ᑐᙵᕕᒃᑯᑦ ᐊᖏᕈᑎᖃᖅᐳᑦ ᑲᓇᑕᓕᒫᕐᒥ ᐃᓄᐃᑦ ᐸᕐᓇᒍᑎᖏᓐᓂᒃ ᑲᒪᒋᐊᕈᑕᐅᓪᓗᓂ ᕿᙳᖅᑕᐅᓯᒪᔪᑦ ᐊᒻᒪ ᐃᓄᐊᖅᑕᐅᓯᒪᔪᓄᑦ ᓄᓇᖃᖅᑳᓯᒪᔪᓂᒃ ᐊᕐᓇᓂᒃ ᐊᒻᒪ ᓱᕈᓯᓛᓂᒃ ᖃᐅᔨᓇᓱᐊᖁᔨᓪᓗᑎᒃ ᑲᓇᑕᓕᒫᕐᒥ
(ᔫᓂ 4, 2021 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓ (ᑐᙵᕕᒃᑯᑦ) ᐊᖏᕈᑎᖃᖅᐳᑦ ᑲᓇᑕᓕᒫᕐᒥ ᐃᓄᐃᑦ ᐸᕐᓇᒍᑎᖓᓐᓂᒃ ᓴᖅᑭᑕᐅᓚᐅᕐᑐᒥᒃ ᐃᓄᐃᑦ ᑕᐱᕇᑦ ᑲᓇᒥ ᐊᒻᒪ ᐸᐅᒃᑑᑎᒃᑯᑦ ᐃᓄᐃᑦ ᐊᕐᓇᐃᑦ ᑲᓇᑕᒥ.
ᑲᓇᑕᐅᑉ ᒐᕙᒪᒃᑯᖏᑦ, ᓄᓇᕗᑦ ᒐᕙᒪᒃᑯᖏᑦ ᐊᒻᒪ ᐃᓄᐃᑦ ᑎᒥᖁᑎᖏᑦ ᐃᖅᑲᓇᐃᔭᖃᑎᒌᒋᐊᖃᖅᐅᑦ ᐸᓚᕐᓯᕚᓪᓕᖁᓪᓗᒍ ᓂᖃᕐᓂᐅᔪᖅ ᓄᓇᓕᒋᔭᑦᑎᓐᓂ. ᑲᓇᑕᓕᒫᕐᒥ ᐃᓄᐃᑦ ᐸᕐᓇᒍᑎᖓ ᐊᑐᓕᖁᔨᓯᒪᕗᖅ ᐱᕕᒃᓴᖃᕐᑎᑕᐅᓗᓂ ᐱᕚᓪᓕᕈᑎᒃᓴᐅᔪᓂᒃ ᐱᒻᒪᕆᐅᔪᓄᑦ ᐱᔨᑦᑎᕈᑎᓄᑦ ᐊᒻᒪ ᑲᒪᒋᔭᐅᒋᐊᕐᓗᑎᒃ ᐊᑭᑐᔪᓂᑦ ᐊᖃᕐᕆᔾᔪᑎᑖᕆᐊᖃᓐᓂᖅ.
ᑲᓇᑕᓕᒫᕐᒥ ᐃᓄᐃᑦ ᐸᕐᓇᒍᑎᖓᑦ ᐃᒪᓐᓇᐃᒍᑕᐅᖃᑦᑕᕐᓯᒪᔪᓂᒃ ᐃᖅᑯᓪᓕᐅᑎᖃᕐᓯᒪᓪᓗᓂ ᓯᕗᓂᑦᑎᓐᓂ ᐊᑑᑎᒍᑕᐅᖃᑦᑕᕐᓯᒪᔪᓂᒃ ᐃᓅᖃᑎᒌᓄᑦ−ᐃᓕᖅᑯᓯᓕᕆᓂᒃᑯᑦ ᑮᓇᐅᔾᔭᓵᒃᓴᑦ ᐊᒻᒪ ᐱᓕᕆᕕᓂ ᐱᔾᔪᑕᐅᓕᕐᓯᒪᓂᖓ ᓂᖓᕐᓂᕐᒧᑦ. ᐃᓄᐃᑦ ᐊᕐᓇᐃᑦ ᐊᒻᒪ ᓱᕈᓯᓛᑦ ᓵᙵᕕᐅᕙᒻᒪᑕ ᓈᖕᒪᖏᒻᒪᕆᒃᑐᓂᒃ ᐊᒥᓲᓪᓗᑎᓪᓗ ᓂᖓᕐᓂᑰᖅᑐᑦ, ᓴᖅᑭᓚᕿᓯᒪᔪᑦ ᑕᓐᓇᓴᐃᓐᓇᓕᔪᓐᓇᕋᑎᒃ ᐊᒻᒪ ᑮᓇᐅᔭᕐᑎᒍᑦ ᑐᖓᐅᑦᓯᕙᒃᑐᑎᒃ ᐃᓄᐃᑦ ᖃᐅᔨᒪᓂᕐᒥᒍᑦ ᑭᐅᔾᔪᑎᒋᕙᒃᑕᖏᓐᓄᑦ ᐱᔭᕆᐊᖃᖅᑕᖏᓐᓂᒃ ᓄᓇᓕᑦᑎᓐᓂ.
ᓄᓇᕗᖕᒥ ᐃᒡᓗᓂᒃ ᐊᒥᒐᓚᑦᑎᓂᒃ ᐊᒃᓱᒻᒪᕆᐊᓗᒃ ᐊᑦᑐᐃᑲᒻᒪᒃᓯᒪᒻᒪᑦ ᐊᕐᓇᓂᒃ ᓱᕈᓯᓛᓂᓪᓗ; ᐃᒪᓐᓇᐃᓚᕿᔾᔪᑎᐅᕙᖕᒪᑦ ᑲᒪᔾᔪᓯᕆᔭᐅᔪᑦ ᐃᓚᔮᕇᑦ ᐱᔪᓐᓇᕋᑎᒃ ᐊᑑᑎᖃᓪᓚᕆᒃᑐᓂᒃ ᐱᔨᑦᑎᕈᑎᓂᒃ ᕿᒫᔭᕆᐊᖃᕈᑎᒃ ᓂᖓᖅᑐᖃᖅᑎᓪᓗᒍ ᐊᖏᕐᕋᒥᓐᓂ. ᑲᒪᓪᓗᓂ ᓯᕗᓂᑦᑎᓐᓂ ᐊᑑᑎᖃᕈᑕᐅᓯᒪᔪᓂᒃ ᐊᒃᓲᕈᓴᒍᑎᐅᖏᓐᓇᕐᒪᑦ ᐱᑦᑎᐊᕐᑕᐅᙱᑦᑐᓄᑦ ᐃᓚᔮᕇᓄᑦ, ᐃᓚᖃᓐᓂᕐᒧᑦ ᐊᒻᒪ ᓄᓇᓕᖕᓄᑦ. ᐃᓕᖅᑯᓯᑐᖃᓐᓂᒃ ᐊᑐᓕᕐᑎᑦᑎᑲᓐᓂᕐᓂᖅ ᐊᒻᒪ ᓇᖕᒥᓂᖅ ᐃᓱᒪᓕᐅᕈᑎᖃᕈᓐᓇᕐᓂᖅ ᒪᒥᓴᓐᓂᒨᖅᐸᓪᓕᐊᑎᓪᓗᑕ ᐊᓯᖅᑯᒃᕕᖃᕆᐊᖃᓐᓂᐊᖏᓚᖅ ᐱᒻᒪᕆᐅᓪᓗᓂ, ᐱᖃᓯᐅᑎᓗᒋᑦ ᖃᓄᖅ ᐊᒻᒪ ᓱᓇᑦ ᐱᔨᑦᑎᕈᑏᑦ ᐱᑕᖃᖅᑎᑕᐅᔪᑦ. ᑲᔪᖏᕆᐊᖃᕋᑦᑕ ᑲᔪᖏᕆᓗᒍ ᓇᖕᒥᓂᖅ ᐃᓱᒪᓕᐅᕈᑎᖃᕈᓐᓇᖁᓪᓗᒋᑦᖅ ᐃᓄᐃᑦ ᑮᓇᐅᔭᕐᑎᒍᑦ ᐊᔪᕐᓴᖏᓐᓂᕐᓴᐅᓗᑎᒃ ᐊᒻᒪ ᓯᕗᒧᐊᒃᕕᖃᕈᓐᓇᖁᓪᓗᒋᑦ.
“ᐃᓄᐃᑦ ᐊᕐᓇᐃᑦ, ᓱᕈᓯᓛᓪᓗ ᐊᒻᒪ ᐊᕐᓇᐅᒍᓂ ᐊᖑᑕᐅᒍᓂ ᐃᓅᓯᒋᒃᑎᐊᕐᓗᑎᒃ ᐱᖏᓐᓇᖏᑦᑐᒥ ᐃᓅᓇᓱᐊᕆᐊᖃᕐᒪᑕ,” ᐅᖅᑲᖅᑐᖅ ᑰᑦᑎᖅ. “ᑐᑭᓯᑦᑎᐊᕐᐸᒃᑲ ᐊᒻᒪ ᐊᒃᓱᐊᓗᒃ ᖁᔭᒋᓪᓗᒋᑦ ᐊᓐᓇᐅᒪᔪᓐᓇᕐᓯᒪᔪᑦ ᑲᒪᔪᓐᓇᕐᓯᒪᒐᕕᑦ ᐱᑦᑎᐊᕐᑕᐅᖁᔨᓪᓗᑎᑦ ᐊᒻᒪ ᓇᓕᒧᒌᒥ ᑲᒪᒋᔭᐅᖁᔨᓪᓗᑎᒃ. ᐱᓕᕆᐊᕆᔭᐅᓂᖓ ᑲᓇᑕᓕᒫᕐᒥ ᐃᓄᖕᓄᑦ ᐸᕐᓇᒍᑦ ᑐᐊᕕᕐᓇᕆᓇᕐᒪᑦ ᐊᒻᒪ ᐱᔪᓐᓇᕐᓂᓕᒫᕋᓄᑦ ᑲᒪᒋᓂᐊᕆᕙᕋ,” ᐅᖃᖅᑐᖅ ᐊᓗᑭ ᑰᑦᑎᖅ, ᐊᖓᔪᖅᑳᖓᑦ ᑐᙵᕕᒃᑯᑦ.
ᐅᓪᓗᒥ ᓇᓪᓕᐅᑎᕈᖅ ᐅᑭᐅᒃ ᒪᕐᕉᒃ ᓈᓯᒪᓕᕐᒪᑦ ᓴᖅᑭᑕᐅᓚᐅᕐᓯᒪᑎᓪᓗᒋᑦ ᕿᙳᖅᑕᐅᓯᒪᔪᑦ ᐊᒻᒪ ᐃᓄᐊᖅᑕᐅᓯᒪᔪᑦ ᓄᓇᖃᖅᑳᓯᒪᔪᑦ ᐊᕐᓇᐃ ᐊᒻᒪ ᓂᕕᐊᕐᓯᐊᑦ ᑭᓪᓕᓯᓂᐊᕐᑎᖏᑦ ᐃᓂᕐᓯᒪᔪᓂᒃ ᐅᓂᒃᑳᓕᐅᕈᑎᖃᓚᐅᕐᓯᒪᒻᒪᑕ.
ᑕᑎᖃᕆᐊᓕᖕᓄᑦ ᐅᖄᓚᕕᒃᓴᑦ ᐊᑦᑐᕐᑕᐅᔪᓄᑦ ᐱᓪᓗᒋᑦ ᕿᙳᖅᑕᐅᓯᒪᔪᑦ ᐊᒻᒪ ᐃᓄᐊᖅᑕᐅᓯᒪᔪᑦ ᓄᓇᖃᖅᑳᓯᒪᔪᑦ ᐊᕐᓇᐃ ᐊᒻᒪ ᓂᕕᐊᕐᓯᐊᑦ, ᐊᕐᓇᐅᖃᑎᒥᓂᒃ/ᐊᖑᑕᐅᖃᑎᒥᓂᒃ ᐊᐃᒃᐸᖃᓲᓄᑦ LGBTQQIA+
ᐃᑲᔪᕐᑕᐅᑦᑕᐅᑎᒋᔭᕆᐊᖃᕈᕕᑦ ᐃᓱᒪᔮᓗᐊᕈᕕᑦ, ᐅᖄᓚᔪᓐᓇᕐᐳᑎᑦ 1-844-413-6649. ᑖᓐᓇ ᑲᓇᑕᓕᒫᕐᒥ, ᐊᑭᓕᕆᐊᑐᙱᑦᑐᖅ ᐅᓪᓗᒃᑯ ᐅᓐᓄᐊᑯᓪᓗ ᐱᓱᓇᐊᕈᓯᓕᒫᖅ ᐊᒃᓱᕈᓗᐊᕐᑐᓄᑦ ᐅᖄᓚᕕᐅᔪᓐᓇᕐᑐᖅ ᑕᑎᖃᕐᕕᒃᓴᖅ ᑭᓇᑐᐃᓐᓇᕐᒧᑦ ᐃᑲᔪᕐᑕᐅᔭᕆᐊᖃᑦᑐᒧᑦ ᐱᓪᓗᒋᒃ ᕿᙳᖅᑕᐅᓯᒪᔪᑦ ᐊᒻᒪ ᐃᓄᐊᖅᑕᐅᓯᒪᔪᑦ ᓄᓇᖃᖅᑳᓯᒪᔪᑦ ᐊᕐᓇᐃ ᐊᒻᒪ ᓂᕕᐊᕐᓯᐊᑦ. ᖃᓄᐃᖁᓇᒃ ᐊᑯᓂᐅᓂᕐᓴᒨᖓᔪᒥᒃ ᑕᑎᖃᖅᑎᑕᐅᔪᓐᓇᕆᕗᑎᒃ ᐃᓱᒪᔮᖁᓇᒃ ᐃᓅᓯᓕᕆᔭᐅᓗᑎᑦ, ᓄᓇᓕᖕᓃᒃᑐᓄᑦ ᐃᓱᒪᔮᓗᐊᕐᑐᑦ ᑕᑎᖃᖅᑎᑕᐅᔪᓐᓇᕐᕕᑕᖃᕆᕗᑦ ᐊᒻᒪ ᐃᓕᖅᑯᓯᕗᑦ ᐊᑐᕐᓗᒍ ᐊᒻᒪ ᐊᐅᓪᓚᕈᑎᖏᓐᓄᑦ ᐊᑮᑦ ᐊᑭᓕᐅᑕᐅᔪᓐᓇᕐᑐᑦ ᐃᓐᓇᕐᓄᑦ ᐊᒻᒪ ᐱᖅᑯᓯᑐᖃᑦᑎᒍᑦ ᒪᒥᓴᐃᔨᓄᑦ.
ᐃᓄᐃᑦ ᓱᕈᓯᓛᒃᑯᕕᓕᖕᓄᑦ ᐊᐅᓪᓚᕐᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᕐᓯᒪᔪᑦ ᐊᓐᓇᒃᓯᒪᔪᑦ ᐊᒻᒪ ᐃᓚᔮᖏᑦ ᐊᑐᐃᓐᓇᐅᕕᐅᕗᑦ ᐃᓱᒪᒥᒍᑦ ᖃᓄᐃᖁᓇᒋᑦ, ᐃᓱᒪᔮᕐᓂᒃᑯᑦ ᐊᒻᒪ ᐱᖅᑯᓯᕐᒥᒍᑦ ᑕᑎᖃᕈᑎᓂᒃ ᐅᕘᓇ ᐊᓪᓚᐃᑦ ᐊᐅᓪᓚᕐᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᕐᓯᒪᔪᓄᑦ ᑕᑎᖃᕈᑎᑦ ᐱᓕᕆᔾᔪᑎᑎᒍᑦ
ᐊᒻᒪ ᐱᖃᓯᐅᔾᔨᔪᑦ ᐃᓅᓯᓕᕆᔭᐅᔾᔪᑎᓂᒃ ᐃᓄᒃᑐᑦ ᐱᓕᕆᖃᑕᐅᒍᑎᖏᑦᑎᒍᑦ ᓄᓇᕗᖕᒥ ᐃᓅᓯᖃᑦᑎᐊᓂᕐᒧᑦ ᑎᒥᐅᔪᓂ; ᐊᒃᓱᕉᓴᓗᐊᕐᑐᓄᑦ ᐅᖄᓚᕕᐅᔪᓐᓇᕐᑐᖅ ᒪᑐᐃᖓᕙᒃᑐᖅ ᐅᓪᓗᓕᒫᖅ ᐅᓐᓄᐊᓕᒫᖅ ᐅᕗᖓ 1 (866) 925-4419. ᐃᓄᐃᑦ ᐅᖄᓚᔪᓐᓇᕆᕗᑦᑕᐅᖅ ᐅᕗᖓ ᐃᑲᔪᕐᑕᐅᕕᖕᒧᑦ (Hope for Wellness Helpline), 1 (855) 242-3310, ᐃᓄᒃᑑᕈᓐᓇᕐᑐᒥᒃ ᐃᓅᓯᓕᕆᔨᖃᖅᑐᑦ.
ᑎᓕᐅᕈᑎᒋᕙᕗᑦ ᐃᓄᖕᓄᑦ ᐊᑑᑎᖃᖅᑎᑕᐅᖁᓪᓗᒋᑦ ᑖᒃᑯᐊ ᐱᔨᑦᑎᕈᑏᑦ ᐊᒻᒪ ᐊᓯᖏᑦ ᐊᔾᔨᒌᒋᑦᑐᑦ ᒪᒥᓴᐃᒍᑏᑦ.
-30-
ᑐᑭᓯᒋᐊᒃᑲᓐᓂᕈᓐᓇᕐᐳᑎᑦ ᐅᕗᖓ:
ᑭᐅᕋᓐ ᕙᓚᐅᕋᑎ
ᑐᑭᒧᐊᒃᑎᑦᑎᔨᐅᑲᐃᓐᓇᕐᑐᖅ ᑐᓴᐅᒪᖃᑦᑕᐅᑎᓕᕆᔨᒃᑯᓐᓄᑦ
ᓄᓇᕗᑦ ᑐᙵᕕᒃ ᑎᒥᖓ
ᐅᖄᓚᐅᑖ: (867) 975-4900/ᐊᑭᓕᕆᐊᑐᙱᑦᑐᖅ: 1-888-646-0006
www.tunngavik.com
