᖃᓗᖕᒥᐅᖅ ᐊᒻᒪ ᒦᕕᔅ ᐃᐅᓪ ᓴᓪᓕᕐᓂᑦ ᐊᑐᓂ ᑐᓂᔭᐅᓂᐊᖅᑐᑦ $5,000 ᐃᓕᓐᓂᐊᕈᑎᒃᓴᖏᓐᓄᑦ. ᐊᐃᐱᓕ ᕿᐊᑦᓱᒃ ᐃᓕᑕᕆᔭᐅᔾᔪᑎᑖᕋᓱᐊᖅᑐᖅ ᓄᓇᕗᒥ ᐃᓕᓴᐃᔨᓄᑦ ᐃᓕᓐᓂᐊᕐᓂᕐᒧᑦ ᐊᒻᒪ ᐃᐅᓪ ᐋᓐᓂᐊᓯᐅᖅᑎᕈᕋᓱᐊᖅᑐᖅ. ᑕᒪᒃᑮᒃ ᐃᓕᓐᓂᐊᖅᑏᑦ ᐃᓕᓐᓂᐊᖅᑑᒃ ᓄᓇᕗᑦ ᓯᓚᑦᑐᖅᓴᕐᕕᖕᒥ.
“ᖁᕕᐊᓲᑎᕙᒃᑲᒃ ᑳᓚᐃ ᐊᒻᒪ ᒦᕕᔅ ᐱᑎᑕᐅᓂᖏᓐᓂᒃ ᑖᑦᓱᒥᖓ ᔫᓯ ᐊᒪᐅᔭᖅ ᑯᓱᒐᖅ ᐃᓕᓐᓂᐊᒃᑲᓐᓂᕈᑎᒃᓴᑦ. ᑖᓐᓇ ᐊᑑᓯᖃᑦᓯᐊᖅᑐᖅ ᐊᔪᓐᖏᑎᑦᓯᔪᓐᓇᖃᑦᑕᖅᑐᖅ ᔫᓯᐅᑉ ᐊᒃᓱᕉᑎᒋᓚᐅᖅᑕᖏᓐᓂᒃ ᐃᓕᓐᓂᐊᕐᓂᕐᒧᑦ ᐊᒻᒪ ᐃᓄᐃᑦ ᐅᖃᐅᓯᖏᓐᓄᑦ ᓱᓕ ᓴᓐᖏᔫᔪᑦ ᐃᓕᓐᓂᐊᖅᑏᑦ ᐃᓕᓐᓂᐊᒃᑲᓐᓂᕐᓂᐊᖅᑐᑦ. ᐱᔭᕆᐊᑐᖃᑦᑕᕐᑐᖅ ᓂᕈᐊᖅᓯᕋᓱᒋᐊᒃᓴᖅ ᑐᒃᓯᕋᖅᓯᒪᔪᓂᒃ, ᑭᓯᐊᓂ ᐃᓕᓐᓂᐊᖅᑏᑦ ᓂᕈᐊᖅᑕᐅᔪᑦ ᑕᒫᓂ ᐊᕐᕌᒍᒥ ᑕᒪᒃᑮᒃ ᑎᑎᕋᐅᓯᖃᑦᓯᐊᓚᐅᕐᒪᑎᒃ ᔫᓯᐅᑉ ᐱᓕᕆᐊᕆᓚᐅᖅᑕᖏᓐᓂᒃ ᐊᒻᒪ ᖃᓄᖅ ᓴᖅᑭᔮᖅᑎᑦᓯᓂᐊᕐᓂᕐᒥᓂᒃ ᐃᓄᐃᑦ ᐅᖃᐅᓯᖏᑦ ᐊᑐᖅᑕᐅᖃᑦᑕᕐᓂᐊᕐᓂᖏᓐᓄᑦ ᐃᓕᓐᓂᐊᕌᓂᒃᓯᒪᓕᖅᑎᓪᓗᖏᑦ ᐃᓕᓴᐃᔨᐅᓗᓂ ᐱᖃᑖᑦ ᐊᒻᒪ ᐱᖃᑖ ᐋᓐᓂᐊᓯᐅᖅᑎᕈᕐᓗᓂ,” ᐅᖃᓚᐅᖅᑐᖅ ᑳᑎ.
ᑖᒃᑯᐊ ᓂᕈᐊᖅᓯᖅᑐᑦ ᕿᒥᕐᕈᓚᐅᖅᑐᑦ 14-ᓂᒃ ᑐᒃᓯᕋᐅᑎᓂᒃ ᑲᑎᑦᑐᒋᑦ. ᓇᓕ ᑯᓱᒐᖅ ᓄᓕᐊᖓ ᔫᓯᐅᑉ, ᐃᓚᐅᓚᐅᖅᑐᖅ ᓂᕈᐊᖅᓯᖅᑎᓪᓗᒋᑦ ᑕᒫᓂ ᐊᕐᕌᒍᒥ ᑎᒃᑯᐊᖅᑕᐅᓚᐅᕋᓂ ᑲᒥᓯᓇᐅᓂᕐᒧᑦ. ᑯᓱᒐᕇᑦ ᐃᓚᐅᖃᑦᑕᖅᓯᒪᒻᒪᕆᒃᑐᑦ ᑖᒃᑯᐊ ᐃᓕᓐᓂᐊᒃᑲᓐᓂᕈᑎᒃᓴᑦ ᓴᖅᑭᑎᑕᐅᓚᐅᖅᑎᓪᓗᒋᑦ ᐊᕐᕌᒍᐊᓂ 2011. “ᐃᓅᓯᕐᒥᓂ ᐊᒻᒪ ᐱᓕᕆᐊᒥᑎᒍᑦ ᔫᓯ ᐅᖃᐃᓐᓇᖃᑦᑕᓚᐅᖅᑐᖅ ᐱᒻᒪᕆᐅᓂᖏᓐᓂᒃ ᐃᓄᐃᑦ ᐅᖃᐅᓯᖏᑦ ᐊᒻᒪ ᐃᓕᖅᑯᓯᖏᑦ ᐊᒻᒪ ᐃᓚᓕᐅᑎᔭᐅᒋᐊᖃᕐᓂᖏᑦ ᐃᓄᐃᑦ ᑭᓇᐅᓂᖏᓐᓄᑦ. ᐱᓕᕆᐊᖃᖅᑐᓂ ᐃᓕᓐᓂᐊᕐᓂᕐᒥᑦ ᓴᓐᖏᔪᒻᒪᕆᐅᓚᐅᖅᑐᖅ ᐊᒻᒪ ᖁᕕᐊᓱᒃᐳᖓ ᑕᑯᔭᕆᐊᒃᓴᖅ ᑕᒪᑐᒥᖓ ᐅᒃᐱᕆᓚᐅᖅᑕᖓᓂᒃ ᐊᒻᒪ ᐱᓕᕆᐊᖏᑦ ᑲᔪᓯᑎᑕᐅᓂᖏᓐᓂᒃ,” ᐅᖃᖅᑐᖅ ᑯᓱᒐᖅ.
ᑭᖑᓪᓕᕐᒥ ᐃᓱᓕᑦᑕᕐᕕᐅᓂᐊᖅᑐᖅ ᑭᖑᓪᓕᕐᓄᑦ ᑐᒃᓯᕋᐅᑎᓄᑦ ᑖᑦᓱᒥᖓ ᔫᓯᐊᒪᐅᔭᖅ ᑯᓱᒐᖅ ᐃᓕᓐᓂᐊᒃᑲᓐᓂᕈᑎᒃᓴᓂᒃ ᔪᓚᐃ 9, 2016. ᑐᒃᓯᕋᐅᑏᑦ ᑲᑎᖅᓱᖅᓯᒪᔪᑦ ᐱᔭᐅᔪᓐᓇᖅᑐᑦ ᓄᓇᕗᑦ ᑐᓐᖓᕕᒃ ᑎᒥᖓᑦᑕ ᐃᑭᐊᖅᑭᕕᐊᓂ. ᐃᓄᐃᑦ ᐃᓕᓐᓂᐊᖅᑏᑦ ᐊᑎᖃᖃᑕᐅᔪᑦ ᓄᓇᕗᒥ ᓄᓇᑖᕐᓂᕐᒧᑦ ᐊᖏᕈᑎᓂ ᐊᒻᒪ ᐃᓕᓐᓂᐊᒃᑲᓐᓂᕈᒪᔪᖅ ᖁᑦᓯᖕᓂᖅᓴᓂᒃ ᐱᔪᓐᓇᖅᑎᑕᐅᔪᑦ ᑖᒃᑯᓂᖓ ᐃᓕᓐᓂᐊᒃᑲᓐᓂᕈᑎᒃᓴᓂᒃ.
