ᑐᓴᕋᑦᓴᓕᕆᔩᑦ

ᓄᓇᕗᒻᒥ ᐃᓄᐃᑦ ᐊᖓᔪᖅᑳᖓ UN−ᑯᓃᑦᑐᖅ: ᑲᓇᑕ ᐃᑲᔪᕐᓱᕆᐊᓕᒃ ᐃᓄᒃᑑᓂᕐᓴᓂᒃ ᓄᓇᕗᒻᒥ

(ᐄᑉᕈ 20, 2018ᐃᖃᓗᐃᑦ, ᓄᓇᕗᑦ) ᐊᑐᖅᑕᐅᓚᐅᕐᓯᒪᓐᖏᑦᑐᒥᒃ ᓂᓪᓕᐊᓂᖃᕆᐅᕐᓂᕐᒥ ᓄᓇᕐᔪᐊᖅ ᑲᑎᒪᔨᕐᔪᐊᖏᓐᓄᑦ ᑲᑎᒪᔨᐅᖏᓐᓇᖅᑐᓄᑦ ᓄᓇᖃᖅᑳᕐᓯᒪᔪᓄᑦ ᑕᑉᕙᓂ ᐱᓇᓱᐊᕈᓯᑦᑎᓐᓂ, ᓄᓇᕗᑦ ᑐᓐᖓᕕᒃ ᑎᒥᖓᓄᑦ ᐊᖓᔪᖅᑳᖅ ᐊᓗᑭ ᑰᑦᑎᖅ ᐅᖃᐅᓯᖃᓚᐅᖅᑐᖅ ᐊᔾᔨᐅᑎᑕᐅᒋᐊᖃᕐᓂᖏᓐᓂᒃ ᑭᒃᑯᑐᐃᓐᓇᕐᓄᑦ ᐱᔨᑦᓯᖅᑕᐅᒍᑎᓄᑦ ᑲᓇᑕᒥᐅᖑᖃᑎᖏᓐᓄᑦ ᐊᑐᖅᑕᐅᑦᓯᐊᑐᐃᓐᓇᖃᑦᑕᖅᑐᑦ, ᐊᑕᐅᓯᕐᒥᒃ ᐅᖃᐅᓯᓖᑦ ᐃᓄᒃᑐᑦ ᓄᓇᕗᒻᒥ. ᐱᓐᖑᖅᑎᑕᐅᓯᒪᓂᖓᒍᑦ ᑭᒃᑯᑐᐃᓐᓇᕐᓄᑦ ᒐᕙᒪᖓ ᓄᓇᕗᑦ 1999-ᒥ, ᑲᓇᑕ ᐅᓄᕐᓂᕐᓴᓂᒃ ᑭᒃᑯᑐᐃᓐᓇᕐᓄᑦ ᐅᖃᐅᓯᓕᕆᓂᕐᒧᑦ ᐊᐅᓚᑦᓯᔪᓐᓇᕐᕕᖃᕐᓂᖓᓂᒃ ᖃᓪᓗᓈᑎᑑᓐᖏᑦᑐᖅ ᐅᑉᕙᓘᓐᓃᑦ ᐅᐃᕖᑎᑐᑦ, ᐃᓄᒃᑐᖔᕐᓕ. ᑲᓇᑕ ᖃᐅᔨᒪᒋᐊᕆᐊᓕᒃ ᐃᓄᒃᑐᑦ ᐅᓄᕐᓂᕐᓴᓄᑦ ᑭᒃᑯᑐᐃᓐᓇᕐᓄᑦ ᐊᑐᖅᑕᐅᓂᖓ ᓄᓇᕗᒻᒥ ᐊᔾᔨᑐᐃᓐᓇᖓᓂᒃ ᑭᒃᑯᑐᐃᓐᓇᕐᓄᑦ ᐱᔨᑦᓯᕈᑏᑦ ᐊᒻᒪᓗ ᒪᓕᒐᖅᑎᒍᑦ ᓴᐳᔾᔭᐅᓯᒪᒍᑏᑦ ᑲᓇᑕᒥᐅᓄᑦ ᐊᑐᖅᑕᐅᑦᓯᐊᑐᐃᓐᓇᖃᑦᑕᖅᑐᓂᒃ.

 

ᐊᖓᔪᖅᑳᖅ ᑰᑦᑎᖅ ᐃᖅᑲᐃᑎᑦᓯᒋᐊᓚᐅᖅᑐᖅ UN−ᑯᓐᓂᒃ ᐃᒫᒃ, “ᐃᓄᒃᑐᑦ ᐃᓕᓴᕆᔭᐅᓯᒪᒋᐊᓕᒃ ᑐᓐᖓᕕᒋᔭᐅᓂᖓᓂᒃ ᐅᖃᐅᓯᖅ ᑲᓇᑕᒥ, ᐊᒻᒪᓗ ᑲᓇᑕ ᖃᐅᔨᒪᒋᐊᕆᐊᓕᒃ ᐅᖃᐅᓯᕗᑦ ᓈᖕᒪᑦᑐᒥᒃ ᐊᒻᒪᓗ ᓴᓐᖏᓂᖃᑦᓯᐊᖅᑐᒥᒃ ᐃᑲᔪᖅᑕᐅᒻᒪᑦ, ᐊᑐᕋᑦᓴᓕᐊᖑᓯᒪᔪᑎᒍᑦ, ᐃᓄᐃᑦ ᑭᒃᑯᑐᐃᓐᓇᕐᓄᑦ ᐱᔨᑦᓯᖅᑕᐅᒍᑎᒃᓴᖏᓐᓂᒃ ᐅᖃᐅᓯᕐᖓᐅᑎᒥᒍᑦ.”

 

ᐃᓛᒃᑯᑦ 13 ᐊᒻᒪᓗ 14 ᓄᓇᕐᔪᐊᒥ ᑲᑎᒪᔩᑦ ᓇᓗᓇᐃᕐᓯᒪᔭᖓᓂ ᐱᔪᓐᓇᐅᑎᖏᓐᓄᑦ ᓄᓇᖃᖅᑳᕐᓯᒪᔪᑦ (UNDRIP) ᐅᖃᕐᓯᒪᔪᖅ ᓄᓇᓕᕐᔪᐊᕆᔭᐅᔪᓄᑦ ᓇᓗᓇᐃᖅᑕᐅᓯᒪᔪᑦ ᐊᑐᖅᑕᐅᑦᓯᐊᖃᑦᑕᕆᐊᖃᕐᒪᑕ ᓴᐳᔾᔭᐅᓯᒪᒍᑎᒃᓴᖏᓐᓂᒃ ᓄᓇᖃᖅᑳᕐᓯᒪᔪᖁᑎᖏᑕ ᐅᖃᐅᓯᖏᑦ. 19-ᓂᒃ ᐊᕐᕌᒍᓂ, ᑲᓇᑕ ᑭᒃᑯᑐᐃᓐᓇᕐᓄᑦ ᐊᐅᓚᑦᓯᔪᓐᓇᕐᕕᖃᕐᓯᒪᓕᖅᑐᖅ ᐅᓄᕐᓂᕐᓴᑦ ᑖᒃᓯᔭᖅᑐᑎᒃ ᐃᓄᖏᑦ ᐅᖃᐅᓯᓖᑦ ᓄᓇᖃᖅᑳᕐᓯᒪᔪᑦ ᐅᖃᐅᓯᖓᓂᒃ, ᑭᓯᐊᓂ ᑲᒪᒋᐊᕐᓯᒪᓐᖏᑦᑐᑦ ᐱᓕᕆᐊᖑᔭᕆᐊᓕᖕᓂᒃ ᐃᑲᔫᑎᒃᓴᖓᓂᒃ ᐃᓄᒃᑐᑦ ᐃᑲᔪᖅᑕᐅᖃᑦᑕᕐᓂᖏᑎᑐᑦ ᖃᓪᓗᓈᑎᑐᑦ ᐅᐃᕖᑎᑐᓪᓗ.

 

ᑲᓇᑕ ᐊᐅᓚᑦᓯᔪᖅ $8,189 ᐊᑕᐅᓯᕐᒧᑦ ᐅᐃᕖᒧᑦ ᐅᖃᐅᓯᓕᕆᓂᕐᒧᑦ ᐱᓕᕆᐊᓂᒃ ᓄᓇᕗᒻᒥ, ᑐᓂᔭᐅᖃᑦᑕᑎᓪᓗᒋᓪᓕ $186 ᐊᑕᐅᓯᕐᒧᑦ ᐃᓄᒃᑐᑦ ᐅᖃᐅᓯᓕᖕᒧᑦ − ᑐᑭᖓ ᐃᒪᐃᓕᖓᔪᖅ ᒐᕙᒪᑐᖃᒃᑯᑦ ᐊᑐᕐᓂᕐᓴᐅᖃᑦᑕᖅᑐᑦ 44-ᖏᕐᓱᖅᑐᓂᒃ ᐅᐃᕖᑎᑐᑦ ᓄᓇᕗᒻᒥ ᐃᓄᒃᑑᖅᑐᓂᒃ.

ᐅᖃᓕᒪᓪᓗᓂ ᑲᑎᒪᔾᔪᑎᒃᓴᓂ 4-ᖓᓂ ᑲᔪᓯᑎᑕᐅᓂᖏᑦ ᐊᕐᕕᓂᓕᓐᓂ ᑎᓕᓯᔾᔪᑕᐅᓯᒪᔪᓂ ᑲᑎᒪᔨᐅᖏᓐᓇᖅᑐᓄᑦ ᑖᒃᑯᓄᓐᖓᖓᔪᓂᒃ UNDRIP, ᑐᓐᖓᕕᒃᑯᑦ ᐊᖓᔪᖅᑳᖓ ᐅᖃᓕᒪᓚᐅᖅᑐᖅ ᐊᐅᓚᔾᔭᐃᔾᔪᑕᐅᒋᐊᖃᕐᓂᐊᖅᑐᓂᒃ ᐸᕐᓇᓂᕐᒧᑦ 2019−ᒥ ᓄᓇᕐᔪᐊᒥ ᐊᕐᕌᒍᕆᓂᐊᖅᑕᖓᓄᑦ ᓄᓇᖃᖅᑳᕐᓯᒪᔪᑦ ᐅᖃᐅᓯᖏᓐᓄᑦ.

ᑐᑭᓯᒋᐊᒃᑲᓐᓂᕈᒪᒍᕕᑦ ᓱᓕ:
ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᑦ
ᐅᖄᓚᐅᑦ:
ᐅᖓᓯᒃᑐᒥᒃ ᐊᑭᖃᖏᑦᑐᖅ: