ᓄᓇᕗᑦ ᑐᓐᖓᕕᒃ ᑎᒥᖓᑕ ᐊᖓᔪᖅᑳᑉ-ᑐᒡᓕᐊ ᔭᐃᒥᓯ ᐃᑦᑐᓗᒃ ᐅᓪᓗᒥ ᑐᓂᔭᐅᖅᑲᐅᔪᖅ 2014 ᐱᕚᓪᓕᑎᑦᓯᓯᒪᓂᕐᒧᑦ ᑐᓐᓂᖅᑯᓯᐊᒥᒃ ᐃᓅᓯᓕᒫᒥᓄᑦ. ᐃᑦᑐᓗᒃ 14-ᓄᑦ ᑐᓐᓂᖅᑯᓯᐊᖅᑐᓄᑦ ᐃᓚᒋᔭᐅᔪᖅ ᓄᓇᖃᖅᑳᕐᓯᒪᔪᓄᑦ ᑲᓇᑕᒥᐅᓄᑦ ᐱᕚᓪᓕᑎᑦᓯᓯᒪᓂᕐᒧᑦ ᑐᓐᓂᖅᑯᓯᐊᒥᒃ ᐊᕐᕌᒍᑦᑎᓐᓂ. ᐃᑦᑐᓗᒃ ᐊᒻᒪᓗ ᐊᓯᖏᑦ ᑐᓐᖓᕕᒃᑯᑦ ᑲᑎᒪᔨᖏᑦ ᐅᐃᓂᐱᒡᒦᖅᑲᐅᔪᑦ ᐅᓪᓗᒥ ᑐᓐᓂᖅᑯᓯᐊᖅᑖᖅᑎᑕᐅᓂᕐᒧᑦ ᖁᕕᐊᓲᑎᖃᖅᑐᓂ.
“ᐅᐱᒍᓱᑦᓯᐊᖅᐳᖓ ᑐᓐᓂᖅᑯᓯᐊᖅᑖᓂᓐᓂᒃ ᐅᓪᓗᒥ. ᐱᓕᕆᐊᕆᓯᒪᔭᓐᓄᑦ ᐃᓅᓯᓕᒫᓐᓂ ᐱᔨᑦᓯᓂᕐᒥᒃ ᐃᓄᖕᓂᒃ, ᓂᕆᐅᓚᐅᓐᖏᒃᑲᓗᐊᖅᑐᖓ ᐃᓕᓴᕆᔭᐅᓛᕐᓂᕐᒥᒃ ᐱᓇᓱᐊᖅᑕᓐᓄᑦ, ᑭᓯᐊᓂ ᐃᑉᐱᓇᕐᓂᖓ ᐊᖏᔪᒻᒪᕆᐊᓗᒃ ᐅᕙᓐᓄᑦ ᐅᐱᒋᔭᐅᔾᔪᑎᑖᖅᑎᑕᐅᓂᕋ,” ᐅᖃᓚᐅᖅᑐᖅ ᐃᑦᑐᓗᒃ. “ᖁᔭᒋᔪᒪᔭᕋ ᓄᓕᐊᕋ, ᒥᐊᓕ, ᐊᒻᒪᓗ ᐃᓚᒃᑲ ᐃᑲᔪᕐᓯᒪᐃᓐᓇᕐᓂᖏᓐᓄᑦ ᐱᔪᓐᓇᕈᑎᒋᓯᒪᒐᒃᑭᑦ ᑐᓂᓯᒪᓂᕐᒧᑦ ᐱᓕᕆᐊᖕᓂᒃ ᐃᑲᔪᕐᓂᕐᒧᑦ ᐱᕚᓪᓕᑎᑦᓯᒍᑎᒃᓴᖏᓐᓄᑦ ᐃᓄᐃᑦ ᐃᓅᓯᖏᓐᓄᑦ, ᐅᖃᓚᐅᖅᑐᖅ.
ᐃᑦᑐᓗᒃ ᐱᓕᕆᒋᐊᓐᖓᕈᑎᒋᓚᐅᖅᑕᖓ ᓂᐅᕕᖅᑎᑯᓐᓂ ᕼᐊᑦᓴᓐ ᐸᐃ ᑲᒻᐸᓂ ᓂᐅᕕᖅᑎᑦᓯᔨᐅᓪᓗᓂ, ᑭᖑᓂᐊᒍᑦ ᐊᖓᔪᖅᑳᕆᔭᐅᓕᓚᐅᖅᑐᖅ ᑯᐊᐸᒃᑯᑦ ᓂᐅᕕᕐᕕᖓᓂ. 1975-ᒥᓂᒃ 1989-ᒧᓄᑦ, ᐃᑦᑐᓗᒃ ᐃᖅᑲᓇᐃᔮᖃᐃᓐᓇᓚᐅᖅᑐᖅ ᑕᓗᕐᔪᐊᓂ ᓄᓇᓖᑦ ᒐᕙᒪᖏᓐᓄᑦ ᐊᓪᓚᑦᑎᐅᓪᓗᓂ ᑭᖑᓂᐊᒍᑦ ᕼᐊᒻᓚᑦᕈᕋᑖᖅᑎᓪᓗᒋᑦ ᐊᓪᓚᑦᑎᒻᒪᕆᒋᔭᐅᓕᓚᐅᖅᑐᖅ. ᐊᖏᔪᕐᔪᐊᒥ ᐱᓇᓱᐊᕐᓯᒪᓂᖓᓄᑦ ᓄᓇᕗᒻᒥ ᒪᐃᔭᐃᑦ ᑲᑎᒪᔨᖏᓐᓄᑦ ᐃᓕᓴᕆᔭᐅᓂᖃᓚᐅᖅᑐᖅ ᑐᓂᔭᐅᒍᑎᒋᓪᓗᒍ, ᒫᓐᓇ ᑕᐃᒎᓯᖃᓕᖅᑐᖅ ᐃᑦᑐᓗᒃ ᑐᓐᓂᖅᑯᓯᐊᖅ, ᑐᓂᔭᐅᖃᑦᑕᖅᑐᖅ ᐊᕐᕌᒍᑕᒫᑦ ᐱᓇᓱᐊᑦᓯᐊᓂᕐᐹᒧᑦ ᐊᓪᓚᑦᑎᒻᒪᕆᒻᒧᑦ. ᐃᑦᑐᓗᒃ ᐱᓇᓱᐊᖅᑐᒻᒪᕆᐅᓯᒪᔪᖅ ᐊᐃᕙᔾᔪᑕᐅᑎᓪᓗᒋᑦ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑏᑦ ᐊᒻᒪᓗ ᐱᓇᓱᐊᖃᑕᐅᓯᒪᔪᒻᒪᕆᐅᓪᓗᓂ ᐊᑐᓕᖅᑎᑕᐅᒋᐊᖃᕐᓂᖏᓐᓄᑦ. ᐊᖓᔪᖅᑳᒧᑦ-ᑐᒡᓕᕆᔭᐅᓯᒪᓕᖅᑐᖅ ᑐᓐᖓᕕᒃᑯᓐᓂ ᐊᕐᕌᒍᓄᑦ 21-ᓄᑦ.
