ᑐᓴᕋᑦᓴᓕᕆᔩᑦ

ᑐᓐᖓᕕᒃᑯᑦ ᐊᖓᔪᖅᑳᖓ, ᐊᓗᑭ ᑰᑦᑎᖅ ᐅᖃᐅᓯᖓ ᑐᓴᖅᑎᑦᓯᒍᑕᐅᔪᒧᑦ ᐊᓯᔾᔨᖅᑕᐅᓂᖏᓐᓄᑦ ᐅᑭᐅᖅᑕᖅᑐᒥ ᓂᕿᑦᓯᐊᕙᓄᑦ ᐊᑭᑭᓪᓕᒋᐊᕈᑎᒃᓴᓄᑦ ᑲᓇᑕᒥ.

(ᑎᓯᑉᐱᕆ 10, 2018 ᐃᖃᓗᐃᑦ, ᓄᓇᕗᑦ) ᐅᓪᓗᒥ ᐃᖃᓗᓐᓂ, ᑲᓇᑕ ᒐᕙᒪᖓ ᑐᓴᖅᑎᑦᓯᖅᑲᐅᔪᖅ ᐊᓯᔾᔨᕐᓂᐅᔪᓂᒃ ᓂᕿᑦᓯᐊᕙᓐᓄᑦ ᐊᑭᑭᓪᓕᒋᐊᕈᑎᒃᓴᓄᑦ ᐅᑭᐅᖅᑕᖅᑐᒥ ᑲᓇᑕᒥ (NNC), ᑐᓴᕐᓇᓪᓗᐊᑕᖅᑐᖅ ᓴᖅᑭᖅᑕᐅᓂᖓ ᐊᖑᓇᓱᑦᑎᓄᑦ ᐃᑲᔫᑎᓄᑦ ᐃᑲᔫᓯᐊᑦᓴᑦ.

ᓴᖅᑭᖅᑕᐅᓂᖏᓐᓄᑦ ᐊᖑᓇᓱᑦᑎᓄᑦ ᐃᑲᔫᑎᓄᑦ ᐃᑲᔫᓯᐊᒃᓴᑦ, ᑲᓇᑕ ᒐᕙᒪᖓ ᐃᓕᓴᕐᓯᔪᖅ ᒪᑭᒪᔾᔪᑎᓄᑦ ᓄᓇᕗᒻᒥ ᐃᓚᒋᔭᐅᒋᐊᓕᒃ ᑐᕌᖓᔪᖅ ᐃᑲᔫᑏᒃᓴᓂᒃ ᐃᓄᓐᓄᑦ ᐊᖑᓇᓱᑦᑎᓄᑦ. ᖃᐅᔨᓴᕐᓂᐅᕋᑖᓚᐅᖅᑐᖅ ᓄᓇᖃᖅᑳᕐᓯᒪᔪᓂᒃ ᖃᐅᔨᔭᐅᓚᐅᖅᑐᖅ 84% ᐃᓄᐃᑦ 15-ᓂᒃ ᐅᖓᑖᓂᓗ ᐅᑭᐅᓖᑦ ᐃᓚᒋᔭᐅᓂᖏᓐᓂᒃ ᐱᖅᑯᓯᒃᑯᑦ ᓴᓇᐅᒐᕐᓂᒃ ᐊᒻᒪᓗ /ᐅᑉᕙᓘᓐᓃᑦ ᐊᖑᓇᓱᓐᓂᕐᒧᑦ.

ᐃᓄᓐᓄᑦ, ᐊᖑᓇᓱᓐᓂᖅ, ᓂᕿᓕᕆᓂᖅ, ᓂᕆᑎᑦᓯᖃᑦᑕᓂᕐᓗ ᐊᒻᒪᓗ ᒥᓇᖃᑦᑕᕐᓂᖅ ᐃᓄᓕᖅᑕᓂᒃ ᓂᕿᓂᒃ ᐊᑦᑐᐊᓂᖃᒻᒪᕆᓐᓂᖓᓂᒃ ᓄᓇᓖᑦ ᐱᖅᑯᓯᖏᓐᓄᑦ, ᓇᑭᓐᖔᕐᓯᒪᓂᕐᒥᒃ ᐊᒻᒪᓗ ᐃᓚᒌᓐᓂᕐᒧᑦ ᐱᕙᓪᓕᐊᑎᑦᓯᓂᕐᒥᒃ. ᐱᕙᕆᐊᖃᕐᐳᖅ ᐊᒻᒪᓗ ᐱᖕᒪᕆᐅᓪᓗᓂ ᐃᓄᐃᑦ ᐃᓕᖅᑯᓯᖓᓄᑦ. ᐊᑦᑕᓇᐃᕐᓯᒪᒍᑎᕗᑦ, ᐊᓯᔾᔨᑐᒻᒪᕆᐅᑎᓪᓗᒍ ᐃᓅᖃᑎᒌᓐᓂᕗᑦ.

ᐊᓯᖏᑦ ᐊᓯᔾᔨᖅᑐᓄᑦ ᐃᓚᒋᔭᐅᔪᑦ; ᐊᑭᑭᓪᓕᒋᐊᕈᑎᓄᑦ ᑎᑎᕋᕐᓯᒪᖃᑕᐅᓂᐊᓕᖅᑐᑦ ᐃᓚᒋᔭᐅᓪᓗᑎᒃ ᓂᖀᑦ ᐱᖕᒪᕆᐅᔪᖁᑕᐅᔪᑦ ᐃᓄᓐᓄᑦ ᐃᓚᒌᓄᑦ; ᖁᑉᕙᕆᐊᖅᑕᐅᓗᑎᒃ ᐊᑭᑭᓪᓕᒋᐊᕈᑕᐅᕙᑦᑐᑦ; ᐃᑲᔫᑎᒃᓴᑦ ᒥᑭᔫᑎᓄᑦ ᓂᐅᕕᕐᕕᓐᓄᑦ; ᐊᒻᒪᓗ ᐃᓕᓴᕆᔭᐅᓂᖓ ᓂᕿᓅᖓᔪᑦ ᓄᓇᓕᑦᑎᓐᓄᑦ ᓱᕋᓴᕋᐃᒻᒪᑦ ᐊᒻᒪᓗ ᐱᔭᕐᓃᑦᑐᓂ.
ᑎᑭᐅᑎᓯᒪᒐᓚᑦᑐᖅ 70% ᐃᓄᐃᑦ ᐊᖏᕐᕋᓖᑦ ᓄᓇᕗᒻᒥ ᓂᕆᔭᑦᓴᖃᑦᓯᐊᖃᑦᑕᖏᓐᓂᖏᓐᓂᒃ. ᐃᓄᐃᑦ ᓄᑕᖅᑲᑦ ᐊᖏᕐᕋᕐᓯᒪᖃᑦᑕᖅᑐᑦ ᓂᕆᔭᒃᓴᖃᑦᓯᐊᖏᑦᑐᒥᒃ 8-ᖏᖅᑕᕐᓱᓂ ᖁᑉᕙᓯᓐᓂᕐᓴᒥᒃ ᑲᓇᑕᒥᒃ, ᖁᑦᓯᓂᕐᐹᖑᖃᑕᐅᔪᖅ ᑎᑎᕋᖅᑕᐅᓯᒪᔪᓂ ᓂᕆᔭᑦᓴᖃᑦᓯᐊᖏᓐᓂᕐᒧᑦ ᓈᓴᖅᑕᐅᓯᒪᔪᓂ ᓄᓇᖃᖅᑳᕐᓯᒪᔪᓂ ᐃᓂᖅᓯᒫᓂᑦᑐᓂ ᓄᓇᓕᓐᓂ.

“ᓂᕿᑦᓯᐊᕙᑦ ᐊᒻᒪᓗ ᐊᖏᕐᕋᒥ ᐱᑕᖃᕆᐊᓖᑦ ᐱᑕᖃᕆᐊᖃᕐᒪᑕ ᑭᓇᑐᐃᓐᓇᖅ ᖃᓄᐃᓐᖏᑦᓯᐊᕈᑎᒃᓴᖓᓄᑦ ᐊᒻᒪᓗ ᖃᓄᐃᓐᖏᑦᓯᐊᕈᑎᒃᓴᖏᓐᓄᑦ ᓄᓇᓖᑦ. ᑖᓐᓇ ᑭᒃᑯᑐᐃᓐᓇᕐᓄᑦ ᐱᔪᓐᓇᐅᑎᓪᓗᐊᑕᖅ. ᐅᓪᓗᒥ ᑐᓴᖅᑎᑦᓯᒍᑕᐅᔪᖅ ᐊᓪᓗᕆᐊᕈᑎᒃᓯᐊᕙᐅᔪᖅ.
ᑭᓯᐊᓂ ᓱᓕ ᐱᒋᐊᒃᑲᓐᓂᕆᐊᓕᒃ ᐋᖅᑭᑦᓯᒪᑦᓯᐊᕈᑎᒃᓴᖓᓄᑦ ᓂᕿᑦᓯᐊᕙᖕᓂᒃ ᐅᑭᐅᖅᑕᖅᑐᒥ ᐊᑭᑭᓪᓕᒋᐊᕈᑎᓕᒫᑦ ᑎᑭᐅᑎᑦᓯᐊᖃᑦᑕᕈᓐᓇᖁᓪᓗᒋᑦ ᓂᐅᕕᕐᐸᑦᑐᓄᑦ. ᐃᓚᒋᔭᐅᓗᑎᒃ ᐃᖅᑲᓇᐃᔭᖃᑎᖃᕐᓂᖅ ᐃᓄᓐᓂᒃ ᑕᑉᕗᓐᖓᖓᔪᒥᒃ ᓂᕆᔭᑦᓴᖃᑦᓯᐊᖃᑦᑕᖏᓐᓂᕐᒧᑦ ᐅᑭᐅᖅᑕᖅᑐᒥ. ᑐᓐᖓᕕᒃᑯᑦ ᓇᓗᓇᐃᕆᕗᑦ NNC ᐊᑭᑭᓪᓕᒋᐊᕈᑏᑦ ᐋᖅᑭᒍᑎᒃᓴᐅᖏᓚᑦ ᓂᕆᔭᒃᓴᖃᑦᓯᐊᖏᓐᓂᕐᒧᑦ ᑖᒃᑯᑑᓗᑎᒃ ᐃᓛᒃ, ᐃᑲᔫᑎᒃᓴᓂᒃ ᐱᕚᓪᓕᕈᑎᒃᓴᓄᑦ, ᐋᔩᕋᕈᑕᐅᓂᖓᓄᑦ ᐃᓚᒋᔭᐅᒋᐊᓕᒃ ᑎᑭᐅᑎᓂᖅ ᑭᒡᒐᖅᑐᐃᓂᐅᔭᕆᐊᓕᖕᒧᑦ ᐃᓄᓐᓂᒃ ᐃᖅᑲᓇᐃᔭᖅᑎᖃᕐᓂᕐᒧᑦ.”
ᑐᑭᓯᒋᐊᒃᑲᓐᓂᕐᕕᒋᔪᓐᓇᕐᑕᐃ:

ᑭᐅᕋᓐ ᕙᓚᐅᕋᑎ
ᑭ/ᑐᓴᐅᒪᔾᔪᑎᓕᕆᔨᒃᑯᑦ ᑐᑭᒧᐊᒃᑎᑦᑎᔨᖓ
ᓄᓇᕗᑦ ᑐᓐᖓᕕᒃ ᑎᒥᖓ
ᐅᖄᓚᐅᑖ: (867) 975-4900 ᐊᑭᖃᓐᖏᑦᑐᖅ 1-888-646-0006

www.tunngavik.com