ᓄᓇᕗᑦ ᑐᙵᕕᒃᑯᑦ ᐊᖓᔪᖅᑳᖓᑦ ᑳᑎ ᑕᐅᑐᙱ ᐅᑉᓗᒥ ᖁᕕᐊᓱᒍᑎᖃᖅᑲᐅᕗᖅ ᐅᐱᒍᓱᒃᑐᓂᓗ ᑲᓇᑕᐅᑉ ᐊᖓᔪᖅᑳᕐᔪᐊᑖᖅᑲᐅᖓᓂᒃ ᔭᔅᑕᓐ ᑐᕉᑐᒥᒃ ᓂᕈᐊᖅᑕᐅᒻᒪᑦ.
“ᑎᓕᐅᕐᐸᕋ ᐊᖓᔪᖅᑳᕐᔪᐊᑖᖅᑲᐅᖅ ᑐᕉᑐ ᐅᒃᑯᐃᖔᕐᑎᐊᖁᓪᓗᒍ ᐊᒻᒪ ᐃᒃᐱᒍᓱᑦᑎᐊᖁᓪᓗᒍ ᐃᖅᑲᓇᐃᔭᖃᑎᖃᓐᓂᒃᑯᑦ ᐃᓄᖕᓂᒃ ᐊᒻᒪᓗ ᓄᓇᕗᑦ ᑐᙵᕕᒃᑯᓐᓂᒃ, ᐊᒻᒪᓗ ᕿᓚᓈᖅᐳᖓ ᐊᑲᐅᔪᒥᒃ ᐱᓕᕆᖃᑎᒋᑦᑎᐊᕈᒪᓪᓗᒍ ᐱᓕᕆᐊᖃᐃᓐᓇᑎᓪᓗᑕ ᐊᑐᓕᕐᑎᑦᑎᓂᕐᒥᒃ ᓄᓇᕗᖕᒥ ᓄᓇᑖᕈᑏᑦ ᐊᖏᕈᑎᖏᓐᓂᒃ. ᓄᓇᕗᑦ ᑐᙵᕕᒃᑯᑦ ᑲᑎᒪᖃᑎᖃᕐᒪᑕ ᒥᔅᑕ ᑐᕉᑐᒥᒃ ᐊᕐᕌᒍᒋᐊᑦᑎᓐᓂ, ᑐᙵᓇᓚᐅᕐᒪᑦ ᐃᖅᑲᓇᐃᔭᖃᑎᖃᑦᑎᐊᕈᒪᓪᓗᓂ ᐃᓄᖕᓂᒃ ᑲᒪᒋᔭᐅᑦᑎᐊᕈᓐᓇᖁᓪᓗᒋᑦ ᓄᓇᑖᕈᑎᒋᓯᒪᔭᕗᑦ ᐊᒻᒪᓗ ᐱᔾᔪᑕᐅᔪᑦ ᓯᕗᓪᓕᕐᐹᖑᑎᑕᐅᓂᐊᕐᓗᑎᒃ ᒐᕙᒪᒋᔭᖓᓄᑦ,” ᐅᖃᖅᑐᖅ ᑕᐅᑐᙱ.
“ᖁᕕᐊᖕᒪᕆᒃᐳᖓ ᖃᐅᔨᓚᐅᕋᒪ ᓈᓚᓚᐅᕐᒪᑦ ᑲᓇᑕᒥᐅᑕᓂᒃ ᐊᒻᒪᓗ ᖃᐅᔨᓇᓱᐊᖁᔨᓂᐊᕐᓂᕋᖅᓯᒪᒻᒪᑦ ᐅᑎᖏᓐᓇᕐᓯᒪᔪᓂᒃ ᐊᒻᒪ ᐃᓄᐊᕐᑕᐅᓯᒪᔪᓂᒃ ᓄᓇᖃᖅᑳᖅᓯᒪᔪᓂᒃ ᐊᕐᓇᓂᒃ ᑲᓇᑕᒥ. ᖃᐅᔨᓇᓱᐊᑐᖃᕆᐊᖃᕐᒪᑦ ᐊᒻᒪ ᐱᒻᒪᕆᐅᓪᓗᓂ ᐱᕚᓪᓕᖁᓪᓗᒍ ᑲᓇᑕᐅᑉ ᑲᒪᓂᕆᕙᒃᑕᖏᑦ ᓄᓇᖃᖅᑳᖅᓯᒪᔪᓂᒃ ᐊᕐᓇᓂᒃ ᐊᒻᒪ ᐱᓂᕐᓗᒃᑕᐅᕙᓐᓂᖏᓐᓂᒃ ᓄᓇᖃᖅᑳᖅᓯᒪᔪᑦ ᐊᕐᓇᐃᑦ,” ᐅᖃᖅᑐᖅ ᑕᐅᑐᙱ.
ᑕᐅᑐᙱ ᐅᐱᒋᔭᖃᓚᐅᕆᕗᑦ ᓕᐳᕈᒃᑯᓐᓄᑦ ᓂᕈᐊᖅᑕᐅᔪᒥᒃ ᕼᐊᓐᑕ ᑐᑐᒥᒃ ᓂᕈᐊᖅᑕᐅᓂᖓᓂᒃ ᓄᓇᕗᖕᒥ ᑲᓇᑕᐅᑉ ᑲᑎᒪᕕᕐᔪᐊᖓᓄᑦ ᒪᓕᒐᓕᐅᕐᑎᐅᓂᐊᕐᓕᕐᓂᖓᓄᑦ, ᐊᒻᒪᓗ ᖁᔭᓐᓇᒦᕐᑐᓂᐅᒃ ᓂᕈᐊᖅᑕᐅᓕᖅᑭᖏᑦᑐᖅ ᓕᐅᓇ ᐊᒡᓘᒃᑲᖅ ᐱᔨᑦᑎᓐᓂᕆᓯᒪᔭᖓᓄᑦ ᓄᓇᕗᖕᒥ.
