(ᒪᐃ 8, 2023 – ᐃᖃᓗᐃᑦ, ᓄᓇᕗᑦ ) ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᖓᔪᖅᑳᖓᑦ ᓄᓇᕗᒻᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂᓪᓗ, ᐱᓕᕆᖃᑎᖃᖅᖢᑎᒃ ᓄᓇᕗᑦ ᑐᙵᕕᒃᑯᓐᓂᒃ. (ᓄᓇᕗᑦ ᑐᙵᕕᒃᑯᑦ), ᐸᖕᓂᖅᑑᒥᐅᓂᒃ ᑐᓴᖁᔨᕗᑦ ᓄᓇᖅᑲᑎᒌᓕᒫᑦ ᐳᕙᒡᓗᖕᒪᖔᑕ ᖃᐅᔨᓴᖅᑕᐅᓛᕐᒪᑕ ᖃᑯᒍᒃᑲᓐᓂᖅ ᑕᒪᑐᒪᓂ ᐊᕐᕌᒍᒥ ᓴᖅᑭᔾᔪᑎᒃᓴᓂᒃ ᖃᔅᓯᐅᓂᖏᑦ ᐆᒻᒪᕆᒃᑐᒥᒃ ᐊᒻᒪ ᑭᖑᕙᖅᓯᒪᔪᓂᒃ ᐳᕙᒡᓗᖕᒪᖔᑕ ᓄᓇᓕᖕᓂ.
ᐳᕙᒡᓗᖕᒪᖔᑦ ᖃᐅᔨᓴᖅᑕᐅᓯᒋᐊᓛᖅᑐᖅ ᓯᑎᐱᕆ 2023−ᒥ ᑲᔪᓯᓗᓂᓗ ᓄᕕᐱᕆ 2023−ᒧᑦ ᖃᐅᔨᒪᖁᓪᓗᒋᑦ ᐱᔭᐅᔪᓐᓇᕐᓂᖏᑦ ᐊᑐᐃᓐᓇᐅᓂᖏᓪᓗ ᐃᓄᒐᓴᐃᑦ ᐊᔪᕐᓇᙱᓐᓂᓕᒫᖓᓂ.
“ᓄᓇᖅᑲᑎᒌᓕᒫᑦ ᑎᓕᐅᖅᐸᒃᑲ ᐃᓚᐅᖁᓪᓗᒋᑦ ᑕᒪᑐᒧᖓ ᖃᐅᔨᓴᖅᑕᐅᔪᒧᑦ ᐃᒪᐃᓐᓂᖓᓄᑦ, ᑭᓇᑐᐃᓐᓇᑦ ᐊᒃᑐᖅᑕᐅᔪᓐᓇᕐᒪᑕ ᐳᕙᒡᓗᖕᓇᒧᑦ. ᖃᐅᔨᓴᖅᑕᐅᓂᒃᑯᑦ ᒪᒥᓴᖅᑕᐅᖃᑦᑕᕐᓂᒃᑯᓪᓗ ᐱᔭᕆᐊᖃᖅᐸᑦ, ᐱᓕᕆᔪᑎᑦ ᓴᐳᑎᓪᓗᒋᑦ ᐋᓐᓂᐊᖃᖅᑕᐃᓕᒪᓂᕐᒥᒃ ᖃᓄᐃᙱᑦᑎᐊᕐᓂᕐᒥᒡᓗ ᐃᓕᖕᓄᑦ, ᓄᓇᖅᑲᑎᔅᓯᓐᓄᑦ ᓄᓇᕘᓕᒫᒧᓪᓗ,” ᐅᖃᖅᑐᖅ ᒥᓂᔅᑕ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᔮᓐ ᒪᐃᓐ. “ᐃᑲᔪᖅᑐᐃᖏᓐᓇᕐᓂᒃᑯᑦ ᐊᒻᒪ ᐱᓕᕆᖃᑎᖃᕐᓂᒃᑯᑦ ᓄᓇᕗᑦ ᑐᙵᕕᒃᑯᓐᓂᒃ, ᓄᓇᕗᑦ ᒐᕙᒪᒃᑯᑦ ᖃᒡᓕᕙᓪᓕᐊᕗᑦ ᑲᔪᓯᑎᑦᑎᔪᒪᓪᓗᑎᒃ ᑐᕌᒐᕆᔭᐅᔪᒥᒃ ᐱᑕᖃᕈᓐᓃᖅᑎᑦᑎᔪᒪᓪᓗᑎᒃ ᐳᕙᒡᓗᖕᓇᒥᒃ ᓄᓇᕗᒻᒥ.”
ᓄᓇᕗᑦ ᑐᙵᕕᒃᑯᑦ ᑮᓇᐅᔭᖃᖅᑎᑦᑎᓂᐊᖅᐳᑦ, ᐅᑯᓂᖓᓗ ᐃᑲᔪᖅᑐᐃᓗᑎᒃ ᐊᒻᒪ ᐱᓕᒻᒪᒃᓴᖅᑎᑦᑎᓗᑎᒃ ᐃᖅᑲᓇᐃᔭᖅᑎᑦ ᖃᐅᔨᓴᖅᑕᐅᓗᑎᒃ, ᐊᒻᒪᓗ ᐃᓄᐃᑦ ᐃᓕᖅᑯᓯᖓᓂᒃ ᐱᓕᕆᔪᓐᓇᕐᓂᕐᒧᑦ ᐱᓕᒻᒪᒃᓴᖅᑎᑕᐅᓗᑎᒃ. ᓄᓇᕗᑦ ᑐᙵᕕᒃᑯᑦ ᐃᓚᐅᖕᒥᔪᑦ ᐸᕐᓇᐃᑎᓪᓗᒋᑦ ᐳᕙᒡᓗᖕᒪᖔᑦ ᖃᐅᔨᓴᖅᑕᐅᔪᓂᒃ.
“ᐳᕙᒡᓗᖕᓇᖅ ᐱᑦᑕᐃᓕᑎᑕᐅᔪᓐᓇᖅᑐᖅ ᐊᒻᒪ ᒪᒥᑕᐅᔪᓐᓇᖅᖢᓂ ᐋᓐᓂᐊᖅ. ᖃᔅᓯᐅᓂᖏᑦ ᐳᕙᒡᓗᒃᑐᑦ ᐅᓄᕐᓂᖅᓴᐅᕗᑦ ᓄᓇᕗᒻᒥ ᐃᒡᓗᓂᒃ ᐃᓄᒋᐊᓗᐊᕐᓂᖏᓐᓄᑦ, ᓂᕿᖃᑦᑎᐊᖃᑦᑕᙱᓐᓂᖏᓐᓄᑦ ᐊᒻᒪ ᑐᓗᖅᑕᕈᑎᖃᖃᑦᑕᕐᓂᖓᓄᑦ ᐋᓐᓂᐊᕕᖕᒥ ᐱᔨᑦᑎᕋᖅᑕᐅᓂᕐᒧᑦ. ᑎᓕᐅᕆᕗᖓ ᑭᒃᑯᑐᐃᓐᓇᑦᑎᐊᓂᒃ ᓄᓇᕗᒻᒥ ᐃᓄᖕᒥᒃ ᐆᑎᕐᓇᖅᑐᓂᒃ, ᐊᐅᒪᔮᖅᑐᓂᒃ, ᓂᕆᔪᒪᑦᑎᐊᑲᑕᙱᑦᑐᓂᒃ ᖁᐃᖅᓱᑲᑕᒃᑐᓂᒡᓘᓐᓃᑦ ᓄᕙᐃᔭᖅᖢᑎᒃ ᐅᕝᕙᓘᓐᓃᑦ ᐊᐅᖕᒥᒃ ᖃᐅᔨᓴᖅᑕᐅᖁᓪᓗᒋᑦ ᐳᕙᒡᓗᙱᒃᑲᓗᐊᕐᒪᖔᑕ. ᐸᖕᓂᖅᑑᒥ, ᖁᕕᐊᓱᒃᐳᒍᑦ ᐱᓕᕆᖃᑎᖃᕈᓐᓇᕋᑦᑕ ᓄᓇᕗᑦ ᒐᕙᒪᒃᑯᓐᓂ ᐱᐅᓯᒋᐊᖅᑎᑦᑎᓇᓱᒃᖢᑕ ᖃᐅᔨᓴᖅᑕᐅᔪᓂᒃ ᓄᓇᓕᖕᓂ ᐅᑭᐊᒃᓵᖅ,” ᐅᖃᓚᐅᖅᐳᖅ ᓄᓇᕗᑦ ᑐᙵᕕᒃᑯᑦ ᐊᖓᔪᖅᑳᖓ ᐊᓗᑭ ᑰᑦᑎᖅ. “ᐳᐃᒍᖅᑕᐃᓕᒋᑦ ᐊᐃᑦᑐᕐᓗᒡᕕᐅᔪᒪᔪᖃᓱᐃᑦᑑᖕᒪᑦ. ᐃᓅᖃᑎᑎᑦ ᐃᒃᐱᒋᑦᑎᐊᕐᓗᒋᑦ ᖃᐅᔨᒃᑲᓐᓂᕐᓗᓯᓗ ᐋᓐᓂᐊᑉ ᒥᒃᓵᓄᑦ.”
ᑐᑭᓯᒋᐊᒐᒃᓴᖅᑕᖃᒃᑲᓐᓂᓛᖅᑐᖅ ᖃᐅᔨᓴᖅᑕᐅᓂᐊᖅᑐᓂᒃ ᑕᖅᑭᓂᒃ ᐊᒡᒋᖅᑐᓂᒃ ᐸᖕᓂᖅᑑᒥ ᓈᓚᐅᑎᒃᑯᑦ ᐊᒻᒪ ᐃᓄᖕᓄᑦ ᑐᓴᐅᒪᔪᓕᕆᔾᔪᑎᒃᑯᑦ.
-30-
ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:
ᑖᓇᕋᐃ ᓴᒧᕕᐅᓪ
ᐊᐅᓚᑦᑎᔨᐅᑲᐃᓐᓇᖅᑐᖅ ᑐᓴᐅᒪᔪᓕᕆᔨᓄᑦ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5949
ᑭᐊᕕᓐ ᖃᑉᓗᑦᓯᐊᖅ
ᑐᑭᒧᐊᒃᑎᑦᑎᔨ ᑐᓴᒐᒃᓴᓕᕆᔨᓄᑦ
ᓄᓇᕗᑦ ᑐᙵᕕᑦ ᑎᒥᖓᑦ
867-975-4941
