ᓄᓇᕗᑦ ᑐᓐᖓᕕᒃᑯᑦ ᐊᖓᔪᖅᑳᖓ ᑳᑎ ᑕᐅᑐᓐᖏ ᐅᓪᓗᒥ ᐅᖃᐅᓯᓕᒃ ᓇᒡᓕᒍᓱᓐᓂᕐᒥᓂᒃ ᐃᓚᓐᖓᖅᑐᓂᒃ ᐃᓚᖏᓐᓂᒃ ᖃᐅᔨᒪᔭᒻᒪᕆᐅᔪᒥᒃ ᐃᓄᐃᑦ ᖃᐅᔨᒪᓂᖓᒍᑦ ᐱᖕᒪᕆᐅᔪᓂᒃ ᐃᓅᓯᓕᕆᔨᐅᓚᐅᖅᑐᒥᒃ ᑑᒪᓯ ᐆᑦᑐᖅ ᒥᑦᑎᒪᑕᓕᖕᒥᐅᑕᖅ. ᐆᑦᑐᖅ ᐃᓅᒍᓐᓇᐃᓚᐅᖅᑐᖅ ᓈᑦᓯᖑᔭᒥᒃ ᐋᑐᕙᒥ.

“ᓂᑲᓪᓗᕈᑎᒋᖅᑲᐅᔭᕋ ᐅᓪᓗᒥ ᖃᐅᔨᒐᒪ ᑑᒪᓯ ᐃᓅᒍᓐᓃᓚᐅᕐᓂᖓᓂᒃ. ᓴᐃᓕᓇᖅᑐᒥᒃ ᐊᓂᒍᐃᑎᑦᓯᓂᕐᒥᓪᓗ ᐊᓂᐊᑦᓯᓂᒃᑯᑦ ᐃᓅᓯᖃᑦᓯᐊᓇᖅᑐᒥᒃ ᑐᓂᓯᖃᑦᑕᓚᐅᕐᓂᖓ ᐃᓄᕋᓴᓐᓄᑦ ᓯᓚᑐᔪᕐᔪᐊᖑᓂᕐᒥᒍᑦ ᐊᒻᒪᓗ ᐃᓅᓯᓕᕆᔨᐅᓂᕐᒥᒍᑦ ᐳᐃᒍᖅᑕᐅᓚᐅᕐᓯᒪᔾᔮᖏᑦᑐᖅ. ᓯᕗᓕᖅᑎᒋᔭᐅᓚᐅᖅᑐᖅ ᐃᓄᐃᑦ ᖃᐅᔨᒪᓂᖓᒍᑦ ᐱᖕᒪᕆᐅᔪᓂᒃ ᐃᓅᓯᓕᕆᓂᕐᒥᒃ ᐊᒻᒪᓗ ᐋᖅᑭᑦᓯᒪᑦᓯᐊᖅᑕᒥᒍᑦ ᑲᒪᕙᓚᐅᕐᓂᖓ ᑭᓐᖑᒪᒋᔭᐅᓂᐊᖅᑐᖅ ᐃᓄᖕᓄᑦ,” ᐅᖃᖅᑐᖅ ᑕᐅᑐᓐᖏ.

ᐆᑦᑐᖅ ᐃᓅᓯᓕᕆᒐᔪᓚᐅᖅᑐᖅ ᑲᑐᔾᔨᖃᑎᖃᖅᑐᓂ ᐃᓅᓯᓕᒫᒥᓂ ᐊᐃᑉᐸᕐᒥᓂᒃ, ᕇᒋᓕ. ᑕᒪᒃᑮᒃ ᑐᓂᔭᐅᓚᐅᖅᑑᒃ ᐃᖢᐊᕐᓴᐃᔨᐅᓂᕐᒧᑦ ᑐᓐᓂᖅᑯᓯᐊᒥᒃ ᐃᓄᐃᑦ ᑕᐱᕇᑦ ᑲᓇᑕᒥ ᑐᓂᔭᖓᓂᒃ. ᓄᓇᕗᒻᒥ ᓯᕗᓕᖅᑎᐅᓚᐅᖅᑐᖅ ᐄᕙ ᐋᕆᐊᒃ ᑐᓂᓯᓚᐅᕐᓯᒪᒻᒥᔪᖅ ᐆᑦᑐᕐᒥᒃ ᑯᐃᓐ ᐃᓕᓴᐱ II ᑕᐃᒪᖁᑎᖓᓂᒃ ᐅᔭᒥᖕᒥᒃ ᒪᕐᕉᒃ ᐊᕐᕌᒎᒃ ᐊᓂᒍᓕᖅᑑᒃ.

ᐆᑦᑐᖅ ᑲᔪᓯᐊᑦᓯᐊᖅᑐᒥᒃ ᑲᑎᑦᓯᓯᒪᖃᑦᑕᓚᐅᖅᑐᖅ ᐱᖅᑯᓯᑐᖃᕐᓂᒃ ᐅᓪᓗᒥᓂᓴᕐᓂᓪᓗ ᐃᓄᐃᑦ ᐃᓅᓯᓕᕆᒍᓯᖏᓐᓂᒃ ᑭᒃᑯᑐᐃᓐᓇᕐᓄᑦ ᐊᐃᑉᐸᕇᓄᓪᓗ. ᐃᓚᒋᔭᐅᒐᔪᖃᑦᑕᓚᐅᖅᑑᒃ ᐊᔾᔨᒌᓐᖏᑦᑐᓂ ᒪᒥᓴᕐᓂᓂ, ᐊᒻᒪᓗ ᐃᓚᒋᔭᐅᒐᔪᖃᑦᑕᓚᐅᖅᑐᒃ ᒪᒥᓴᖅᑐᓕᕆᔪᓂ ᐊᒃᑐᐊᔪᓂ ᑐᓐᖓᕕᒃᑯᑦ ᖃᐅᒪ ᓄᒃᑕᖃᑦᑕᓂᒃᑯᑦ ᒪᒥᓴᖅᑐᓕᕆᓂᖓᓂᒃ, ᐃᓅᓯᓕᓂᐅᖃᑦᑕᓚᐅᖅᑐᒥᒃ ᐃᓕᓐᓂᐊᕆᐊᖅᑎᑕᐅᖃᑦᑕᓚᐅᖅᑐᓂᒃ.