ᑐᓴᕋᑦᓴᓕᕆᔩᑦ

ᓄᓇᕗᑦ ᑐᙵᕕᒃ ᑎᒥᖓ ᑐᙵᓱᒃᑎᑦᑎᕗᑦ ᒥᐊᓕᒐᐃᑦ – ᑲᓇᑕᓗ ᑲᑐᔾᔨᓪᓗᑎᒃ ᓇᓗᓇᐃᕐᓯᒍᑎᖃᖅᑎᓪᓗᒋᒃ ᐱᓪᓗᒋᑦ ᓯᓚ, ᐆᒻᒪᖁᑎᑦ, ᐊᒻᒪᓗ ᐅᑭᐅᖅᑕᕐᑐᒥ ᓯᕗᓕᕐᑎᐅᓂᕐᒥᒃ

(ᒪᑦᓯ 11, 2016 – ᐃᖃᓄᐃᑦ, ᓄᓇᕗᑦ)     ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓ ᑳᑎ ᑕᐅᑐᙱ ᑐᙵᓱᒃᑎᑦᑎᖃᐅᕗᖅ ᒥᐊᓕᒐᐃᑦ – ᑲᓇᑕᓗ ᑲᑐᔾᔨᓪᓗᑎᒃ ᓇᓗᓇᐃᕐᓯᒍᑎᖃᖅᑎᓪᓗᒋᒃ ᐱᓪᓗᒋᑦ ᓯᓚ, ᐆᒻᒪᖁᑎᓕᕆᓂᖅ, ᐊᒻᒪᓗ ᐅᑭᐅᖅᑕᕐᑐᒥ ᓯᕗᓕᕐᑎᐅᓂᕐᒥᒃ, ᑐᓴᕋᒃᓴᓕᐊᕆᔭᖏᑦᑎᒍᑦ ᒥᐊᓕᒐᐃᑦ ᐊᖓᔪᖅᑳᖓᑦᑕ ᐅᐹᒪᑉ ᐊᒻᒪᓗ ᑲᓇᑕᐅ ᐊᖓᔪᖅᑳᕐᔪᐊᖓᑦᑕ ᑐᕉᑑᑉ.

“ᖁᕝᕙᐹᓪᓕᓇᕐᐳᖅ ᑕᑯᓪᓗᒋᒃ ᐊᖓᔪᖅᑳᖅ ᐅᐹᒪ ᐊᒻᒪᓗ ᑲᓇᑕᐅᑉ ᐊᖓᔪᖅᑳᕐᔪᐊᖓ ᑐᕉᑐ ᐱᓂᐊᕐᓂᖃᕈᑎᖃᖅᑲᐅᑎᓪᓗᒋᒃ ᑲᒪᒋᐊᕈᑎᒃᓴᓂᒃ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ ᐊᒻᒪᓗ ᐊᓯᖏᓐᓂᒃ ᑐᐊᕕᓐᓇᕐᑐᓂᒃ ᐊᕙᑎᓕᕆᓂᕐᒥᒃ ᐱᔾᔪᑎᖃᖅᑐᓂᒃ” ᐅᖃᖅᑐᑦ ᑕᐅᑐᙱ. “ᐃᓕᑕᕆᖃᐅᕙᕗᑦ ᑲᑎᒪᔾᔪᑎᒃᓴᖏᓐᓃᒃᑐᑦ ᐱᔾᔪᑎᖃᕐᒪᑕ ᐅᑭᐅᖅᑕᕐᑐᒥᒃ, ᐊᒻᒪᓗ ᐅᑭᐅᖅᑕᕐᑐᒥ ᐅᔭᕋᑦᑕᕆᐊᕐᕕᑦᑖᕐᐸᓪᓕᐊᓂᕐᒥᒃ, ᐃᓅᓯ ᐊᒻᒪ ᐃᓕᖅᑯᓯᖅ ᐱᕙᓪᓕᐊᑎᑕᐅᓂᖓᓂ, ᐊᒻᒪᓗ ᐊᐅᓚᑦᑎᔨᐅᓂᕐᒧᑦ ᐃᓱᒫᓗᓐᓇᕆᔭᓂᒃ”, ᐅᖃᐅᓯᕆᒃᑲᓐᓂᕆᓪᓗᓂᐅᒃ ᑳᑎ ᑕᐅᑐᙱᐅᑉ. “ᑖᒃᑯᐊ ᐅᖃᐅᓯᐅᖅᑲᐅᔪᑦ, ᐱᒻᒪᕆᐅᑎᑕᑦᑕ ᐊᔾᔨᒋᓪᓚᒻᒪᒋᑦ, ᑕᒪᒃᑮᓐᓂ ᑐᕌᖅᑕᐅᔪᓂ ᐊᒻᒪᓗ ᐅᖃᐅᓯᐅᔪᓂ, ᑖᒃᑯᓇᖓᑦ ᒥᐊᓕᒐᐃᑦ – ᑲᓇᑕᓗ ᑲᑐᔾᔨᓪᓗᑎᒃ ᐅᖃᐅᓯᔭᖏᓐᓂ ᐊᒻᒪᓗ ᓄᓇᕐᔪᐊᑉ ᐅᑭᐅᖅᑕᖅᑐᓕᒫᖓᓂ ᐃᓄᒋᔭᐅᔪᑦ ᓇᓗᓇᐃᕈᑎᒋᓚᐅᕐᓯᒪᔭᖏᑦ ᓄᓇᒥᖔᖅᑐᓂᒃ ᐱᕙᓪᓕᐊᑎᑦᑎᓂᕐᒥᒃ ᒪᓕᒐᕆᔭᐅᔪᓂ ᐃᓄᐃᑦ ᓄᓇᖓᓐᓂ, ᐱᖁᔨᕗᖔᑎᒍᑦ ᐊᑐᓕᖅᑎᑕᐅᓚᐅᕐᓯᒪᔪᖅ ᐃᓄᖕᓄᑦ ᑭᒡᒐᑐᖅᑎᐅᔪᓄᑦ ᑲᓇᑕᒥᖔᖅᑐᓄᑦ, ᐊᓛᓯᑲᒥᙶᖅᑐᓄᑦ, ᑲᓛᖡᑦ ᓄᓇᖓᓂᖔᖅᑐᓄᑦ ᐊᒻᒪᓗ ᕋᓴᒥᖔᖅᑐᓄᑦ 2011-ᖑᑎᓪᓗᒍ.

ᑳᑎ ᑕᐅᑐᙱ ᐅᖃᐅᓯᖃᖅᑲᐅᔪᖅ ᓄᓇᕗᑦ ᑐᙵᕕᒃ ᑎᒥᖓᑕ ᖁᔭᓕᓂᕆᔭᖓᓂᒃ ᐃᒃᐱᔭᐅᓯᒪᖃᐅᓂᖏᓐᓄᑦ ᑕᕝᕘᓇ ᑲᑐᔾᔨᓪᓗᑎᒃ ᐅᖃᐅᓯᖃᖅᑎᓪᓗᒋᒃ ᐱᔪᓐᓇᐅᑎᖏᓐᓂᒃ ᐊᒻᒪᓗ ᐱᖃᑕᐅᔭᕆᐊᖃᓐᓂᖏᓐᓂᒃ ᓄᓇᖃᖅᑳᖅᓯᒪᔪᑦ ᐱᒻᒪᕆᐅᓂᖓᓂᒃ ᐅᑭᐅᖅᑕᖅᑐᒥ ᓯᕗᓪᓕᖅᐹᖑᑎᑕᐅᔭᕆᐊᓖᑦ ᐋᖅᑭᓱᕐᑕᐅᑎᓪᓗᒋᑦ, ᐊᑐᐊᒐᓕᐅᕈᑕᐅᑎᓪᓗᒋᑦ, ᐊᒻᒪ ᐊᑐᐊᒐᐃᑦ ᐊᑐᓕᕐᑎᑕᐅᕙᓪᓕᐊᓂᖏᓐᓄᑦ, ᓄᓇᕐᔪᐊᓕᒫᕐᒥ ᐊᒻᒪᓗ ᓄᓇᒋᔭᑦᑎᓐᓂ.

ᑳᑎ ᑕᐅᑐᙱ ᐃᒃᐱᒋᔭᖃᓗᐊᒃᑲᓂᖅᑲᐅᒋᕗᖅ ᓇᓗᓇᐃᕈᑎᓂ ᐱᓂᐊᕐᓂᕋᕈᑕᐅᔪᓂᒃ “ᐱᓕᕆᖃᑎᒌᓐᓂᕐᒥᒃ ᐊᑐᓕᕐᑎᑕᐅᕙᓪᓕᐊᑎᓪᓗᒋᑦ ᓄᓇᑖᕈᑎᓄᑦ ᐊᖏᕈᑏᑦ ᓴᖅᑭᕈᑕᐅᔪᓐᓇᖁᓪᓗᒍ ᐃᓅᓯᓕᕆᓂᒃᑯᑦ ᐃᓕᖅᑯᓯᓕᕆᓂᒃᑯᑦ ᐊᒻᒪᓗ ᑮᓇᐅᔭᓕᐅᕈᑕᐅᔪᓐᓇᕆᐊᓕᓐᓂᒃ ᑕᒪᐃᓐᓄᑦ ᓄᓇᖃᖅᑳᖅᓯᒪᔪᓄᑦ ᐅᑭᐅᖅᑕᖅᑐᒥ ᓄᓇᖃᖅᑐᓄᑦ”. “ᑖᓐᓇ ᐱᒻᒪᕆᐅᖕᒪᑦ.” ᐅᖃᖅᑐᖅ ᑕᐅᑐᙱ, “ᐊᖏᖃᑎᒌᒍᑕᐅᓯᒪᔪᑦ ᓄᓇᖃᖅᑳᖅᓯᒪᔪᓄᑦ ᐊᑐᓕᕐᑎᑕᐅᑦᑎᐊᕆᐊᖃᕐᒪᑕ ᓱᓕᔪᕐᓴᖃᑎᒌᓪᓗᑎᒃ ᐊᒻᒪ ᐃᓱᒪᒋᓗᒋᑦ ᐊᑑᑎᒋᔪᒫᕐᓂᐊᕐᓯᒪᔭᖏᑦ ᐱᓂᐊᕐᓂᕋᕈᑎᑎᒍᑦ ᐊᒻᒪᓗ ᐊᑲᐅᔪᒃᑯᑦ ᐊᒻᒪ ᖃᓄᖅᑑᕈᓐᓇᓂᒃᑯᑦ ᐱᓕᕆᖃᑎᒌᒍᑎᒋᓗᒋᑦ. ᓱᓕᓗᑕ ᐊᒻᒪᓗ ᑲᑐᑎᓗᒋᑦ ᐊᒃᓱᕈᕈᑎᒋᒍᑦᑎᒍ ᐊᖏᔪᒥᒃ ᐃᓂᕐᓯᔪᓐᓇᕋᑦᑕ.”

ᑐᑭᓯᒋᐊᒃᑲᓐᓂᕈᒪᒍᕕᑦ ᓱᓕ:
ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᑦ
ᐅᖄᓚᐅᑦ:
ᐅᖓᓯᒃᑐᒥᒃ ᐊᑭᖃᖏᑦᑐᖅ: