ᓴᒃᑯᑕᐅᑲᐅᑎᒋᔭᕆᐊᓕᒃ
(ᒫᑦᓯ 18, 2026 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓᓄᑦ ᐃᓚᒋᔭᐅᔪᑦ ᐊᒻᒪᓗ ᑲᑎᒪᔨᖏᑦ ᐃᓱᒪᓕᐅᓚᐅᖅᑐᑦ, ᒫᑦᓯ 13, 2026−ᖑᑎᓪᓗᒍ, ᒪᐅᓇᑐᐃᓐᓇᖅ ᓂᕈᐊᕐᓇᑉ ᐅᓪᓗᖓ ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓᓄᑦ ᑎᓰᕝᕙ 2026−ᒥ ᓂᕈᐊᕐᕕᒃᓴᖃᓚᐅᕋᓗᐊᖅᑐᑎᑦ ᒪᐃ 27, 2026−ᒥᖔᖅ ᓂᕈᐊᖅᑐᖃᓛᓕᕐᒥᒻᒪᑦ.
ᔮᓐᓄᐊᕆᒥ ᑕᒫᓂ ᐊᕐᕌᒍᒥ, ᓄᓇᕗᑦ ᑐᙵᕕᒃ ᑎᒥᖓᓄᑦ ᐃᓚᒋᔭᐅᔪᑦ ᑎᒃᑯᐊᖅᓯᓚᐅᖅᓯᒪᔪᑦ ᐊᖓᔪᖅᑳᑉ ᑐᖏᓕᐊᓂᒃ ᐹᓪ ᐃᕐᖓᐅᑦ, ᐊᖓᔪᖅᑳᕐᒧᑦ, ᐊᖓᔪᖅᑲᑉ ᐃᓂᖓ ᐃᓄᖃᕈᓐᓃᓚᐅᖅᑎᓪᓗᒍ. ᐃᓚᒋᔭᐅᔪᑦ ᐃᓱᒪᓕᐅᖅᑐᒥᓃᑦ ᐊᑐᓕᖁᔭᖓᓂᒃ ᓄᓇᕗᑦ ᑐᙵᕕᒃ ᑎᒥᖓᑕ ᑲᑎᒪᔨᖏᑦ, ᐊᒃᓱᕈᕐᓇᖅᓯᒪᒐᒥ ᓄᓇᕗᑦ ᑐᙵᕕᒃ ᑎᒥᖓ ᑭᒡᒐᖅᑐᐃᑦᑎᐊᕐᓗᑎᑦ ᐃᓄᓐᓂᒃ, ᒪᕐᕉᒃ ᑕᖅᑭᐅᓚᐅᖅᑑᓐᓂᒃ ᐊᑕᐅᓯᑐᐊᑯᓗᒻᒥᒃ ᐊᐅᓚᑦᑎᔨᖃᖅᑐᑎᑦ.
“ᐊᖓᔪᖅᑳᖅ ᐱᒻᒪᕆᐊᓗᒻᒥᒃ ᐱᓕᕆᐊᖃᓲᖅ ᑭᒡᒐᖅᑐᐃᓪᓗᓂ ᐃᓄᐃᑦ ᓂᐱᖏᖕᓂᒃ ᐊᒻᒪᓗ ᑲᒪᓪᓗᓂ ᓄᓇᕗᑦ ᑐᙵᕕᒃ ᑎᒥᖓᑕ ᑲᒪᒋᔭᕆᐊᓕᖏᑦ ᒪᓕᓪᓗᒋᑦ ᓄᓇᕗᑦ ᐊᖏᕈᑎᖓ,” ᐅᖃᖅᑐᓂ ᐊᖓᔪᖅᑳᖅ ᐹᓪ ᐃᕐᖓᐅᑦ. “ᑖᓐᓇ ᓂᕈᐊᕐᓇᖅ ᐃᓄᓐᓂᒃ ᐱᕕᖃᖅᑎᑦᑎᔪᖅ ᓂᕈᐊᕐᓗᑎᑦ ᐊᖓᔪᖅᑳᕐᒥᒃ ᐊᒻᒪᓗ ᖃᐅᔨᒪᓇᑦᑎᐊᖅᑎᑦᑎᒍᑕᐅᓪᓗᓂ ᓄᓇᕗᑦ ᑐᙵᕕᒃ ᑎᒥᖓ ᐊᖓᔪᖅᑳᖃᕐᓂᐊᕋᓗᐊᕐᒪᖔᖅ ᐊᒻᒪᓗ ᐊᖓᔪᖅᑳᑉ ᑐᖏᓕᐊᓂ ᓯᕗᒃᑲᖅᑕᖅᑎᐅᓂᐊᕐᓗᑎᒃ ᓄᓇᕗᑦ ᑐᙵᕕᒃ ᑎᒥᖓᓂ.”
ᐊᒻᒪᓗᒃᑲᓐᓂᖅ, ᐃᓚᒋᔭᐅᔪᑦ ᑎᒃᑯᐊᖅᓯᓚᐅᖅᑐᑦ ᐋᑕᒥ ᐃᑦᑐᐊᑦᓯᐊᕐᒥᒃ, ᐊᓪᓚᑦᑎ−ᑮᓇᐅᔭᓕᕆᔨᒧᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ, ᐊᖓᔪᖅᑳᑉ ᑐᖏᓕᐊ ᐃᓱᓕᒐᓱᐊᕐᓂᖓᓂᒃ ᑕᒪᐅᓇᑐᐃᓐᓇᖅ ᓂᕈᐊᕐᓂᖅ ᖃᐅᔨᒪᓇᑦᑎᐊᖁᓪᓗᒍ ᓯᕗᓕᖅᑎᐅᔪᑦ ᑲᔪᓯᓂᖃᐃᓐᓇᕐᓂᐊᕐᒪᑕ.
“ᑲᑎᒪᔩᑦ ᓯᕗᓪᓕᐅᑎᒻᒪᒍ ᖃᐅᔨᒪᑦᑎᐊᕐᓗᑎᑦ ᓄᓇᕗᑦ ᑐᙵᕕᒃ ᑎᒥᖓ ᐃᖅᑲᓇᐃᔮᕐᒥᓂᒃ ᐱᓕᕆᐊᖃᐃᓐᓇᕋᓗᐊᕐᒪᖔᑦ ᓄᖅᑲᖅᑎᑕᐅᙱᓪᓗᑎᑦ,” ᐅᖃᖅᑐᓂ ᐃᕐᖓᐅᑦ. “ᑎᒃᑯᐊᖅᓯᓂᖅ ᐊᖓᔪᖅᑳᑉ ᑐᖏᓕᐊᓂ ᐃᓂᒋᑲᐃᓐᓇᕐᓂᐊᕐᓗᓂᐅᒃ ᐱᔪᓐᓇᑎᑦᑎᓂᓕᒃ ᐊᓯᔾᔨᖅᑕᓗᐊᙱᑦᑐᒥᒃ ᓯᕗᓕᖅᑎᖃᕐᓂᐊᕋᑦᑕ ᐱᒻᒪᕆᐅᔪᒥᓪᓗ ᐱᓇᓱᐊᒐᑦᑎᓂᒃ ᑲᒪᓗᑕ ᐅᐸᓗᖓᐃᔭᖅᑎᓪᓗᑕ ᑕᒪᐅᓇᑐᐃᓐᓇᖅ ᓂᕈᐊᕐᓂᐅᓛᖅᑐᒥᒃ.”
ᑲᔪᖏᖅᓴᖅᑐᒋᑦ ᑕᒪᐃᓐᓂ ᐃᓄᐃᑦ ᓂᕈᐊᕈᓐᓇᖅᑐᑦ ᓂᕈᐊᓛᕐᓂᖏᓐᓄᑦ ᒪᐅᓇᑐᐃᓐᓇᖅ ᓂᕈᐊᕐᓇᒥ ᒪᐃ 27, 2026-ᒥ, ᓄᓇᕗᑦ ᑐᙵᕕᒃ ᑎᒥᖓᑕ ᑲᑎᒪᔨᖏᑦ ᐃᓱᒪᓕᐅᖅᓯᒪᕗᑦ ᓄᓇᕗᑦ ᑐᙵᕕᒃ ᑎᒥᖓ ᐊᑐᐃᓐᓇᐅᒪᑎᒃᑲᓐᓂᕐᓂᐊᖅᑕᖓ $100 ᓂᐅᕕᕈᓐᓇᐅᑎᒥᒃ ᐱᓕᕆᐊᖅ, ᑮᓇᐅᔭᖃᖅᑎᑕᐅᒐᔭᖅᑐᓂ ᓄᓇᒦᙶᖅᑐᓂᒃ ᑮᓇᐅᔭᑦ ᐃᓯᖅᐸᓪᓕᐊᔪᓂᒃ ᐃᓄᐃᑦ ᓄᓇᖁᖏᓐᓂᒃ ᐅᔭᕋᓐᓂᐊᕋᒃᓴᓂᒃ ᕿᓂᖅᐸᑦᑐᑦ ᐊᑭᓕᐅᑎᒋᓲᖏᑦ.
ᑐᑭᓯᒋᐊᕈᑎᒃᑲᓐᓃᑦ ᒪᐅᓇᑐᐃᓐᓇᖅ ᓂᕈᐊᕐᓇᑉ ᒥᒃᓵᓄᑦ ᐊᒻᒪᓗ ᓂᐅᕕᕈᓐᓇᐅᑎᑉ ᐱᓕᕆᐊᖓᓄᑦ ᑐᓴᖅᑎᑕᐅᓛᖅᑐᑦ ᒫᓐᓇᕈᓗᒃ.
-30-
ᐱᕙᓪᓕᐊᔪᓕᕆᔨᒃᑯᑦ ᖃᐅᔨᒋᐊᕈᓐᓇᖅᑐᑦ:
ᐳᕉᑎ ᓚᕋᒃ
ᑐᑭᒧᐊᑦᑎᑦᑎᔨᐅᑲᐃᓐᓇᖅᑐᖅ ᑐᓴᐅᒪᔪᓕᕆᓂᕐᒧᑦ
ᓄᓇᕗᑦ ᑐᙵᕕᒃ ᑎᒥᖓ
