ᓄᓇᕗᑦ ᑐᓐᖓᕕᒃᑯᑦ ᐊᖓᔪᖅᑲᖓᑕ ᑐᒡᓕᐊ ᔭᐃᒥᓯ ᐃᑦᑐᓗᒃ ᐅᓪᓗᒥ ᑐᓴᖅᑎᑦᓯᔪᖅ ᓄᓇᕗᒻᒥ ᐊᖑᓇᓱᒃᑎᓄᑦ ᐃᑲᔫᑏᑦ ᐊᑐᐃᓐᓇᐅᑎᑕᐅᔾᔮᖏᑦᑐᑦ 2014 ᕿᒥᕐᕈᓇᑦᑕᐅᕙᓪᓕᐊᓂᖏᓐᓄᑦ ᓯᕗᓂᕐᒥ ᖃᓄᐃᓕᖓᓂᐊᕐᓂᖓ.
ᐃᓱᒪᓕᐅᕈᑕᐅᔪᒧᑦ ᐋᖅᑭᑦᓯᒍᑕᐅᔪᖅ ᑎᓕᓯᔾᔪᑎᒋᓚᐅᖅᑕᖏᓐᓂᒃ ᓄᓇᕗᒻᒥ ᐊᖑᓇᓱᒃᑎᓄᑦ ᐃᑲᔫᑎᒃᓴᓂᒃ ᑮᓇᐅᔭᖁᑎᓕᕆᔪᓂᒃ, ᐊᑐᓕᖁᔨᔾᔪᑎᓕᐅᓚᐅᖅᑐᑦ ᑐᓂᐅᖅᑲᐃᖁᔨᒐᑎᒃ ᐊᒻᒪᓗ ᐃᑲᔫᑎᒃᓴᓂᒃ ᑲᒪᖁᔨᓇᑎᒃ 2014-ᒥ. ᐊᑐᓕᖁᔨᔾᔪᑎᓃᖃᑕᐅᓪᓗᓂ ᑐᓐᖓᕕᒃᑯᑦ ᐊᒻᒪᓗ ᐊᕕᑦᑐᕐᓯᒪᓂᕐᓂ ᐃᖅᑲᓇᐃᔭᖅᑏᑦ ᑕᓪᓕᒪᓄᑦ ᐅᑭᐅᓄᑦ ᐸᕐᓇᐅᑎᓕᐅᖁᔭᐅᓪᓗᑎᒃ ᐊᒻᒪᓗ ᑐᑭᒧᐊᒍᑎᒃᓴᓂᒃ ᐊᐅᓚᑕᐅᓂᖓᓂᒃ ᓄᓇᕗᒻᒥ ᐊᖑᓇᓱᒃᑎᓄᑦ ᐃᑲᔫᑏᑦ. ᑖᓐᓇ ᐸᕐᓇᐅᑦ ᐊᒻᒪᓗ ᑐᑭᒧᐊᒍᑎᒃᓴᖅ ᑐᓂᔭᐅᓂᐊᖅᑐᖅ ᑐᓐᖓᕕᒃᑯᑦ ᑲᑎᒪᔨᖏᓐᓄᑦ ᕿᒥᕐᕈᓇᒐᑦᓴᐅᓗᓂ ᐆᑦᑑᕝᕙ 2014.
“ᐱᖕᒪᕆᐅᔪᖅ ᑐᓐᖓᕕᒃᑯᓐᓄᑦ ᐊᔪᕐᓇᖏᓐᓂᓕᒫᖓᒍᑦ ᑲᔪᓯᑎᑦᓯᓂᖅ ᓄᓇᕗᒻᒥ ᐊᖑᓇᓱᒃᑎᓄᑦ ᐃᑲᔫᑎᓂᒃ. ᐃᓱᒪᓕᐅᕈᑕᐅᓂᖓ ᑮᓇᐅᔭᓕᑕᐅᓯᒪᒍᑎᖏᑦ ᐸᐸᑦᓯᕕᖓᓂ ᓄᖑᖁᓇᒋᑦ ᑕᓪᓕᒪᑦ ᐊᕐᕌᒍᑦ ᐊᓂᒍᕐᐸᑕ. ᕿᒥᕐᕈᓇᑦᑕᐅᕙᓪᓕᐊᔪᖅ ᒫᓐᓇ ᖃᐅᔨᔾᔪᑕᐅᓂᐊᖅᑐᖅ ᐊᑯᓂᒃᑲᓐᓂᖅ ᐆᒪᑎᑕᐅᓇᓱᐊᕈᓐᓇᕐᓂᖓᓂᒃ ᐸᐸᑕᐅᔪᑦ ᐅᖓᑖᓄᑦ ᑕᓪᓕᒪᑦ ᐊᕐᕌᒍᑦ,” ᐅᖃᓚᐅᖅᑐᖅ ᐃᑦᑐᓗᒃ.
ᓄᓇᕗᒻᒥ ᐊᖑᓇᓱᒃᑎᓄᑦ ᐃᑲᔫᑎᒃᓴᑦ ᓴᖅᑭᖅᑕᐅᓚᐅᖅᑐᑦ 1993-ᒥ ᓄᓇᑦᓯᐊᖅ ᒐᕙᒪᖏᓐᓄᑦ ᐊᒻᒪᓗ ᑐᓐᖓᕕᒃ ᐃᓚᒌᑦᓴᑦ ᓄᓇᕗᒻᒥ ᑮᓇᐅᔭᑎᒍᑦ ᐃᑲᔫᑎᒃᓴᓂᒃ ᐃᓄᖕᓄᑦ ᑎᒍᓯᔾᔪᑎᒃᓴᓂᒃ ᐱᖁᑎᓂᒃ ᐱᖅᑯᓯᕐᒥᑎᒍᑦ ᐊᖑᓇᓱᓐᓂᕆᕙᑦᑕᖓ ᐊᐅᓚᓂᖃᐃᓐᓇᕈᓐᓇᖁᓪᓗᒍ. ᑲᑐᔾᔨᖃᑎᒌᒃᑑᒃ ᐊᑐᓂᑦ ᐃᑲᔫᑎᖃᓚᐅᖅᑑᒃ $15 ᒥᓕᔭᓂᒃ ᑮᓇᐅᔭᓖᓪᓗᑎᒃ, ᑲᑎᓐᓂᖃᓕᖅᑐᑎᒃ $30 ᒥᓕᔭᓂᒃ. ᑮᓇᐅᔭᑦ ᑮᓇᐅᔭᓕᐅᖅᑎᑕᐅᓪᓗᑎᒃ ᓄᓇᕗᒻᒥ ᐊᖑᓇᓱᒃᑎᓄᑦ ᐃᑲᔫᑎᒃᓴᑦ ᑮᓇᐅᔭᖁᑎᓕᕆᔪᓂᒃ, ᐊᐅᓚᑕᐅᓂᖓᒍᑦ ᐱᔪᓐᓇᐅᑕᐅᒃᑲᓐᓂᖃᑦᑕᕈᓐᓇᕐᓯᓚᐅᖅᑐᖅ ᑮᓇᐅᔭᓖᓂᕐᒥᒃ ᐊᕐᕌᒍᕋᓴᒃᑲᓂᕐᓂᒃ. ᒫᓐᓇ $13 ᒥᓕᔭᖑᓕᖅᑐᑦ ᐊᒥᒃᑯᑦ ᑮᓇᐅᔭᖁᑎᖏᓐᓂ.
