(ᐄᑉᕈ 28, 2023 – ᐃᖃᓗᐃᑦ, ᓄᓇᕗᑦ) ᐅᖁᒪᐃᓐᓇᑐᒃᑯᑦ ᑐᙵᕕᒃᑯᑦ ᑐᓴᖅᑎᑕᐅᓚᐅᖅᑐᑦ ᐱᓇᓱᐊᕈᓯᑦᑎᓐᓂ ᐃᓅᒍᓐᓃᕐᓂᕆᓚᐅᖅᑕᖓᓂᒃ ᑑᓇᑦ ᒥᓗᖅᑐᖅ ᓇᐅᔮᒥᐅᑕᖅ. ᓇᒡᓕᒋᕙᕗᑦ ᐃᓚᖏᑦ, ᐱᖃᓐᓇᕆᔭᖏᑦ ᐊᒻᒪᓗ ᓄᓇᖅᑲᑎᖏᑦ.
ᑐᓇᑦ ᐃᓅᓯᖃᖅᓯᒪᔪᖅ ᑲᔪᓯᐊᑎᑦᓯᓯᒪᓂᕐᒥᒃ ᐃᓄᐃᑦ ᓄᓇᕗᒻᒥ ᐅᐱᒋᔭᕆᐊᓕᖏᓐᓂᒃ ᑕᑯᓐᓇᒐᕆᓗᒋᓪᓗ. ᓯᕗᓕᖅᑎᐅᒋᐊᙵᖃᑕᐅᓯᒪᔪᖅ ᐊᒻᒪᓗ ᐊᔭᐅᖅᑐᐃᖃᑦᑕᖅᓱᓂ ᐱᓇᓱᐊᒐᖃᖅᑐᓂ, ᐊᕐᕌᒍᕋᓴᓐᓂᒃ ᑭᖑᓂᐊᓂ, ᐃᓱᓕᒍᑎᖃᖅᓯᒪᔪᒥᒃ ᐱᙳᖅᑎᑕᐅᓂᖓᓂᒃ ᓄᓇᕗᑦ. ᑐᙵᕕᖃᓚᐅᖅᑐᖅ ᐃᓅᓯᓕᒫᒥᓂ ᐱᓇᓱᐊᕐᓂᕐᒥᒃ ᐃᓕᓐᓂᐊᕆᐊᖅᑎᑕᐅᒋᐊᙵᓚᐅᖅᓯᒪᔪᓄᑦ ᐃᓚᒋᔭᐅᒐᓗᐊᖅᑐᓂ Sir Joseph Bernier ᐃᓕᓐᓂᐊᕐᕕᐅᓚᐅᖅᑐᒥ ᐃᒡᓗᓕᒑᕐᔪᒻᒥ. ᐊᓐᓇᓯᒪᓪᓗᓂ ᐃᓕᓐᓂᐊᕆᐊᖅᑎᑕᐅᓯᒪᓚᐅᕐᓂᕐᒥᓂᒃ, ᐅᑎᓚᐅᖅᑐᖅ ᕇᐴᔅ ᕙᐃᖑᓛᕐᓂᐊᖅᑐᒧᑦ ᐃᑲᔪᕆᐊᖅᑐᒋᑦ ᐊᖓᔪᖅᑳᓂ ᓄᓇᖃᖅᑐᑎᒃ ᐃᓄᐃᓪᓚᒥ.
1969-ᒥ ᑑᓇᓐ ᓯᕗᓪᓕᖅᐸᐅᓚᐅᖅᑐᖅ ᑲᑎᒪᔨᓄᑦ ᐃᒃᓯᕙᐅᑕᐅᓪᓗᓂ ᕇᐴᔅ ᕙᐃᒥ. 1970-ᖏᓐᓂ ᐊᐅᓚᑦᓯᓂᖓ ᐃᓄᐃᑦ ᐱᔪᓐᓇᐅᑎᖏᓐᓂᒃ ᐊᒻᒪᓗ ᑲᑎᒪᔨᐅᓂᒃᑯᑦ ᑲᒪᒋᖃᑦᑕᖅᑕᖏᓐᓂᒃ ᐊᕙᖕᒧᐊᑦᓯᒪᓚᐅᖅᑐᑦ ᓄᓇᓕᖕᓂ, ᐊᕕᑦᑐᖅᓯᒪᓂᕐᓄᑦ ᐊᒻᒪᓗ ᑲᓇᑕᓕᒫᒧᑦ. ᓄᓇᑖᕋᓱᐊᕐᓂᕐᒧᑦ ᓴᓇᔨᐅᖃᑦᑕᓚᐅᖅᑐᖅ ᐃᓄᐃᑦ ᑕᐱᕇᑦ ᑲᓇᑕᒥ ᑭᖑᓂᐊᒍᑦ ᓄᓇᑖᕐᓂᕐᒧᑦ ᑲᒥᓴᖏᓐᓂ. ᑑᓇᑦ ᓴᖅᑮᓚᐅᖅᑐᓂ ᑲᑎᒪᔨᐅᖃᑕᐅᓚᐅᖅᑐᖅ ᑐᙵᕕᒃ ᐃᓚᒌᑦᓴᑦ ᓄᓇᕗᒻᒥ (TFN) ᐊᒻᒪᓗ ᑲᔪᓯᓪᓗᓂ ᐃᑲᔪᖅᑐᓂᒋᑦ ᓯᕗᓕᕐᓂᒃᑯᑦ TFN−ᑯᓐᓂ ᐊᖓᔪᖅᑳᒧᑦ−ᑐᒡᓕᕆᔭᐅᓪᓗᓂ ᐊᒻᒪᓗ ᐊᖓᔪᖅᑳᖑᓪᓗᓂ. ᑑᓇ ᐱᓪᓗᐊᑕᐅᓚᐅᖅᑐᖅ ᓴᖅᑭᖅᑕᐅᓂᖓᓂᒃ ᐊᐃᕙᔩᑦ ᓄᓇᕗᑦ ᐊᖏᕈᑎᖏᓐᓄᑦ.
ᑑᓇᑦ ᑲᔪᓯᓚᐅᖅᑐᖅ ᑖᑦᓱᒥᖓ ᐊᐅᓚᑕᒥᓂᒃ ᑲᒪᑦᓯᐊᖅᑐᓂ ᐊᕐᕌᒍᓂ ᑭᖑᓂᐊᒍᑦ, ᐃᓚᒋᔭᐅᓪᓗᑎᒃ ᐅᖃᓕᒪᖃᑦᑕᕐᓂᖅ ᐃᑲᔪᖅᓱᐃᓪᓗᓂ ᓄᖅᑲᑎᑦᓯᓇᓱᐊᓚᐅᖅᑐᓂᒃ ᓄᓘᔮᓐᓂ ᐹᕕᓐᓛᓐ ᓴᕕᒃᓴᓂᒃ ᐅᔭᕋᓐᓂᐊᕕᖕᒥᒃ ᐅᕙᑦᓯᐊᕉᓗᐊᙱᑦᑐᖅ ᐊᕐᕌᒎᓚᐅᖅᑐᓂ. ᓵᓚᒃᓴᓚᐅᖅᑐᖅ ᑲᑎᒪᔨᓄᑦ ᐃᑦᓯᕚᖃᑕᐅᓕᖅᓱᓂ ᓄᓇᒥᓂ 2017-ᒥ ᑭᖑᓂᐊᒍᓪᓗ 2019-ᒥ.
ᐃᓅᓯᓕᒫᒥᓂ, ᑑᓇᑦ ᑐᕌᒐᓪᓗᐊᑕᖃᓚᐅᖅᑐᖅ ᐃᓄᐃᑦ ᐱᔪᓐᓇᐅᑎᖏᑦ ᐊᑕᖏᕐᓗᑎᒃ ᐃᓕᓴᕆᔭᐅᓯᒪᖁᓪᓗᒋᑦ ᒐᕙᒪᑐᖃᒃᑯᓐᓄᑦ. ᓲᖑᓚᐅᖅᑐᖅ ᐊᔭᐅᖅᑐᐃᓪᓗᓂ ᐃᓄᐃᑦ ᐊᐅᓚᑦᓯᖁᓪᓗᒋᑦ ᓂᕐᔪᑎᓕᕆᓂᕐᒥᒃ ᐊᒻᒪᓗ ᓄᓇᒥᒃ. 30 ᐊᕐᕌᒍᑦ ᓈᓕᖅᑐᑦ, ᓄᓇᕗᑦ ᐊᖏᕈᑎᖓ ᐊᑎᓕᐅᖅᑕᐅᓚᐅᖅᑐᖅ − ᐃᓄᐃᑦ ᑲᔪᓯᑎᓚᐅᖅᑕᖓ ᑑᓇᑦ ᐊᑦᓱᕈᐊᕆᓚᐅᖅᑕᖓ ᓴᖅᑭᖁᓪᓗᒍ ᑲᔪᓯᓗᓂ.
ᑐᙵᕕᒃᑯᑦ ᐃᓚᒋᔭᐅᕗᑦ ᐃᓚᖏᓐᓂᒃ, ᐱᖃᓐᓇᕆᔭᖏᓐᓂᒃ, ᐊᒻᒪᓗ ᓄᓇᖅᑲᑎᖏᓐᓂᒃ ᕿᑦᓵᕈᑎᖃᖅᑎᓪᓗᒋᑦ ᑑᓇᑦ ᐃᓅᒍᓐᓃᕐᓂᕆᓚᐅᖅᑕᖓᓂᒃ, ᐊᒻᒪᓗ ᖁᕕᐊᓲᑎᖃᕐᓂᕐᒥᒃ ᐃᓅᓯᕆᓚᐅᖅᑕᖓᓂᒃ ᐱᕕᐊᓇᖅᑐᒥᒃ ᐃᓄᓐᓄᑦ.
-30-
ᑐᑭᓯᒋᐊᒃᑲᓂᕐᕕᒃᓴᖅ:
ᑭᐊᕙᓐ ᑲᑉᓗᑦᓯᐊᖅ
ᑐᑭᒧᐊᒃᑎᑦᑎᔨ ᑐᓴᐅᒪᔾᔪᑎᓕᕆᔨᒃᑯᓐᓂ
ᓄᓇᕗᑦ ᑐᙵᕕᒃ ᑎᒥᖓ
ᐅᖄᓚᐅᑖ: (867) 975-4900/ᐊᑭᖃᙱᑦᑐᖅ: 1-888-646-0006
