Nunavut Tungavik Timeoyomi Tuklea Ikhivaotaleom James Eetoolook uplomi okaktok ukoa nunakyoanigaktun ilaoyun Neovigaogitaagani Hilakyoami Nugutpaleanigaktaoyun Angutikhanik (CITES-kon) katimanikmi Bangkok-mi Thailand-mi, akigaktoelimaetunguuk vuteotaoyomik atugoegutaoyok Amealikan atuligumayaenik ilaoligeagani titikami nannun.
Nunakyoanin katimayun Neovigaogitaagani Hilakyoami Nugutpaleanigaktaoyun Angutikhanik (CITES-kon) 16th Kamiteoyok Ilaoyonik vutktun Amealikan atuligumayaenik imani, kiheani vuteotin akigaktuktaolaktugaloen katimahoektinagin. Aalagukniga titigaknigin nannuun oegoanin II-min oegoanun I-mun CITES-mi ayoknakhitineagaloakman hilakyoami neovgutigiyaagani nannun. Akimayun agiyok Kanatamilo nugutitaagani atuteaknigilo nannuktaoyun monagiyaoteakmata.
“Inoen kuveahuktun uplomi. Monagiteakhimayavun agunahoaknigin nannun taemanin, unalo ilitagiyaokman hilakyoami inuknin,” okaktok Eetoolook. “Amealikan kavamaenin atulikoyaoyok kigiyaohimayok malgoektokhoni taya. Ihomagiyakaliktukhaogaloen havaagigeaklogo aktoknigiyatik hilamik monaginahoagilotin Inoen manikhakheotaen.”
Kanatamin katimayaktoktun Thailand-mun kivgaktokteoyun NTI-konin, Aviktokhimayunilo Angutikhalikiyinin, Kavamanilo Nunavumi, Inoen Tapiget Kanatamilo, Inuvealoelo Aviktokhimayomi Koaparesigiyaanin, Makivik Koaparesigiyaanilo, Nunatsiavut kavamanilo, Kavamanilo Kanatami. Eetoolook okaktok Kanataom ikayoktigeknigin havaamigun takhiyutaoyok.
“Katimatilogin Thailand-mi hivoanilo, NTI-kon ahelo atanguyan akhukhaeyun amigaetonik nunakyoanik kaoyimaligeagani monagiteakniganik agunahoagutivun. Naonaeyaeyin takupkaeyun hilakyoami neovgutaonigin ihoetomik aktoknikaginman nanukakniginik Kanatami,” okaktok Eetoolook.
