ᓄᓇᕗᑦ ᑐᓐᖓᕕᒃᑯᑦ ᐊᖓᔪᖅᑳᖓᑕ-ᑐᒡᓕᐊ ᔭᐃᒥᓯ ᐃᑦᑐᓗᒃ ᑐᓴᖅᑎᑦᓯᖅᑲᐅᔪᖅ ᐊᕕᑦᑐᕐᓯᒪᓂᕐᓂ ᐆᒪᔪᓕᕆᔩᑦ ᑲᑎᒪᔨᖏᑦ ᕿᑎᕐᒥᐅᓂ, ᑭᕙᓪᓕᖅ ᐊᒻᒪᓗ ᕿᑭᖅᑖᓗᖕᒥ ᐊᖏᕈᑎᖃᕆᐊᖏᑦ ᐊᓪᓚᓐᖑᐊᑦ ᓂᕕᖓᑖᖏᓐᓄᑦ ᐊᑐᐊᒐᕆᑲᐃᓐᓇᓂᐊᖅᑕᖏᑦ ᑭᖑᓪᓕᒨᖅᑕᐅᓗᑎᒃ ᐊᕐᕌᒍᒧᑦ ᐊᑐᖅᑕᐅᒪᐃᑦᑐᑦ ᐊᖑᓇᓱᑦᑎᓄᑦ 2013-ᒥ.
ᑭᖑᓪᓕᕐᒨᕆᓂᕐᒧᑦ ᐊᑐᐊᒐᐅᑲᐃᓐᓇᓂᐊᖅᑐᖅ ᐱᔾᔪᑎᒃᓴᐅᔪᓐᓇᓂᐊᖅᑐᖅ ᐊᕕᑦᑐᕐᓯᒪᓂᕐᓂ ᐆᒪᔪᓕᕆᔩᑦ ᑲᑎᒪᔨᖏᑦ ᑐᓂᓯᒍᓐᓇᓂᐊᕐᓂᖏᓐᓂᒃ, ᓂᕕᖓᑖᓂᒃ ᐊᑐᖅᑕᐅᓚᐅᓐᖏᑦᑐᓂᒃ 2013-ᒥ ᐊᖑᓇᓱᑦᑎᓄᑦ 2014-ᒥ ᑖᒃᑯᓇᓐᖓᓴᐃᓐᓇᖅ ᐱᔾᔪᑕᐅᒍᓐᓇᓂᐊᖅᑐᑦ ᐊᐅᔭᕐᓯᐅᕆᐊᖅᑐᕕᖏᓐᓂ ᐊᓪᓚᓐᖑᐊᑦ. ᐊᕕᑦᑐᕐᓯᒪᓃᑦ ᐆᒪᔪᓕᕆᔨᒃᑯᑦ ᑲᑎᒪᔨᖏᑦ ᐊᖏᕈᑎᖃᓚᐅᖅᑐᑦ ᐊᑐᐊᒐᖃᑲᐃᓐᓇᓂᐊᕐᓂᖅ ᑐᑭᓕᒃ ᓄᑖᖅ ᐊᐅᓚᑦᓯᔾᔪᑎᒃᓴᖅ ᑐᓂᔭᐅᓂᐊᖅᑐᖅ ᓄᓇᕗᒻᒥ ᐆᒪᔪᓕᕆᔨᕐᔪᐊᑯᓐᓄᑦ ᐊᖏᕈᑕᐅᖁᓪᓗᒍ ᑭᖑᓪᓕᕐᒥ ᑲᑎᒪᓕᕐᐸᑕ ᒫᑦᓯ 2014.
ᑭᖑᓪᓕᒨᖅᑕᐅᓂᖏᓐᓄᑦ ᐊᑐᐊᒐᖅ ᐃᓚᒋᔭᖓ ᑲᑎᑕᐅᓯᒪᔪᑦ ᐃᖃᓗᓕᕆᓂᕐᒧᑦ ᐊᐅᓚᑦᓯᔾᔪᑎᒃᓴᓄᑦ ᐸᕐᓇᐅᑎᓕᐊᖑᓚᐅᖅᑐᒧᑦ ᐊᓪᓚᓐᖑᐊᓄᑦ ᐃᒪᕐᒥᐅᑕᓕᕆᔨᒃᑯᓐᓄᑦ ᑐᓴᕆᐊᖃᑦᑕᕐᓱᑎᒃ ᑐᓐᖓᕕᒃᑯᓐᓂᒃ, ᐊᕕᑦᑐᕐᓯᒪᓂᕐᓂ ᐆᒪᔪᓕᕆᔨᒃᑯᑦ ᑲᑎᒪᔨᖏᑦ ᐊᒻᒪᓗ ᓄᓇᓕᖕᓂ ᐊᖑᓇᓱᑦᑐᓕᕆᔨᒃᑯᑦ ᑲᑐᔾᔨᖃᑎᒌᖏᓐᓂᒃ 2012-ᒥ. ᐸᕐᓇᐅᑦ ᓴᖅᑭᕈᑕᐅᓪᓗᓂ ᑲᑎᓪᓗᒋᑦ ᐊᖑᓇᓱᒃᑕᐅᔪᓐᓇᖅᑐᓂᒃ ᐊᓪᓚᓐᖑᐊᓄᑦ ᑕᕝᕙᖔᖅᑐᑦ ᐃᓄᐃᑦ ᐊᖑᓇᓱᖕᓂᕐᒧᑦ ᐱᔪᓐᓇᐅᑎᖏᓐᓂᒃ ᐊᒻᒪᓗ ᐱᕚᓪᓕᕈᑎᒃᓴᓂᒃ ᐊᖑᓇᓱᒃᑕᐅᖃᑦᑕᕈᓐᓇᕐᓂᖏᓐᓄᑦ ᐊᒻᒪᓗ ᓂᐅᕐᕈᑕᐅᓗᑎᒃ ᐊᓪᓚᓐᖑᐊᑦ. ᑐᓐᖓᕕᒃᑯᓐᓂᒃ ᐱᓕᕆᐊᓪᓗᐊᑕᐅᓚᐅᖅᑐᖅ ᐸᕐᓇᐅᓯᐅᕐᓂᖅ.
“ᐃᖅᑲᓇᐃᔭᖃᑎᒌᓐᓂᒃᑯᑦ, ᑐᓐᖓᕕᒃᑯᑦ ᐃᒪᕐᒥᐅᑕᓕᕆᔨᒃᑯᓪᓗ ᐋᖅᑮᓚᐅᖅᑐᑦ ᑭᖑᓪᓕᒨᖅᑕᐅᓚᐅᐱᓪᓚᓂᕐᒧᑦ ᑐᒃᓯᕋᐅᓯᐅᖅᑐᑎᒃ ᑲᒪᒍᑕᐅᓂᐊᖅᑐᒥᒃ ᐊᑲᐅᓐᖏᓪᓕᐅᕈᑕᐅᓯᒪᔪᒥᒃ ᐊᑐᖅᑕᐃᒪᐃᑦᑐᓄᑦ ᐊᓪᓚᓐᖑᐊᓄᑦ ᓂᕕᖓᑖᓄᑦ 2014 ᐊᓪᓚᖑᐊᕐᓂᐊᕐᓇᖓᓄᑦ,” ᐅᖃᖅᑐᖅ ᐃᑦᑐᓗᒃ. “ᑖᓐᓇ ᐋᖅᑭᑦᓯᒍᑕᐅᔪᖅ ᐃᓚᒋᒻᒥᔭᖓ ᑕᑯᑦᓴᐅᓂᖓ ᐊᑑᑎᖃᕐᓂᖏᓐᓂᒃ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑕᐅᓯᒪᔪᑦ ᐃᑲᔫᑕᐅᓇᓱᐊᕐᓯᒪᓂᖏᑦ ᐃᓄᖕᓄᑦ ᐱᔪᓐᓇᐅᑎᖃᕐᓂᑦᑎᒍᑦ ᐊᖑᓇᓱᓐᓂᕐᒧᑦ.”
ᐃᒪᕐᒥᐅᑕᓕᕆᔨᒃᑯᑦ ᐊᖏᕐᓯᒪᔪᑦ ᐋᖅᑭᑦᓯᓂᕐᒥᒃ ᐃᓱᒪᕐᓲᑕᐅᒍᓐᓇᖅᑐᒥᒃ ᐊᓪᓚᓐᖑᐊᓄᑦ ᑰᑕᓂᒃ ᐊᐅᓚᑦᓯᔾᔪᑎᒃᓴᓄᑦ 2015-ᕈᕋᓱᐊᕐᓂᖓᓂ. ᓂᕆᐅᒋᔭᐅᔪᖅ ᐃᓇᖏᓂᐊᕐᓂᖓᓂᒃ ᑖᑦᓱᒥᖓ ᐊᑐᐊᒐᐅᓚᐅᐱᓪᓚᓂᐊᖅᑐᒥᒃ.
