(ᐊᐅᒡᒍᓯ 5, 2014 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᓐᖓᕕᒃᑯᑦ ᐊᖏᔪᖅᑳᖓ ᑳᑎ ᑕᐅᑐᙱ ᓇᓗᓇᐃᖅᓯᔪᖅ ᐅᓪᓗᒥ ᐃᑲᔫᓯᐊᑑᓐᓂᒃ ᔫᓯ ᐊᒪᐅᔭᖅ ᑯᓱᒐᖅ ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑎᒥᒃ 2014. ᐃᓕᓴᐱ ᐅᔭᕋᒃ ᒪᒃᓕᓐᑖᒃ ᐊᕐᕕᐊᒥᐅᖅ ᐊᒻᒪᓗ ᐋᐳᓖᓇ ᒪᑭᒐᖅ ᑲᖏᕐᖠᓂᕐᒥᐅᖅ ᐊᑐᓂᑦ ᑐᓐᓂᖅᑯᓯᐊᖅᑎᑕᐅᓂᐊᖅᑑᒃ $5,000-ᓂᒃ ᐃᑲᔫᑎᒃᓴᓂᒃ ᐃᓕᓐᓂᐊᕐᓂᖏᓐᓄᑦ. ᐃᓕᓴᐱ ᓱᕈᓯᓛᓄᑦ ᐃᓕᓐᓂᐊᕕᖕᒥ ᐃᓕᓐᓂᐊᑎᑦᓯᔨᒃᓴᐅᓂᕐᒧᑦ ᐃᓕᓐᓂᐊᖅᑐᖅ ᒪᒡᒋᐅ ᐃᓕᓐᓂᐊᕕᒡᔪᐊᖓᓂ ᐊᒻᒪᓗ ᐋᐳᓖᓇ ᐃᓕᓐᓂᐊᖅᑐᖅ ᑲᖏᕐᖠᓂᕐᒥ ᓄᓇᕗᒻᒥ ᐃᓕᓴᐃᔨᒃᓴᓄᑦ ᐃᓕᓐᓂᐊᕕᖕᒥ.
ᓱᓕ, ᑐᓐᖓᕕᒃᑯᑦ ᖃᐅᔨᓴᖅᑎᖏᑦ ᓇᓗᓕᐅᖅᑲᖃᑦᑕᓚᐅᖅᑐᑦ ᓂᕈᐊᕋᓱᐊᖅᑐᑎᑦ ᑐᓐᓂᖅᑯᓯᐊᖅᑐᒃᓴᓂᒃ ᔫᓯ ᐊᒪᐅᔭᖅ ᑯᓱᒐᖅ ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑎᒥᒃ. ᐃᑲᔫᓯᐊᖅᑖᕋᓱᐊᖅᑐᑦ ᐊᔪᓐᖏᑦᓯᐊᓚᐅᖅᑐᑦ. 15 ᐱᓇᓱᐊᓚᐅᖅᑐᑦ ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑎᒥᒃ ᐊᕐᕋᒍᑦᑎᓐᓂ.
“ᖁᕕᐊᒃᑯᑎᕙᕗᑦ ᑐᓐᓂᖅᑯᓯᐊᓚᐅᖅᑐᑦ ᐋᐳᓖᓇ ᐊᒻᒪᓗ ᐃᓕᓴᐱ ᐃᑲᔫᓯᐊᖅᑖᕐᒪᑎᒃ ᔫᓯ ᐊᒪᐅᔭᖅ ᑯᓱᒐᖅ ᐃᑲᔫᑎᒥᒃ. ᐅᕙᒍᑦ, ᑯᓱᒐᖅ ᐃᓚᒌᖑᔪᒍᑦ, ᐃᓕᓐᓂᐊᑦᓯᐊᕐᓂᐊᖁᕙᑦᑎᒋᑦ ᑲᔪᓯᑦᓯᐊᕐᓗᓯ ᐃᓕᓐᓂᐊᑕᑦᓯᓐᓂᒃ ᐊᒻᒪᓗ ᓂᕆᐅᒋᑦᓯᐊᐸᑦᑎᒋᑦ ᐃᑲᔫᑎᓂᐊᕐᓂᖏᓐᓂᒃ ᐃᓕᓐᓂᐊᖅᑕᓯ ᓄᓇᕗᒻᒧᑦ ᐊᒻᒪᓗ ᓄᓇᕗᒻᒥᐅᖑᖃᑎᑦᓯᓐᓄᑦ.” ᐅᖃᓚᐅᖅᑐᖅ ᐳᔾᔫᑦ ᑯᓱᒐᖅ, ᐃᓚᒥᓂᒃ ᑭᒡᒐᑐᐃᓪᓗᓂ.
ᑐᓐᖓᕕᒃᑯᑦ ᐊᓯᔾᔩᓛᖅᑐᑦ ᐊᕐᕌᒍ ᐃᓱᓕᕝᕕᖓᓂᒃ ᔫᓯ ᐊᒪᐅᔭᖅ ᑯᓱᒐᖅ ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑎᓂᒃ. 2015-ᒥ ᐱᒋᐊᕐᓗᓂ, ᐃᑲᔫᓯᐊᖅᑖᕋᓱᐊᕐᓇᖅ ᒪᑐᐃᖓᖃᑦᑕᕈᒫᓕᖅᑐᖅ ᐄᑉᕈ 1-ᒥᒃ ᒪᐃ 31-ᒧᑦ ᐊᕐᕋᒍᑕᒫᑦ. ᑐᓐᖓᕕᒃᑯᑦ ᖃᐅᔨᓴᖅᑎᖏᑦ ᕿᒥᕐᕈᓇᖃᑦᑕᕈᒫᕐᓂᐊᓕᖅᑐᑦ ᐱᓇᓱᐊᖅᑐᑦ ᑐᒃᓯᕋᐅᓯᐊᒥᓂᖏᓐᓂᒃ ᔫᓂᒥ ᐊᒻᒪᓗ ᑐᓴᖅᑎᑦᓯᓗᑎᒃ ᐃᑲᔫᓯᐊᖅᑖᖅᑐᓂᒃ ᐊᕐᕋᒍᑕᒫᑦ ᓄᓇᕗᑦ ᐅᓪᓗᖓᓂ, ᔪᓚᐃ 9.
ᐃᓕᓐᓂᐊᖅᑐᑦ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᓂ ᐊᑎᖃᖃᑕᐅᔪᑦ ᐃᓕᓐᓂᐊᑲᓐᓂᖅᑐᓄᑦ ᐃᑲᔫᓯᐊᖅᑖᕋᓱᐊᖃᑦᑕᕈᓐᓇᖅᑐᑦ.
-30-
ᑐᑭᓯᒋᐊᖃᑦᑕᕆᑦᓯ:
ᑭᐅᕆᓐ ᕙᓚᐅᕋᑎ
ᑭᖑᕝᕕᐅᑎᓯᒪᔪᖅ ᑐᑭᒧᐊᒃᑎᑦᑎᔨᒧᑦ ᑐᓴᐅᒪᖃᑦᑕᐅᑎᓕᕆᔨᒃᑯᑦ
ᐅᖄᓚᐅᑖ: (867) 975-4914 ᐊᑭᖃᓐᖏᑦᑐᖅ: 1-888-646-0006
ᐃᑉᐱᐊᔪᒻᒥᒐᖅ: 867-222-2393
