ᓴᒃᑯᑕᐅᑲᐅᑎᒋᔭᕆᐊᓕᒃ
(ᒫᑦᓯ 7, 2025 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓ ᔨᐅᓚᒥ ᑑᕐᖔᓗᒃ ᑐᙵᓱᐊᑎᑦᑎᔪᖅ ᑐᓴᖅᑎᑕᐅᓂᖓᓂᒃ ᐅᓪᓗᒥ ᑲᓇᑕᒥ ᒐᕙᒪᒃᑯᑦ ᐊᑯᓂᐅᓂᖅᓴᖅ ᐊᑐᖅᑕᐅᔪᓐᓴᕐᓂᐊᓕᕐᓂᖓᓂᒃ ᐃᓄᐃᑦ ᓄᑕᖅᑲᑦ ᓯᕗᓪᓕᐅᑎᑕᐅᓂᖏᑦ ᐱᓕᕆᐊᖓᓂᒃ ᐊᑕᐅᓯᕐᒧᑦ ᐊᕐᕌᒍᒧᑦ ᐅᖓᕙᕆᐊᖅᑕᐅᓪᓗᓂ ᐊᑐᖅᑕᐅᓂᒃᓴᖓ.
ᐃᓄᐃᑦ ᓄᑕᖅᑲᑦ ᓯᕗᓪᓕᐅᑎᑕᐅᓂᖏᑦ ᐱᓕᕆᐊᖅ ᕿᓚᒥᐅᔪᒃᑯᑦ ᐊᖏᕈᑎᓕᐊᕆᔭᐅᓯᒪᕗᖅ ᑲᓇᑕᒥ ᒐᕙᒪᓄᑦ ᐋᖅᑭᒃᑕᐅᖁᓪᓗᒍ ᐱᓕᕆᐊᖅ ᓲᕐᓗᒃ ᔪᐊᑕᓐ ᐳᕆᓐᓯᐳᓪ, ᑭᓯᐊᓂᓕ ᐃᓄᖕᓅᖓᓪᓗᓂ. ᐋᖅᑭᒃᓱᖅᑕᐅᓚᐅᖅᓯᒪᕗᖅ ᓇᓕᒧᒌᓕᖅᑎᑕᒻᒪᕆᐅᖁᔭᐅᓪᓗᑎᑦ ᐃᓄᐃᑦ ᓄᑕᖅᑲᖏᑦ ᖃᐅᔨᒪᓇᖅᑎᐊᖅᑎᑦᑎᓪᓗᑎᑦ ᓄᑕᖅᑲᑦ ᐊᑐᕈᓐᓇᕐᓂᐊᕐᒪᑕ ᐊᑐᖅᑕᐅᔭᕆᐊᖃᓪᓚᕆᑦᑐᓄᑦ ᒐᕙᒪᒃᑯᓐᓄᑦ ᑮᓇᐅᔭᖃᖅᑎᑦᑎᓂᖏᓐᓂᒃ ᐋᓂᐊᖅᑕᐃᓕᒪᓂᕐᒨᖓᔪᓂᒃ, ᐃᓅᓯᕐᒧᑦ ᐊᒻᒪᓗ ᐃᓕᓐᓂᐊᕈᑎᒃᓴᓄᑦ, ᐱᔨᑦᑎᕋᕈᑎᓄᑦ ᐊᒻᒪᓗ ᐃᑲᔪᖅᑐᐃᔾᔪᑎᓄᑦ ᑭᙴᒪᒋᔭᐅᔪᑦ, ᐱᔭᕆᐊᖃᓕᕋᐃᒍᓂᒋᑦ.
ᖁᔭᓐᓇᒦᕈᒪᔭᕋ ᑲᓇᑕᒥ ᓯᕗᓕᖅᑎᕐᔪᐊᖓ ᔭᔅᑎᓐ ᑐᕉᑐ ᐊᑯᓂᐅᓂᖅᓴᖅ ᑕᒪᔅᓱᒥᖓ ᐊᑐᖅᑕᐅᑎᑦᑎᔪᓐᓇᕐᒪᑦ ᐱᕐᔪᐊᕌᓗᒻᒥᒃ ᐱᓕᕆᐊᕐᒥᒃ ᐃᓄᐃᑦ ᓄᑕᖅᑲᖏᖕᓄᑦ. ᓄᓇᕗᒻᒥ, ᐃᓄᐃᑦ ᓄᑕᖅᑲᑦ ᓯᕗᓪᓕᐅᑎᑕᐅᓂᖏᑦ ᐱᓕᕆᐊᖅ ᐃᓚᑰᔪᓂᒃ ᐱᑕᖃᓕᖅᑎᑦᑎᔪᓐᓇᓲᖅ ᐃᓕᓐᓂᐊᕐᓂᓕᕆᓂᕐᒨᖓᔪᓂᒃ, ᐋᓐᓂᐊᖅᑕᐃᓕᒪᓂᕐᒧᑦ ᐊᒻᒪᓗ ᐃᓅᓯᖃᑦᑎᐊᕐᓂᕐᒨᖓᑎᑦᑎᒍᑎᓂᒃ. ᐊᑦᑐᐃᓂᖃᓪᓚᕆᑦᑐᖅ ᖃᓄᐃᑦᑕᐃᓕᒪᓂᖏᖕᓂᒃ ᐃᓄᐃᑦ ᓄᑕᖅᑲᓂᒃ ᐊᒻᒪᓗ ᐃᓚᒌᓂᒃ,” ᐅᖃᖅᑐᓂ ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓ ᔨᐅᓚᒥ ᑑᕐᖔᓗᒃ. “ᐊᑯᓂᐅᔪᒧᑦ ᑮᓇᐅᔭᖃᖅᑎᑕᐅᓂᐊᕐᓂᕋᖅᓯᒪᔭᕆᐊᖃᕐᒪᑦ ᐃᓄᐃᑦ ᓄᑕᖅᑲᑦ ᓯᕗᓪᓕᐅᑎᑕᐅᓂᖏᑦ ᐱᓕᕆᐊᖓᑦ ᓴᐳᒻᒥᐅᓯᖅᓯᒪᖁᓪᓗᒋᑦ ᐱᔪᓐᓇᐅᑎᖏᑦ ᐃᓄᐃᑦ ᓄᑕᖅᑲᑦ ᓄᓇᕗᒻᒥ ᐊᒻᒪᓗ ᓇᓕᒧᒌᒻᒪᕆᓕᖅᑎᑕᐅᖁᓪᓗᒋᑦ ᐊᑐᕈᓐᓇᑦᑎᐊᕐᓂᐊᕐᒪᑕ ᐱᕐᔪᐊᕌᓗᓐᓂᒃ ᒐᕙᒪᒃᑯᓐᓄᑦ ᑮᓇᐅᔭᖃᖅᑎᑕᐅᓲᑦ ᐱᔨᑦᑎᕋᕈᑎᓂᒃ ᐊᒻᒪᓗ ᐃᑲᔪᖅᑐᐃᔾᔪᑎᓂᒃ ᐊᑐᕆᐊᖃᖅᑕᒥᖕᓂᒃ.”
ᐱᒋᐊᓚᐅᖅᓯᒪᒻᒪᓂᑦ ᐃᓄᐃᑦ ᓄᑕᖅᑲᑦ ᓯᕗᓪᓕᐅᑎᑕᐅᓂᖏᑦ ᐱᓕᕆᐊᖓ, ᓄᓇᕗᑦ ᑐᙵᕕᒃ ᑎᒥᖓ ᐃᖅᑲᓇᐃᔭᖃᑎᖃᐃᓐᓇᖅᑐᑦ ᐃᓄᐃᑦ ᐊᕕᑦᑐᖅᓯᒪᓂᖏᓐᓂᒃ, ᐃᓄᐃᑦ ᑕᐱᕇᑦ ᑲᓇᑕᒥ ᐊᒻᒪᓗ ᑲᓇᑕᒥ ᒐᕙᒪᒃᑯᓐᓂ ᐋᖅᑮᖁᓪᓗᒋᑦ ᐊᑯᓂᐅᔪᒧᑦ ᐃᓄᐃᑦ ᐊᔾᔨᐸᓗᐊᓂᑦ ᔪᐊᑕᓐ ᐳᕆᓐᓯᐳᓪ−ᒧᑦ ᐊᑐᐃᓐᓇᐅᒪᕕᐅᓂᐊᕐᒪᑕ ᑐᙵᕕᒋᓪᓗᒋᑦ ᑲᑐᔾᔨᓪᓗᑕ ᑲᒪᒋᔭᖃᕈᓯᑦᑎᓐᓂᒃ. ᑖᓐᓇ ᐋᖅᑭᒃᓯᒪᓂᖓ ᑲᒪᒋᔭᖃᕈᓯᖅ ᖃᐅᔨᒪᑦᑎᐊᑎᑦᑎᓂᐊᖅᑐᖅ ᐃᓄᐃᑦ ᓄᑕᖅᑲᑦ ᓯᕗᓪᓕᐅᑎᑕᐅᓂᖏᑦ ᐱᓕᕆᐊᖓ ᐊᐅᓚᑕᐅᓂᐊᕐᒪᑦ ᓄᓇᕗᒻᒥ ᓯᕗᒃᑲᖅᑖᕆᔭᐅᓗᓂ ᓄᓇᕗᒻᒥᐅᑦ ᐃᓄᒻᒪᕆᖏᖕᓄᑦ ᐊᒻᒪᓗ ᑕᒪᐃᓐᓂ ᑕᐅᑐᓐᓂᖃᖅᑐᑎᑦ ᑲᒪᒋᔭᖃᕆᐊᖅᑎᑦᑎᓯᒪᔪᑦ ᑲᒪᒋᔭᐅᖁᓪᓗᒋᑦ ᐃᓅᓯᕐᒥᒃ ᐊᒻᒪᓗ ᐱᕙᓪᓕᐊᓂᕐᒥᒃ ᓇᓕᒧᒌᙱᑦᑎᑕᐅᕙᓐᓂᖏᑦ ᐊᑦᑐᐃᓂᖃᓲᑦ ᓄᑕᖅᑲᓂᑦ.
-30-
ᐱᕙᓪᓕᐊᔪᓕᕆᔨᒃᑯᓐᓄᑦ ᖃᐅᔨᒃᑲᖅᑕᐅᔪᓐᓇᖅᑐᖅ:
ᐃᕙᓗᐊᕐᔪᒃ ᒥᐅᕆᑦ
ᑐᑭᒧᐊᑦᑎᑦᑎᔨ ᑐᓴᐅᒪᔪᓕᕆᓂᕐᒧᑦ
ᓄᓇᕗᑦ ᑐᙵᕕᒃ ᑎᒥᖓ
