(February 20, 2014 –Iqaluit, Nunavut)     Nunavut Tunngavikkut Timingat Tuklia Angayuqqaap James Eetoolook uqaqtuq taimaa taapkua Aviktuqhimayumi Anguniaqtit Katimayiit Qitirmiuni, Kivalliqmi Qikiqtaalungmilu angiqhimayut atukaffuktughanik tuugaalingnik qilalugaqhiurutighat atuqtaunngittut ukiumi atuqtaulutik atuqtaunngitpata 2013-mi.

Atukaffuktaghat maligaghait atuqtaunngittunut qilalugaqhiurutit nakurutauniaqtut RWO-nut aittuqtitqingnirmut, qilalugaqhiurutinik atuqtaunngittut 2013-mi tunilugit anguniaqtunut atuqtaghait 2014-mi auyami anguniaqtaghainut.  RWO-kut angirumigik atukaffuktaghat maligaghanik taimaa nutaakkut havauhikkut turaaqtitauniat talvunga Nunavunmi Anngutighaliqiyit Katimayiinut angiqtauyughat katimatqikkumik March-mi 2014-mi.

Hapkua atukaffuktauyut maligaghait atuqtaunngittunut ilauyut taapkununnga Katimaqatigiit Iqalliqinirmut Parnaiyaqhimayut qilalukkanut titiraqtauhimayuq Havakvianit Iqalliqiyit Taryuliqiyillu katimaqatigiplugit NTI-kut RWO-kut Anguniaqtit Katimayiillu 2012-mi.  Parnaiyaqhimayainit angunianginnarialgit qilalukkanik naammagiyainik ihumagiplugit Inuit pilaarutait niqighaqhiurniqmut niqighaqhiuqtittinahuaqhugit kiinauyaqhiurutigilugu qilalukkat.  NTI-kut ikayuqtiulluaqtut parnaiyaiyunik atuqtaghainik.

“Havaqatigiighutik, NTI-kut DFO-kullu tutqighaivaktut atukaffuktaghanik maligaghanik atuqtaunngittunik qilalugaqhiurutinik ihuaqhautauluni atuqtaulutik 2014-mi,” uqaqtuq Eetoolook.  “Imaatut ihuaqtukkut ilittuqhautauyuq Nunavunmi Nunataarnikkut Angirutit ikayuutauyut Inungnut pilaarutikput ihumagiplugit niqighaqhiurniqmut.”

DFO-kut iniqhiniaqturiyut maligaghanik qilalugaqhiuriniqmut 2015 atuliqqat.  Naahuriyauyuq taimaa himmautauniaqtuq maligaghaliuqhimayunik.