ᓴᒃᑯᑕᐅᑲᐅᑎᒋᔭᕆᐊᓕᒃ
(ᐊᒃᑑᕝᕙ 26, 2023), ᐃᖃᓗᒃᑑᑦᓯᐊᖅ, ᓄᓇᕗᑦ) ᐊᕐᕌᒍᑕᒫᑦ ᑲᑎᒪᕕᔾᔪᐊᕐᓂᕆᔭᖏᖕᓂᑦ ᐃᓚᒋᔭᐅᔪᑦ ᓄᓇᕗᑦ ᑐᙵᕕᒃ ᑎᒥᖓᓄᑦ ᐱᔭᕇᖅᑲᐅᔪᑦ ᐅᓪᓗᒥ ᐃᖃᓗᒃᑑᑦᓯᐊᖅ, ᓄᓇᕗᒻᒥ ᐱᒻᒪᕆᐅᔪᓂᒃ ᐃᓱᒪᓕᐅᖅᑐᑎᑦ ᐱᐅᓂᖅᓴᒥᒃ ᐊᑦᑐᐃᓂᖃᕐᓂᐊᖅᑐᓂᑦ ᓄᓇᕗᑦ ᐃᓄᖏᖕᓄᑦ. ᐊᕐᕌᒍᑕᒫᑦ ᑲᑎᒪᕕᔾᔪᐊᕆᐊᖅᑐᕐᕕᐅᓚᐅᖅᑐᖅ ᐅᖓᑖᓄᑦ ᐱᖓᓱᓄᑦ ᐅᓪᓗᓄᑦ ᑲᑎᒪᔭᖅᑐᖅᑐᖃᖅᑐᓂ ᑭᒡᒐᖅᑐᐃᔨᖏᑦ ᐊᑐᓂ ᐊᕕᑦᑐᖅᓯᒪᔪᑦ ᐃᓄᐃᑦ ᑲᑐᔾᔨᖃᑎᒌᖏᑦ ᐊᒻᒪᓗ ᓄᓇᕗᑦ ᑐᙵᕕᒃ ᑎᒥᖓᓃᙶᖅᑐᑦ ᑲᑎᒪᔭᖅᑐᖅᓯᒪᓚᐅᖅᑐᑎᑦ.
ᐊᑭᖏᑦ ᐊᑐᓕᖅᑎᑦᑎᙱᑦᑐᒥᓂᐅᓂᖏᖕᓄᑦ ᐊᕕᑦᑐᖅᓯᒪᓂᖓ 23-ᒥ
ᐃᓚᒋᔭᐅᔪᑦ ᐊᕐᕌᒍᑕᒫᑦ ᑲᑎᒪᕕᔾᔪᐊᕐᓂᐅᕙᑦᑐᒧᑦ ᐅᓂᒃᑳᕐᕕᐅᓚᐅᖅᑐᑦ ᓴᖅᑭᖅᑐᒥᓂᐅᓯᒪᓂᖏᖕᓂᑦ ᐱᕙᓪᓕᐊᔪᓕᕆᓂᕐᒧᑦ ᖃᐅᔨᓵᒥᓂᖅ ᖃᐅᔨᓴᖁᔭᐅᓯᒪᔪᖅ ᓄᓇᕗᑦ ᑐᙵᕕᒃ ᑎᒥᖓᓄᑦ ᕿᒥᕐᕈᖁᔨᓪᓗᑎᑦ ᑮᓇᐅᔭᖅᑎᒍᑦ ᐊᓯᐅᔨᔭᐅᓲᑦ ᐃᓄᖕᓄᑦ ᐊᒻᒪᓗ ᒐᕙᒪᒃᑯᓐᓄᑦ ᐊᑐᓕᖅᑎᑕᐅᙲᓐᓇᖅᑐᒥᓂᐅᑎᓪᓗᒍ ᐊᕕᑦᑐᖅᓯᒪᓂᖓ 23 ᓄᓇᕗᑦ ᐊᖏᕈᑎᖓᓂ. ᐊᕕᑦᑐᖅᓯᒪᓂᖓ 23 ᐱᔭᕆᖃᖅᑎᑦᑎᕗᖅ ᒐᕙᒪᒃᑯᓐᓂ ᐃᖅᑲᓇᐃᔭᖅᑎᑖᕐᓗᑎᑦ ᑕᒪᐃᓐᓂ ᒐᕙᒪᐅᔪᓂᑦ ᐊᒥᓲᓂᖏᑦ ᐃᖅᑲᓇᐃᔭᖅᑏᑦ ᒪᓕᒋᐊᖃᖅᑐᑎᑦ ᓄᓇᕗᒻᒥᐅᑕᐅᔪᑦ ᐃᓄᖏᑦᑕ ᐊᒥᓲᓂᖏᖕᓂᑦ ᖃᖓᑐᐃᓐᓇᒃᑯᑦ ᐊᕐᕌᒍᒥ. 199-ᒥᓂᑦ, ᐃᓄᐃᑦ ᐃᖅᑲᓇᐃᔭᖅᑐᑦ ᐅᖓᑕᐅᔨᓚᐅᖅᓯᒪᙱᓚᑦ 52%-ᓂᑦ. ᖃᐅᔨᓵᖃᖅᑎᓪᓗᒋᑦ ᐱᔪᒥᓂᐅᕗᑦ ᑐᑭᓯᒋᐊᕈᑎᖏᖕᓂᑦ ᑭᒡᓕᓯᓂᐊᖅᑎᒻᒪᕆᒃᑯᑦ ᑲᓇᑕᒥ ᐊᒻᒪᓗ ᒐᕙᒪᒃᑯᑦ ᐃᖅᑲᓇᐃᔭᕐᓂᕐᒧᑦ ᐅᓂᒃᑳᖏᖕᓂᑦ ᐊᒻᒪᓗ ᐊᔾᔨᒌᙱᓐᓂᖏᖕᓂᒃ ᕿᒥᕐᕈᓪᓗᑎᑦ ᖃᓄᖅ ᑕᒪᐃᓐᓂ ᑭᒡᒐᖅᑐᐃᑦᑎᐊᖅᑐᑦ ᐃᓄᐃᑦ ᐃᖅᑲᓇᐃᔮᖃᖅᑎᑕᐅᔪᑦ ᐃᓄᓐᓂᒃ ᑭᒃᑯᑐᐃᓐᓇᕐᓂᒃ ᐱᔨᑦᑎᕋᖅᑐᑎᑦ ᑕᐅᑐᓐᓂᖃᕋᔭᕐᒪᖔᖅ. ᓴᖅᑭᓐᓂᖏᑦ ᑕᑯᒃᓴᐅᑎᑦᑎᕗᑦ ᐊᕐᕌᒍᖏᖕᓂ 2015 ᑎᑭᑦᑐᒍ 2023, ᓄᐊᑉᐸᓪᓕᐊᓯᒪᔪᖃᕋᔭᕐᒪᑦ ᑮᓇᐅᔾᔭᒃᓵᕆᔭᐅᒐᔭᖅᑐᒥᓂᐅᒐᓗᐊᕐᓂᑦ ᓄᓇᕗᑦ ᐃᓄᖏᖕᓄᑦ ᑲᑎᓕᒫᖅᑐᒋᑦ $1.4 ᕕᓕᐊᓐ ᑮᓇᐅᔭᑦ ᐃᓄᓐᓄᖔᕆᐊᖃᖅᑐᒥᓂᐅᒐᓗᐊᑦ. ᑐᑭᓯᒋᐊᕈᑏᓪᓗ ᑕᑯᒃᓴᐅᑎᑦᑎᓯᒪᕗᑦ ᐊᑭᑦᑐᕆᐊᖅᓯᒪᓂᖏᑦ ᒐᕙᒪᒃᑯᓐᓄᑦ ᐃᒡᓗᓂᒃ ᐃᖅᑲᓇᐃᔭᖅᑎᖏᖕᓄᑦ ᐃᑲᔫᓯᐊᖅᑖᖅᑎᑦᑎᖃᑦᑕᕐᓂᖏᖕᓄᑦ, ᐃᖅᑲᓇᐃᔭᙱᑐᖅᓯᐅᑏᑦ ᐊᒻᒪᓗ ᑮᓇᐅᔭᑦ ᐃᑲᔫᓯᐊᖅᑖᕈᑎᖏᑦ ᑲᑎᑦᑐᒋᑦ ᐊᓯᐅᔨᔪᒥᓂᐅᓪᓗᑎᑦ ᑖᒃᓰᔭᐃᓂᕐᒧᑦ ᑮᓇᐅᔭᑦ ᐃᓯᖅᐸᓪᓕᐊᔪᓂᑦ, ᑲᑎᓕᒫᖅᑐᒋᑦ $630 ᒥᓕᐊᓐ ᑮᓇᐅᔭᑦ ᑕᐃᑲᓂᒃᓴᐃᓐᓇᖅ ᐊᕐᕌᒍᖏᖕᓂ.
ᖃᐅᔨᓵᖅ ᓱᖅᑯᐃᓇᑦᑎᐊᖅᑐᑯᓗᒃᑯᑦ ᑕᑯᒃᓴᐅᑎᑦᑎᕗᖅ ᐊᑐᓕᖅᑎᑕᐅᓂᖓ ᐊᕕᑦᑐᖅᓯᒪᓂᖓᑕ 23 ᐊᖏᕈᑎᒥ ᓴᖅᑮᒐᔭᖅᑐᖅ ᐊᒥᓱᒻᒪᕆᐊᓗᓐᓂᒃ ᑮᓇᐅᔭᖅᑖᖃᑦᑕᕐᓗᑎᑦ ᐃᓄᐃᑦ ᐊᒻᒪᓗ ᑮᓇᐅᔭᓂᑦ ᐊᑐᖅᑐᒻᒪᕆᐅᒍᑎᑦ ᐱᓕᒻᒪᒃᓴᖅᑕᐅᓗᑎᑦ ᐃᓄᐃᑦ ᐊᑯᓂᐅᔪᒧᑦ ᐃᑲᔪᕐᓂᖃᕋᔭᖅᑐᓂ ᒐᕙᒪᐅᔪᓄᑦ, ᐊᒻᒪᓗ ᑕᒪᐃᓐᓄᑦ ᑲᓇᑕᒥᐅᑕᕐᓄᑦ.
ᐃᓄᐃᑦ ᐃᖅᑲᓇᐃᔭᖅᑎᑕᐅᙲᓐᓇᑐᐃᓐᓇᖃᑦᑕᕐᓂᖏᖕᓄᑦ, ᓄᓇᕗᑦ ᑐᙵᕕᒃ ᑎᒥᖓ ᑭᒡᓕᓯᓂᐊᖅᑕᐅᓂᖃᖁᔨᓕᓚᐅᖅᓯᒪᕗᖅ 2018-ᖑᑎᓪᓗᒍ ᓄᓇᕗᑦ ᒐᕙᒪᖏᑦ ᐊᒻᒪᓗ ᑲᓇᑕᒥ ᒐᕙᒪᖏᑦ ᖃᐅᔨᓵᕆᔭᐅᓗᑎᑦ ᐊᑐᓕᖅᑎᑕᐅᓂᖓᓄᑦ ᐊᕕᑦᑐᖅᓯᒪᓂᖓ 23. ᐊᐃᕙᐅᑎᓂᖃᓚᐅᕐᒪᑎᒃ ᒐᕙᒪᐅᔫᑉ ᐃᓄᖕᓂᒃ ᐃᖅᑲᓇᐃᔭᖅᑎᑦᑎᓂᕐᒧᑦ ᐸᕐᓇᐅᑎᖏᑦ ᒪᓕᒃᑲᓗᐊᕐᒪᖔᑕ ᐱᖁᔭᖅᑎᒍᑦ ᒪᓕᒋᐊᓕᒻᒥᓂᒃ ᐊᕕᑦᑐᖅᓯᒪᓂᖓᓂᒃ 23. ᑭᒡᓕᓯᓂᐊᖅᑎᐅᔪᖅ ᐊᖏᖃᑎᖃᓚᐅᖅᑐᖅ ᓄᓇᕗᑦ ᑐᙵᕕᒃ ᑎᒥᖓᓂᒃ ᐊᒻᒪᓗ ᖃᐅᔨᓪᓗᓂ ᒪᕐᕉᒃ ᒐᕙᒪᐅᔫᒃ ᐃᓄᓐᓂᒃ ᐃᖅᑲᓇᐃᔭᖅᑎᖃᕐᓂᐊᕐᓂᕐᒧᑦ ᐸᕐᓇᐅᑎᖏᑦ ᓯᖁᒥᑦᑎᒻᒪᑕ ᓄᓇᕗᑦ ᐊᖏᕈᑎᖓᓂᒃ. ᐊᒻᒪᓗᒃᑲᓐᓂᖅ, ᒐᕙᒪᒃᑯᑦ ᐊᑐᕆᐊᓯᓯᒪᓐᓂᕐᒪᑕ ᑐᐊᓗᐊᖅᑐᑯᓗᒻᒥᒃ ᐊᒻᒪᓗ ᐱᓕᕆᐊᖃᙱᒍᑎᖃᓗᐊᖅᑐᐊᓘᓯᒪᓪᓗᑎᑦ ᑲᒪᒋᔭᖃᕆᐊᖅᑎᓪᓗᒋᑦ ᐅᖃᐅᓯᐅᓯᒪᔪᓂᑦ ᓄᓇᕗᑦ ᐊᖏᕈᑎᖓᓂᒃ ᐊᒻᒪᓗ ᐃᓱᒪᒋᔭᖃᖅᓯᒪᙱᓗᐊᖅᑐᑦ ᑕᒪᐃᓐᓂ ᐱᓇᓱᐊᒐᓪᓗᐊᑕᕆᔭᐅᔪᓂᑦ ᐊᖏᕈᑎᒥ.
ᐃᓱᒪᓕᐅᕈᑕᐅᓯᒪᓂᖓᓄᑦ ᑲᓇᑕᒥ ᒐᕙᒪᒃᑯᑦ ᐊᒻᒪᓗ ᓄᓇᕗᑦ ᒐᕙᒪᖏᑦ ᓯᖁᒥᑦᑎᓯᒪᕗᑦ ᐊᕕᑦᑐᖅᓯᒪᓂᖓᓂᒃ 23-ᒦᑦᑐᓂᑦ, ᑲᓇᑕᒥ ᒐᕙᒪᐅᔪᑦ ᐊᒻᒪᓗ ᓄᓇᕗᑦ ᒐᕙᒪᖏᑦ ᓄᒃᑎᒋᐊᖅᓯᒪᓕᖅᑐᑦ “ᐋᖅᑭᒍᑎᓕᐅᕐᓂᐊᓕᖅᑐᑎᑦ”. ᐋᖅᑭᒍᑎᓕᐅᕐᓂᖃᕈᓐᓇᖅᑐᑦ ᑮᓇᐅᔭᓂᑦ ᐅᕝᕙᓘᓐᓃᑦ ᑮᓇᐅᔭᖅᑎᒎᙱᒃᑲᓗᐊᖅᑐᓂᑦ ᐊᑭᓖᓗᑎᑦ. ᓄᓇᕗᑦ ᑐᙵᕕᒃ ᑎᒥᖓ ᐋᔩᕋᖃᑎᖃᖅᐳᑦ ᑕᒪᒃᑮᓐᓂᒃ ᒐᕙᒪᐅᔫᓐᓂᒃ ᑕᒪᒃᑮᓐᓄᑦ ᐊᖏᕈᑎᒋᔭᐅᖁᓪᓗᒍ ᐋᖅᑭᒍᑎᒃᓴᓕᐅᖁᓪᓗᒋᑦ ᑲᒪᒋᔭᐅᓂᐊᕐᒪᑦ ᓯᖁᒥᑦᑕᐅᓯᒪᔪᑦ ᐊᕕᑦᑐᖅᓯᒪᓂᖓᑕ 23 ᖃᓄᐃᓕᐅᕆᐊᖃᖅᑕᒥᓂᕋᓗᐊᖏᖕᓂᑦ. ᒐᕙᒪᐅᔫᒃ ᑐᙵᕕᒃᑯᓪᓗ ᐊᖏᕈᑎᖃᕈᓐᓇᙱᒃᑯᑎᑦ ᐋᖅᑭᒍᑎᓂᑦ, ᓄᓇᕗᑦ ᑐᙵᕕᒃ ᑎᒥᖓ ᐅᐸᓗᖓᐃᔭᐃᒋᐊᖃᑐᐃᓐᓇᕋᔭᖅᑐᖅ ᐋᖅᑭᒍᑎᒃᓴᓕᐅᕐᓗᑎᑦ ᓈᓚᓐᓂᒃᑯᑦ ᐋᔩᕋᖃᑎᒌᑦᑎᑦᑎᔨᑉ ᓵᖓᓅᕐᒥᓗᑎᑦ.
ᐃᓚᒋᔭᐅᖃᑕᐅᔪᑦ ᐊᕐᕌᒍᑕᒫᑦ ᑲᑎᒪᕕᔾᔪᐊᕐᓂᕐᒧᑦ ᖃᓄᐃᓕᐅᕈᑎᖃᕆᐊᓯᓚᐅᖅᐳᑦ ᒐᕙᒪᒫᕐᓂᑦ ᐊᑐᓕᖅᑎᑦᑎᖁᔨᓕᖅᑐᑎᑦ ᑕᒪᐃᓐᓂ ᓄᓇᕗᑦ ᐊᖏᕈᑎᖓᓂᒃ ᐊᒻᒪᓗ 2015-ᒥ ᐋᖅᑮᖃᑎᒌᓐᓂᕐᒧᑦ ᐊᖏᕈᑎᐅᔪᒥᒃ ᐊᒻᒪᓗ ᒪᑭᒪᑦᑎᐊᑎᑦᑎᒍᓐᓇᖅᑐᒃᑯᑦ ᐱᖁᔭᓕᐅᖅᑐᖃᓕᕐᓗᓂ, ᐊᑐᐊᒐᕋᓛᖅᑎᒍᑦ, ᐊᑐᐊᒐᑎᒍᓪᓗ ᐱᓕᕆᐊᖅᑎᒍᓪᓗ ᖃᓄᖅᑑᕈᑎᖃᕐᓗᑎᑦ ᐊᒃᓱᒻᒪᕆᐊᓗᒃ, ᐊᓯᔾᔨᖅᑕᓗᐊᙱᑦᑐᒥᒃ ᖃᐅᔨᓴᕋᒃᓴᓂᓪᓗ ᐱᕙᓪᓕᐊᒍᑎᒋᔭᐅᓂᐊᕐᒪᑦ ᑕᒪᒃᑯᐊ ᒐᕙᒪᒃᑯᑦ ᓇᓕᐊᖑᒐᓗᐊᕈᑎᑦ ᓄᓇᕗᒻᒥ ᐃᓄᖕᓂᒃ ᐃᖅᑲᓇᐃᔭᖅᑎᖃᓕᕐᓗᑎᑦ ᐊᒥᓲᓂᖃᐅᖅᑐᓂᑦ ᑭᒡᒐᖅᑐᖅᑕᐅᔪᑦ ᐃᓄᑐᐃᓐᓇᐃᑦ ᐊᒥᓲᓂᖏᑦ ᓈᒻᒪᑦᑑᓗᒋᑦ; ᐊᒻᒪᓗ ᒐᕙᒪᐅᔪᑦ ᖃᐅᔨᓴᕐᓗᑎᑦ ᐋᖅᑭᒃᓯᒪᐅᕐᓂᖏᖕᓂᒃ, ᐊᐅᓚᑦᑎᒍᓯᖏᖕᓂᑦ ᐊᒻᒪᓗ ᐊᐅᓚᔾᔪᓯᖏᖕᓂᒃ ᑐᕌᖓᔪᑦ ᐃᖅᑲᓇᐃᔭᖅᑎᑖᕐᓂᕐᒧᑦ, ᐃᖅᑲᓇᐃᔭᖅᑎᖃᐃᓐᓇᕐᓂᕐᒧᑦ, ᖁᕝᕙᓯᓐᓂᖅᓴᒨᖅᑎᑕᐅᖃᑦᑕᕐᓂᖏᑦ ᐱᓕᒻᒪᒃᓴᖅᑕᐅᖃᑦᑕᕐᓂᖏᓪᓗ ᐃᓄᐃᑦ ᖃᐅᔨᓵᕆᔭᐅᓗᑎᑦ, ᐊᒻᒪᓗ ᐊᕝᕕᐊᕈᑎᓕᒫᑦᑎᐊᕐᓂᒃ ᐲᔭᐃᓗᑎᑦ ᐊᔾᔨᖃᐅᙱᑦᑐᑦ ᐱᓇᓱᐊᒐᕆᓯᒪᔭᖓᓂᒃ ᐅᕝᕙᓘᓐᓃᑦ ᑎᑎᖅᑲᖓᓂᒃ ᖃᓄᐃᓕᐅᕈᑕᐅᒐᓱᐊᕐᓂᖓᑕ ᐊᕕᑦᑐᖅᓯᒪᔪᖅ 23-ᒦᑦᑐᑦ.
ᐊᒻᒪᓗᒃᑲᓐᓂᖅ, ᐃᓚᒋᔭᐅᖃᑕᐅᔪᑦ ᑲᓇᑕᒥ ᒐᕙᒪᒃᑯᓐᓂᑦ ᐊᒥᓱᕈᕆᐊᖅᑎᑦᑎᖁᔨᓕᓚᐅᖅᑐᑦ ᑮᓇᐅᔭᖃᖅᑎᑦᑎᓂᖏᖕᓂᑦ ᐃᓄᐃᑦ ᓯᓚᑦᑐᖅᓴᕐᕕᒻᒧ ᐃᓕᓐᓂᐊᕆᐊᓲᑦ ᐱᓕᕆᐊᖓᓂᒃ. ᓄᓇᕗᑦ ᑐᙵᕕᒃ ᑎᒥᖓ ᓴᓂᕐᕙᐃᕕᐅᓚᐅᖅᓯᒪᕗᖅ ᐃᒪᓐᓇᐸᓗᓐᓂᒃ $65 ᒥᓕᐊᓐ ᑮᓇᐅᔭᓂᑦ ᐅᕝᕙᓘᓐᓃᑦ 48%−ᓂᒃ ᑮᓇᐅᔭᖃᕐᕕᒻᒦᙶᖅᑐᒥᒃ ᐃᓄᐃᑦ ᓯᓚᑦᑐᖅᓴᕐᕕᒻᒧ ᐃᓕᓐᓂᐊᕆᐊᓲᑦ ᐱᓕᕆᐊᖓᓄᑦ ᓄᓇᖃᖅᑳᖅᓯᒪᔪᓂᒃ ᐱᔨᑦᑎᖅᑎᐅᔪᑦ ᑲᓇᑕᒥ ᑖᒃᑯᑎᒎᓇᖅ ᐃᓄᐃᑦ ᑕᐱᕇᑦ ᑲᓇᑕᒥᑎᒍᑦ ᐊᒻᒪᓗ ᐃᖅᑲᓇᐃᔭᖃᑎᖃᖅᑐᑦ ᐱᖓᓱᓂᑦ ᐊᕕᑦᑐᖅᓯᒪᔪᓂᑦ ᐃᓄᐃᑦ ᑲᑐᔾᔨᖃᑎᒌᖏᖕᓂ ᓄᓇᕗᒻᒥ ᐊᕕᑦᑐᖅᓯᒪᔪᓂ ᐊᐅᓚᑦᑎᔨᐅᓪᓗᑎᑦ ᑎᒥᒋᔭᐅᔪᑦ ᐱᓕᕆᐊᕐᒧᑦ. ᐱᓕᕆᐊᖅ ᐊᑐᖅᑕᐅᓯᒪᔪᒻᒪᕆᐅᓯᒪᓕᕐᒪᑦ ᐱᒋᐊᓚᐅᖅᓯᒪᒻᒪᓂᑦ, ᐊᑐᖅᑕᐅᒍᒪᔪᑦ ᐊᒥᓲᓂᖅᓴᐅᓕᖅᑐᑎᑦ ᓇᓚᒃᑖᖅᑕᐅᓚᐅᖅᓯᒪᔪᓂᑦ 2018−ᖑᑎᓪᓗᒍ ᑮᓇᐅᔭᖅᑖᕈᒪᔾᔪᑎᒋᔭᐅᔪᒥᒃ, $20.4 ᒥᓕᐊᓐᓂᒃ ᑮᓇᐅᔭᓂᒃ ᐊᒥᒐᖅᓯᓕᖅᑐᑎᑦ ᑎᓴᒪᓄᑦ ᐊᕐᕌᒍᓄᑦ 2023-2027−ᒧᑦ. ᓄᓇᕗᑦ ᑐᙵᕕᒃ ᑎᒥᖓ ᐃᖅᑲᓇᐃᔭᖃᑎᖃᖅᓯᒪᔪᖅ ᐊᓯᖏᖕᓂᑦ ᐃᓄᐃᑦ ᐊᕕᑦᑐᖅᓯᒪᔪᓂᑦ ᐊᒻᒪᓗ ᐃᓄᐃᑦ ᑕᐱᕇᑦ ᑲᓇᑕᒥ ᐊᔭᐅᕆᒋᐊᒃᑲᓐᓂᕐᓗᑎᑦ ᑮᓇᐅᔭᒃᑲᓐᓂᐅᒐᔭᖅᑐᓂᑦ ᑲᒪᒋᔭᐅᖁᓪᓗᒍ ᐊᒥᒐᖅᓯᓕᕐᓂᖓ.
ᓄᓇᕗᑦ ᑐᙵᕕᒃ ᑎᒥᖓᑕ ᑕᒻᒪᖅᓯᒪᔪᕐᓂᐊᖅᑕᐅᓯᒪᔪᑦ ᑮᓇᐅᔭᑦ ᐅᓂᒃᑳᖏᑦ ᐊᖏᖅᑕᐅᕗᑦ
ᓄᓇᕗᑦ ᑐᙵᕕᒃ ᑎᒥᖓᑕ ᒪᑭᒪᒍᓐᓇᕐᓂᖓ ᐊᐅᓚᑦᑎᓗᑎᑦ ᐱᓕᕆᐊᕐᓂᒃ ᐃᑲᔪᕐᓂᖃᓪᓚᑦᑖᖅᑐᓂᒃ ᐃᓄᖕᓂᒃ ᐱᐅᓯᕚᓪᓕᖅᓯᒪᔪᒻᒪᕆᐅᕗᖅ, ᑕᑯᒃᓴᐅᓪᓗᓂ ᑕᒪᓐᓇ ᒪᕐᕈᐊᖅᑎᒃᑲᓐᓂᒻᒪᕆᕈᖅᓯᒪᔪᑦ ᐊᒥᓲᓂᖏᑦ ᐊᑭᖏᑦᑕ ᓄᓇᕗᑦ ᑐᙵᕕᒃ ᑎᒥᖓᑕ ᐱᖁᑎᖏᑦ ᐊᒻᒪᓗ ᑮᓇᐅᔭᖃᕐᕕᖏᑦ ᐃᒪᓐᓇᐅᓕᖅᑐᑎᑦ $686.6 ᒥᓕᐊᓐ ᑮᓇᐅᔭᑦ ᐊᕐᕌᒎᓚᐅᖅᑐᒥ. ᐊᒥᓱᕈᕆᐊᖅᓯᒪᓂᖃᖅᑐᑦ ᐃᒪᓐᓇᓂᒃ $341 ᒥᓕᐊᓐ ᑮᓇᐅᔭᑦ ᐱᔾᔪᑎᖃᓗᐊᙳᐊᓚᐅᖅᑐᑦ ᓄᑖᕐᒥᒃ ᒐᕙᒪᑐᖃᒃᑯᓐᓂ ᑮᓇᐅᔭᖃᖅᑎᑦᑎᓂᖏᑦ ᐃᒡᓗᓕᕆᓂᕐᒧᑦ ᐊᒻᒪᓗ ᐱᖁᑎᕐᔪᐊᓕᕆᓂᕐᒧᑦ ᐊᒻᒪᓗ 20%−ᖑᔪᑦ ᐊᒥᓱᕈᕆᐊᖅᓯᒪᓕᖅᑐᑎᑦ ᓄᓇᕗᑦ ᑐᙵᕕᒃ ᑎᒥᖓᑕ ᑮᓇᐅᔭᖅᑖᕆᕙᑦᑕᖏᑦ ᐊᐅᓚᔾᔪᑎᖏᖕᓄᑦ. ᖄᖓᒍᒃᑲᓐᓂᖅ ᐃᒡᓗᓕᕆᓂᕐᒧᑦ ᐊᒻᒪᓗ ᐱᖁᑎᕐᔪᐊᓅᖅᑐᑦ ᐊᕐᕌᒎᓕᖅᑐᓂᑦ, ᓄᓇᕗᑦ ᑐᙵᕕᒃ ᑎᒥᖓ ᑕᑯᓯᒪᓕᕐᒥᔪᑦ ᐊᒥᓱᕈᕆᐊᖅᓯᒪᔪᓂᑦ ᖁᔭᒋᔭᐅᓪᓗᑎᓪᓗ ᐊᓯᖏᖕᓂᒃ ᒐᕙᒪᑐᖃᒃᑯᑦ ᐱᓕᕆᐊᓄᑦ ᑮᓇᐅᔭᖃᖅᑎᑦᑎᓂᕆᓯᒪᓕᖅᑕᖏᖕᓂᑦ.
ᐊᒥᓱᒻᒪᕇᑦ ᑮᓇᐅᔭᑦ ᐱᔭᒥᓂᐅᒐᓗᐊᖅᑎᓪᓗᒋᑦ ᐊᕐᕌᒍ ᐃᓱᓕᓕᖅᑎᓪᓗᒍ, ᓄᓇᕗᑦ ᑐᙵᕕᒃ ᑎᒥᖓ ᑮᓇᐅᔭᖃᖅᑎᑕᐅᔾᔪᑎᖏᖕᓂᑦ ᑕᐃᑯᙵᕈᓐᓇᖅᓯᓯᒪᓕᖅᑐᖅ ᐃᓄᖕᓅᖓᔪᓂᑦ ᐱᓕᕆᐊᕐᓂᑦ ᐊᒻᒪᓗ ᐱᔨᑦᑎᕋᕈᑎᓂᑦ, ᑕᐃᒪᐃᑦᑐᒥᓂᐅᑎᓪᓗᒋᑦ 53%−ᖑᔪᓂᑦ ᐊᒥᓱᕈᕆᐊᖅᓯᒪᔪᓂᑦ ᑮᓇᐅᔭᑦ ᐊᑐᖅᑕᐅᒍᓐᓇᖅᓯᒪᓕᖅᑐᑎᑦ ᐊᕐᕌᒎᓚᐅᖅᓯᒪᒻᒪᓂᑦ. 2019-ᒥᓂᑦ, ᐱᓕᕆᐊᕐᓄᑦ ᐊᑐᖃᑦᑕᕐᓂᖏᑦ ᑮᓇᐅᔭᓂᑦ ᑎᓴᒪᐃᕋᖅᑎᓗᐊᕌᓗᒻᒪᕆᒃ ᐊᒥᓱᕈᖅᓯᒪᓕᖅᑐᑦ ᐃᒪᓐᓇᐅᕙᓚᐅᖅᓯᒪᓪᓗᑎᑦ $31.8 ᒥᓕᐊᓐ ᑮᓇᐅᔭᑦ ᐃᒪᓐᓇᐅᓕᖅᑐᑎᑦ $157.7 ᒥᓕᐊᓐ ᑮᓇᐅᔭᑦ 2022-23−ᖑᑎᓪᓗᒍ ᑮᓇᐅᔭᓂᑦ ᐊᑐᖅᑐᑎᑦ ᐅᑯᓄᖓ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ, ᐃᓅᓯᓕᕆᓂᕐᒧᑦ, ᐃᓕᓐᓂᐊᕐᓂᕐᒧᑦ, ᐃᒡᓗᒃᓴᓕᐅᕐᓂᕐᒧᑦ ᐱᖁᑎᕐᔪᐊᓂᓪᓗ ᐱᓕᕆᐊᖏᖕᓄᑦ.
ᐃᓚᒋᔭᐅᔪᑦ ᐊᕐᕌᒍᑕᒫᑦ ᑲᑎᒪᕕᔾᔪᐊᕐᓂᕐᒧᑦ ᑲᔪᓯᑎᑦᑎᓚᐅᕆᕗᑦ ᐱᖁᔨᕗᖔᕈᑎᓂᑦ ᒐᕙᒪᒃᑯᓐᓂᑦ ᖃᓄᐃᓕᐅᖁᔨᓪᓗᑎᑦ ᐊᒥᓱᓂᑦ ᓯᕗᓪᓕᐅᔾᔭᐅᖁᔭᐅᔪᓂᑦ ᐅᑯᐊᖑᓪᓗᑎᑦ:
ᐋᙵᔮᕐᓇᖅᑐᓂᑦ ᐊᔪᕈᑎᓖᑦ ᐊᒻᒪᓗ ᐋᓐᓂᓗᐊᖅᓯᒪᔪᓄᑦ ᒪᒥᓴᖅᑕᐅᓂᖏᖕᓄᑦ ᐃᑲᔪᖅᑑᑏᑦ: ᐃᓚᒋᔭᐅᔪᑦ ᓄᓇᕗᑦ ᒐᕙᒪᖏᖕᓂᑦ ᓯᕗᓪᓕᐅᔾᔨᖁᔨᓯᒪᓂᕋᐃᖁᔨᓚᐅᖅᐳᑦ ᐋᙵᔮᕐᓇᖅᑐᓂᑦ ᐊᔪᕈᑎᓕᓐᓄᑦ ᐊᒻᒪᓗ ᐋᓐᓂᓗᐊᖅᓯᒪᔪᑦ ᒪᒥᓴᖅᑕᐅᓂᖏᖕᓄᑦ ᐊᒻᒪᓗ ᐃᑲᔪᖅᑐᐃᔾᔪᑎᖏᖕᓄᑦ ᐱᓕᕆᐊᓂᑦ ᓄᓇᕗᒻᒥ, ᐱᖃᓯᐅᑎᓪᓗᒋᑦ ᐸᕐᓇᐅᓯᐅᖅᑕᐅᒃᑲᓐᓂᕐᓗᑎᑦ ᐊᒻᒪᓗ ᓴᓇᔭᐅᒃᑲᓐᓂᕐᓗᑎᓗ ᐊᒥᓲᓂᖅᓴᑦ ᐋᙵᔮᕐᓇᖅᑐᓄᑦ ᐊᔪᕈᑎᓕᖕᓄᑦ ᐊᒻᒪᓗ ᐋᓐᓂᓗᐊᖅᓯᒪᔪᓄᑦ ᒪᒥᓴᕐᕕᐅᔪᓂᑦ ᑕᒪᒃᑮᓐᓂᒃ ᐊᕕᑦᑐᖅᓯᒪᔪᓃᖁᓪᓗᒋᑦ ᐊᒻᒪᓗ ᓄᓇᓕᓐᓂ ᓄᓇᕗᒻᒥ ᐊᒻᒪᓗᑦᑕᐅᖅ ᐱᓕᒻᒪᒃᓴᖅᑎᑕᐅᓗᑎᑦ ᐃᓄᒃᑐᑦ ᐅᖃᓪᓚᒍᓐᓇᖅᑐᑦ ᐃᓅᓯᓕᕆᔩᑦ ᐊᒻᒪᓗ ᓄᓇᓕᓐᓂ ᐃᓄᓕᕆᔨᐅᔪᑦ; ᐊᑐᖅᑕᐅᑲᐃᓐᓇᕐᓗᓂᓗ, ᐊᑯᓂᐅᔪᒧᑦ ᐃᓅᓯᓕᕆᔨᐅᔪᑦ ᐊᒻᒪᓗ ᐃᓄᓕᕆᔨᐅᔪᑦ ᐊᑐᐃᓐᓇᐅᒪᖃᑦᑕᕐᓗᑎᑦ ᓄᓇᓕᓐᓂ ᐱᖃᓯᐅᑎᓗᒋᑦ ᐃᓕᓐᓂᐊᕐᕕᓃᑎᑕᐅᖃᑦᑕᕐᓗᑎᑦ; ᐊᒻᒪᓗ ᐅᖓᕙᕆᐊᖅᑕᐅᓗᓂ ᒪᑐᐃᖅᑕᐅᒃᑲᓐᓂᕐᓂᖏᑦ ᕕᐊᑖᕐᕖᑦ ᐊᒻᒪᓗ ᕙᐃᓂᑖᕐᕖᑦ ᓄᓇᕗᒻᒥ ᓈᒻᒪᑦᑐᒥᒃ ᐸᓂᖅᓰᕕᒃᓴᓂᑦ ᒪᒥᓴᕐᕕᒃᓴᓂᓪᓗ ᐊᑐᖅᑕᐅᒍᒪᒐᔭᖅᑐᓂᑦ ᐱᑕᖃᓕᖅᐸᑦ ᑭᓯᐊᓂ ᓄᓇᕗᑦ ᐃᓄᖏᖕᓄᑦ.
ᐃᓐᓇᒃᑯᕖᑦ: ᐃᓚᒋᔭᐅᔪᑦ ᑲᔪᓯᑎᑦᑎᓯᒪᓕᕋᓗᐊᕐᒪᑕ ᐊᒥᓱᓂᑦ ᐱᖁᔨᕗᖔᕈᑎᓂᑦ ᐊᕐᕌᒍᑕᒫᑦ ᑲᑎᒪᕕᔾᔪᐊᕐᓂᖃᕋᑖᖅᑐᒥᓂᐅᑎᓪᓗᒋᑦ ᓄᓇᕗᑦ ᒐᕙᒪᖏᖕᓂᑦ ᐊᒥᓱᕈᕆᐊᖅᓯᖁᔨᓪᓗᑎᑦ ᐃᓐᓇᒃᑯᕖᑦ ᐊᒥᓲᓂᖏᖕᓂᑦ ᐊᒻᒪᓗ ᐊᑯᓂᐅᔪᒧᑦ ᐸᖅᑭᕕᓐᓂ ᓄᓇᕗᑦ ᓄᓇᓕᖏᖕᓂ. ᐃᓚᒋᔭᐅᔪᑦ ᐅᐱᒍᓱᒃᑲᓗᐊᖅᑐᑎᑦ ᐃᓕᓴᖅᓯᓪᓗᑎᑦ ᓄᓇᕗᑦ ᒐᕙᒪᖏᑦᑕ ᐱᓇᓱᐊᒐᖏᖕᓂᑦ ᐅᓪᓗᒥᒧᑦ ᐃᓐᓇᒃᑯᕕᓕᐅᕐᓗᑎᑦ ᐃᖃᓗᓐᓂ, ᑲᖏᖅᖠᓂᖅ ᐊᒻᒪᓗ ᐃᖃᓗᒃᑑᑦᓯᐊᕐᒥ, ᐃᓚᒋᔭᐅᖃᑕᐅᔪᑦ ᓄᓇᕗᑦ ᒐᕙᒪᖏᖕᓂ ᐃᖅᑲᓇᐃᔭᖃᑎᖃᖁᔨᕗᑦ ᐃᓄᐃᑦ ᑲᑐᔾᔨᖃᑎᒌᖏᖕᓂᒃ ᐋᖅᑮᓗᑎᑦ ᐊᒻᒪᓗ ᐋᖅᑭᐅᒪᑎᑦᑎᓗᑎᑦ ᐊᒥᓲᓂᖏᖕᓂᑦ ᐃᓐᓇᒃᑯᕕᐅᔪᓂᑦ ᓄᓇᕗᒻᒥ, ᐱᖃᓯᐅᑎᓗᒋᑦ ᒥᑭᓐᓂᖅᓴᓂ ᓄᓇᓕᓐᓂ ᓴᓇᔪᖃᕐᒥᓗᓂ; ᐊᔭᐅᕆᓗᑎᑦ ᓈᒻᒪᑦᑐᓂᑦ, ᐊᑯᓂᐅᔪᒧᑦ ᐊᑐᖅᑕᐅᒍᓐᓇᕋᔭᖅᑐᑦ ᑮᓇᐅᔭᖃᕐᕕᖃᖅᑎᑦᑎᓕᕐᓗᑎᑦ; ᖃᐅᔨᒪᓇᑦᑎᐊᖁᓪᓗᒋᑦ ᐃᓐᓇᒻᒪᕆᐅᔪᑦ ᓈᒻᒪᑦᑐᒥᒃ ᐊᒻᒪᓗ ᐃᑉᐱᒍᓱᑦᑕᐅᑦᑎᐊᕐᓗᑎᑦ ᐸᖅᑭᔭᐅᓂᐊᕐᒪᑕ ᓄᓇᖏᖕᓂ; ᐊᒻᒪᓗ ᖃᐅᔨᒪᓇᑦᑎᐊᖁᓪᓗᒍ ᐃᓄᐃᑦ ᖃᐅᔨᒪᔭᑐᖃᖏᑦ ᐊᑐᓕᖅᑎᑕᐅᓂᐊᕋᓗᐊᕐᒪᖔᑕ ᐊᐅᓚᓂᖃᖅᑎᑦᑎᓂᓕᒫᖏᖕᓂ ᐃᓐᓇᒃᑯᕕᓐᓂ ᐊᒻᒪᓗ ᐃᓐᓇᒻᒪᕇᑦ ᐸᖅᑭᔭᐅᖃᑦᑕᕐᓗᑎᑦ ᐃᓄᒃᑑᕐᕕᐅᖃᑦᑕᕐᓗᑎᑦ.
ᐊᑭᑐᓗᐊᖅᑐᐊᓘᓕᕐᓂᖓ ᐃᓅᓇᓱᐊᕐᓗᓂ: ᖃᐅᑕᒫᑦ ᐃᓅᓇᓱᐊᕐᓗᓂ ᐊᑭᒋᓕᖅᑕᖓ, ᐱᖃᓯᐅᑎᓪᓗᒋᑦ ᐊᑐᖅᑕᐅᖃᑦᑕᕆᐊᖃᓲᑦ ᓲᕐᓗᒃ ᐃᒡᓗᖃᕐᓂᖅ ᐊᒻᒪᓗ ᓂᕿᖃᖃᑦᑕᕐᓂᖅ, ᐊᑭᑐᓗᐊᖅᑐᐊᓘᓕᕐᒪᑦ ᓄᓇᕗᒻᒥ. ᐃᓚᒋᔭᐅᖃᑕᐅᔪᑦ ᑲᓇᑕᒥ ᒐᕙᒪᒃᑯᓐᓂ ᐊᒻᒪᓗ ᓄᓇᕗᑦ ᒐᕙᒪᖏᖕᓂ ᖃᓄᐃᓕᐅᖁᔨᑲᐅᑎᒋᓚᐅᖅᐳᑦ ᐊᑭᑐᓗᐊᖅᑐᐊᓘᒍᓐᓃᖁᓪᓗᒍ ᐃᓅᓂᖅ ᓄᓇᕗᒻᒥ, ᐱᖃᓯᐅᑎᓪᓗᒋᑦ, ᑖᒃᑯᑑᙱᑦᑑᒐᓗᐊᑦ, ᐊᒥᓱᕈᕆᐊᖅᑎᑕᐅᓗᑎᑦ ᑮᓇᐅᔭᑦ ᐃᑲᔫᓯᐊᖅᑖᕆᔭᐅᕙᑦᑐᑦ ᐊᑭᓕᐅᑕᐅᓪᓗᑎᑦ ᐊᒻᒪᓗ ᐃᑲᔪᖅᑐᖅᑕᐅᓂᖅᓴᐅᓗᑎᑦ ᐊᓯᕙᖅᑏᑦ.
ᓂᖀᑦ ᐊᑭᑐᓗᐊᓕᕐᓂᖏᑦ ᐊᑭᑦᑐᕈᑕᐅᓗᐊᙳᐊᖅᓯᒪᒋᕗᑦ ᐅᖓᑖᓃᑦᑐᑦ ᐊᕝᕙᖏᑦ $131 ᒥᓕᐊᓐ ᑮᓇᐅᔭᑦ ᐊᕐᕌᒍᑕᒫᑦ ᓂᕿᑦᑎᐊᕙᖃᖁᓪᓗᒍ ᐅᑭᐅᖅᑕᖅᑐᖅ ᐃᑲᔫᓯᐊᖏᑦ ᐊᑭᓕᐅᑕᐅᓲᖑᖕᒪᑕ ᓂᐅᕕᕐᕕᓄᑦ ᐱᔨᑦᑎᕋᖅᑐᑦ ᐅᖓᑖᓂ 120 ᐅᑭᐅᖅᑕᖅᑐᒥ ᓄᓇᓕᖏᖕᓄᑦ ᑕᐅᓇᙵᑦ ᓛᕙᑐᐊᕆᒥ ᑎᑭᑦᑐᒍ ᔫᑳᓐ−ᒧᑦ ᐱᔭᐅᑐᐃᓐᓇᖅᐸᒻᒪᑕ ᓂᐅᕕᕐᕕᓄᑦ ᓂᐅᕕᖅᐸᑦᑐᓅᖅᑎᑕᐅᙱᖔᖅᑐᑎᑦ ᑕᐃᒪᐃᒋᐊᖃᖅᑎᑦᑎᓪᓗᓂ ᐱᓕᕆᐊᖅ ᒪᓕᑦᑐᒍ. ᐃᓚᒋᔭᐅᖃᑕᐅᔪᑦ ᑲᓇᑕᒥ ᒐᕙᒪᒃᑯᓐᓂᑦ ᑕᒻᒪᖅᓯᒪᔪᕐᓂᐊᖁᔨᓚᐅᖅᐳᑦ ᓂᕿᑦᑎᐊᕙᖃᖁᓪᓗᒍ ᐅᑭᐅᖅᑕᖅᑐᖅ ᐃᑲᔫᑏᑦ ᐱᓕᕆᐊᖓᓂᒃ ᐊᒻᒪᓗ ᐅᐊᑦᑎᔭᐅᑦᑎᐊᕐᓂᖅᓴᐅᓕᕐᓗᓂ ᐊᒻᒪᓗ ᐊᑐᓕᖅᑎᑦᑎᓂᕐᒧᑦ ᐊᐅᓚᑦᑎᒍᓯᖅᑖᕐᓗᓂ ᖃᐅᔨᒪᔭᐅᑦᑎᐊᕐᓂᐊᕐᒪᑕ ᐊᕐᕌᒍᑕᒫᑦ ᓂᕿᑦᑎᐊᕙᖃᖁᓪᓗᒍ ᐅᑭᐅᖅᑕᖅᑐᖅ ᐃᑲᔫᑏᑦ ᐃᓄᖕᓅᖅᑎᑕᐅᖔᕋᓗᐊᕐᒪᖔᑕ.
ᓄᓇᖃᖅᑳᖅᓯᒪᔪᑦ ᓄᓇᓕᖏᑦ ᐃᑲᔪᖅᑐᖅᑕᐅᓂᖏᑦᑕ ᑮᓇᐅᔭᖃᕐᕕᖓ ᑮᓇᐅᔭᖃᖅᑎᑕᐅᔪᖅ ᑲᓇᑕᒥ ᒐᕙᒪᒃᑯᓐᓄᑦ ᓄᕙᒡᔪᐊᕐᓇᖅ-19 ᐊᐅᑦᑑᑖᓘᖃᑦᑕᑎᓪᓗᒍ ᐊᒻᒪᓗ ᐊᐅᓚᑕᐅᓯᒪᓪᓗᑎᑦ ᐃᓄᐃᑦ ᑲᑐᔾᔨᖃᑎᒌᖏᖕᓄᑦ ᐊᒃᓱᒻᒪᕆᐊᓗᒃ ᐃᑲᔫᑎᖃᖅᓯᒪᓂᖃᖅᑐᖅ ᐃᓄᖕᓄᑦ. ᐃᓚᒋᔭᐅᔪᑦ ᑲᓇᑕᒥ ᒐᕙᒪᒃᑯᓐᓂ ᑐᓂᓰᓐᓇᖃᑦᑕᖁᔨᕗᑦ ᓄᓇᖃᖅᑳᖅᓯᒪᔪᑦ ᓄᓇᓕᖏᖕᓄᑦ ᐃᑲᔫᑎᓂᑦ ᑮᓇᐅᔭᓂᑦ ᐅᕝᕙᓘᓐᓃᑦ ᐊᓯᐊᒍᖔᖅ ᓇᓕᒧᓐᓂᖃᖅᑐᒥᓘᓐᓃᑦ ᑮᓇᐅᔭᖅᑎᒍᑦ ᐱᓕᕆᐊᖃᖁᔨᓪᓗᑎᑦ, ᐊᑐᖅᑕᐅᖏᓐᓇᓕᕋᔭᖅᑐᒥᒃ ᐅᕝᕙᓘᓐᓃᑦ ᐆᑦᑐᕋᐅᑕᐅᓗᓂ ᐱᓕᕆᐊᕆᔭᐅᓗᓂ ᐊᔪᖅᓴᕈᓐᓃᖁᓪᓗᒋᑦ ᓄᓇᕗᒻᒥᐅᑦ.
ᐆᒪᔪᓕᕆᓂᕐᒥᒃ ᐊᐅᓚᑦᑎᓂᖅ ᐊᒻᒪᓗ ᐃᓄᐃᑦ ᖃᐅᔨᒪᔭᑐᖃᖏᑦ: ᐃᓄᐃᑦ ᖃᐅᔨᒪᔭᑐᖃᖏᑦ ᐊᑐᖅᑕᐅᑦᑎᐊᖅᓯᒪᙱᓗᐊᕐᒪᑦ ᐆᒪᔪᓕᕆᓂᕐᒧᑦ ᐊᐅᓚᑦᑎᓂᐅᕙᑦᑐᓂᑦ ᓄᓇᕗᒻᒥ, ᑕᐃᒪᐃᑦᑕᕆᐊᖃᕋᓗᐊᖅᑐᑎᑦ ᒪᓕᑦᑐᒍ ᓄᓇᕗᑦ ᐊᖏᕈᑎᖓ, ᐃᓛᓐᓂᒃᑯᑦ ᐃᓱᒪᓕᐅᕈᑎᖃᑲᒻᒪᓕᕈᑕᐅᓲᖅ ᐊᑦᑐᐃᓂᖃᐅᖅᑐᓂᑦ ᐃᓄᖕᓂᒃ. ᐃᓚᒋᔭᐅᖃᑕᐅᔪᑦ ᑲᓇᑕᒥ ᒐᕙᒪᒃᑯᓐᓂ, ᓄᓇᕗᑦ ᒐᕙᒪᖓᓂ, ᑲᑎᒪᕕᐅᕗᑦ ᐃᓄᖕᓂᒃ ᑭᒃᑯᑐᐃᓐᓇᕐᓂᒃ ᐱᔨᑦᑎᕋᓲᓄᑦ ᒐᕙᒪᓂ, ᐊᒻᒪᓗ ᐊᓯᖏᖕᓂᑦ ᑎᒥᐅᔪᓂᑦ ᐃᓕᓴᖅᓯᖁᔨᔪᑦ ᑐᑦᑕᕐᕕᓪᓗᐊᑕᕆᔭᐅᓂᖓᓂᒃ ᐃᓄᐃᑦ ᖃᐅᔨᒪᔭᑐᖃᖏᑦ ᐆᒪᔪᓕᕆᓂᕐᒧᑦ ᐊᐅᓚᑦᑎᔪᖃᖅᑎᓪᓗᒍ ᓄᓇᕗᒻᒥ, ᐊᒻᒪᓗ ᐃᖅᑲᓇᐃᔭᖃᑎᖃᑦᑎᐊᕐᓂᖅᓴᐅᓕᕐᓗᑎᑦ ᐃᓄᖕᓂᒃ ᖃᐅᔨᒪᓇᑦᑎᐊᖁᓪᓗᒍ ᑕᒪᐃᓐᓂ ᐱᖃᓯᐅᔾᔭᐅᖃᑦᑕᕋᓗᐊᕐᒪᖔᖅ ᐊᒻᒪᓗ ᐊᔾᔨᖃᓲᖑᒐᓗᐊᕐᒪᖔᑕᓗ ᐃᓄᐃᑦ ᖃᐅᔨᒪᔭᑐᖃᖏᖕᓂᑦ ᑕᒪᐃᓐᓂ ᐃᓱᒪᓕᐅᖅᑎᓪᓗᒋᑦ ᐊᐅᓚᑦᑎᓂᖃᕋᓱᐊᖅᑎᓪᓗᒋᑦ ᐊᑦᑐᐃᓂᓕᒻᒥᒃ ᐆᒪᔪᕐᓂᑦ.
ᐃᑲᔪᖅᑐᖅᑕᐅᓂᖏᑦ ᐃᓄᐃᑦ ᐊᓯᕙᖅᑏᑦ: ᐊᑭᑐᓗᐊᓕᕐᓂᖓ ᒑᓯ ᐊᒻᒪᓗ ᐊᖑᓇᓱᓐᓂᕐᒧᑦ ᐃᒋᕐᕈᑏᑦ ᐊᕝᕕᐊᕈᑕᒻᒪᕆᐊᓘᓲᖑᕗᖅ ᐊᒥᓱᓄᑦ ᐃᓄᖕᓄᑦ ᐊᖑᓇᓱᓐᓂᕐᒧᑦ ᖃᓄᐃᓕᐅᕈᑎᖃᕋᓱᐊᕐᓗᑎᑦ, ᐊᒻᒪᓗ ᐊᑭᑦᑐᑲᓪᓚᓗᐊᕋᑖᖅᓯᒪᓂᖓ ᐃᓅᓇᓱᐊᕐᓗᓂ ᑲᓇᑕᒥ ᐃᓄᖕᓂᑦ ᐊᖑᓇᓱᒃᑎᓂᑦ ᐊᓯᕙᕐᓂᕐᒧᑦ ᖃᓄᐃᓕᐅᓗᐊᖅᑎᑦᑎᒍᓐᓃᖅᓯᒪᕗᖅ, ᐱᐅᙱᓐᓂᖅᓴᒥᒃ ᓂᕿᖃᖅᑎᑦᑎᓂᖃᓕᕈᓐᓇᖅᑐᓂ, ᑎᒥᒃᑯᑦ ᐊᒻᒪᓗ ᐃᓱᒪᒃᑯᑦ ᐋᓐᓂᐊᓂᖅᓴᐅᓕᕈᓐᓇᖅᑐᓂ, ᐊᒻᒪᓗ ᐃᓅᓯᖏᑦ ᐱᐅᒍᓐᓃᕐᓂᖅᓴᐅᒍᓐᓇᖅᑐᑎᑦ ᐃᓄᐃᑦ ᓄᓇᓕᖏᖕᓂ. ᐃᓚᒋᔭᐅᖃᑕᐅᔪᑦ ᑲᓇᑕᒥ ᒐᕙᒪᒃᑯᓐᓂ ᐊᒻᒪᓗ ᓄᓇᕗᑦ ᒐᕙᒪᖓᓂᒃ ᐃᖅᑲᓇᐃᔭᖃᑎᖃᖁᔨᓕᖅᓯᒪᕗᑦ ᐃᓄᐃᑦ ᑲᑐᔾᔨᖃᑎᒌᖏᓐᓂ ᖃᐅᔨᓴᖅᑕᐅᓗᑎᑦ ᐅᓪᓗᒥᐅᔪᖅ ᐊᑐᐊᒐᕋᓛᖏᑦ, ᐊᑐᐊᒐᖏᑦ ᐊᒻᒪᓗ ᑮᓇᐅᔭᖅᑎᒍᑦ ᐊᕝᕕᐊᕈᑕᐅᕙᑦᑐᑦ ᐃᓄᖕᓄᑦ ᐊᓯᕙᖅᑎᓄᑦ, ᑭᒡᓕᖃᙱᓪᓗᒍ, ᐃᖅᑲᓇᐃᔭᙱᑐᖅᓯᐅᑎᑖᕈᓐᓇᖅᑐᑦ, ᑖᒃᓰᔭᐃᙱᒍᑕᐅᔪᓐᓇᖅᑐᑦ ᐊᒻᒪᓗ ᐊᑭᓕᖅᑕᐅᓂᖏᑦ ᒑᓯᒧᑦ ᐊᒻᒪᓗ ᐊᖑᓇᓱᓐᓂᕐᒧᑦ ᐃᒋᕐᕈᑎᓄᑦ, ᐊᒻᒪᓗ ᐃᖅᑲᓇᐃᔭᙱᑲᐃᓐᓇᕈᓐᓇᕐᓂᖏᖕᓄᑦ.
ᑭᖑᓪᓕᕐᒥᒃ ᐊᕐᕌᒍᑕᒫᑦ ᑲᑎᒪᕕᔾᔪᐊᕐᓂᖃᓛᓕᕐᒥᔪᑦ ᐊᒃᑑᕝᕙ 22-24, 2024 ᐃᖃᓗᓐᓂ, ᓄᓇᕗᑦ.
-30-
ᖃᐅᔨᒃᑲᕋᔅᓴᖅ:
ᑭᐊᕙᓐ ᖃᑉᓗᑦᓯᐊᖅ
ᑐᑭᒧᐊᑦᑎᑦᑎᔨ ᑐᓴᐅᒪᔪᓕᕆᔨᒃᑯᓐᓄᑦ
ᓄᓇᕗᑦ ᑐᙵᕕᒃ ᑎᒥᖓ
ᐅᖄᓚᐅᑎᖓ: (867) 975-4941
ᐊᑭᖃᙱᑦᑐᖅ: 1-888-646-0006
https://www.tunngavik.com/iu/resolutions/
