ᓴᒃᑯᑕᐅᑲᐅᑎᒋᔭᕆᐊᓕᒃ
(ᕖᕝᕗᐊᕆ 9, 2024 – ᐃᖃᓗᐃᑦ, ᓄᓇᕗᑦ) ᐅᓪᓗᒥ, ᓄᓇᕗᑦ ᑐᙵᕕᒃ ᑎᒥᖓ ᓈᒻᒪᒃᓴᖅᑐᑦ ᐸᓯᔭᒃᓴᐅᓂᕋᐃᓂᖓᓂᒃ ᑲᕆᒪ ᒪᓐᔨ ᓄᓇᕗᑦ ᐃᖅᑲᖅᑐᐃᔨᖏᖕᓂ ᐱᖁᔭᕐᒥᒃ ᓱᕋᐃᓪᓗᓂ ᓴᓪᓗᔪᒥᓂᐅᓂᖓᓄᑦ ᓄᓇᕗᒻᒥᐅᑕᔅᓴᔭᐅᓂᕋᖅᑐᓂ ᐃᓅᓂᕋᖅᑐᓂ. ᒪᓐᔨ ᓴᓪᓗᓪᓗᓂ ᑎᒍᐊᖅᑖᖅᑐᒥᓂᐅᓂᕋᖅᓯᒪᔪᖅ ᐸᓂᖏᖕᓂᒃ ᒪᕐᕈᓕᐊᒃ, ᓇᑕᐃᔭ ᐊᒻᒪᓗ ᐊᒥᕋ ᒋᐅᓪ, ᑐᒍᐊᖅᑖᒥᓂᖏᒡᒎᖅ ᐃᓄᒻᒥᒃ ᐊᓈᓇᒥᒃ ᐊᒻᒪᓗ ᐊᑎᓕᐅᖅᑕᐅᑎᑦᑎᔪᒥᓂᐅᓪᓗᓂ ᒪᓕᑦᑐᒍ ᓄᓇᕗᑦ ᐊᖏᕈᑎᖓᒍᑦ. ᑕᐃᒪᐃᑦᑐᒥᓂᐅᓂᖓᓄᑦ, ᒪᕐᕈᓕᐊᒥᓃᒃ ᑮᓇᐅᔭᕐᓄᑦ ᐊᓯᖏᓄᓪᓗ ᐃᑲᔫᓯᐊᖅᑖᖃᑦᑕᖅᑐᒥᓂᐅᕘᒃ, ᓴᓂᕐᕙᖅᑕᐅᓯᒪᔪᓄᑦ ᐃᓄᖕᓄᑦ ᐊᒻᒪᓗ ᓄᓇᖃᖅᑳᖅᓯᒪᔪᓄᑦ, ᒪᓕᑦᑐᒋᑦ ᓴᓪᓗᓪᓗᓂ ᐊᑎᓕᐅᖅᓯᓚᐅᖅᑐᓂ ᓄᓇᕗᒻᒥᐅᑕᔅᓴᔭᐅᓂᕋᖅᑐᓂ ᐃᓅᓂᕋᖅᑐᓂᒋᒃ.
ᓄᓇᕗᑦ ᑐᙵᕕᒃ ᑎᒥᖓ ᓈᒻᒪᒃᓴᕋᓗᐊᖅᑎᓪᓗᒍ ᐸᓯᔭᒃᓴᐅᓂᕋᕐᓂᖓ ᒥᔅ ᒪᓐᔨᑉ, ᓇᑕᐃᔭ ᐊᒻᒪᓗ ᐊᒥᕋ ᒋᐅᓪ, ᑮᓇᐅᔭᖅᑖᖃᑦᑕᖅᑐᒥᓂᐅᔫᒃ ᓴᓪᓗᔪᒥᓂᐅᑎᓪᓗᒋᑦ, ᐸᓯᔭᒃᓴᐅᓂᕋᖅᓯᒪᙱᑦᑑᒃ. ᐊᓯᖏᓐᓂᓪᓗ ᐱᔪᒥᓂᐅᒐᓗᐊᖅᑎᓪᓗᒍ, ᓇᑕᐅᔭ ᒋᐅᓪ ᐊᒻᒪᓗ ᐊᒥᕋ ᒋᐅᓪ ᐱᔪᒥᓂᐅᕘᒃ ᑮᓇᐅᔭᓂᑦ 158,254.05 ᑲᑭᕙᒃ ᑲᑐᔾᔨᖃᑎᒌᖏᖕᓂᒃ, ᑲᑐᔾᔨᖃᑎᒌᖑᔪᖅ ᑲᒪᒋᔭᓕᒃ ᐊᐅᓚᑦᑎᓪᓗᓂ ᐃᓕᓐᓂᐊᖅᑏᑦ ᐃᑲᔫᓯᐊᖏᖕᓂᒃ ᐱᔭᐅᔪᓐᓇᓲᑦ ᓄᓇᕗᒻᒥᐅᑕᑦ ᐃᓄᖏᖕᓄᑦ ᕿᑭᖅᑖᓗᒻᒥ.
“ᓇᑕᐃᔭ ᒋᐅᓪ ᐊᒻᒪᓗ ᐊᒥᕋ ᒋᐅᓪ ᖁᑦᑎᓐᓂᖅᓴᒥᒃ ᐃᓕᓐᓂᐊᖅᑐᒥᓂᐅᕘᒃ ᐊᒻᒪᓗ ᐃᑲᔫᓯᐊᖅᑖᖅᑐᒥᓂᐅᓪᓗᑎᒃ ᐱᕋᔭᑦᑐᑎᑦ ᖃᓄᐃᓕᐅᖅᑐᒥᓂᐅᖓᓂᒃ ᐊᓈᓇᖓᑦᑕ. ᐱᕋᔭᑦᑐᓂ ᐃᓅᓂᕋᐃᔪᒥᓂᐅᓪᓗᓂ ᑐᙵᕕᒋᔭᐅᓪᓗᓂ, ᑮᓇᐅᔭᖅᑎᒍᑦ ᐃᑲᔫᓯᐊᑐᐃᓐᓇᓚᐅᙱᑦᑑᒃ ᓴᓂᕐᕙᖅᑕᐅᓯᒪᔪᑦ ᐃᑲᔪᖅᑕᐅᖁᓪᓗᒋᑦ ᓄᓇᕗᒻᒥᐅᑦ ᐃᓄᐃᑦ ᐃᓕᓐᓂᐊᕇᑦᑎᐊᖁᓪᓗᒋᑦ, ᑭᓯᐊᓂᓕ ᒋᐅᓪ ᓄᑲᕇᒃ ᓯᓚᑦᑐᖅᓴᕐᕕᕐᔪᐊᕐᒥ ᐊᒻᒪᓗ ᐱᓕᕆᐊᕐᓂ ᐊᖅᓵᖅᓯᓯᒪᔪᒥᓃᒃ ᐋᖅᑭᒃᑕᐅᓯᒪᒐᓗᐊᖅᑎᓪᓗᒋᑦ ᓄᓇᖃᖅᑳᖅᓯᒪᔪᓄᑦ. ᖃᓪᓗᓇᕐᔨᕐᖓᑦ ᐃᓕᖅᑯᓯᖏᖕᓂᒃ ᐅᖃᐅᓯᖏᓐᓂᓪᓗ ᐊᑐᖅᑕᐅᒃᑲᐃᑎᑦᑎᒐᓱᐊᖃᑦᑕᖅᓯᒪᔪᑦ ᐊᖅᓵᖅᓯᓪᓗᑎᑦ ᓄᓇᑦᑎᓐᓂ ᐊᒻᒪᓗ ᓄᓇᒦᙶᖅᑐᓂᑦ ᐱᒻᒪᕆᓂᖏᑦ, ᐊᒻᒪᓗ ᑕᒪᓐᓇ ᐃᓅᓂᕋᖅᑐᑎᑦ ᐊᖅᓵᖅᓯᔪᒥᓂᐅᔪᑦ ᐅᓪᓗᒥᓕᓴᕐᒥᒃ ᐱᓕᖅᑭᑦᑖᑎᑦᑎᓯᒪᕗᑦ ᐊᔾᔨᖏᓐᓂᒃ ᖃᓪᓗᓇᕐᔨᕐᖓᑦ ᐃᓕᖅᑯᓯᕆᕙᓚᐅᖅᑕᕐᒥᖕᓂᒃ ᐊᖅᓵᖅᓯᖃᑦᑕᖅᑐᑎᑦ,” ᐅᖃᖅᑐᓂ ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓ ᐊᓗᑭ ᑰᑦᑎᖅ.
ᐃᖃᓗᓐᓂ ᐊᑎᓕᐅᖅᑐᓂᑦ ᕿᒥᕐᕈᔩᑦ ᑲᑎᒪᔨᕋᓛᖏᑦ (CEC), ᐃᓚᒋᔭᐅᕗᖅ 25-ᖑᔪᓂᑦ ᑎᓕᔭᐅᓯᒪᔪᑦ ᑲᑎᒪᔨᐊᓛᑦ ᓄᓇᕗᒻᒥ ᐱᔪᓐᓇᕐᓂᖃᖅᑐᑦ ᐃᓱᒪᓕᐅᕐᓗᑎᑦ ᑭᒃᑯᑦ ᐊᑎᓕᐅᖅᑕᐅᔪᓐᓇᕐᒪᖔᑕ ᒪᓕᑦᑐᒍ ᓄᓇᕗᑦ ᐊᖏᕈᑎᖓ, ᓈᓚᓐᓂᖃᓚᐅᖅᓯᒪᔪᑦ ᐄᐳᕈᓪ 6, 2023-ᖑᑎᓪᓗᒍ, ᐊᒻᒪᓗ ᐲᖅᓯᓪᓗᑎᑦ ᓇᑕᐃᔭᒥᒃ ᐊᒻᒪᓗ ᐊᒥᕋᕐᒥᒃ ᒋᐅᓪ ᐃᓄᐃᑦ ᐊᑎᓕᐅᖅᓯᒪᔪᖏᖕᓂ. ᑖᓐᓇ ᓯᕗᓪᓕᖅᐹᖑᕗᖅ ᖃᐅᔨᒪᔭᐅᔪᖅ ᐊᑎᓕᐅᖅᑐᖃᖅᑐᒥᓂᐅᔪᑦ ᓴᓪᓗᓪᓗᑎᑦ ᓄᓇᕗᑦ ᑐᙵᕕᒃ ᑎᒥᖓᓂ. ᑕᐃᒪᐃᒃᑲᓐᓂᓛᖁᔨᓇᑎᑦ, ᓄᓇᕗᑦ ᑐᙵᕕᒃ ᑎᒥᖓ ᐱᖃᑕᐅᓪᓗᑎᑦ ᓄᓇᓕᓐᓂ ᐊᑎᓕᐅᕈᒪᔪᑦ ᕿᒥᕐᕈᔩᑦ ᑲᑎᒪᔨᐊᓛᖏᑦ ᐊᑐᖅᑎᑦᑎᓯᒪᓕᖅᑐᑦ ᒪᓕᑦᑕᐅᒃᑲᓐᓂᕆᐊᓕᓐᓂᑦ ᐱᓇᓱᐊᖅᑐᓄᑦ ᑎᑎᕋᖅᓯᒪᔪᖅᑎᒍᑦ ᑐᓂᓯᖃᑦᑕᕐᓗᑎᑦ ᓇᓗᓇᐃᖅᑕᐅᑦᑎᐊᖁᓪᓗᒋᑦ ᐃᓛᓐᓂᒃᑯᑦ ᐃᓅᓂᕋᖅᑐᑦ.
ᐃᓅᓂᕋᖅᑐᖃᓗᐊᕌᓗᒃᐸᙱᑦᑐᖅ ᓴᓪᓗᓪᓗᑎᑦ ᐃᓅᖃᑎᒌᑦᑎᐊᖅᑐᑯᓘᓂᖏᖕᓄᑦ ᐃᓄᐃᑦ ᓄᓇᓕᖏᖕᓂ. ᐃᓄᐃᑦ ᐊᑎᖏᑎᒍᑦ ᖃᐅᔨᒪᔭᖃᑐᐃᓐᓇᙱᓚᑦ ᑭᓯᐊᓂᓕ ᑲᑐᔾᔨᓪᓗᑎᑦ ᐃᓅᖃᑎᒌᖃᑦᑕᕐᓂᖏᑎᒍᑦ, ᐃᓚᒌᑦᑎᐊᓲᖑᓪᓗᑎᑦ ᐃᓚᔮᕇᑦ, ᐊᒻᒪᓗ ᓄᓇᓕᒻᒧᐊᖓᓂᖏᑦ ᐃᓄᐃᑦ. ᑕᒪᓐᓇ ᖃᐅᔨᒪᖃᑦᑕᐅᑎᓂᐅᔪᖅ ᓄᓇᓕᒻᒥ ᓴᐳᒻᒥᐅᓯᖅᓯᒪᑎᑦᑎᓲᖑᕗᖅ ᓴᓪᓗᓪᓗᑎᑦ ᐃᓅᓂᕋᖅᑐᓂᑦ. ᓄᓇᕗᒻᒨᖓᓂᖏᑦ ᐊᒻᒪᓗ ᓄᓇᒧᑦ ᓴᙵᑦᑎᑕᐅᓯᒪᒋᕗᖅ ᑕᒪᔅᓱᒧᖓ ᑕᐃᔭᐅᔪᖅ “ᓄᓇᓕᒻᒧᐊᖓᓂᖏᑦ” ᐊᕕᑦᑐᖅᓯᒪᓂᖓᓂᒃ 35 ᓄᓇᕗᑦ ᐊᖏᕈᑎᖓᓂᒃ, ᐱᓇᓱᐊᖅᑐᖅ ᐊᑎᓕᐅᕋᓱᐊᕐᓗᓂ ᓄᓇᑐᖃᖃᑦᑕᕐᓂᑯᒥᓂᖏᖕᓄᒃ ᐊᖓᔪᖅᑳᖏᒃ ᐅᕝᕙᓘᓐᓃᑦ ᐊᓈᓇᑦᑎᐊᒃᑯᖏᒃ.
“ᐃᓚᒌᑦ ᑐᑭᓯᒋᐊᕈᑎᖏᑦ ᑭᒃᑯᑐᐃᓐᓇᕐᓄᑦ ᑐᓴᖅᑕᐅᒐᔭᓚᐅᙱᑦᑎᓪᓗᒋᑦ, ᓴᐃᒪᓂᖏᑦ, ᐊᒻᒪᓗ ᐃᒻᒥᓂᒃ ᐃᖅᑲᒋᑦᑎᐊᕋᔭᕐᓂᖏᑦ ᐊᑦᑐᖅᑕᐅᓯᒪᕗ ᑖᒃᑯᐊ ᐱᖓᓱᑦ ᐊᕐᓇᐃᑦ ᖃᓄᐃᓕᐅᕐᓂᕆᓚᐅᖅᑕᖏᖕᓄᑦ,” ᐅᖃᖅᑐᓂ ᐊᖓᔪᖅᑳᖅ ᑰᑦᑎᖅ. “ᒪᕐᕉᒃ ᐸᓂᒋᔭᐅᔫᒃ ᐃᑲᔫᓯᐊᖅᑖᓚᐅᖅᑐᑦ ᐊᓈᓇᖏᑕ ᐱᕋᔭᑦᑐᓂ ᖃᓄᐃᓕᐅᓚᐅᕐᓂᖓᓄᑦ, ᐊᒻᒪᓗ ᑭᓯᐊᓂᓕ ᐱᓕᕆᐊᖃᕐᓂᕆᓚᐅᖅᑕᖏᑦ ᐱᕋᔭᑦᑐᒥᓂᐅᑎᓪᓗᒋᒃ ᖃᐅᔨᔭᐅᔾᔮᙱᑦᑐᑦ. ᑕᒪᓐᓇ ᓈᒻᒪᙱᑦᑐᖅ.”
-30-
ᐱᕙᓪᓕᐊᔪᓕᕆᔨᓄᑦ ᖃᐅᔨᒃᑲᖅᑕᐅᔪᓐᓇᖅᑐᖅ:
ᑭᐊᕙᓐ ᖃᑉᓗᑦᓯᐊᖅ
ᑐᑭᒧᐊᑦᑎᑦᑎᔨ ᑐᓴᐅᒪᔪᓕᕆᔨᒃᑯᓐᓄᑦ
ᓄᓇᕗᑦ ᑐᙵᕕᒃ ᑎᒥᖓ
