ᐃᕐᖐᓐᓇᖅ ᓴᖅᑭᖅᑕᐅᒋᐊᓕᒃ
(ᓅᕙᐃᒻᕙ 9, 2023 – ᑲᖏᕐᖠᓂᖅ, ᓄᓇᕗᑦ) ᓄᓇᕗᑦ ᑐᙵᕕᒃ ᐃᑲᔫᑎᑦᓴᓕᕆᔨᒃᑯᑦ (NTF) ᖁᕕᐊᓱᑦᑐᑦ ᑐᓴᖅᑎᑦᓯᒋᐊᑦᓴᖅ ᑐᒡᓕᐊᓂ ᓴᖅᑮᓂᕐᒥᒃ ᑐᑦᓯᕋᕈᒪᔪᓂᒃ ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑎᓂᒃ ᒪᑐᐃᖓᓂᐊᖅᑐᓂᒃ ᓅᕙᐃᒻᕙ 9-ᒥᒃ 30-ᒧᑦ, 2023 ᐅᑯᓄᖓ 1) ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑎᓂᒃ ᐊᒻᒪᓗ 2) ᐊᔪᕈᓐᓃᖅᓴᐅᑎᓄᑦ ᐃᖅᑲᓇᐃᔮᒧᓪᓗ ᖁᕝᕙᕆᐊᕋᓱᐊᕈᑎᓂᒃ ᐃᓕᓐᓂᐊᖅᑐᓄᑦ ᐃᑲᔫᑎᑦ.
NTF ᐃᓕᓐᓂᐊᖅᑐᓄᑦ ᐃᑲᔫᑎᑦ ᐊᑐᖅᑕᐅᒍᓐᓇᖅᑐᑦ ᐊᑭᓕᕆᐊᓕᒻᒧᑦ ᐃᓕᓐᓂᐊᒐᕐᒧᑦ, ᐊᑭᖏᓐᓄᑦ, ᐅᖃᓕᒫᒐᕐᓄᑦ, ᐃᓕᓐᓂᐊᒐᑦᓴᓄᑦ ᐃᓕᓐᓂᐊᓂᕐᒧᓪᓗ ᐊᑐᕆᐊᓕᓐᓄᑦ, ᐃᖏᕐᕋᔾᔪᑎᓄᑦ, ᐊᒻᒪᓗ ᑐᔪᕐᒥᔾᔪᑎᓄᑦ, ᐃᓅᓇᓱᐊᕐᓂᕐᒧᑦ ᐊᑭᓕᖅᓱᕆᐊᓕᓐᓄᑦ, ᓄᑕᖅᑲᑦ ᐸᖅᑭᔭᐅᔾᔪᑎᖏᓐᓄᑦ, ᓂᕆᔭᑦᓴᓄᑦ, ᐊᒻᒪᓗ ᐃᓕᓐᓂᐊᖅᑏᑦ ᐊᑭᓕᑦᓴᖏᓐᓄᑦ.
$1500.00 ᐊᔪᕈᓐᓃᖅᓴᐅᑎᓄᑦ ᐃᖅᑲᓇᐃᔮᒧᓪᓗ ᖁᕝᕙᕆᐊᕋᓱᐊᕈᑎᓂᒃ ᐃᓕᓐᓂᐊᖅᑐᓄᑦ ᐃᑲᔫᑎᑦ; ᑐᓂᔭᐅᔪᑦ ᐊᑎᓕᐅᖅᑕᐅᓯᒪᓗᑎᒃ ᐃᓕᓴᕆᔭᐅᓯᒪᔪᒥ ᐃᓕᓐᓂᐊᒐᑦᓴᒥ ᐊᑦᑐᐊᓂᓕᒻᒥ ᓴᓇᑐᓕᓴᕐᓂᕐᒧᑦ/ ᐃᖅᑲᓇᐃᔮᒧᑦ ᐊᔪᕈᓐᓃᖅᓴᐅᑎᓄᑦ ᓯᑕᒪᓂᒃ ᐱᓇᓱᐊᕈᓯᕐᓂᒃ ᓯᕕᑐᑎᒋᔪᓄᑦ ᐊᑯᓂᐅᓂᖅᓴᓘᓐᓃᑦ. ᑕᕝᕗᖓ ᐃᓚᒋᔭᐅᔪᑦ ᓴᓇᔭᕆᐅᖅᓴᓂᕐᒧᑦ−ᐃᓯᕈᑎᑦ, G.R.E.A.T ᐊᒻᒪᓗ ᐊᙳᑎᑎᑦᓯᒋᐊᕈᑏᑦ ᐃᓕᓐᓂᐊᖅᓯᒪᔭᐅᔪᓄᑦ (A.B.E., P.A.S.S., G.E.D, ᐃᓕᓐᓂᐊᓂᕐᒧᑦ ᐃᓯᕐᓂᕐᒧᑦ ᐊᕐᕌᒍᖓ).
$2500 ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑎᑦ: ᑐᓂᔭᐅᔪᑦ ᐊᑎᓕᐅᖅᑕᐅᓯᒪᓗᑎᒃ ᐃᓕᓴᕆᔭᐅᓯᒪᔪᒥ ᓯᓚᑦᑐᓴᕐᕕᒻᒥ ᐅᕝᕙᓘᓐᓃᑦ ᐃᓕᓐᓂᐊᕕᔾᔪᐊᒥ ᐃᓕᓐᓂᐊᓂᕐᒧᑦ ᒪᕐᕉᓐᓂᒃ ᐊᕐᕌᒎᓐᓂᒃ ᓯᕕᑐᑎᒋᔪᒥᒃ ᐊᑯᓂᐅᓂᖅᓴᓘᓐᓃᑦ ᐃᓕᓴᕆᔭᐅᔾᔪᑎᑖᕋᓱᐊᕐᓂᕐᒧᑦ ᐃᓕᓐᓂᐊᓂᒃᑯᑦ ᐅᕝᕙᓘᓐᓃᑦ ᐸᕐᓇᐅᑎᒧᑦ ᐃᓕᓐᓂᐊᕋᑦᓴᒧᑦ ᑎᑭᐅᑎᒍᑎᑦᓴᒧᑦ ᐃᓕᓴᕆᔭᐅᔾᔪᑎᒻᒪᕆᑦᑖᓂᕐᒧᑦ ᐃᓕᓐᓂᐊᕕᒻᒥᒃ.
ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑎᓄᑦ ᐊᑐᐊᒐᑦ, ᐊᑐᐊᖅᓯᔾᔪᑎᑦ, ᐊᒻᒪᓗ ᑐᑦᓯᕋᐅᑏᑦ ᑕᑕᑎᕆᐊᓖᑦ ᐊᐃᔭᐅᖃᑦᑕᕈᓐᓇᖅᑐᑦ ᓄᓇᑦᓯᓐᓂ ᑐᖅᑲᑕᕐᕕᓯᓐᓂᒃ ᐅᕝᕙᓘᓐᓃᑦ ᖃᕆᓴᐅᔭᒃᑯᑦ ᐱᔭᐅᔪᓐᓇᖅᑐᑦ ᐃᑭᐊᖅᑭᕕᑦᑎᓐᓂᒃ ᓄᓇᕗᑦ ᑐᙵᕕᒃ ᐃᑲᔫᑎᑦᓴᓕᕆᔨᒃᑯᑦ ᐃᑲᔫᑎᖏᑦ − ᓄᓇᕗᑦ ᑐᙵᕕᒃ ᑎᒥᖓ.
ᐃᓄᐃᑦ ᐊᑎᖃᖃᑕᐅᔪᑦ ᓄᓇᕗᑦ ᐊᖏᕈᑎᖏᓐᓂ ᑐᑦᓯᕋᐅᓯᐅᕈᓐᓇᖅᑐᑦ.
ᑕᑕᑎᐊᓂᑦᓯᒪᔪᑦ ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑎᓄᑦ ᑐᑦᓯᕋᐅᑏᑦ, ᐃᓚᖃᕐᓗᑎᒃ ᑎᑎᕋᖅᓯᒪᔪᓂᒃ ᓇᑦᓯᐅᑎᖃᑕᐅᒋᐊᓕᓐᓂᒃ, ᐊᐅᓪᓚᖅᑎᑕᐅᒍᓇᖅᑐᑦ ᑎᑎᖅᑲᓂᐊᕐᕕᒃᑯᑦ, ᐃᕐᖐᓐᓈᕈᑎᒃᑯᑦ, ᓱᒃᑲᔪᒃᑯᑦ, ᐅᕝᕙᓘᓐᓃᑦ ᐸᔪᒍᑎᒋᓗᒋᑦ ᐱᓕᕆᐊᑦᓴᓕᕆᔨᒧᑦ ᑐᙵᕕᒃ ᐃᑲᔫᑎᑦᓴᓕᕆᔨᒃᑯᓐᓂ ᑲᖏᕐᖠᓂᕐᒥ.
-30-
ᑐᑭᓯᒋᐊᒃᑲᓂᕐᕕᒃᓴᖅ:
ᒥᓯᐅᓪ ᖃᓗᔾᔭᖅ
ᐱᓕᕆᐊᑦᓴᓕᕆᔨ
ᑎᑎᖅᑲᖃᐅᑖ 280 ᑲᖏᕐᖠᓂᖅ, ᓄᓇᕗᑦ X0C 0G0
ᓄᓇᕗᑦ ᑐᙵᕕᒃ ᐃᑲᔫᑎᑦᓴᓕᕆᔨᒃᑯᑦ
ᐅᖄᓚᐅᑖ: (867) 645-5400/ᐊᑭᖃᙱᑦᑐᖅ: 1-888-236-5400
ᓱᒃᑲᔪᒃᑰᕈᑖ: (867)645-5414
