(ᐊᒃᑑᕝᕙ 20, 2025 – ᑲᖏᖅᖠᓂᖅ, ᓄᓇᕗᑦ) ᐅᓪᓗᒥ, ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓ ᔨᐅᓚᒥ ᑑᕐᖔᓗᒃ ᖁᕕᐊᓱᖅᑲᐅᕗᖅ ᑐᓴᖅᑎᑦᑎᔭᕆᐊᒃᓴᖅ $5 ᒥᓕᐊᓐ ᑮᓇᐅᔭᓂᒡᒎᖅ ᑐᓂᓯᓛᕐᒪᑕ ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᑦᑐᖅᑎᒃᑯᓐᓄᑦ ᓴᓇᔭᐅᖁᓪᓗᒍ ᓄᓇᕗᒻᒥ ᐃᓄᐃᑦ ᐱᖅᑯᓯᖏᓐᓂᒃ ᑕᑯᔭᒐᖃᕐᕕᖓ.
“ᑮᓇᐅᔭᓂᒃ ᐊᑐᕐᓗᓂ ᐱᐅᓛᕐᒥᒃ ᐃᓄᐃᑦ ᐱᖅᑯᓯᖏᓐᓂᒃ ᑕᑯᔭᒐᖃᕐᕕᖓᓄᑦ ᓄᓇᕗᒻᒥ, ᑐᑭᓕᒃ ᑮᓇᐅᔭᓂᑦ ᐊᑐᕋᑦᑕ ᐃᓄᐃᑦ ᑭᓇᐅᓂᖏᓐᓄᑦ, ᖃᐅᔨᒪᓂᖏᑦ ᐃᓕᓐᓂᐊᖅᑕᐅᔪᓐᓇᓕᕐᓗᑎᑦ ᐊᒻᒪᓗ ᐅᐱᒍᓱᒍᓐᓇᕐᓗᑎᑦ,” ᐅᖃᖅᖢᓂ ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓ ᑑᕐᖔᓗᒃ. “ᓄᓇᕗᒻᒥ ᐃᓄᒻᒪᕆᖏᑦ ᓱᓕ ᑲᔪᓯᓯᒪᕗᑦ ᐊᑐᖅᐸᓐᓂᖏᓐᓂᒃ ᖃᐅᑕᒫᑦ ᐊᔪᙱᑕᒥᓂᒃ ᐊᒻᒪᓗ ᓴᙱᓂᖏᓐᓂᒃ ᓯᕗᓪᓕᒥᓂᖅᐳᑦ. ᑖᓐᓇ ᐱᖅᑯᓯᕐᓄᑦ ᑕᑯᔭᒐᖃᕐᕕᒃ ᐃᓕᓐᓂᐊᕐᕕᐅᔪᓐᓇᕋᔭᖅᑐᖅ, ᐃᓄᐃᑦ ᓱᓇᒃᑯᑖᖏᑦ ᐊᖏᕐᕋᐅᔾᔭᐅᔪᓐᓇᖅᓯᓗᑎᑦ, ᐊᒻᒪᓗ ᐃᓄᐃᑦ ᖃᐅᔨᒋᐊᕈᓐᓇᑦᓯᐊᕐᓗᑎᑦ ᓯᕗᓕᒥᓂᖏᑕ ᐊᑐᖃᑦᑕᕐᓂᑯᒥᓂᖏᓐᓂᒃ ᐃᓅᓯᕆᕙᓚᐅᖅᓯᒪᔭᖏᓐᓂᒃ, ᐃᓕᖅᑯᓯᖏᓐᓂᒃ, ᐊᒻᒪᓗ ᖃᐅᔨᒪᓂᑐᖄᓗᖏᓐᓂᒃ ᐊᒥᓱᓄᑦ ᑭᖑᕚᖑᓂᐊᖅᑐᓄᑦ.
$5 ᒥᓕᐊᓐ ᑮᓇᐅᔭᑦ ᑕᐃᑲᙶᕋᔭᖅᑐᑦ ᑭᖑᓪᓕᖅᐹᑦ ᐊᑭᓕᖅᑕᐅᔾᔪᑎᖏᑦ 2015-ᒥ ᓄᓇᑖᕐᓂᕐᒧᑦ ᐊᖏᕈᑎᑉ ᑮᓇᐅᔭᖃᕐᕕᖓᓂ ᑲᓇᑕᒥ ᒐᕙᒪᒃᑯᓐᓂ ᐱᔭᐅᓛᖅᑐᑦ.
ᓄᓇᕗᑦ ᑐᙵᕕᒃ ᑎᒥᖓᑕ ᑲᑎᒪᔨᖏᑦ ᐱᖁᔨᕗᖔᕈᑎᒥᒃ ᑲᔪᓯᑎᑦᑎᓚᐅᖅᓯᒪᕗᑦ ᐊᒃᑑᕝᕙ 2017−ᖑᑎᓪᓗᒍ ᑮᓇᐅᔭᖃᖅᑎᑦᑎᓂᐊᕐᓂᕋᖅᑐᑎᑦ ᐃᑲᔪᖅᑕᐅᖁᓪᓗᒍ ᐋᖅᑭᒃᑕᐅᓂᖓ ᓄᓇᕗᒻᒥ ᐃᓄᐃᑦ ᐱᖅᑯᓯᖏᓐᓂᒃ ᑕᑯᔭᒐᖃᕐᕕᖓᓂᒃ. ᑕᒫᓂ ᐊᕐᕌᒍᒥ, ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᖅᑐᖅᑎᒃᑯᑦ ᑐᑦᓯᕋᖅᓯᒪᓚᐅᖅᑐᑦ ᓴᓂᕐᕙᐃᖁᔨᓪᓗᑎᑦ ᑮᓇᐅᔭᖃᖅᑎᑕᐅᒐᔭᕐᓂᖓᓂᒃ ᐃᑲᔫᑎᓂᑦ, ᓴᓇᔭᐅᓂᖓ ᐃᓄᐃᑦ ᐱᖅᑯᓯᖏᓐᓂᒃ ᑕᑯᔭᒐᖃᕐᕕᒃ ᓴᓇᔭᐅᒋᐊᓯᓛᕐᓂᐊᕐᓂᕋᖅᑕᐅᓪᓗᓂ 2027-ᒥ, ᓇᓚᐅᒃᑖᖅᑕᐅᓯᒪᓪᓗᓂ ᒪᑐᐃᕐᕕᒃᓴᖓ ᐊᕐᕌᒍᐊᓂ 2030 ᓇᓪᓕᖅᐸᑦ.
-30-
ᐱᕙᓪᓕᐊᔪᓕᕆᔨᒃᑯᑦ ᖃᐅᔨᒋᐊᕈᓐᓇᖅᑐᑦ:
ᐃᕙᓗᐊᕐᔪᒃ ᒥᐅᕆᑦ
ᑐᑭᒧᐊᑦᑎᑦᑎᔨ ᑐᓴᐅᒪᑎᑦᑎᓂᕐᒧᑦ
ᓄᓇᕗᑦ ᑐᙵᕕᒃ ᑎᒥᖓ
