(ᔫᓂ 2, 2010 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃᑯᑦ ᐊᖏᔪᖅᑳᖓ ᐹᓪ ᖃᓗᔾᔭᖅ ᐅᓪᓗᒥ ᓇᓗᓇᐃᖅᓯᔪᖅ ᒪᕐᕉᒃ ᐃᖅᑲᐅᒪᔭᐅᔾᔪᑎᒃᓵᒃ – ᖃᐅᓱᐃᑦᑐᒥ ᐊᐅᓱᐃᑦᑐᒥᓗ – ᐃᖅᑲᐅᒪᔭᐅᔾᔪᑎᒃᓴᖏᑦ ᐊᒃᓱᕈᕐᓂᕆᓚᐅᖅᑕᖏᓐᓄᑦ ᐃᓄᐃᑦ ᐊᐅᓪᓛᖅᑕᐅᓚᐅᖅᓯᒪᑎᓪᓗᒋᑦ ᑖᒃᑯᓄᖓ ᓄᓇᓖᓐᓄᑦ 1950-ᖏᓐᓃᑎᓪᓗᒋᑦ ᓴᖅᑭᑕᐅᓂᐊᖅᑐᑦ ᓯᑎᐱᕆ 8, 2010 ᖃᐅᓱᐃᑦᑐᒥ ᐊᒻᒪ ᓯᑎᐱᕆ 10, 2010 ᐊᐅᓱᐃᑦᑐᒥ.

2009-ᖑᑎᓪᓗᒍ ᒪᕐᕉᒃ ᓄᓇᕗᒻᒥ ᓴᓐᖑᐊᒐᖅᑎᒻᒪᕇᑦ ᓴᓇᖁᔭᐅᓚᐅᑑᑉ ᐃᖅᑲᐅᒪᔭᐅᔾᔪᑎᒃᓵᓂᒃ: ᓯᒥᐅᓂ ᐊᒪᕈᐊᓕᒃ ᖃᐅᓱᐃᑦᑐᒥ ᐊᒻᒪ ᓘᑎ ᐱᔭᒥᓂᖅ ᐊᐅᓱᐃᑦᑐᒥ.

“ᑲᔪᖏᖅᐳᖓ ᑕᑯᓛᕐᓂᓐᓂᒃ ᓴᓇᔭᐅᓯᒪᔪᓂᒃ ᐊᓯᖏᓐᓂᓪᓗ ᐃᖅᑲᐅᒪᑦᓯᓂᕗᑦ ᐃᑲᔫᑎᖃᓗᓪᓗᒋᑦ ᓄᓇᓖᓐᓄᑦ ᐊᒻᒪ ᓄᓇᖓᓄᑦ. ᐊᐅᓪᓛᖅᑕᐅᓯᒪᔪᑦ ᐱᒻᒪᕆᐅᒻᒪᑕ ᐅᑭᐅᖅᑕᖅᑐᒥ ᐊᑐᖅᑕᐅᖃᑦᑕᖅᓯᒪᔪᓄᑦ.” ᐅᖃᖅᑐᖅ ᖃᓗᔾᔭᖅ.

ᐊᕐᕌᒎᑦ 50 ᐅᖓᑖᓂ ᐊᓂᒍᖅᓯᒪᓕᖅᑐᑦ ᑲᓇᑕᐅᑉ ᒐᕙᒪᒃᑯᖏᑦ ᐊᐅᓪᓛᖅᓯᓚᐅᖅᓯᒪᑎᓪᓗᒋᑦ ᐃᓚᒌᖑᔪᓂᒃ ᒪᕐᕉᓐᓂᒃ ᓄᓇᓕᒃᑖᑎᑦᓯᓪᓗᑎᒃ ᖁᑦᑎᑦᑐᒥ, ᓴᖏᓂᖃᕐᓂᖅ ᐅᑭᐅᖅᑕᖅᑐᒥ ᐃᓱᒪᑐᐊᕆᔭᐅᔮᖅᑐᖅᓱᓕ ᒪᓕᒐᓕᕆᔨᓄᑦ, ᑐᓴᐅᒪᔪᓕᕆᔨᓄᑦ ᐊᒻᒪ ᐱᕕᒃᓴᖃᕐᕕᖃᕈᒪᔪᓄᑦ ᓯᓚᕐᔪᐊᒥ.

“ᑐᓴᕋᔪᖃᑦᑕᕋᑦᑕ ᐅᑭᐅᖅᑕᖅᐴᑉ ᐊᖅᑯᑎᖓ ᐊᒻᒪ ᐅᑭᐅᖅᑕᖅᑐᒥ ᓴᖏᓂᖃᕐᓃᑦ ᐸᕐᓇᒍᑕᐅᑎᓪᓗᒋᑦ. ᐃᖅᑲᐅᒪᔾᔪᑏᑦ ᐃᖅᑲᐃᑎᑦᓯᒍᑎᐅᓂᐊᖅᐳᑦ ᑲᓇᑕᒥᐅᒧᑦ ᐅᒥᐊᕐᔪᐊᒧᑦ ᐊᐅᓪᓛᖅᑕᐅᓚᐅᕋᓗᐊᖅᑎᓪᓗᒋᑦ ᐃᓄᐃᑦ ᖃᑕᓐᖑᑎᒌᑦᑐᑦ ᐱᔭᕆᐊᑐᓂᖅᐹᒧᑦ ᓯᓚᕐᔪᐊᒥ ᐊᐅᓪᓛᖅᑕᐅᓚᐅᖅᓯᒪᓂᖏᑦ ᓇᒃᓴᕈᓐᓇᖅᑎᑕᐅᒐᑎᒃ ᓴᓇᕐᕈᑎᖏᓐᓂ ᐊᖑᓇᓱᒍᓐᓇᐅᑎᖏᓐᓂᓪᓗ ᐃᓅᓇᓱᐊᕈᑎᒋᓂᐊᖅᑕᖏᓐᓄᑦ, ᖁᔭᓕᓇᖅᐳᖅ ᖃᑕᖑᑎᒌᑦ ᓴᓐᖏᓂᖏᓐᓄᑦ ᐊᓂᒎᑎᔪᓐᓇᓚᐅᕐᓂᖏᑦ ᐅᒃᓱᕈᓐᓇᒻᒪᕆᒃᑐᓂᒃ ᓄᓇᓕᐅᔫᒃ ᑲᒪᒋᔭᐅᑦᓯᐊᖁᓐᓇᖅᓯᓂᖏᓐᓄᑦ.”

“ᖃᐃᖁᕙᒃᑲ ᐃᓚᒋᔭᐅᔪᑦ ᐅᐱᒍᓱᖃᑎᒋᔪᒪᓪᓗᒋᑦ ᐃᓚᒌᖑᔪᓂ ᓄᓇᓕᓐᓂᓗ ᐃᓕᒃᐹᓪᓕᖃᑎᒋᓂᐊᕋᑦᑎᒍ ᐊᐅᓪᓛᖅᑕᐅᓚᐅᕐᓂᖏᓐᓂᒃ.” ᐅᖃᑐᖅ ᖃᓗᔾᔭᖅ.

ᑐᑭᓯᒋᐊᒃᑲᓂᕈᒪᒍᕕᑦ ᐃᖅᑲᐅᒪᔭᐅᔾᔪᑎᒃᓴᓄᑦ, ᑕᑯᒋᐊᕈᓐᓇᖅᑕᐃᑦ ᑐᙵᕕᒃᑯᑦ ᐃᑭᐊᕐᕆᕕᐊ ᐅᕗᖓ:

https://www.tunngavik.com/current-initiatives/arctic-exile-monument-project/

-30-

ᑐᑭᓯᒋᐊᒃᑲᓐᓂᕈᒪᒍᕕᑦ::

ᕗᕌᓐᑯ ᐳᓴᒥ

ᑐᑭᒧᐊᑦᑎᑦᓯᔨ ᑐᓴᐅᒪᖃᑦᑕᐅᑎᓕᕆᔨᒃᑯᑦ

ᓄᓇᕗᑦ ᑐᙵᕕᒃ ᑎᒥᖓ

ᐅᖄᓚᐅᑎᖓ: (867) 975-4939 ᐅᖄᓚᐅᑎᕋᓛᖓ: 867 222 1411

ᐊᑭᖃᙱᑦᑐᖅ: 1-888-646-0006

www.tunngavik.com