(ᐊᒃᑑᕝᕙ 24, 2025 – ᑲᖏᖅᖠᓂᖅ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓ 2025-ᒥ ᐊᕐᕌᒍᑕᒫᑦ ᑲᑎᒪᕕᔾᔪᐊᕐᓂᖏᓐᓂᒃ ᐱᔭᕇᖅᑲᐅᕗᑦ ᐃᒃᐸᑦᓴ ᑲᖏᖅᖠᓂᕐᒥ, ᐱᖓᓱᓂᒃ ᐅᓪᓗᓂᑦ ᑲᑎᒪᕕᔾᔪᐊᖅᑎᓪᓗᒋᑦ ᐅᓂᒃᑳᕐᕕᐅᓚᐅᖅᑐᑦ, ᐱᖁᔨᕗᖔᕈᑎᓕᐅᖅᑐᑎᑦ ᐊᒻᒪᓗ ᑕᒪᐃᓐᓂ ᑐᑭᒧᐊᑦᑎᑦᑎᓚᐅᖅᑐᑦ ᐋᖅᑮᓪᓗᑎᑦ ᐃᓄᐃᑦ ᓯᕗᓪᓕᐅᑎᖁᔭᖏᓐᓂᒃ. ᐃᓱᒪᓕᐅᕈᑕᐅᓗᐊᓚᐅᖅᑐᖅ ᐅᑯᐊ, ᐅᑎᖅᑎᑕᐅᓂᖓ ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᑉ ᑐᖏᓕᐊᑕ ᑮᓇᐅᔭᓕᕆᓂᕐᒧᑦ ᐃᓂᖓ, ᑲᒪᒋᔭᖃᕈᓐᓇᖅᑐᓂᓗ ᐊᓪᓚᑦᑎᐅᓗᓂ−ᑮᓇᐅᔭᓕᕆᔨ, ᐃᒃᓯᕙᐅᑕᕆᔭᐅᓗᓂ ᐃᓄᐃᑦ ᐃᓅᓯᓕᕆᔭᐅᓂᖏᖕᓄᑦ ᐊᒻᒪᓗ ᐃᓕᖅᑯᓯᓕᕆᓂᖅ ᐱᕙᓪᓕᐊᑎᑕᐅᓂᖓᓄᑦ ᐅᖃᐅᔾᔨᒋᐊᖅᑏᑦ ᑲᑎᒪᔨᕋᓛᖏᖕᓄᑦ, ᐊᑭᓕᖅᓱᐃᖃᑦᑕᕐᓂᕐᒧᑦ ᑲᑎᒪᔨᕋᓛᖏᖕᓄᑦ, ᑳᓐᑐᕌᒃᑦ−ᓯᓂᕐᒧᑦ ᑲᑎᒪᔨᕋᓛᖏᑦ, ᐃᒡᓗᕗᑦ ᑯᐳᕇᓴᙵᓄᑦ ᐊᒻᒪᓗ ᐊᓯᖏᑦ ᐱᓕᕆᐊᒃᓴᐃᑦ ᑐᕌᖓᔪᑦ ᓄᓇᕗᑦ ᑐᙵᕕᒃ ᑎᒥᖓᑕ ᐱᓕᕆᐊᖏᓐᓄᑦ ᐊᒻᒪᓗ ᐊᐅᓚᑕᐅᔭᕆᐊᓕᓐᓄᑦ.
“ᓴᙵᑦᑎᑕᐅᑎᓪᓗᒍ ᓵᑕᐅᓯᒪᔪᓐᓇᕐᓂᕗᑦ ᓄᓇᕗᑦ ᑐᙵᕕᒃ ᑎᒥᖓᓂ ᖃᐅᔨᒪᑦᑎᐊᖅᑎᑦᑎᒍᑕᐅᕗᖅ ᐃᓄᐃᑦ ᓂᐱᖏᑦ ᑐᓴᖅᑕᐅᖃᑦᑕᕋᓗᐊᕐᒪᖔᕐᒥᒃ ᑲᑎᒪᔨᑦᑎᓐᓄᑦ ᐊᒻᒪᓗ ᐃᖅᑲᓇᐃᔭᖅᑎᑦᑎᓐᓄᑦ,” ᐅᖃᖅᑐᓂ ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓ ᔨᐅᓚᒥ ᑑᕐᖔᓗᒃ. “ᓴᖅᑭᖅᑎᒃᑲᓐᓂᖅᑐᒍ ᐊᖓᔪᖅᑳᑉ ᑐᖏᓕᐊᑕ ᑮᓇᐅᔭᓕᕆᓂᕐᒧᑦ ᐃᓂᖓ ᓴᙵᑦᑎᕆᔪᖅ ᐅᐊᑦᑎᔪᓐᓇᕐᓂᕗᑦ ᑮᓇᐅᔭᓂᒃ ᐊᑐᕐᓂᑦᑎᓐᓂᒃ, ᐅᓂᒃᑲᐅᓯᖃᑦᑕᕐᓗᑕ ᓴᖅᑭᔮᖅᑐᒃᑯᑦ, ᐊᒻᒪᓗ ᐊᑯᓂᐅᔪᒧᑦ ᐅᑉᐱᕆᔭᐅᔪᓐᓇᑦᑎᐊᕐᓗᑕ ᓄᓇᕗᒻᒥ ᐃᓄᖏᖕᓄᑦ.”
ᐅᐊᑦᑎᐊᕈ, ᓄᓇᕗᑦ ᑐᙵᕕᒃ ᑎᒥᖓ ᐱᖓᓱᓂᒃ ᐊᖓᔪᖅᑳᑉ ᑐᖏᓕᖏᓐᓂᒃ ᐱᑕᖃᖃᑦᑕᓚᐅᖅᓯᒪᒋᕗᖅ, ᐱᖃᓯᐅᑎᓪᓗᒍ ᐊᖓᔪᖅᑳᑉ ᑐᖏᓕᐊ ᑮᓇᐅᔭᓕᕆᓂᕐᒧᑦ ᐊᓪᓚᒃᑎᐅᕙᓚᐅᖅᓯᒪᔪᖅ−ᑮᓇᐅᔭᓕᕆᔨ 2010-ᕈᕋᓱᐊᕐᓂᖓᓂᒃ, ᑲᒪᒋᔭᐅᓂᖏᑦ ᑲᑎᑕᐅᒻᒪᑕ ᐊᖓᔪᖅᑳᕐᒧᑦ ᑲᒪᒋᔭᐅᖔᓕᖅᑐᑎᑦ. ᐅᑎᖅᑎᑕᐅᓂᖓ ᑖᓐᓇ ᐃᓂᒋᔭᖅ ᑲᒪᒋᔭᖃᓗᐊᕋᔭᖅᑐᓂ ᓴᙱᓂᖅᓴᒃᑯᑦ ᑮᓇᐅᔭᖅᑎᒍᑦ ᐅᐊᑦᑎᖃᑦᑕᕐᓗᓂ ᐊᒻᒪᓗ ᐊᖓᔪᖅᑳᕐᒥᒃ ᐊᒻᒪᓗ ᐊᖓᔪᖅᑳᑉ ᑐᖏᓕᐊᓂᒃ ᑲᒪᒋᔭᖃᕐᓂᖅᓴᐅᑎᑦᑎᓂᐊᖅᑐᖅ ᓯᕗᒧᐊᒃᑎᑦᑎᓂᖏᓐᓂᒃ ᐃᓄᒻᒪᕆᖕᓄᑦ−ᓯᕗᒃᑲᖅᑖᖑᔪᑦ ᓯᕗᓪᓕᐅᑎᑕᐅᖁᔭᑦ.
ᐊᕐᕌᒍᑕᒫᑦ ᑲᑎᒪᕕᔾᔪᐊᖅᑎᓪᓗᒋᑦ ᐱᖁᔨᕗᖔᕈᑏᑦ: ᓴᙵᑦᑎᑕᐅᓗᑎᑦ ᓄᓇᓖᑦ, ᓇᓕᒧᒌᓕᖅᑎᑦᑎᓂᖅ, ᐊᒻᒪᓗ ᖃᓄᐃᑦᑕᐃᓕᒪᓂᖅ
ᖄᖓᒍᒃᑲᓐᓂᖅ ᐊᐅᓚᑦᑎᓂᕐᒧᑦ ᑲᑎᒪᔨᓄᑦ ᐱᐅᓯᕚᓪᓕᖅᑎᑕᐅᓪᓗᑎᑦ, ᐊᕐᕌᒍᑕᒫᑦ ᑲᑎᒪᕕᔾᔪᐊᖅᑎᓪᓗᒋᑦ ᑲᔪᓯᑎᑦᑎᓚᐅᖅᑐᑦ ᐱᖁᔨᕗᖔᕈᑎᓂᒃ ᐱᕐᔪᐊᕌᓗᓐᓂᒃ ᓲᕐᓗᒃ ᐱᖃᓯᐅᑎᓪᓗᒍ ᐃᖏᕐᕋᔪᓕᕆᓂᕐᒧᑦ, ᐱᖁᑎᕐᔪᐊᓕᕆᓂᕐᒧᑦ, ᐃᓕᓐᓂᐊᕐᓂᓕᕆᓂᕐᒧᑦ, ᐃᓱᒪᒃᑯᑦ ᖃᓄᐃᑦᑕᐃᓕᒪᓂᕐᒧᑦ, ᑮᓇᐅᔭᓕᕆᔾᔪᑏᑦ ᐱᖃᓯᐅᔾᔭᐅᓂᖏᑦ, ᓄᓇᒥ−ᑐᙵᕕᖃᖅᑐᒥᒃ ᑲᒪᓲᑦ ᐊᑦᑕᕐᓇᖅᑕᐃᓕᒪᑎᑕᐅᓂᖏᑦ, ᐃᓄᐃᑦ ᑭᒃᑯᑐᐃᓐᓇᐃᑦ ᐋᓐᓂᐊᖅᑕᐃᓕᓂᖏᖕᓄᑦ, ᐃᓅᓯᖃᑦᓯᐊᕐᓂᖅ, ᐊᒻᒪᓗ ᓄᓇᓕᐅᔪᑦ ᓴᐳᔾᔭᐅᓂᖏᖕᓄᑦ ᐱᖁᔨᕗᖔᓕᐅᖅᓯᒪᔪᒥᓂᐅᓪᓗᑎᑦ.
ᐃᓚᒋᔭᐅᔪᑦ ᐱᖁᔨᕗᖔᕈᑎᖏᑦ ᐃᒪᐃᓕᐅᖁᔨᓯᒪᔪᑦ:
• ᐊᑦᑕᕐᓇᙱᑦᑐᒥᒃ ᐃᒥᕐᒥᒃ ᐃᒥᖅᑕᐅᔪᓐᓇᖅᑐᒥᒃ ᐱᔪᓐᓇᕐᓗᑎᑦ − ᑮᓇᐅᔭᖅᑎᒍᑦ ᐊᑐᖅᑐᖃᕐᓂᖅᓴᐅᓗᓂ ᐃᒥᕋᒃᓴᐅᔪᒥᒃ ᐃᒥᖅᑕᖃᖃᑦᑕᖁᓪᓗᒍ ᐊᒻᒪᓗ ᐅᐊᑦᑕᒃᑯᓄᑦ ᐱᖁᑎᕐᔪᐊᓄᑦ
• ᖃᖓᑕᓲᓕᕆᓂᕐᒧᑦ ᐱᔨᑦᑎᖅᑕᐅᓂᖅ − ᑲᓇᑕᒥ ᒐᕙᒪᒃᑯᑦ ᐊᑐᓕᖅᑎᑦᑎᖁᔭᐅᓪᓗᑎᑦ ᐊᑭᑦᑐᕋᐅᑎᓂᕐᒧᑦ ᓇᐅᑦᓯᖅᑐᖅᑏᑦ ᑎᒥᖓᓂᒃ ᐊᑐᓕᖁᔭᐅᓯᒪᔪᓂᒃ ᐊᒻᒪᓗ ᐱᖃᓯᐅᔾᔭᐅᓗᑎᑦ ᐃᓄᐃᑦ ᑲᓇᑕᒥ ᐱᓕᕆᔩᑦ ᑲᑎᒪᔨᕋᓛᖏᓐᓄᑦ ᐅᑭᐅᖅᑕᖅᑐᒥ ᖃᖓᑕᓲᓕᕆᓂᕐᒨᖓᔪᓂᒃ
• ᖃᖓᑕᓲᕐᓄᑦ ᒥᕝᕖᑦ − ᐊᔭᐅᕆᔪᑦ ᑲᓇᑕᒥ ᒐᕙᒪᖏᓐᓂ ᐊᒻᒪᓗ ᓄᓇᕗᑦ ᒐᕙᒪᖏᓐᓂ ᐋᖅᑭᒃᓱᐃᓗᑎᑦ ᐸᕐᓇᐅᑎᓂᒃ ᖁᐊᖅᑕᖅᑐᓂᒃ ᒥᕝᕕᓕᐅᕐᓗᑎᑦ ᑕᒪᐃᓐᓂ ᓄᓇᕗᒻᒥ ᓄᓇᓕᓕᒫᖏᓐᓂ
• ᕕᐊᑖᕐᕕᒃ ᐊᒻᒪᓗ ᕙᐃᓂᑖᕐᕕᒃ ᓂᐅᕕᕐᕕᖏᒃ (ᐃᖃᓗᓐᓂ ᐊᒻᒪᓗ ᑲᖏᖅᖠᓂᕐᒥ) − ᓄᓇᓕᓐᓄᑦ−ᓯᕗᒃᑲᖅᑖᖑᔪᒥᒃ ᕿᒥᕐᕈᓇᖁᔨᔪᑦ, ᓂᕈᐊᕕᔾᔪᐊᖅᑐᖃᕐᓗᓂᓗ, ᐊᒻᒪᓗ ᒪᑐᔭᐅᒻᒪᕆᓪᓗᑎᓪᓘᓐᓃᒃ ᑭᒡᓕᖃᖅᑎᑕᐅᓗᑎᓪᓘᓐᓃᒃ ᐃᑲᕐᕋᖏᓐᓂᒃ ᐃᑲᔪᖅᑐᐃᔾᔪᑏᑦ ᐋᖅᑭᒃᑕᐅᑉᐸᑕ ᑭᓯᐊᓂ
• ᒪᑐᔭᐅᓂᖓ ᑲᖏᖅᖠᓂᕐᒥ ᐊᒻᒪᓗ ᐃᖃᓗᓐᓂ ᕕᐊᑖᕐᕕᒃ ᕙᐃᓂᑖᕐᕕᓪᓗ ᓂᐅᕕᕐᕕᖏᒃ − ᒪᑐᔭᐅᑲᐅᑎᒋᖁᔨᔪᑦ ᑲᖏᖅᖠᓂᕐᒥ ᐊᒻᒪᓗ ᐃᖃᓗᓐᓂ ᕕᐊᑖᕐᕖᓐᓂᒃ ᕙᐃᓂᑖᕐᕕᒻᒥᓗ ᓈᒻᒪᑦᑐᒥᒃ ᐸᓂᖅᓰᕕᑖᕋᓱᐊᕐᓂᖏᓐᓂᒃ ᐊᒻᒪᓗ ᐃᓱᒪᒃᑯᑦ ᐃᑲᔪᖅᑐᐃᔾᔪᑎᖃᕋᓱᐊᕐᓂᖏᓐᓂᒃ
• ᐃᓐᓇᒃᑯᕖᑦ ᐸᖅᑭᕕᖏᑦ ᐊᒻᒪᓗ ᐃᒡᓗᖏᑦ − ᓄᓇᕗᑦ ᒐᕙᒪᖏᓐᓂ ᓴᓇᖁᔨᔪᑦ ᐊᒥᓲᓂᖅᓴᓂᒃ ᐃᓐᓇᒻᒪᕇᑦ ᐃᒡᓗᖏᓐᓂ ᐊᒻᒪᓗ ᐊᑯᓂᐅᔪᒧᑦ ᐸᖅᑭᕕᓐᓂ ᐃᓐᓇᒻᒪᕆᖕᓄᑦ ᐊᕕᑦᑐᖅᓯᒪᔪᓂ ᑐᑦᑕᕐᕕᑐᐃᓐᓇᐅᙱᑦᑐᓂᒃ ᐊᒻᒪᓗ ᐱᓕᒻᒪᒃᓴᖅᑕᐅᓗᑎᑦ ᐃᓄᐃᑦ ᐃᖅᑲᓇᐃᔭᖅᑎᐅᒐᔭᖅᑐᑦ
• ᐃᓄᐃᑦ ᑮᓇᐅᔭᖃᕐᕕᒻᒥ ᐊᑐᕈᓐᓇᕐᓂᖏᑦ − ᑲᓇᑕᒥ ᑮᓇᐅᔭᒃᑯᕕᓂᒃ ᐊᒻᒪᓗ ᑲᓇᑕᒥ ᒐᕙᒪᒃᑯᓐᓂ ᐱᐅᓯᕚᓪᓕᖅᑎᑦᑎᖁᔨᔪᑦ ᐃᓕᖅᑯᓯᕐᓄᑦ ᐊᑦᑕᕐᓇᙱᑦᑐᓂᒃ, ᐃᓄᒃᑎᑑᕐᕕᐅᔪᓐᓇᖅᑐᒥᒃ ᑮᓇᐅᔭᓕᕆᓂᕐᒧᑦ ᐱᔨᑦᑎᕋᕈᑎᓂᒃ ᓄᓇᕗᒻᒥ.
• ᐃᓄᓐᓄᑦ−ᓯᕗᒃᑲᖅᑖᖑᔪᑦ ᐃᓕᓐᓂᐊᕐᕖᑦ − ᑲᓇᑕᒥ ᒐᕙᒪᓂ ᐊᒻᒪᓗ ᓄᓇᕗᑦ ᒐᕙᒪᖏᓐᓂ ᐃᑲᔪᖅᑐᖅᑕᐅᖁᔨᔪᑦ ᐋᖅᑭᒃᑕᐅᓂᖏᓐᓂᒃ ᐃᓄᓐᓄᑦ−ᓯᕗᒃᑲᖅᑖᖑᔪᑦ ᐃᓕᓐᓂᐊᕐᕖᑦ ᑐᙵᕕᖃᕐᓗᑎᑦ ᐃᓄᐃᑦ ᐅᖃᐅᓯᖓᓂᒃ, ᐃᓕᖅᑯᓯᖓᓂᒃ, ᐊᒻᒪᓗ ᐃᓅᓯᖏᓐᓂᒃ.
• ᐃᓱᒪᒃᑯᑦ ᖃᓄᐃᑦᑕᐃᓕᒪᓂᕐᒧᑦ − ᐊᔭᐅᕆᔪᑦ ᑐᐊᕕᕐᓇᖅᑐᒃᑯᑦ ᑮᓇᐅᔭᖃᖅᑎᑕᐅᓕᕐᓗᑎᑦ ᐊᒻᒪᓗ ᐅᐸᓗᖓᐃᔭᐃᓗᑎᑦ ᖃᓄᐃᓕᐅᕈᑎᖃᕆᐊᖅᑐᖃᕐᓂᐊᕐᒪᑦ ᐃᒻᒥᓃᖅᑕᐃᓕᒪᓂᕐᒨᖓᔪᓂᒃ, ᒪᒃᑯᑦᑐᓪᓗ ᐃᓱᒪᒃᑯᑦ ᖃᓄᐃᑦᑕᐃᓕᒪᖁᓪᓗᒋᑦ.
• ᓇᓄᐃᑦ ᐱᓪᓗᒋᑦ ᐊᐅᓚᑕᐅᓂᖏᑦ − ᑐᐊᕕᕐᓇᖅᑐᒃᑯᑦ ᖃᓄᐃᓕᐅᕈᑎᖃᕆᐊᖁᔨᔪᑦ ᑲᒪᒋᔭᐅᖁᓪᓗᒋᑦ ᓇᓄᖅᑕᐅᑦᑕᐃᓕᒪᔾᔪᑎᓂᒃ ᐅᓗᕆᐊᓇᖅᑐᒨᖅᑐᖃᖁᓇᒍ ᐊᒻᒪᓗ ᐋᖅᑭᒋᐊᖅᑕᐅᓗᑎᑦ ᑰᑕᖏᑦ ᐊᑐᖅᑕᐅᓗᑎᑦ ᐃᓄᐃᑦ ᖃᐅᔨᒪᔭᑐᖃᖏᑦ.
• ᓴᙱᔪᑦ ᐋᙵᔮᕐᓇᖅᑐᑦ ᓄᖅᑲᖅᑎᑕᐅᓂᖏᑦ − ᐱᓕᕆᖃᑎᖃᖁᔨᔪᑦ ᑲᓇᑕᒥ ᑎᑎᖅᑲᓂᐊᕐᕕᒃᑯᑦ, ᐳᑭᖅᑕᓕᒃᑯᑦ, ᐊᒻᒪᓗ ᒐᕙᒪᓂ ᐱᐅᓯᔮᓪᓕᕐᓗᑎᑦ ᖃᐅᔨᓴᖅᑕᐅᖃᑦᑕᕐᓂᖏᑦ ᐊᒻᒪᓗ ᓄᖅᑲᖅᑎᑕᐅᓗᑎᑦ ᐱᖁᔭᖅᑎᒍᑦ ᐱᔭᐅᔭᕆᐊᖃᙱᓐᓂᕋᖅᑕ ᐋᙵᔮᕐᓇᖅᑐᑦ ᓄᓇᕗᒻᒨᖅᑕᐃᓕᑎᑕᐅᓗᑎᑦ
• ᐋᓐᓂᖅᑎᕆᔪᖃᕐᓂᐊᙱᑦᑐᖅ ᐸᕝᕕᓴᐃᔪᖃᕐᓂᐊᙱᑦᑐᕐᓗ ᐃᓅᖃᑎᒥᓂᒃ − ᓇᓗᓇᐃᖅᓯᔪᑦ ᓄᓇᕗᑦ ᑐᙵᕕᒃ ᑎᒥᖓᑕ ᑲᒪᒋᔭᖃᕐᓂᐊᕐᓂᕋᕐᓂᖏᑦ ᐋᓐᓂᖅᑎᕆᔪᓂᒃ ᑕᑯᓂᐊᙱᒻᒪᑕ ᖃᓄᐃᓕᐅᕈᑎᖃᕐᓂᐊᖅᑐᑎᓪᓗ, ᓵᑕᐅᓯᒪᑎᑦᑎᓗᑎᑦ ᐊᒻᒪᓗ ᐱᕋᔭᒃᐸᑦᑐᑦ ᐅᖃᐅᑕᐅᓗᑎᑦ, ᐊᒻᒪᓗ ᐃᑲᔪᖅᑕᐅᓗᑎᑦ ᐃᓄᐃᑦ Me Too ᐅᕙᖓᓗ ᑕᐃᒪᐃᑕᐅᓯᒪᒋᕗᖔᕈᑎᒥᒃ ᑕᐃᒪᐃᑦᑐᖃᖅᑕᐃᓕᑎᑦᑎᖁᓪᓗᒋᑦ ᖃᓄᐃᓕᐅᕈᑎᒋᔭᐅᒋᐊᙵᖅᑐᖅ ᐃᓄᓕᒫᕐᓄᑦ ᐊᒻᒪᓗ LGBTQ2+−ᖑᔪᓂᒃ
ᓄᓇᕗᑦ ᑐᙵᕕᒃ ᑎᒥᖓ ᓯᕗᒧᐊᑦᑎᒃᑎᓂᐊᖅᑐᑦ ᐊᕐᕌᒍᑕᒫᑦ ᑲᑎᒪᕕᔾᔪᐊᖅᑎᓪᓗᒋᑦ ᓴᖅᑭᖅᓯᒪᔪᓂᒃ ᐃᓱᒪᓕᐅᕈᑎᒥᓂᕐᓂᒃ ᓴᙵᑦᑎᓯᒪᓂᖅᓴᒃᑯᑦ ᐊᐅᓚᔾᔪᓯᖃᕐᓂᐊᓕᕐᓂᖏᑎᒍᑦ, ᓴᖅᑭᔮᖅᑐᒃᑯᑦ ᑮᓇᐅᔭᓂᒃ ᐅᐊᑦᑎᑦᑎᐊᕐᓂᖅᓴᐅᓂᐊᕐᓗᑎᑦ, ᐊᒻᒪᓗ ᐊᑐᓕᖅᑎᑦᑎᓗᑎᑦ ᐱᖁᔨᕗᖔᕈᑎᓂᒃ ᑲᒪᒋᔭᖃᓗᐊᖅᑐᑦ ᐃᓄᐃᑦ ᖃᓄᐃᑦᑕᐃᓕᒪᓂᖏᓐᓂᒃ, ᐊᑦᑕᕐᓇᖅᑐᒦᑎᑕᐅᑦᑕᐃᓕᒪᓂᖏᓐᓂᒃ, ᐃᓕᖅᑯᓯᖓᓂᒃ, ᐊᒻᒪᓗ ᓇᒻᒥᓂᖅ ᐃᓱᒪᓕᐅᕈᓐᓇᖃᑦᑕᕐᓂᖏᓐᓂᒃ.
-30-
ᐱᕙᓪᓕᐊᔪᓕᕆᔨᒃᑯᑦ ᖃᐅᔨᒋᐊᕈᓐᓇᖅᑐᑦ:
ᐃᕙᓗᐊᕐᔪᒃ ᒥᐅᕆᑦ
ᑐᑭᒧᐊᑦᑎᑦᑎᔨ ᑐᓴᐅᒪᑎᑦᑎᓂᕐᒧᑦ
ᓄᓇᕗᑦ ᑐᙵᕕᒃ ᑎᒥᖓ
