ᐃᕐᖐᓐᓇᖅ ᓴᖅᑭᖅᑕᐅᒋᐊᓕᒃ
(ᓯᑉᑎᒻᐱᕆ 12, 2025 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓᓄᑦ (ᑐᙵᕕᒃ) ᐊᖓᔪᖅᑳᖅ ᔨᕆᒥ ᑑᕐᖔᓗᒃ ᐅᖃᐅᓯᖃᖅᑲᐅᔪᖅ ᑭᒡᒍᑎᒥᓂᒃ ᑲᓇᑕ ᒐᕙᒪᖓᑕ ᐊᖏᔫᑎᓄᑦ ᐱᓕᕆᐊᓄᑦ ᑐᓴᖅᑎᑦᓯᒍᑎᒋᖅᑲᐅᔭᖓᓄᑦ ᐱᓇᓱᐊᕈᓯᕐᒥ.
“ᓂᕆᐊᓚᐅᕋᓗᐊᕋᑦᑕ ᓄᓇᕗᒻᒥ ᐊᖏᔫᑎᓄᑦ ᑲᓇᑕ−ᐱᕙᓪᓕᐊᔾᔪᑎᒃᓴᖓᓄᑦ ᐱᓕᕆᐊᑦ ᐃᓚᐅᒐᔭᕆᐊᖏᑦ ᒐᕙᒪᑐᖃᒃᑯᑦ ᐱᒋᐊᕈᑎᖏᓐᓂ,” ᐅᖃᖅᑲᐅᔪᖅ ᐊᖓᔪᖅᑳᖅ ᑐᕐᖔᓗᒃ. “ᐊᑕᐅᑦᓯᒃᑯᑦ, ᑐᙵᕕᒃᑯᑦ ᓂᕆᐅᒋᔭᐅᕗᖅ ᑲᓇᑕ ᐃᓕᓴᖅᓯᖁᓪᓗᒍ ᒍᕇᔅ ᕙᐃ ᐊᖅᑯᑎ ᑐᓚᑦᑕᕕᒡᓗ ᕿᑎᕐᒥᐅᓂ ᐱᓕᕆᐊᖑᓂᖓ ᐋᖅᑭᒍᑕᐅᓂᐊᕐᓂᖓᓂᒃ ᑲᓇᑕᒧᑦ ᓄᓇᒋᔭᑦᑎᓐᓄᑦ. ᑕᑯᔪᒪᓂᐊᖅᑕᕗᑦ ᑲᓇᑕ ᓯᕗᒧᐊᑦᑎᓪᓗᒍ ᑐᐊᕕᕐᓇᖅᑎᑕᐅᓗᓂ ᑖᓐᓇ ᐊᓯᖏᓪᓗ ᐱᑕᖃᕆᐊᓕᒻᒪᕇᑦ ᐱᓕᕆᐊᑦ.”
ᑐᙵᕕᒃᑯᑦ, ᐱᓕᕆᖃᑎᖃᖅᑐᑎᒃ ᓄᓇᕗᑦ ᒐᕙᒪᖓᓂᒃ (GN), ᓯᕗᒧᐊᒃᑎᑦᓯᓯᒪᕗᑦ ᓯᑕᒪᓂᒃ ᓯᕗᓪᓕᐅᑎᔭᕆᐊᓕᖕᓂᒃ ᐱᓇᓱᐊᒐᑦᓴᓂᒃ ᑕᕝᕘᓇ GN-NTI ᐅᑭᐅᖅᑕᖅᑐᒥ ᓄᓇᒥᒃ ᐃᓐᓃᓯᒪᓂᕐᒧᑦ ᐊᒻᒪᓗ ᒥᐊᓂᖅᓯᓂᕐᒧᑦ ᑐᑭᒧᐊᒍᑎᒃᓴᓂᒃ: ᒍᕇᔅ ᕙᐃ ᐊᖅᑯᑎ ᑐᓚᑦᑕᕕᒡᓗ, ᐃᖃᓗᓐᓂ ᑰᓕᕆᓂᖅ ᐆᒻᒪᖅᑯᑎᒃᓴᒥᒃ ᐱᓕᕆᐊᖅ, ᑭᕙᓪᓕᕐᒥ ᐆᒃᑳᓪᓕᕆᓂᕐᒧᑦ ᑲᓲᒪᔾᔪᑎ, ᐊᒻᒪᓗ ᕿᑭᖅᑕᔪᐊᒥ ᐃᑎᔪᒥᒃ ᑕᕆᐅᕐᒥ ᑐᓚᑦᑕᕐᕕᒃ. ᑖᒃᑯᐊ ᐃᓄᓐᓄᑦ−ᓯᕗᓕᖅᑕᐅᔪᑦ ᐱᖁᑎᕐᔪᐊᑦ ᐱᓕᕆᐊᑦ ᓴᕐᖓᑎᑦᓯᓂᐊᖅᑐᑦ ᑲᓇᑕᒥ ᐅᑭᐅᖅᑕᖅᑐᒥ ᓄᓇᒥᒃ ᐃᓐᓃᓯᒪᓂᕐᒧᑦ, ᐃᑯᓪᓚᕈᑕᐅᓗᓂ ᓱᖏᖅᓲᑎᖃᕐᓂᕐᒥᒃ ᓄᓇᒦᙶᖏᑦᑐᓂᒃ ᐆᒻᒪᖅᑯᑎᓕᐅᕈᑎᓂᒃ, ᓯᕗᒧᐊᒃᑎᑦᑎᓗᓂ ᑲᓲᒪᔾᔪᑎᓂᒃ ᓄᓇᕗᑦ ᓄᓇᓕᖏᓐᓄᑦ, ᐊᒻᒪᓗ ᐱᕚᓪᓕᕈᑕᐅᓗᓂ ᐃᓄᐃᑦ ᐃᓅᓯᖏᓐᓄᑦ ᒪᑭᒪᔾᔪᑎᖏᓐᓄᓪᓗ ᖃᓄᐃᙱᑦᓯᐊᕈᑎᒃᓴᖏᓐᓄᑦ.
ᑲᓇᑕ ᐊᖏᔫᑎᓂᒃ ᐱᓕᕆᐊᓂᒃ ᑐᓴᖅᑎᑦᓯᓂᕆᓚᐅᖅᑕᖓ ᐱᖕᒪᕆᐅᕗᖅ ᐊᓪᓗᐸᓪᓕᐊᓂᕐᒧᑦ ᓴᕐᖓᑎᑦᓯᒍᑎᒃᓴᓂᒃ, ᓱᖏᐅᑎᓯᒪᓂᖅᓴᐅᓗᓂ ᑲᓇᑕᒥ. ᑐᒥᕕᒃᑯᑦ ᐱᓕᕆᖃᑎᖃᑦᓯᐊᖏᓐᓇᓂᐊᖅᑐᑦ ᒐᕙᒪᑐᖃᒃᑯᓐᓂᒃ ᐊᒻᒪᓗ ᐅᑭᐅᖅᑕᖅᑐᒥ ᒐᕙᒪᖓᓂᒃ ᑲᑐᔾᔨᖃᑎᖃᕐᓗᓂ ᓄᓇᕗᒻᒥ ᐋᖅᑭᐸᓪᓕᐊᓂᕐᒧᑦ ᐱᓕᕆᐊᑦ ᑕᕝᕙᓃᖃᑕᐅᓛᖁᓪᓗᒋᑦ ᑲᓇᑕ ᑭᖑᓪᓕᕐᒥ ᑐᓴᖅᑎᑦᓯᒍᑎᒋᓂᐊᖅᑕᖓᓂᒃ ᓯᕗᓪᓕᐅᑎᔭᕆᐊᓖᑦ ᐱᕙᓪᓕᐊᑎᑕᐅᓂᖏᓐᓂ.
-30-
ᑐᓴᕋᑦᓴᙳᖅᑎᑕᐅᔪᓂᒃ ᖃᐅᔨᒋᐊᕐᕕᒃᓴᖅ:
ᐃᕙᓗᐊᕐᔪᒃ ᒦᕆᑦ
ᑐᑭᒧᐊᒃᑎᑦᑎᔨᖓ ᑐᓴᐅᒪᔾᔪᑎᓕᕆᔨᒃᑯᑦ
ᓄᓇᕗᑦ ᑐᙵᕕᒃ ᑎᒥᖓ
