ᓴᖅᑭᑕᐅᑲᐅᑎᒋᔭᕆᐊᓕᒃ
(ᕕᕗᐊᕆ 6, 2026 – ᐃᖃᓗᐃᑦ, ᓄᓇᕗᑦ) ᖁᕕᐊᓲᑎᒋᓗᒍ ᖁᓕᑦ ᓇᓪᓕᐅᓐᓂᖅᓯᐅᖅᑐᑦ ᕿᓚᐅᑦ ᐃᙱᐅᓯᓕᐅᕐᓂᕐᒧᑦ ᓵᓚᖃᕋᓱᒃᑐᑦ, ᓄᓇᕗᑦ ᒐᕙᒪᖓ (GN) ᐊᒻᒪᓗ ᓄᓇᕗᑦ ᑐᙵᕕᒃᑯᑦ ᑎᒥᖓᑦ. (NTI) ᐱᓕᕆᖃᑎᖃᖅᑐᑦ ᐊᓕᐊᓇᐃᑦ ᖁᙱᐊᖅᑎᑦᑎᔨᒃᑯᓐᓂ 2026−ᒥ ᕿᓚᐅᒃᑯᓐᓂᑦ ᓵᓚᒃᓴᖅᑎᑦᑎᓇᓱᒃᑐᓂᒃ.
ᑕᐃᒪᙵᑦ ᓴᖅᑭᑕᐅᓚᐅᖅᑎᓪᓗᒍ 2015−ᒥ, ᕿᓚᐅᑦ ᑕᑯᒃᓴᐅᑎᑦᑎᖃᑦᑕᖅᓯᒪᕗᖅ ᐃᓱᒪᒃᓴᖅᓯᐅᕈᓐᓇᑦᑎᐊᕐᓂᖏᓐᓂᒃ ᐊᔪᙱᓐᓂᕆᔭᖏᓐᓂᒡᓗ ᐃᓄᒃᑐᑦ ᐃᙱᐅᑎᓂᒃ ᑎᑎᕋᖅᐸᒃᑐᑦ ᐃᙱᖅᑏᓪᓗ. ᑖᓐᓇ ᐊᕐᕌᒍ ᓇᓗᓇᐃᕈᒪᓪᓗᒍ, 2025−ᒥ ᓵᓚᒃᓴᖅᑐᑦ ᓄᓇᕘᓕᒫᒥ ᐃᙱᐅᓯᕐᓂᒃ ᓵᓚᖃᖅᑐᓂᒃ ᐅᖃᐅᓯᐅᓛᖅᑐᑦ. ᐊᑕᐅᑦᑎᒃᑰᖃᑎᖃᕐᓗᑎᒃ ᓂᔾᔭᐅᓯᔭᖅᑎᓂᒃ, ᐊᓕᐊᓇᐃᑦ ᐃᓄᒃᑐᑦ ᑎᑎᕋᕆᐅᖅᓴᑎᑦᑎᓛᖅᑐᑦ ᑕᒪᐃᓐᓂᒃ ᓄᓇᓕᖕᓂ. ᑐᓴᖅᑕᐅᔪᒃᓴᒃᑲᓐᓂᕐᓂᒃ ᒪᓂᒪᔪᖃᕐᓂᐊᖅᐳᖅ ᓄᓇᓕᖕᓂ ᓈᓚᐅᑎᒃᑯᑦ ᑭᒃᑯᑐᐃᓐᓇᓄᓪᓗ ᑐᓴᐅᑎᒃᑯᑦ.
ᓂᔾᔭᐅᓯᔭᕐᓃᑦ ᐋᖅᑭᒃᑕᐅᓯᒪᔪᑦ ᐅᑯᓄᖓ ᓄᓇᓕᖕᓄᑦ ᐅᑯᓇᓂ:
• ᐅᓪᓗᑐᐃᓐᓇᖅ, ᕕᕗᐊᕆ 6 ᒥᑦᑎᒪᑕᓕᖕᒥ (7:00-ᒧᐊᖅᐸᑦ ᐅᓐᓄᒃᑯᑦ ᐱᙳᐊᕐᕕᖕᒥ).
• ᐱᖓᔪᐊᓂᑦ, ᕕᕗᐊᕆ 11 ᐊᕐᕕᐊᓂ (7:00-ᒧᐊᖅᐸᑦ ᐅᓐᓄᒃᑯᑦ ᐱᙳᐊᕐᕕᖕᒥ).
• ᓯᓚᑖᕐᕕᖕᒥᑦ, ᕕᕗᐊᕆ 14 ᐃᖃᓗᒃᑑᑦᑎᐊᒥ (7:00-ᒧᐊᖅᐸᑦ ᐅᓐᓄᒃᑯᑦ ᐱᙳᐊᕐᕕᖕᒥ).
ᐃᙱᖅᑎᑦ ᖁᙱᐊᖅᑕᐅᓂᐊᖅᑐᑦ ᐅᑯᐊᖑᕗᑦ ᑑᒪ ᓚᐃᓴ, ᑯᕆᔅᑎ ᑲᓇᔪᖅ, ᓖᑎᐊ ᑲᓪᓗᒃ ᐊᒻᒪ ᔮᔅᓕᓐ ᒪᓚ.
ᓄᓇᕗᑦ ᒐᕙᒪᖓ ᓄᓇᕗᑦ ᑐᙵᕕᒃᑯᓪᓗ ᑎᒥᖓᑦ ᐱᓕᕆᖃᑎᒌᖏᓐᓇᖅᐳᑦ ᓴᙱᒃᑎᒋᐊᖅᑎᑦᑎᔪᒪᓪᓗᑎᒃ
ᐅᔾᔨᕐᓇᖅᓯᑎᑦᑎᔪᒪᓪᓗᑎᒡᓗ ᐊᑐᖅᑕᐅᕙᖕᓂᖓᓂᒃ ᐃᓄᒃᑐᑦ ᑕᒫᓂ ᐅᑭᐅᖅᑕᖅᑐᒥ ᐊᕕᒃᓯᒪᓂᑦᑎᓐᓂ.
“ᕿᓚᐅᑦ ᐱᔪᒃᓯᑎᑦᑎᕙᒃᐳᖅ ᓴᓇᙳᐊᖅᑎᓂᒃ ᓄᓇᓕᖕᓂᒡᓗ ᑲᑎᖦᖢᑎᒃ ᖁᕕᐊᓲᑎᖃᕐᓗᑎᒡᓗ ᐃᓄᒃᑐᑦ,” ᐅᖃᓚᐅᖅᐳᖅ ᒥᓂᔅᑕ ᐅᖃᐅᓯᕐᓄᑦ ᐳᕋᐃᐊᓐ ᑯᓄᒃ. “ᓂᔾᔭᐅᓯᔭᖅᑕᐅᔪᑦ ᓵᓚᒃᓴᕋᓱᒃᑎᓪᓗᒋᑦ ᑕᑯᒃᓴᐅᑎᑦᑎᕗᑦ ᐱᒻᒪᕆᐅᓂᖓᓂᒃ ᓴᐳᔾᔨᓂᕐᒥᒃ, ᐅᔾᔨᕐᓇᖅᓯᑎᑦᑎᓂᕐᒥᒃ ᐊᒻᒪ ᐆᒻᒪᕆᐊᖅᑎᑦᑎᓂᕐᒥᒃ ᐅᖃᐅᓯᑦᑎᓐᓂᒃ ᑭᖑᕚᒃᓴᑦᑎᓐᓄᑦ.”
“ᐃᓄᒃᑐᑦ ᑕᐃᒪᙵᓕᒫᖅ ᓯᕗᓪᓕᐅᑎᑕᐅᔪᒪᓪᓚᕆᒃᐳᖅ ᓄᓇᕗᑦ ᑐᙵᕕᒃᑯᑦ ᑎᒥᖓᓄᑦ ᐃᓄᖕᓂᒃ ᒪᑭᑉᐸᓪᓕᐊᑎᑦᑎᓂᖅ ᖃᓄᐃᓕᐅᖅᑕᐅᕙᓪᓕᐊᔪᒪᔪᓂᑦ. ᐅᖃᐅᓯᕗᑦ ᑲᔪᓯᑎᑦᑎᕗᖅ ᓄᓇᕐᔪᐊᒥ ᑕᐅᑐᖅᑰᖅᑕᑦᑎᓐᓂᒃ, ᒪᓕᒐᑦᑎᓐᓂᒃ, ᑭᓇᐅᓂᑦᑎᓐᓂᒡᓗ ᐃᓅᓪᓗᑕ,” ᐅᖃᓚᐅᖅᐳᖅ ᓄᓇᕗᑦ ᑐᙵᕕᒃᑯᑦ ᐊᖓᔪᖅᑳᖓ ᐸᐅᓗᓯ ᐃᕐᖓᐅᑦ. “ᐱᒃᑯᒍᓱᒃᐳᒍᑦ ᐃᑲᔪᖅᑐᐃᔪᓐᓇᕋᑦᑕ ᐱᓕᕆᐊᖑᕙᓪᓕᐊᔪᒪᔪᓂᒃ ᓲᕐᓗ ᕿᓚᐅᑦ ᓲᖃᐃᒻᒪ ᓴᙱᒃᑎᒋᐊᖅᑎᑦᑎᓲᖑᖕᒪᑕ ᐃᓄᒃᑐᑦ ᑐᑭᖃᑦᑎᐊᖅᑐᒃᑯᑦ, ᐃᓱᒪᒃᓴᖅᓯᐅᕈᓐᓇᑦᑎᐊᕐᓂᒃᑯᑦ, ᓄᓇᓕᖕᓂ ᐊᒻᒪ ᐃᓄᐃᑦ ᓂᐱᖏᑦᑎᒍᑦ.”
ᐅᑭᐅᑦ ᖁᓕᑦ ᐊᓂᒍᖅᑐᓂᒃ, ᕿᓚᐅᑦ ᐃᑲᔪᖅᑐᐃᖃᑦᑕᖅᓯᒪᕗᖅ ᓴᖅᑭᑎᑦᑎᓂᕐᒥᒃ ᑐᓵᑎᑦᑎᓂᕐᒥᒡᓗ ᐃᓄᒃᑐᑦ ᐃᙱᐅᓯᕐᓂᒃ. ᓵᓚᒃᓴᕋᓱᖕᓂᖅ ᐱᕕᖃᖅᑎᑦᑎᓯᒪᕗᖅ ᓴᖅᑭᑉᐸᓪᓕᐊᔪᓂᒃ ᐊᒻᒪ ᐋᖅᑭᒃᑕᐅᓯᒪᔪᓂᒃ ᐃᙱᖅᑎᓂᒃ ᖁᙱᐊᖅᑕᐅᔪᓐᓇᖅᖢᑎᒃ, ᓂᐱᓕᐅᕆᔪᓐᓇᖅᖢᑎᒃ ᐊᒻᒪ ᑐᓂᐅᖅᑲᐃᔪᓐᓇᖅᖢᑎᒃ ᐱᓕᕆᐊᖏᓐᓂᒃ. 2026−ᐊᑐᖅᑎᓪᓗᒍ, 100 ᐅᖓᑖᓂ ᐃᙱᐅᓯᐅᖅᓯᒪᓕᖅᐳᑦ ᕿᓚᐅᒃᑯᑦ, 11−ᖑᓪᓗᑎᒃ ᓂᐱᓕᐅᖅᓯᒪᔪᑦ ᑕᑯᒃᓴᐅᑎᑦᑎᓪᓗᑎᒃ ᐅᑭᐅᓂ ᖁᓕᓂ ᐅᓂᒃᑳᖅᑐᐊᓂᒃ, ᐱᖅᑯᓯᑐᖃᕐᓂᒃ ᐊᒻᒪ ᐱᒃᑯᒍᓱᖕᓂᕐᒥᒃ.
ᑐᑭᓯᒋᐊᒃᑲᓐᓂᕈᒪᒍᕕᑦ ᕿᓚᐅᑦ ᒥᒃᓵᓄᑦ, ᖃᐅᔨᒋᐊᕐᓗᑎᑦ ᓄᓇᕗᑦ ᒐᕙᒪᒃᑯᑦ ᐃᑭᐊᕿᕕᖓᑦᑎᒍᑦ.
-30-
ᐱᕙᓪᓕᐊᔪᓂᑦ ᖃᐅᔨᒋᐊᕐᕕᒃᓴᑦ:
ᐃᕙᓗᐊᕐᔪᒃ ᒥᐅᕆᑦ
ᑐᑭᒧᐊᒃᑎᑦᑎᔨ ᑐᓴᒐᒃᓴᓕᕆᔨᓄᑦ
ᓄᓇᕗᑦ ᑐᙵᕕᒃᑯᑦ ᑎᒥᖓᑦ
ᐅᐃᑦᓰᓐ ᑦᓵᓐ
ᐊᐅᓚᑦᑎᔨ, ᑐᓴᒐᒃᓴᓕᕆᔨᒃᑯᓐᓄᑦ
ᐃᓕᖅᑯᓯᓕᕆᔨᒃᑯᑦ
867-975-5508
