ᓄᓇᕗᑦ ᑐᙵᕕᒃᑯᑦ ᑎᒥᖓᑦᑕ ᐊᖏᔪᖅᑳᖓᑕ-ᑐᖏᓕᐊ ᔭᐃᒥᓯ ᐃᑦᑐᓗᒃ ᐅᓪᓗᒥ ᓇᓗᓇᐃᕐᓯᕗᖅ ᓄᓇᓕᒐᓴᓕᒡᒍᑏᑦ ᑲᑎᒪᔭᖅᑐᕐᓯᒪᓚᐅᖅᑐᑦ ᓄᓇᕐᔪᐊᕐᒥ ᑲᑎᒪᔩᑦ ᐆᒪᔪᓂᑦ ᓂᐅᕕᐊᔅᓴᐅᒍᓐᓃᑎᑦᑎᓲᑦ ᐃᓱᒫᓗᓇᕐᓯᓂᕋᖅᑕᐅᒐᐃᒻᒪᑕ ᑲᑎᒪᓂᖓᓐᓄᑦ ᕚᖕᑳᒃᒧᑦ, ᑕᐃᓛᓐᒥ, ᐊᑭᓂᐊᕋᓱᓐᓂᐅᓴᓚᐅᙱᒻᒪᑕ ᓂᕈᐊᕈᑕᐅᓚᐅᖅᑐᒥᒃ ᓵᓚᖃᐅᑕᐅᓚᐅᖅᑐᒥᒃ ᐊᒥᐊᓕᒐᐃᑦ ᑐᔅᓯᕋᐅᑎᖓᓐᓄᑦ ᑎᑎᕋᖅᑕᐅᖃᓯᐅᔾᔭᐅᖁᓪᓗᒋᑦ ᓇᓄᐃᑦ.
ᓄᓇᓕᒐᓴᓕᒡᒍᑏᑦ ᑲᑎᒪᔭᖅᑐᕐᓯᒪᔪᑦ ᑲᑎᒪᕕᔾᔪᐊᕐᓂᖓᓐᓄᑦ ᓄᓇᕐᔪᐊᕐᒥ ᑲᑎᒪᔩᑦ ᐆᒪᔪᓂᑦ ᓂᐅᕕᐊᔅᓴᐅᒍᓐᓃᑎᑦᑎᓲᑦ ᐃᓱᒫᓗᓇᕐᓯᓂᕋᖅᑕᐅᒐᐃᒻᒪᑕ (CITES) 16ᒋᓕᖅᑕᖓᓐᓂ ᑲᑎᒪᔩᑦ ᑲᑐᔾᔨᖃᑎᒌᖑᔪᓄᑦ ᓂᕈᐊᓚᐅᕐᖓᑕ ᐊᒥᐊᓕᒐᐃᑦ ᑐᔅᓯᕋᐅᑎᖓᓐᓄᑦ ᐱᓇᓱᐊᕈᓯᐅᓚᐅᖅᑐᒥ, ᑭᓯᐊᓂ ᐊᑭᔭᐅᒐᓱᒍᓐᓇᓚᐅᕐᖓᑕ ᓂᕈᐊᕈᑕᐅᓚᐅᖅᑐᑦ ᑲᑎᒪᔭᕇᓚᐅᙱᓐᓂᖏᓐᓂ. ᐊᓯᔾᔨᖅᑕᐅᓚᐅᖅᑲᑦ ᓇᓄᐃᑦ ᑎᑎᕋᖅᑕᐅᓯᒪᓂᖏᑦ ᐅᐃᒍᖏᓐᓂ II-ᒥ ᐅᐃᒍᖏᓐᓄᑦ 1-ᒧᑦ ᑲᑎᒪᔩᑦ ᑲᑎᒪᓂᖓᓐᓂ ᑭᓪᓕᖃᖅᑎᑦᑎᒍᑕᐅᓪᓚᕆᓕᙳᓱᓚᐅᕐᖓᑦ ᓄᓇᕐᔪᐊᕐᒥ ᓂᐅᕕᐊᔅᓴᖃᖃᑦᑕᓂᕐᒥ ᓇᓄᕐᓂᑦ. ᓵᓚᒃᓴᕐᓂᖓᑦ ᐱᒻᒪᕆᐊᓘᒻᒪᑦ ᑐᑭᓯᓇᑦᑎᐊᖅᑐᖅ ᑲᓇᑕᐅᑉ ᐋᖅᑭᐅᒪᑎᒍᓐᓇᖅᑕᖏᑦ ᑲᒪᒋᔭᔅᓴᒫᖓᓪᓗ ᓇᓐᓄᒐᓱᖃᑦᑕᓂᕐᒧᑦ ᐊᐅᓚᑕᐅᑦᑎᐊᕐᖓᑦ.
“ᐃᓄᐃᑦ ᖁᕕᐊᓲᑎᖃᖅᑐᑦ ᐅᓪᓗᒥ. ᐊᐅᓚᑦᑎᑎᐊᕐᓯᒪᔪᒍᑦ ᓇᓐᓄᒐᓱᓐᓂᐅᕙᑦᑐᒥᒃ ᐊᕐᕌᒍᒐᓴᕐᔪᐊᕌᓗᓐᓂᑦ, ᐊᒻᒪᓗ ᑕᒪᓐᓇ ᐃᓕᓴᕆᔭᐅᓯᒪᓪᓗᓂ ᓄᓇᕐᔪᐊᕐᒥᐅᖑᖃᑎᒌᓂᑦ,” ᐅᖃᖅᑐᖅ ᐃᑦᑐᓗᒃ. “ᐊᒥᐊᓕᒐᕐᒥᐅᑦ ᒐᕙᒪᒃᑯᖏᑕ ᑐᔅᓯᕋᐅᑎᖓᑦ ᓵᓚᐅᓯᒪᓕᖅᑐᖅ ᒪᕐᕈᐊᖅᑎᓕᖅᑐᓂ ᒫᓐᓇ. ᐃᒻᒪᖄ ᓵᙵᓂᕐᓴᐅᖔᕆᐊᖃᕐᓂᐊᓕᖅᑐᑦ ᐱᓇᓱᐊᕈᑎᒋᕙᑦᑕᖏᓐᓂ ᐊᑐᕈᓐᓃᐹᓪᓕᕆᐊᕐᓂᕐᒥᒃ ᓇᒻᒥᓂᖅ ᐊᑦᑐᐃᔾᔪᑎᒋᕙᑦᑕᖏᓐᓂᒃ ᓯᓚᒧᑦ ᐊᐅᓚᑦᑎᖔᕋᓱᑐᐃᓐᓇᖏᓪᓗᑎᒃ ᐃᓄᐃᑦ ᒪᑭᑕᔾᔪᑎᖏᓐᓂᒃ.”
ᑲᓇᑕᒦᙶᕐᓯᒪᔪᑦ ᑲᑎᒪᔭᖅᑐᕐᓯᒪᓚᐅᖅᑐᑦ ᑕᐃᓛᓐᒧᑦ ᑭᒡᒐᑐᖅᑎᒡᒍᑎᐅᓚᐅᖅᑐᑦ ᐅᑯᓇᙶᕐᓯᒪᔪᑦ ᓄᓇᕗᑦ ᑐᙵᕕᒃᑯᑦ ᑎᒥᖓᓐᓂ, ᐊᕕᑦᑐᕐᓯᒪᓂᐅᔪᓂᑦ ᐆᒪᔪᓕᕆᓂᕐᒧᑦ ᑲᑐᔾᔨᖃᑎᒌᖏᓐᓂᑦ, ᓄᓇᕗᑦ ᒐᕙᒪᒃᑯᖏᓐᓂ, ᐃᓄᐃᑦ ᑕᐱᕇᒃᑯᓐᓂ ᑲᓇᑕᒥ, ᐃᓄᕕᐊᓗᐃᑦ ᑯᐊᐳᕇᓴᒃᑯᖏᓐᓂ, ᒪᑭᕕᒃ ᑯᐊᐳᕇᓴᒃᑯᓐᓂ, ᓄᓇᑦᓯᐊᕗᑦ ᒐᕙᒪᒃᑯᓐᓂ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᓐᓂ. ᐃᑦᑐᓗᒃ ᐅᖃᖅᑐᖅ ᑲᓇᑕᐅᑉ ᑲᑐᔾᔨᖃᑎᒌᑦᑐᑎᒃ ᐱᓇᓱᐊᕈᑎᒋᓚᐅᖅᑕᖏᑦ ᓵᓚᖃᕈᑕᐅᕗᑦ.
“ᑲᑎᒪᓂᖏᓐᓂ ᑕᐃᓛᓐᒥ ᐊᒻᒪᓗ ᑲᑎᒪᔭᖅᑐᓛᕐᓂᐊᑎᓪᓗᒋᑦ, ᓄᓇᕗᑦ ᑐᙵᕕᒃᑯᑦ ᐊᓯᖏᓪᓗ ᑲᑎᒪᔩᑦ ᑎᓕᐅᕆᓪᓚᕆᓚᐅᖅᑐᑦ ᐊᒥᓱᓂᑦ ᓄᓇᓕᒐᓴᓕᒡᒍᑎᓂᑦ ᐅᔾᔨᕈᓱᓕᖅᑎᒋᐊᕈᒪᓪᓗᒋᑦ ᑲᒪᒋᔭᖃᑦᑎᐊᖅᑐᑕ ᐱᐅᓯᖃᖃᑦᑕᓂᑎᓐᓂᒃ ᓇᓐᓄᒐᓱᓐᓂᕆᕙᑦᑕᑎᓐᓂᒃ. ᖃᐅᔨᓴᖅᑐᓕᕆᓂᖅ ᑐᑭᓯᓇᑦᑎᐊᖅᑐᒍ ᑕᑯᑎᑦᑎᓯᒪᔪᑦ ᓄᓇᕐᔪᐊᕐᒥ ᓂᐅᕕᐊᔅᓴᖃᖃᑦᑕᕐᓂᖅ ᐊᑦᑐᐃᑲᒻᒪᖃᑦᑕᙱᒻᒪᑦ ᓇᓄᕐᓂᑦ ᑲᓇᑕᒥ,” ᐅᖃᖅᑐᖅ ᐃᑦᑐᓗᒃ.
