ᓴᒃᑯᑕᐅᑲᐅᑎᒋᔭᕆᐊᓕᒃ
(ᔮᓐᓄᐊᕆ 23, 2025 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓᑕ ᑲᑎᒪᔨᖏᑦ ᑲᑎᒪᓚᐅᖅᑐᑦ ᑕᒫᓂ ᐱᓇᓱᐊᕈᓯᕐᒥ ᐃᖃᓗᓐᓂ. ᒪᕐᕉᓐᓂᒃ ᐅᓪᓘᓐᓂᒃ ᑲᑎᒪᓂᖃᖅᑎᓪᓗᒋᑦ, ᑲᑎᒪᔩᑦ ᐊᖏᖅᓯᓚᐅᖅᑐᑦ ᑎᓴᒪᓄᑦ ᐊᕐᕌᒍᓄᑦ ᖃᓄᖅᑑᕈᑕᐅᓯᒪᔪᑦ ᓯᕗᓪᓕᐅᔾᔭᐅᖁᔭᑦ ᑕᐃᔭᐅᔪᖅ ᐃᓄᖕᓂᒃ ᒪᑭᑉᐸᓪᓕᐊᑎᑦᑎᓂᖅ ᐊᒻᒪᓗ ᑮᓇᐅᔭᓂᑦ ᐊᑐᕐᓂᐊᖅᑐᑎᑦ ᐃᓕᖅᑯᓯᖏᖕᓅᖓᔪᓂᑦ ᓂᕿᖃᑦᑎᐊᖃᑦᑕᖅᑎᑦᑎᓂᐊᕐᓗᑎᑦ ᐊᒻᒪᓗ ᐃᓄᒃᑐᑦ ᐱᓇᓱᐊᒐᖏᖕᓄᑦ, ᐊᒻᒪᓗ ᓄᓇᕗᒻᒥ ᐃᓄᐃᑦ ᑐᐊᕕᕐᓇᖅᑐᖃᖅᑎᓪᓗᒍ ᖃᓄᐃᓕᐅᕈᑎᖃᕆᐊᕐᓂᕐᒧᑦ ᑮᓇᐅᔭᖃᕐᕕᓕᐅᖅᑐᑎᑦ.
ᐊᔾᔨᒋᓪᓗᓂᐅᒃ ᑲᑎᒪᔩᑦ ᑲᒪᒋᓂᐊᕐᓂᕋᖅᓯᒪᔭᖓ ᑮᓇᐅᔭᓂᒃ ᐊᑐᖃᑦᑕᖅᑕᒥᓂᖏᓐᓂᒃ ᓴᖅᑭᔮᕐᔫᒥᑎᑦᑎᓂᐊᕐᓂᕋᖅᑐᒥᓂᐅᓪᓗᑎᑦ, ᑲᑎᒪᔩᑦ ᐊᖏᖅᓯᓚᐅᖅᑐᑦ ᐋᖅᑭᒋᐊᖅᓯᒪᔪᓂᒃ ᑮᓇᐅᔭᖅᑑᑎᓪᓗᐊᑕᒃᓴᑦ ᐋᖅᑭᒃᓱᖅᓯᒪᓂᖓᓂᒃ ᐊᑐᖅᑕᐅᒋᐊᓯᓛᖅᑐᓂ ᐄᐳᕈᓪ 1, 2025. ᐋᖅᑭᒋᐊᖅᓯᒪᔪᖅ ᑖᓐᓇ ᐋᖅᑭᒃᓱᖅᓯᒪᓂᖓ ᓄᐊᑉᐸᓪᓕᐊᔪᓃᙶᖅᑐᖅ ᐃᖅᑲᓇᐃᔭᖃᑎᒌᖃᑦᑕᕐᓂᑯᒥᓂᖏᖕᓂᒃ ᓄᓇᕗᑦ ᑐᙵᕕᒃ ᑎᒥᖓ, ᐱᖓᓱᑦ ᐊᕕᑦᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᒻᒪᓗ ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᖅᑐᖅᑏᑦ. ᐋᖅᑮᔪᖅ ᑮᓇᐅᔭᖃᖅᑎᑦᑎᓂᕐᒧᑦ ᓈᓴᐅᓯᕆᔾᔪᓯᖅ ᐋᖅᑭᒃᓯᒪᓂᖓᓂᒃ ᑮᓇᐅᔭᖃᕈᑎᒋᔭᐅᓪᓗᐊᕐᓂᐊᖅᑐᓂᑦ ᑐᓂᐅᖅᑲᐃᓗᑎᑦ ᐱᔭᒥᓃᑦ ᓄᓇᕗᑦ ᐸᐸᑦᑎᕕᖓᓂᒃ, ᒪᓕᑦᑐᒋᑦ ᐋᖅᑭᒃᑕᐅᓯᒪᔪᑦ ᐳᓴᓐᑎᖏᑦ ᕿᒥᕐᕈᓇᒃᑕᐅᖃᑦᑕᕐᓂᐊᖅᑐᑎᑦ ᑕᒪᐃᓐᓂ ᐱᖓᓱᑦ ᐊᕐᕌᒍᑦ ᐊᓂᒍᕋᐃᑉᐸᑕ. ᖄᖓᒍᒃᑲᓐᓂᖅ, ᓄᓇᕗᑦ ᑐᙵᕕᒃ ᑎᒥᖓ ᑮᓇᐅᔭᓕᕆᔨᒃᑯᑦ ᑲᑎᒪᔨᕋᓛᖏᑦ ᑲᑎᒪᖃᑦᑕᕐᓂᖅᓴᐅᓂᐊᖅᑐᑦ ᓇᐅᑦᓯᖅᑐᑦᑎᐊᕐᓂᐊᕐᒪᑕ ᑮᓇᐅᔭᓕᕆᓂᕐᒧᑦ ᐸᕐᓇᐅᓯᐅᕐᓗᑎᑦ, ᑮᓇᐅᔭᖁᑎᒋᔭᐅᔪᓂᑦ ᑲᒪᓗᑎᑦ ᐊᒻᒪᓗ ᑮᓇᐅᔭᓕᕆᓂᕐᒧᑦ ᐊᐅᓚᓂᐅᕙᑦᑐᓂᒃ.
ᐊᖑᓇᓱᒃᑏᑦ ᐃᑲᔪᖅᑐᖅᑕᐅᓂᖏᖕᓄᑦ ᐊᐃᑦᑑᓯᐊᖅ
ᑮᓇᐅᔭᖅᑐᕈᑎᒃᓴᑦ 2024 ᐱᖃᓯᐅᔾᔨᓚᐅᖅᑐᑦ $29.5 ᒥᓕᐊᓐ ᑮᓇᐅᔭᓂᒃ ᐊᑐᕐᓂᐊᕐᓂᕋᖅᑐᑎᑦ ᑮᓇᐅᔭᖃᖅᑎᑕᐅᖁᓪᓗᒍ ᓂᕿᑦᑎᐊᕙᖃᖅᑎᑦᑎᔩᑦ ᐅᑭᐅᖅᑕᖅᑐᒥ ᑲᓇᑕ ᐊᖑᓇᓱᒃᑏᑦ ᐃᑲᔪᖅᑐᖅᑕᐅᓂᖏᑦᑕ ᐊᐃᑦᑑᓯᐊᖏᑦ ᐊᒻᒪᓗ ᓄᓇᓕᓐᓂ ᓂᕿᖃᕐᓂᕐᒧᑦ ᐱᓕᕆᐊᑦ ᑮᓇᐅᔭᖃᕐᕕᖓ ᐊᑐᓕᖅᑎᑕᐅᖁᓪᓗᒍ ᐃᓄᐃᑦ ᓄᓇᖓᓂᒃ ᓂᕿᖃᑦᑎᐊᖃᑦᑕᕐᓂᕐᒧᑦ ᖃᓄᖅᑑᕈᑎ. ᑮᓇᐅᔭᑦ ᐱᔭᐅᓚᐅᖅᓯᒪᙱᑦᑑᒐᓗᐊᑦ, ᑲᑎᒪᔩᑦ ᓯᕗᓂᐊᒍᑦ ᑲᒪᒋᔭᖃᕈᒪᓪᓗᑎᑦ ᑐᓂᐅᖅᑲᐃᓯᒪᔮᕈᒪᔪᑦ ᑖᒃᑯᓂᖓ ᑮᓇᐅᔭᓂᒃ ᓄᓇᕗᑦ ᑐᙵᕕᒃ ᑎᒥᖓ ᐊᒻᒪᓗ ᐊᕕᑦᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᑐᕐᓗᑎᑦ ᐊᑐᖅᑕᐅᖃᑦᑕᕐᓂᐊᖅᑐᖅ ᓈᓴᐅᓯᕆᔾᔪᓯᖅᓯᒪᔪᖅ ᐋᖅᑭᒃᑕᐅᓯᒪᓂᖏᑦ ᐊᒻᒪᓗ ᐊᖏᖅᓯᓚᐅᖅᑐᑎᑦ ᑮᓇᐅᔭᓂᒃ ᐊᑐᕐᓂᐊᕐᓂᖏᖕᓂᒃ ᐸᕐᓇᐅᑎᒥᒃ ᓄᓇᕗᑦ ᑐᙵᕕᒃ ᑎᒥᖓᑕ $8.8 ᒥᓕᐊᓐ ᑮᓇᐅᔭᓂᒃ.
ᑖᒃᑯᓇᓂ ᑮᓇᐅᔭᓂᒃ, $4 ᒥᓕᐊᓐ ᑮᓇᐅᔭᑦ ᑕᐃᒃᑯᓄᖓᕐᓂᐊᖅᑐᑦ ᓄᓇᕗᓕᒫᕐᒥ ᐃᓕᓐᓂᐊᕐᕖᑦ ᓂᕿᖃᖅᑎᑕᐅᓂᖏᖕᓄᑦ ᐱᓕᕆᐊᕐᓄᑦ, ᐱᖃᓯᐅᑎᓗᒍ ᓄᓇᑐᐃᓐᓇᕐᒧᑦ ᐊᐅᓪᓚᕐᓗᑎᑦ ᐊᖑᓇᓱᒋᐅᖅᓴᓂᕐᒧᑦ ᐱᓕᕆᐊᕐᒧᑦ ᖁᑦᑎᓂᖅᐹᓂ ᐃᓕᓐᓂᐊᖅᑎᓄᑦ. ᑕᐃᒪᐃᒃᑯᑎᑦ, ᓂᕐᔪᑏᑦ ᐃᓄᐃᑦ ᓂᕿᖏᑦ ᐱᓕᕆᐊᕐᒥ ᑐᓂᐅᖅᑲᖅᑕᐅᖃᑦᑕᕐᓂᐊᖅᑐᑦ ᐃᓕᓐᓂᐊᕐᕕᓄᑦ. ᑮᓇᐅᔭᑦ ᐃᑲᔪᖅᑐᐃᓂᐊᕐᒥᔪᑦ ᓄᓇᕗᑦ ᐅᓪᓗᖓᓂ ᖃᒧᑕᐅᔭᕐᓂᒃ, ᐱᓲᑎᓂᒃ ᐊᒻᒪᓗ ᐃᒋᕐᕈᑎᓂᒃ
ᐊᒧᔭᐅᔪᒃᓴᒫᓂᑦ ᐊᑐᓂ ᓄᓇᕗᑦ ᓄᓇᓕᖏᓐᓂᒃ, ᐋᓐᓂᐊᕐᓇᖅᑐᖃᙱᒃᑲᓗᐊᕐᒪᖔᑕᓗ ᓂᕐᔪᑏᑦ ᖃᐅᔨᓴᕈᑎᖏᑦ, ᐱᕙᓪᓕᐊᒍᑎᖏᔭᓂᖓᓗ ᐃᓕᓐᓂᐊᖅᑎᑦᑎᔾᔪᑎ ᓇᓐᓂᐊᕐᓂᕐᒧᑦ ᑕᓚᕖᓴᒃᑯᑦ ᑕᑯᒃᓴᐅᑎᑦᑎᒍᑎ ᐊᒻᒪᓗ ᐋᖅᑭᒃᑕᐅᓗᓂ ᐊᓪᓚᕝᕕᒃ ᐅᐸᓗᖓᐃᔭᐃᖃᑦᑕᕐᓂᐊᕐᒪᑕ ᖃᐅᔨᓴᖃᑦᑕᕐᓗᑎᓪᓗ ᓄᓇᕗᑦ ᑐᙵᕕᒃ ᑎᒥᖓ ᐊᒻᒪᓗ ᐊᕕᑦᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᑕ ᐱᓇᓱᐊᒐᖏᑦ ᐱᓕᕆᐊᕐᒥᒃ.
ᐅᖃᐅᓯᕐᖓᖅ ᐊᑐᐊᒐᖅ
ᐱᕙᓪᓕᐊᖏᓐᓇᖅᑐᑦ ᐊᑐᓕᖅᑎᑕᐅᓂᖓ ᐅᖃᐅᓯᕐᖓᖅ ᖃᓄᖅᑑᕈᑕᐅᓯᒪᔪᖅ ᑐᙵᕕᖓ, ᑐᑭᒧᐊᑦᑎᑦᑎᓇᓱᒃᑐᖅ ᓄᓇᕗᑦ ᑐᙵᕕᒃ ᑎᒥᖓᓂᒃ ᐊᒻᒪᓗ ᐊᕕᑦᑐᖅᓯᒪᔪᓂᑦ ᐃᓄᐃᑦ ᑲᑐᔾᔨᖃᑎᒌᖏᖕᓂᒃ ᐃᑲᔪᖅᑐᖅᑕᐅᖁᓪᓗᒍ ᓄᓇᕗᒻᒥᐅᑦ ᐃᓄᒻᒪᕆᖏᑦ ᑕᓱᐃᓗᑎᑦ, ᐊᑐᕐᓂᖅᓴᐅᖃᑦᑕᓕᕐᓗᑎᑦ, ᐋᖅᑭᐅᒪᑎᑕᐅᓗᓂ ᓴᙵᑦᑎᑕᐅᓗᓂᓗ ᐃᓄᒃᑐᑦ. ᑲᑎᒪᔩᑦ ᐊᖏᖅᓯᓚᐅᖅᑐᑦ ᐊᑐᐊᒐᕐᒥᒃ ᐋᖅᑭᒃᑕᐅᖁᓪᓗᒍ ᐊᑐᓕᖅᑎᑕᐅᓗᓂᓗ ᐅᖃᐅᓯᕐᖓᖅ ᐊᐃᑦᑑᓯᐊᑦ ᐊᒻᒪᓗ ᐃᑲᔫᑏᑦ ᐱᓕᓂᕆᐊᖓᓂᒃ, ᓴᓂᕐᕙᐃᓚᖓᓪᓗᑎᑦ $13.78 ᒥᓕᐊᓐ ᑮᓇᐅᔭᓂᒃ ᐃᑲᔪᖅᑕᐅᒐᔭᕐᒪᑦ ᓇᖕᒥᓂᖅ ᑲᒪᒋᔭᐅᓯᒪᔪᒥᒃ ᐃᓄᒃᑐᑦ ᐅᖃᐅᓯᓕᕆᓂᕐᒧᑦ ᐱᓕᕆᐊᖑᓲᑦ ᓄᓇᕗᒻᒥ 2028−ᕈᕋᕋᓱᐊᐊᕐᓂᖓᓂᒃ. ᒫᓐᓇᐅᑲᐃᓐᓇᖅᑐᕐᓕ, ᓄᓇᕗᑦ ᑐᙵᕕᒃ ᑎᒥᖓ ᓴᓂᕐᕙᐃᓚᐅᖅᑐᑦ $1 ᒥᓕᐊᓐ ᑮᓇᐅᔭᓂᒃ ᑐᒃᓯᕋᐅᑎᓕᐅᖁᔨᔾᔪᑎᒥᒃ ᐃᑲᔪᖅᑐᖅᑕᐅᖓᔭᕐᒪᑕ ᑲᑐᔾᔨᖃᑎᒌᑦ ᑕᑎᖃᖃᑦᑕᓚᐅᖅᑑᒐᓗᐊᑦ ᑲᓇᑕᒥ ᐱᖅᑯᓯᓕᕆᔨᕐᔪᐊᒃᑯᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᕐᓄᑦ ᑮᓇᐅᔭᖃᕐᕕᖓᓂᒃ.
ᖄᖓᒍᒃᑲᓐᓂᖅ, ᑲᑎᒪᔩᑦ ᐊᖏᖅᓯᓚᐅᖅᑐᑦ ᒪᕐᕉᓐᓄᒃ ᐊᕐᕌᒎᓐᓄᒃ ᑮᓇᐅᔭᑦ ᐊᑐᖅᑕᐅᓂᐊᕐᓂᖏᑦᑕ ᐸᕐᓇᐅᑎᒥᒃ ᓄᓇᕗᑦ ᑐᙵᕕᒃ ᑎᒥᖓᑕ ᓴᓂᕐᕙᐃᕕᐅᓯᒪᔪᖓᑎᒍᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᑦ ᑮᓇᐅᔭᖅᑎᒍᑦ, ᐃᑲᔪᖅᑐᐃᓇᓱᐊᕐᓗᑎᑦ ᐅᖃᐅᓯᕐᒧᑦ “ᐱᑭᐅᕐᒥᒃ” ᓴᓂᕐᕚᖑᓯᒪᔪᑦ ᐃᓄᒃᑐᐃᓐᓇᖅ ᐅᖃᓪᓚᖃᑦᑕᕐᓗᑎᑦ ᐃᓕᓐᓂᐊᖅᑎᑕᐅᔪᑦ ᐃᓕᓐᓂᐊᓕᓵᖅᑐᓄᑦ, ᐃᓄᐃᑦ ᐃᓕᓐᓂᐊᕈᑎᒃᓴᖏᑦᑕ ᐱᓕᕆᐊᖅ, ᐃᓄᐃᑦ ᐃᓕᓴᐃᔨᐅᔪᑦ ᓯᕗᓕᖅᑎᖏᑦ ᐱᓕᕆᐊᕐᒧᑦ, ᐊᒻᒪᓗ ᖃᐅᔨᓴᖅᑕᐅᖁᓪᓗᒋᑦ ᐃᓄᒃᑑᖃᑦᑕᖅᑐᑦ ᑐᓴᕋᒃᓴᖃᖅᑎᑦᑎᓲᑦ ᑕᑯᓐᓇᒐᒃᓴᓕᐅᓲᑦ ᐊᒻᒪᓗ ᐅᖃᐅᓯᓕᕆᓂᕐᒧᑦ ᑐᑭᓯᒋᐊᕈᑎᖏᑦ ᑭᒡᓕᓯᐊᖅᑕᐅᔾᔪᑎᓂᑦ.
ᓄᓇᕗᑦ ᑐᙵᕕᒃ ᑎᒥᖓ ᐃᖅᑲᓇᐃᔭᐃᓐᓇᕐᓂᐊᖅᑐᑦ ᐊᑐᕐᓗᒍ ᐅᖃᐅᓯᕐᖓᖅ ᑐᙵᕕᖓ ᐊᒻᒪᓗ ᐃᓄᒃᑐᑦ ᑐᑭᒧᐊᑦᑎᑦᑎᔩᑦ ᑲᑎᒪᔨᐊᓛᖏᖕᓂᒃ ᐋᖅᑭᒋᐊᕆᒻᒪᕆᓪᓗᑎᑦ ᐱᔭᕇᖅᓯᓗᑎᓪᓗ ᐅᖃᐅᓯᕐᖓᖅ ᖃᓄᖅᑑᕈᑎᓕᐊᕆᔭᐅᓯᒪᔪᖅ ᖃᓄᐃᓕᐅᕈᑕᐅᓂᐊᕐᓂᖏᑕ ᐸᕐᓇᐅᑎᖓᓂᒃ, ᑐᑭᒧᐊᑦᑎᑕᐅᓗᑎᑦ ᑲᑎᒪᔨᓄᑦ.
ᑐᐊᕕᕐᓇᖅᑐᖃᖅᑎᓪᓗᒍ ᑮᓇᐅᔭᑦ
ᓄᓇᕗᑦ ᑐᙵᕕᒃ ᑎᒥᖓ ᐊᖏᖅᓯᓚᐅᖅᑐᑦ $1 ᒥᓕᐊᓐ ᑮᓇᐅᔭᓂᒃ ᐋᖅᑭᒃᑕᐅᓂᖓᓂᒃ ᓄᓇᕗᒻᒥ ᐃᓄᐃᑦ ᑐᐊᕕᕐᓇᖅᑐᖃᖅᑎᓪᓗᒍ ᖃᓄᐃᓕᐅᕆᐊᕐᓂᕐᒧᑦ ᑮᓇᐅᔭᓂᒃ, ᖃᓄᐃᓕᐅᑲᐅᑎᒋᖁᓪᓗᒋᑦ ᐊᒻᒪᓗ ᐊᐅᓚᓂᖃᑦᑎᐊᖅᑐᒃᑯᓪᓗ ᑲᒪᖃᑦᑕᖁᓪᓗᒋᑦ ᐱᓂᕐᓗᐊᕿᔪᖃᖅᑎᓪᓗᒍ ᐃᑲᔪᖅᑐᖃᖃᑦᑕᕐᓂᐊᕐᒪᑦ ᓄᓇᕗᒻᒥ. ᐱᖃᓯᐅᔾᔨᔪᑦ ᓂᐅᕕᕐᓗᑎᑦ ᑐᖅᑯᐃᒍᓐᓇᕐᓗᑎᓪᓗ ᑐᐊᕕᕐᓇᖅᑐᖃᖅᑎᓪᓗᒍ ᓱᓇᒃᑯᑖᓂᒃ, ᓲᕐᓗᒃ ᐊᐅᓚᐅᑏᑦ ᐆᒻᒪᖅᑯᑎᓄᑦ, ᓱᐴᔫᑦ, ᓯᓂᑦᑐᖅᓯᐅᑦ ᐴᑦ ᐊᒻᒪᓗ ᐊᓯᖏᑦ ᐱᕐᔪᐊᖑᔪᑦ ᓱᓇᒃᑯᑖᑦ.
ᐃᓄᖕᓂᒃ ᒪᑭᑉᐸᓪᓕᐊᑎᑦᑎᓂᖅ
ᓄᓇᕗᑦ ᑐᙵᕕᒃ ᑎᒥᖓᑕ ᑲᑎᒪᔨᖏᑦ ᐊᖏᖅᓯᓚᐅᖅᑐᑦ ᑎᓴᒪᓄᑦ ᐊᕐᕌᒍᓄᑦ ᖃᓄᖅᑑᕈᑕᐅᓯᒪᔪᒥᒃ ᓯᕗᓪᓕᐅᔾᔭᐅᒐᔭᖅᑐᓂᑦ ᐃᓄᖕᓂᒃ ᒪᑭᑉᐸᐊᓪᓕᐊᑎᑦᑎᓂᖅ (2025-2029). ᑲᑎᒪᔩᑦ ᑕᖃᔪᐃᑦᑑᓪᓗᑎᑦ ᐃᖅᑲᓇᐃᔮᖃᓚᐅᕐᒪᑕ ᒪᕐᕉᒃ ᐊᕐᕌᒎᓚᐅᖅᑑᓐᓂᒃ ᐋᖅᑭᒃᓱᐃᓪᓗᑎᑦ ᑎᓴᒪᐅᔪᖅᑐᓂᒃ ᓯᕗᓪᓕᐅᔾᔭᐅᓂᐊᖅᑐᓂᒃ, ᐅᑯᓂᖓ:
1. ᖃᓄᖅᑑᖅᓯᒪᐅᑦᑎᐊᖅᑐᑎᒍᑦ ᐋᖅᑮᑦᑎᐊᖃᑎᒌᒍᓐᓇᖅᑐᓪᓗ ᐱᓕᕆᖃᑎᒋᔭᐅᓗᑎᑦ ᒐᕙᒪᒃᑯᑦ − ᐊᖅᑯᓯᐅᕐᓗᑎᑦ ᐊᑑᑎᖃᑦᑎᐊᖅᑐᒃᑯᑦ ᐱᓕᕆᖃᑎᖃᖃᑦᑕᕐᓂᐊᕐᒪᑕ ᐊᑐᖅᑕᐅᒻᒪᕆᓪᓗᓂ ᐃᓄᐃᑦ ᓯᕗᓕᖅᑎᐅᓂᖏᑦ ᐊᒻᒪᓗ ᐊᐅᓚᑦᑎᔪᓐᓇᑦᑎᐊᕐᓂᖏᑦ.
2. ᐱᐅᔪᒃᑯᑦ ᐱᕈᖅᐸᓪᓕᐊᑎᓪᓗᒋᑦ ᐃᓄᐃᑦ ᑲᑕᒪᓇᙱᑦᑐᒃᑯᑦ − ᓂᕿᖃᑦᑎᐊᖃᑦᑕᙱᓐᓂᖅ ᑲᒪᒋᔭᐅᓗᓂ ᖃᓄᖅᑑᖅᓯᒪᔪᑎᒍᑦ, ᐃᓄᖕᓄᑦ ᓯᕗᒃᑲᖅᑖᕆᔭᓄᑦ ᐋᖅᑭᒍᑎᒃᓴᓕᐅᖅᑎᓪᓗᒋᑦ.
3. ᐊᑑᑎᖃᑦᑎᐊᖅᑐᒥᒃ ᐃᖅᑲᓇᐃᔭᕐᓂᖅ − ᐃᖅᑲᓇᐃᔭᕈᒪᓕᖅᑎᒻᒪᕆᓗᒋᑦ ᐃᓄᐃᑦ ᐃᖅᑲᓇᐃᔭᕐᓂᒃᑯᑦ ᓈᒻᒪᒋᔭᐅᒍᓐᓇᖅᑐᓂᒃ ᐊᒻᒪᓗ ᐱᔪᓐᓇᕐᓂᑦᑎᓐᓂᒃ ᐊᔾᔨᖃᕐᓗᓂ.
4. ᐊᔪᙱᑦᑐᑦ ᐃᓄᐃᑦ ᐅᐸᓗᖓᐃᖅᓯᒪᑦᑎᐊᕐᓗᑎᑦ ᐃᖅᑲᓇᐃᔭᕈᓐᓇᕐᓗᑎᑦ − ᐃᓕᓐᓂᐊᖅᑎᑦᑎᒍᑎᓂᑦ ᐱᓕᒻᒪᒃᓴᕈᑎᓂᓪᓗ ᐱᓕᕆᐊᖃᖅᑎᑦᑎᓗᑕ ᐅᐸᓗᖓᐃᖅᑕᐅᖁᓪᓗᒋᑦ ᐃᓄᐃᑦ ᓯᕗᒃᑲᖅᑕᖅᑎᐅᓂᐊᕐᒪᑕ ᓇᒥᓕᒫᑦᑎᐊᖅ ᐃᖅᑲᓇᐃᔭᕐᕕᓂ.
5. ᐱᓕᕆᐊᖃᖅᑐᒻᒪᕆᑯᓘᓪᓗᑎᑦ ᐃᓄᐃᑦ ᓄᓇᓕᖏᑦ − ᑲᒪᒋᔭᐅᓗᓂ ᐃᒡᓗᑭᒃᓴᕐᓂᐊᓘᕙᑦᑐᖅ ᐊᒻᒪᓗ ᐱᖁᑎᕐᔪᐊᖃᙱᓐᓂᐊᓘᕙᑦᑐᖅ ᒪᑭᒪᑦᑎᐊᖅᑐᑯᓘᖁᓪᓗᒋᑦ, ᓇᖕᒥᓂᕐᓗ ᐊᐅᓚᓂᖃᖁᓪᓗᒋᑦ ᓄᓇᓖᑦ.
6. ᐃᓄᒃᑑᖅᑐᑦ ᖃᖓᓕᒫᒃᑯᑦ − ᖃᐅᔨᒪᑦᑎᐊᖅᑎᑦᑎᓗᑎᑦ ᐃᓄᒃᑐᑦ ᐊᑐᖅᑕᐅᑦᑎᐊᕐᔫᒥᖃᑦᑕᕐᓂᐊᕐᒪᑦ ᑐᙵᕕᒋᔭᐅᓗᓂ ᐃᓄᐃᑦ ᑭᓇᐅᓂᖏᖕᓂᒃ.
7. ᓄᓇᓖᑦ ᐋᓐᓂᐊᖅᑕᐃᓕᓂᖏᑦ, ᖁᕕᐊᓱᓐᓂᖅ, ᐊᒻᒪᓗ ᖃᓄᐃᑦᑕᐃᓕᓂᖅ − ᐋᖅᑮᓗᑎᑦ ᐃᓄᐃᑦ ᐃᓅᓯᖃᕈᓐᓇᖁᓪᓗᒋᑦ ᓇᖕᒥᓂᖅ ᐃᑉᐱᒍᓱᑦᑎᐊᕐᓂᒃᑯᑦ, ᑭᓱᑐᐃᓐᓇᕐᓄᑦ ᐊᑐᖅᑕᐅᓲᕐᓄᑦ ᐋᖅᑭᒃᓱᖅᑕᐅᓯᒪᔪᓄᑦ ᓇᓕᒧᒌᙱᑦᑐᒃᑯᑦ ᑲᒪᒋᔭᐅᖃᑦᑕᙱᓪᓗᑎᑦ.
8. ᐃᓕᖅᑯᓯᑦᑎᐊᕙᒻᒪᕆᐊᓗᒻᒥᒃ ᐃᓴᒃᓯᒪᔪᑦ − ᐃᓅᖃᑎᒌᑦ ᐱᓕᕆᐊᖃᕈᒪᑦᑎᐊᓕᖁᓪᓗᒋᑦ ᐃᔾᔪᐊᕈᒥᓇᖅᑐᒡᒍᑕᐅᓂᖏᖕᓄᑦ ᐊᓯᖏᑦ ᖁᑦᑎᓐᓂᖅᓴᒥᒃ ᐃᓅᓯᖃᖁᓪᓗᒋᑦ ᐱᕚᓪᓕᑦᑎᐊᒃᑲᓐᓂᖅᓯᒪᒻᒪᕆᑦᑐᒥᓪᓗ.
ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓ, ᔨᐅᓚᒥ ᑑᕐᖔᓗᒃ ᓴᒃᑯᐃᓛᖅᑐᖅ ᐃᓄᖕᓂᒃ ᒪᑭᑉᐸᓪᓕᐊᑎᑦᑎᓂᖅ (2025-2029) ᐱᔭᕇᖅᓯᒪᑦᑎᐊᖅᑐᓂᒃ ᕖᕝᕗᐊᕆ 2025-ᖑᓕᖅᐸᑦ.
-30-
ᐱᕙᓪᓕᐊᔪᓕᕆᓂᕐᒧᑦ ᖃᐅᔨᒃᑲᕋᒃᓴᖅ:
ᐃᕙᓗᐊᕐᔪᒃ ᒥᐅᕆᑦ
ᑐᑭᒧᐊᑦᑎᑦᑎᔨ ᑐᓴᐅᒪᔪᓕᕆᔨᒃᑯᓐᓄᑦ
ᓄᓇᕗᑦ ᑐᙵᕕᒃ ᑎᒥᖓ
