ᓄᓇᕗᑦ ᑐᓐᖓᕕᒃ ᑎᒥᖓ ᐅᓪᓗᒥ ᒪᑐᐃᕐᓯᔪᑦ ᑐᒃᓯᕋᐅᑎᓂᒃ ᔫᓯ ᐊᒪᐅᔭᖅ ᑯᓱᒐᖅ ᐃᓕᓐᓂᐊᑲᓐᓂᖅᑐᓄᑦ ᐃᑲᔫᓯᐊᖅᑖᕋᓱᐊᕈᒪᔪᓄᑦ.

ᐱᓇᓱᐊᖅᑐᑦ ᑎᑎᕋᕆᐊᓖᑦ 500−ᓂᒃ ᐅᖃᐅᓯᖅᑕᓕᖕᓂᒃ ᐅᓂᒃᑳᓂᒃ ᐅᖃᐅᓯᖃᑦᓯᐊᕐᓗᑎᒃ ᐊᑐᕐᓂᐊᓂᕐᒥᓂᒃ ᐃᓕᓐᓂᐊᖅᑕᒥᓂᒃ ᐱᕚᓪᓕᕈᑎᒃᓴᐅᑎᓪᓗᒍ ᐃᓄᐃᑦ ᐱᔪᓐᓇᐅᑎᖏᓐᓄᑦ, ᓇᑭᓐᖔᕐᓯᒪᓂᖏᓐᓄᑦ, ᐅᖃᐅᓯᕐᒧᑦ ᐃᓕᖅᑯᓯᕐᒧᓪᓗ. ᑕᒪᕐᒥᒃ ᐅᓂᒃᑳᑦ ᐃᖕᒥᓃᓐᖔᓪᓚᑦᑖᕆᐊᓖᑦ  ᐊᒻᒪᓗ ᑎᑎᕋᕇᕐᓯᒪᔪᓂᒃ ᐃᔾᔪᐊᕐᓯᓯᒪᔭᕆᐊᖃᓐᖏᑦᑐᑦ ᑎᑎᕋᖅᑕᐅᖃᑦᑕᕐᓯᒪᔪᓂᒃ. ᐱᓇᓱᐊᖅᑐᑦ ᐃᓕᓐᓂᐊᕕᖕᒥ ᐃᓕᓐᓂᐊᕐᓂᖏᓐᓂᒃ ᑎᑎᕋᖅᑕᐅᓯᒪᑉᐸᑕ ᓈᖕᒪᒋᔭᐅᓂᕐᓴᐅᔪᖅ ᐅᕝᕙᓗᓐᓃᑦ ᐃᓄᐃᑦ ᐅᖃᐅᓯᖓᓂᒃ ᐃᓕᓐᓂᐊᕐᐸᑕ. ᐊᖏᖅᑕᐅᒍᓐᓇᕐᒥᔫᒐᓗᐊᑦ ᐱᓇᓱᐊᖅᑐᖅ ᑐᑭᓯᓇᕐᓯᑎᑦᓯᓯᒪᑦᓯᐊᑐᐊᕐᐸᑦ ᐃᓕᓐᓂᐊᕐᓂᖓ ᐊᒻᒪᓗ ᐃᖅᑲᓇᐃᔮᖓ ᐃᑲᔫᑎᖃᕐᓂᐊᕐᓂᖓᓂᒃ ᓯᕗᒧᐊᒃᑲᓐᓂᕈᑎᒃᓴᐅᓂᖓᓂᒃ ᐃᓄᐃᑦ ᐱᔪᓐᓇᐅᑎᖓᓄᑦ.

ᒪᕐᕉᒃ ᐃᓅᒃ ᐃᓕᓐᓂᐊᖅᑑᒃ ᑐᓂᔭᐅᓂᐊᖅᑑᒃ $5,000.00 ᐊᑐᓂᑦ ᐃᓕᓐᓂᐊᖅᑑᒃ ᐃᓕᓴᕆᔭᐅᓯᒪᔪᓂ ᐃᓕᓐᓂᐊᑲᓐᓂᕕᖕᓂ. ᑐᓐᖓᕕᒃᑯᓃᓐᖔᖅᑐᓂᒃ ᖃᐅᔨᓴᖅᑎᖃᕐᓂᐊᖅᑐᖅ ᕿᒥᕐᕈᓇᓐᓂᐊᖅᑐᓂᒃ ᐱᓇᓱᐊᕈᑎᓂᒃ ᐊᒻᒪᓗ ᓂᕈᐊᕐᓗᑎᒃ ᐃᓕᓐᓂᐊᖅᑎᓂᒃ ᐃᓕᓐᓂᐊᖅᑕᖏᑎᒍᑦ, ᐅᓂᒃᑳᓕᐅᕐᓗᓂ ᑎᑎᕋᕐᓯᒪᔪᓂᒃ ᐊᒻᒪᓗ ᖃᐅᔨᒋᐊᕐᕕᒃᓴᓂ ᓇᓗᓇᐃᕐᓯᓯᒪᓗᓂ. ᐃᓕᓐᓂᐊᖅᑎ ᐅᓂᒃᑳᓕᐅᕐᓯᒪᑉᐸᑦ ᐃᓄᒃᑎᑐᑦ ᐃᓄᐃᓐᓇᑐᓪᓘᓐᓃᑦ ᐱᔪᓐᓇᕐᓯᑎᑕᐅᒃᑲᓐᓂᕈᑎᑖᕐᓯᒪᔪᖅ.

ᐱᓇᓱᐊᕈᑏᑦ ᑐᓂᔭᐅᓯᒪᔭᕆᐊᓖᑦ ᔪᓚᐃ 9, 2014, ᓄᓇᕗᑦ ᐅᓪᓗᖓᓂ. ᐃᓕᓐᓂᐊᖅᑏᑦ ᐊᑎᖃᖃᑕᐅᔪᑦ ᐅᕝᕙᓘᓐᓃᑦ ᐊᑎᖃᖃᑕᐅᔪᓃᖃᑕᐅᒍᓐᓇᖅᑐᑦ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᓂ ᐱᓇᓱᐊᕈᓐᓇᖅᑐᑦ ᐃᓕᓐᓂᐊᖅᑐᒧᑦ ᐃᑲᔫᑎᒥᒃ. ᑐᒃᓯᕋᐅᑏᑦ ᑎᑎᕋᕐᕕᒃᓴᑦ ᐊᑐᐃᓐᓇᐅᔪᑦ ᑐᓐᖓᕕᒃᑯᑦ ᐃᑭᐊᖅᑭᕕᖓᓂ.

https://www.tunngavik.com/current-initiatives/jose-amaujaq-kusugak-memorial-scholarship/?lang=iu