ᓴᒃᑯᑕᐅᑲᐅᑎᒋᔭᕆᐊᓕᒃ
(ᓄᕖᕝᕙ 14, 2024 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓ ᓂᕈᐊᖅᑎᑦᑎᓂᖃᓛᖅᑐᑦ ᐊᖓᔪᖅᑳᑉ ᐃᓂᖓᓄᑦ ᑎᓰᕝᕙ 9, 2024−ᖑᓕᖅᐸᑦ. ᑲᔪᖏᖅᓴᖅᑕᐅᓪᓗᑎᑦ ᓂᕈᐊᕆᐊᖅᑐᕐᓗᑎᑦ, ᓄᓇᕗᑦ ᑐᙵᕕᒃ ᑎᒥᖓ ᐊᐅᓚᑦᑎᔪᑦ ᐊᒥᓱᓂᑦ ᓂᕈᐊᕆᐊᖅᑐᕈᒪᒍᑎᓂᒃ, ᓲᕐᓗᒃ $100 ᓂᐅᕕᕈᓐᓇᐅᑎᑖᖅᑎᑦᑎᓗᑎᑦ ᑕᒪᐃᓐᓂ ᓂᕈᐊᕈᓐᓇᖅᑐᓕᒫᓂᒃ ᓂᕈᐊᕆᐊᖅᑐᖅᐸᑕ, ᑕᒪᐃᓐᓂ ᓂᕈᐊᕋᒃᓴᐅᔪᑦ ᐊᐃᕙᐅᑎᑕᐅᓗᑎᑦ, ᐊᒻᒪᓗ ᑐᓂᓯᓗᑎᑦ $5,000 ᐊᑭᓕᐅᑕᐅᔾᔪᑎᒃᓴᑦ ᐊᑐᓂ ᓂᕈᐊᕋᒃᓴᐅᔪᓄᑦ ᐃᑲᔪᖅᑕᐅᖁᓪᓗᒋᑦ ᐊᐅᓪᓚᕈᑎᖏᑦ ᓄᓇᓕᖕᓄᑦ ᓂᕈᐊᖅᑕᐅᓇᓱᐊᕐᓂᖏᑕ ᐱᔾᔪᑎᖃᕐᓗᑎᑦ ᐊᑐᖅᑕᐅᒐᔭᕐᓗᑎᑦ.
$100 ᓂᐅᕕᕈᓐᓇᐅᑎ
ᑕᒪᐃᓐᓂ ᓂᕈᐊᕈᓐᓇᖅᑐᑦ ᓂᕈᐊᕐᕕᒻᒨᕈᑎᑦ ᓯᕗᓂᐊᒍᑦ ᓂᕈᐊᖅᑎᑦᑎᓂᖏᖕᓂᒃ ᑎᓰᕝᕙ 2nd, ᓂᕈᐊᖅᑎᑦᑎᒋᐊᖅᑐᕐᓗᑎᑦ ᐅᐸᒍᑎᔪᑦ ᐊᔪᕈᑎᖃᐅᖅᑐᓄᑦ ᑎᓰᕝᕙ 3 – 6th, ᐅᕝᕙᓘᓐᓃᑦ ᓂᕈᐊᕐᓇᑉ ᐅᓪᓗᖓᓂᒃ ᑎᓰᕝᕙ 9th ᓂᕕᕈᓐᓇᐅᑎᑖᕋᔭᖅᑐᑦ ᐃᒪᓐᓇᓂᒃ $100 ᓂᐅᕕᕈᓐᓇᐅᑎᑖᕈᑎᒋᔭᐅᓗᓂ ᐅᕝᕙᓘᓐᓃᑦ ᐊᑭᓕᒃᓴᓂᐅᑎᐅᔪᓐᓇᓕᕐᓗᓂ ᑯᐊᐸᒃᑯᓐᓂ ᑎᓰᕝᕙ 31, 2024 ᐊᓂᒍᓚᐅᙱᓐᓂᖓᓂᒃ ᐊᑐᕋᒃᓴᐅᒐᔭᕐᓗᓂ. ᓂᕈᐊᕈᓐᓇᖅᑐᑦ ᒪᕐᕉᓐᓂᒃ ᓄᓇᕗᑦ ᓄᓇᓕᖏᖕᓂᒃ ᑯᐊᐸᒃᑯᖃᙱᑦᑐᑦ, ᐊᕐᕕᐊᑦ ᐊᒻᒪᓗ ᑲᖏᖅᑐᒑᐱᒃ, ᐊᑐᕈᓐᓇᖅᑐᑦ ᓂᐅᕕᕈᓐᓇᐅᑎᒥᓂᒃ ᓄᓇᓕᓐᓂ ᓂᐅᕕᕐᕕᒻᒥ.
ᓂᕈᐊᕆᐊᖅᑐᖅᓯᒪᔪᑦ ᓂᕈᐊᕐᕕᓂ ᓄᓇᕗᑦ ᓯᓚᑖᓂ ᓂᐅᕕᕈᓐᓇᐅᑎᒥᒃ ᓈᑎᕆᔪᓐᓇᖅᑐᑦ ᐊᐅᓪᓚᖅᑎᑕᐅᒐᔭᕐᒪᑕ $100 ᐊᑭᓕᒃᓴᓂᒍᓐᓇᐅᑏᑦ ᕖᓴᐅᓗᒋᑦ ᓂᕈᐊᖅᑐᖃᓚᐅᖅᑎᓪᓗᒍ. ᓂᕈᐊᕐᕖᑦ ᓄᓇᕗᑦ ᓯᓚᑖᓂ ᐅᑯᐊᖑᒐᔭᖅᑐᑦ ᔭᓗᓇᐃᑉ, ᐋᑐᕚ, ᐃᐊᑦᒪᓐᑕᓐ ᐊᒻᒪᓗ ᕕᓂᐱᒡ.
ᓇᓕᐊᑐᐃᓐᓇᖅ ᓂᕈᐊᕈᓐᓇᖅᑐᖅ ᓂᕈᐊᕈᓂ ᑭᒡᒐᖅᑐᐃᔨᖃᕐᓗᓂ ᐅᕝᕙᓘᓐᓂᑦ ᑎᑎᖅᑲᓂᐊᕐᕕᒃᑯᑎᒍᑦ ᐱᒐᔭᕐᒥᔪᑦ $100 ᐊᑭᓕᒃᓴᓂᒍᓐᓇᐅᑎᒥᒃ ᕖᓴᒻᒃ ᑎᑎᖅᑲᓂᐊᕐᕕᒃᑯᑎᒍᑦ ᓂᕈᐊᖅᑐᖃᓚᐅᖅᑎᓪᓗᒍ.
ᑕᒪᐃᓐᓂ ᓂᕈᐊᕋᒃᓴᐅᔪᑦ ᐊᐃᕙᐅᑎᓂᖃᕐᓂᖏᑦ
ᓄᓇᕗᑦ ᑐᙵᕕᒃ ᑎᒥᖓ, ᐱᓕᕆᖃᑎᖃᖅᑐᑎᑦ ᑲᓇᑕᒥ ᑕᑯᓐᓇᒐᒃᓴᓕᕆᔨᒃᑯᑦ ᑯᐊᐳᕇᓴᓐ ᐊᒻᒪᓗ ᐅᕙᒍᑦ ᑕᓚᕖᓴᓕᕆᔨᒃᑯᑦ, ᐅᐸᓗᖓᐃᔭᐃᕗᑦ ᑕᒪᐃᓐᓂ ᓂᕈᐊᕋᒃᓴᐅᔪᑦ ᐊᐃᕙᐅᑎᓂᖏᑦ ᐃᖃᓗᓐᓂ, ᓄᓇᕗᑦ ᑎᓯᒥ ᐃᓄᒃᓱᒃ ᐃᓕᓐᓂᐊᑯᐊᓗᒻᒥ 7−9 ᐅᓐᓄᒃᑯᑦ ᐃᖃᓗᐃᑦ ᓯᕿᙳᔭᖓ ᒪᓕᑦᑐᒍ ᓯᕙᑖᕐᕕᐅᓕᖅᐸᑦ ᓄᕖᕝᕙ 30, 2024.
ᓄᓇᕗᑦ ᑐᙵᕕᒃ ᑎᒥᖓ ᓄᓇᕗᒻᒥᐅᑦ ᐃᓄᒻᒪᕆᖏᖕᓂᒃ ᐊᐱᖅᑯᑎᒥᓂᒃ ᑐᓂᓯᖁᔭᐅᕗᑦ ᐃᓱᒪᒃᓴᖅᓯᐅᕋᑕᐅᒐᔭᕐᒪᑕ ᐃᓄᑐᐃᓐᓇᐃᑦ ᐊᐱᖅᓱᕈᓐᓇᖅᑎᑕᐅᓕᕈᑎᑦ, ᐊᒻᒪᓗ ᑲᓇᑕᒥ ᑕᑯᓐᓇᒐᒃᓴᓕᕆᔨᒃᑯᑦ ᑯᐊᐳᕇᓴᙵ ᑕᑯᒃᓴᐅᑎᑦᑎᓂᕋᔭᖅᑐᑦ ᐊᐅᓚᑦᑎᓗᑎᓪᓗ ᐊᐃᕙᐅᓂᑎᕐᒥᒃ. ᐊᐃᕙᐅᑎᓂᖅ. ᑖᒃᑯᐊ ᖃᕋᓴᐅᔭᒃᑯᑦ ᑕᑯᒃᓴᐅᑦᑕᐅᑎᒋᑎᑕᐅᓂᐊᖅᑐᑦ ᐃᕐᖐᓐᓇᖅ, ᓇᓗᓇᐃᔭᖅᓯᒪᓂᖏᑦ ᑐᑭᓯᒋᐊᕈᑏᑦ ᓴᖅᑭᖅᑎᑕᐅᓛᑐᐃᓐᓇᖅᑐᑦ.
ᓂᕈᐊᕋᒃᓴᐅᓂᕐᒥᓂᒃ ᑐᓴᐅᒪᑎᑦᑎᖃᑦᑕᕐᓂᖏᑦ ᓄᓇᓕᐅᔪᓂ
ᓂᕈᐊᕋᒃᓴᐅᔪᑦ ᓇᓕᒧᒌᑦᑐᒃᑯᑦ ᓂᕈᐊᕋᒃᓴᐅᓂᕐᒥᓂᒃ ᑐᓴᐅᒪᑎᑦᑎᑦᑎᐊᖁᓪᓗᒋᑦ ᐊᒥᓲᓂᖅᐹᓂᒃ ᓄᓇᕗᒻᒥ ᓄᓇᓕᖏᖕᓂᒃ ᐅᐸᒍᓐᓇᖅᑕᓕᒫᖏᖕᓂᒃ ᐅᐸᒐᓱᖁᓪᓗᒋᑦ ᓂᕈᐊᕋᒃᓴᐅᓂᖃᕐᓂᕐᒥᓂᒃ, ᓄᓇᕗᑦ ᑐᙵᕕᒃ ᑎᒥᖓ ᐱᓕᕆᖃᑎᖃᖅᑐᑎᑦ ᑲᓇᐃᑎᐊᓐ ᓄᐊᑦ−ᒃᑯᓐᓂ ᓂᕈᐊᕋᒃᓴᓂᑦ ᐊᑐᓂ ᑐᓂᓯᒐᔭᖅᑐᑦ $5,000 ᐊᐅᓪᓚᕈᑎᓄᑦ ᐃᑲᔫᑎᓂᑦ ᐊᑐᖅᑕᐅᒐᔭᖅᑐᑦ ᓂᕈᐊᕋᒃᓴᐅᓂᕐᒥᓂᒃ ᑐᑭᓯᒋᐊᖅᑎᑦᑎᓇᓱᑦᑎᓪᓗᒋᑦ. ᑲᓇᐃᑎᐊᓐ ᓄᐊᑦ ᑐᓂᓯᓯᒪᔪᑦ ᓂᕈᐊᕋᒃᓴᓂᑦ ᐊᑐᕈᓐᓇᕐᓗᑎᑦ ᓄᓇᕗᑦ ᓄᓇᑖᕐᓂᕐᒧᑦ ᐊᑎᓕᐅᖅᑕᐅᖃᑕᐅᓯᒪᔪᑦ ᖃᖓᑦᑕᐅᑏᑦ ᐊᑭᖏᖕᓂᒃ ᐊᐅᓪᓚᖁᓪᓗᒋᑦ ᓄᓇᕗᒻᒥ ᓄᓇᓕᖏᖕᓄᑦ, ᐊᒻᒪᓗ ᑲᓪᒻ ᐃᐊᕐ ᑐᓂᓯᓯᒪᒋᕗᑦ ᓂᕈᐊᕋᒃᓴᓕᒫᓂᒃ ᐊᑭᑭᓪᓕᒋᐊᖅᑎᑦᑎᓗᑎᑦ 90% ᖃᖓᑦᑕᐅᑏᑦ ᐊᑭᖏᖕᓂᒃ ᓂᕈᐊᕋᒃᓴᐅᔪᓄᑦ ᑭᕙᓪᓕᕐᒥ ᓄᓇᓕᖏᖕᓄᐊᖃᑦᑕᖁᓪᓗᒋᑦ ᓂᕈᐊᕋᒃᓴᐅᔪᑦ.
ᐊᕕᑦᑐᖅᓯᒪᓂᖓ 39 ᓄᓇᕗᑦ ᓄᓇᑖᕐᓂᕐᒧᑦ ᐊᖏᕈᑎᒥ ᐱᔪᓐᓇᑎᑦᑎᔪᑦ ᓄᓇᕗᑦ ᑐᙵᕕᒃ ᑎᒥᖓᓂᒃ “ᐃᒪᐃᓐᓂᐊᖅᐳᑦ… ᐊᐅᓚᑦᑎᓗᑎᑦ ᓵᑕᐅᓯᒪᔪᓐᓇᕐᓗᑎᑦ ᑖᒃᑯᓄᖓ, ᐊᒻᒪᓗ ᓂᕈᐊᕋᒃᓴᐅᓂᕐᒧᑦ ᐊᐅᓚᑕᐅᓗᑎᑦ ᐃᓄᖕᓄᑦ.” ᓄᓇᕗᑦ ᑐᙵᕕᒃ ᑎᒥᖓ ᑕᐃᒃᑯᐊᑎᑐᑦ ᐊᓯᖏᑦ ᐃᓄᐃᑦ ᑭᒃᑯᑐᐃᓐᓇᐃᑦ ᑲᑐᔾᔨᖃᑎᒌᒋᔭᖏᑎᑐᑦ ᖃᑦᑏᓐᓇᒻᒪᕆᐅᓯᒪᒻᒪᑕ ᓂᕈᐊᕆᐊᖅᑐᖅᓯᒪᔪᑦ ᓂᕈᐊᖅᑐᖃᖃᑦᑕᑎᓪᓗᒍ ᒫᓐᓇᒫᖑᓂᖅᓴᖅ, ᐊᒻᒪᓗ ᐅᑉᐱᕈᓱᒃᑐᑎᑦ ᐃᓄᒻᒪᕇᑦ ᐃᓚᐅᖃᑕᐅᓂᖏᑦ ᓄᓇᕗᑦ ᑐᙵᕕᒃ ᑎᒥᖓᑕ ᓂᕈᐊᖅᑎᑦᑎᓂᖏᖕᓂᒃ ᓯᕗᓪᓕᖅᐹᖑᕗᖅ ᓵᑕᐅᓯᒪᓂᖃᕐᓂᐊᕐᒪᑦ ᐊᒻᒪᓗ ᓂᕈᐊᖅᑐᖃᖅᑎᓪᓗᒍ ᐊᐅᓚᑕᐅᓗᑎᑦ ᐃᓄᒻᒪᕆᖕᓄᑦ. ᓄᓇᕗᑦ ᑐᙵᕕᒃ ᑎᒥᖓᑕ ᑲᑎᒪᔨᖏᑦ ᐊᖏᖅᓯᓯᒪᔪᑦ ᑕᒪᒃᑯᓂᖓ ᐊᒃᑑᕝᕙ 2024-ᖑᑎᓪᓗᒍ ᐃᓄᒻᒪᕇᑦ ᐃᓚᐅᖃᑕᐅᓂᖅᓴᐅᖁᓪᓗᒋᑦ ᐊᖓᔪᖅᑳᑉ ᐃᓂᖓᓄᑦ ᓂᕈᐊᖅᑐᖃᖅᑎᓪᓗᒍ.
ᑕᒪᐃᓐᓂ ᓄᓇᕗᒻᒥ ᐃᓄᒻᒪᕇᑦ, 16-ᓂᒃ ᐅᑭᐅᓖᑦ ᐅᖓᑖᓄᓪᓗ ᑎᓰᕝᕙ 9, 2024−ᖑᑎᓪᓗᒍ, ᓂᕈᐊᕈᓐᓇᖅᐳᑦ.
-30-
ᐱᕙᓪᓕᐊᔪᓕᕆᔨᒃᑯᓐᓄᑦ ᖃᐅᔨᒃᑲᕋᒃᓴᖅ:
ᐃᕙᓗᐊᕐᔪᒃ ᒥᐅᕆᑦ
ᑐᑭᒧᐊᑦᑎᑦᑎᔨ ᑐᓴᐅᒪᔪᓕᕆᓂᕐᒧᑦ
ᓄᓇᕗᑦ ᑐᙵᕕᒃ ᑎᒥᖓ
