(October 24, 2025 – Kangirhiniq, Nunavut) Ublumi, Nunavut Tunngavik inniktikmata tatvani 2025-mi Aipagugangat Katimakjuakninganik Katimaniat Kangirhiniqmi, malikavlutjuk pingahunik ublunik unipkalioktat, pigiaktitaohimayot, tatvalu katikhukhimayot hivunighitjutit ihuaghaotikhait Inuit hivuliotiyomayaitnik. Una ihomakhutaoloaktok uttitiffakutikha uma NTI-kut Toglia Angayokanguyup Manilikiyiitkuni, havaginiagungnakhiya uma Titigaktii-Manilikiyii, Ighivaotaliup tatvani Inuit Innulikiyiit tatvalu Iliitkuhilikiyiit Pivalianikut Ukkautjiyiovlutik Katimayigalaat, Ikkayohiakutinik Katimayigalaat, Igluvut Timingat tatvalu allanik havakaktok tatvani NTI-kut havagiyaitni ataniktotainilo.
“Hakkugikhivaligahuaklugit kiotiakutikhait iloani NTI-kut pitjutaoniaktok Inuit nipingitnik tohaktaolutik Katimayiitnit havaktitiyaptingnitlo,” ukkalaktok NTI-kut Angayokangat Jeremy Tunraluk. “Uttiktitaoffakninga uma Toglia Angayokanguyup Manilikiyiitkuni hakkugikhivaliutigiyavut munagiyaoniakmata maniit akkiliktutitlo, unipkagiyaolotik kiotiakataklutik, tatvalu ihuakutaoniakmat ukpiknaknikakluta Nunavumi Inuinaknun.”
Taimaninguktok, NTI-kut pinahunik Angayokagiyaoyok Toglikagaloakmat, illaliotivlugo una Toglia Angayokanguyup Manilikiyiitkuni havakakhunilo Titigaktiit Manilikiyii piiktaovluni 2010-mi, tatvanganin havagihimayait nutitaohimayot tatvunga Angayokamut. Uttiktitaoffakmat una havagiyaoyok pitjutaoyok hakkugikhivaliokutaovluni manilikinikut tammakhimayokaknikat tatvalutaok pitjutaoniakmat ukkua Angayokak Togigiyaitlo havagiyamingnik ihomagiloakniakmatjuk tatvalu Inuit-hivuliktaitnik hivuliotiyagiakaktonik havakhanik.
Katimakjuaktitlugit Pigiaktitjutaohimayot: Hakkugikhivalikutikhait Nunaliit. Ajikigiakaknik, tatvalu Innutiakutikhat
Illaliotilugit tahapkuninga ataniktotikhaita ingilgaiyaotikhaitnun, tatvani Katimakjuaktitlugit angikutikakhimayot hapkuninga pigiaktitaohimayonik ihomalotaoloaktunik tahapkuninga illaliotivlugit ingilgalikinikut, pikutaita ihuakutaitnik, ilihainikut, ihumakut ayoghaotikaktot, manikakvikaknik, manikami kayagiyagiakaknikut ilihaknik, munaghikakvikhanik, innutiakutikhanik, tatvalu nunaliitni munagitiakutikhanik.
Katimayiit Pigiaktitjutait tohaktitkuyaoyot hapkuninga:
· Hatkititjutikhait hallumayunik imiktakvikhanik – Tohaktitiyot pivaliotikhanik ikkayotikhanik hallumayunik imiktakvikhanik tatvalu anaktakviit ihuakutikhaitnik
· Tingmitjikiyiit Havagiyaitnik – Tohakuyait Kavamatokatkut ihuaghaikovlugit Akkikyaktoinikut Katimayikhanik pigiaktitjutikaktot illaliotivlugo Inuit illaliotiyagiakaktot tatvunga Kanatamiut havaghitaohimayot Katimayigalaatnun tahapkuninga ukkiuktaktumi tingmitjikinikut
· Tingmiakakviitni Mittakviit – Aghukhaktait Kavamatokatkut Nunavut Kavamatkutlo (GN-kut) ihuaghaitkovlugit parnaiyaotikhanik hannatjutikhaitnik mittakviit hiugaungitunik naptuyunik avugialiknik hannalugit mittakviit tamaitni Nunavumi nunaliitni
· Beer-nik Wine-miklo Niovikvit (Iqalungni Kangirhiniqmilo) – Toghiktoktut nunaliitni ihivgiokutikhanik, illaliotilugit nigoakutikhat, tatvalu umikutikhaitnik uvalunin illainaknik angmakataotikhaitnik ihuakhailgakhutik ihuaktunik ikkayotikhanik pilgaaklutik.
· Umiktikutikhanik Kangirhiniqmi Iqalungnilu Beer-nik Wine-niklo Niovaviitnik – Toghiktoktot kilamik umikovlugik ukkua Kangirhiniqmi Iqalungnilu niovavioyuni ihuaktunik atoktaotiaktoghanik mamihakvinikaklutik tamakmik nunaliitni tatvalu ihomakut ayoghaktot ikkayokvikhaitnik angmakhilgaktotik.
· Iniknigit Munaghivikhaitnik Iglutikhanik tatvalu Iglukhaitnik – Toghiktoktot Nunavut Kavamatkunit hannakuvlugit huli iniknigit iglukhaitnik tatvalu iniknigit munaghivikhaitnik iglukhanik tamaitni nunaliitni tatvalu ilihaitjutikhaitnik Inuit havaktigiyait
· Inuit Pivaliotikhait Manikakviitni – aghukhaktait hapkua manikakviit tatvalu Kavamatokatkut ingilgaikovlugit hapkua iliitkuhiktotikaklutik, Inuktut-ukkagungnaktunik havaktikaklotik manikakviitni tahamani Nunavumi.
· Inuit-Ilihaktitioyokhanik Ilihakviitni – Toghiktotait Kavamatokatkut tatvalu Nunavut Kavamatkut ikkayokuvlugit aolatkutikhaitnik Inuit Ilihaiyioyokhanik ilihakviitni atokataklutik Inuktun ukkauhiitnik ilihakvitni, iliitkuhiktoklutik tatvalu innuhiknik atoklotik.
· Ihomakut Innutiaknik – aghukhaktait kilamik uppalungnaktitlugo manighaknik ihuakhaotikhanik ikkayotikhaniklo inminniktailitjutikhanik, tatvalu inolgamiit ihomakut innutiakutikhaitnik.
· Nannuit Munagitjutikhaitnik – Toghiktoktot kilamik havagiyaoyoghanik ihuaghaotikhanik nannuit kayangnaipkutikhanik tatvalu nutangugiakaliktat tahapkua ataataghat nanugakhautit atoklugit hapkua Inuit Qaujimajatuqangit.
· Nutkaktinahuaklugit hapkua Hivuganaktot Uuitayaknaktot Angayaknaktot Higgakluit Naptuyut – Kinnikhialutik ikkayoktikhanik tahapkuninga Kanatami Titigakakviit, Palihimatkut tatvalu kulligiiktot kavamauyot ihuaghaotikhanik takkukatautikhanik tatvalu nutkaktinahuaklogit hapkua nioviakhaulikpaktot hivugannaktot angayaknaktot higgakluit tikkitailikataklugit tahamunga Nunavumut.
· Piiktitagiakaliktot Ningaknik tatvalu Ighitaginik – Ikkayoktoiyot NTI-kut tunnikhimatjutat piiktitagiakakninganik ningaknik, kiotiakatagiakaknik, tatvalu ningakataktonik, tatvalu ikkayoklutik tahapkuninga Inuit Uvangalu ukkautauvaliayok, annaumayoniklo tatvalu tahapkua LGBTQ2+ nunaliitni.
NTI-kut hivumuvaliatjutiginiaktait hapkua ukkaotaohimayot tatvani Katimakjuaktitlugit hakkugikhivaligahoaklugit hapkua ataniktotikhat, naunaitiakhimayonik manilikinikut tammaktailitjutikhat, tatvalu ihuaghaotikhaitnik hapkua pigiaktitaohimayot nuttigiakutaohimayot pitjutikaktot Inuit innutiakutikhaitnik, kayangnaipkutikhanik, iliitkuhiktotikaktunik, tatvalu ihomaghutikaktunik ataniktotikhanik.
-30-
Pivalialikiyiit Tohakvikhat una:
Ivaluarjuk Merritt
Ataniat Tohaktitilikiyiit
Nunavut Tunngavik
