(ᐊᒃᑑᕝᕙ 21, 2025 – ᑲᖏᖅᖠᓂᖅ, ᓄᓇᕗᑦ) ᐃᑉᐸᔅᓴᖅ, ᓄᓇᕗᑦ ᑐᙵᕕᒃ ᑎᒥᖓᑕ ᑲᑎᒪᔨᖏᑦ ᑐᓴᖅᑎᑦᑎᓚᐅᖅᐳᑦ ᓯᕗᓪᓕᐅᑎᓪᓗᐊᖁᔭᕐᒥᓂᒃ ᓂᕈᐊᕋᑦᓴᐅᔪᓄᑦ ᓄᓇᕗᒻᒥ ᓂᕈᐊᕐᓇᒧᑦ ᐊᒻᒪᓗ ᑭᖑᓪᓕᕐᒥᒃ ᒐᕙᒪᐅᓂᐊᖅᑐᓄᑦ, ᓇᓗᓇᐃᖅᓯᓯᓐᓈᒃᑲᓐᓂᖅᑐᑎᑦ ᓄᓇᕗᑦ ᑐᙵᕕᒃ ᑎᒥᖓᑕ ᐃᖅᑲᓇᐃᔭᖃᑎᖃᕐᓂᐊᖅᑐᑎᑦ ᓯᕗᒧᐊᑦᑎᑕᐅᖁᓪᓗᒋᑦ ᐃᓄᐃᑦ ᐃᓅᓯᖏᑦ, ᐃᓕᖅᑯᓯᖏᑦ ᐊᒻᒪᓗ ᐱᕙᓪᓕᐊᔪᓕᕆᓂᕐᒧᑦ ᖃᓄᐃᑦᑕᐃᓕᓂᖏᑦ.
ᑲᑎᒪᔩᑦ ᓇᓗᓇᐃᖅᓯᓚᐅᖅᑐᑦ ᐊᒥᓱᓂᒃ ᓯᕗᓪᓕᐅᑎᖁᔭᕐᒥᓂᒃ ᑲᑐᔾᔭᐅᔭᕆᐊᖃᖅᑐᑎᑦ ᑲᒪᒋᔭᐅᑦᓯᐊᕐᓗᑎᑦ, ᐱᖃᓯᐅᑎᓪᓗᒋᑦ ᐃᓄᒃᑐᑦ ᐅᖃᐅᓯᕐᒥᒃ ᐊᑐᕐᓗᑎᑦ ᐃᓕᓐᓂᐊᖅᑎᑦᑎᔭᕆᐊᖃᕐᓂᖅ, ᐃᓄᐃᑦ ᐃᖅᑲᓇᐃᔭᖅᑎᑕᐅᓂᖏᑦ ᐊᒻᒪᓗ ᐱᓕᒻᒪᒃᓴᖅᑎᑕᐅᓂᖏᑦ, ᐃᒡᓗᓕᕆᓂᖅ ᐊᒻᒪᓗ ᐱᖁᑎᕐᔪᐊᓕᕆᓂᖅ, ᓂᕿᖃᑦᓯᐊᖃᑦᑕᕐᓂᖅ, ᐃᓄᐃᑦ ᓄᑕᖅᑲᑦ ᓯᕗᓪᓕᐅᑎᑕᐅᓂᖏᖕᓄᑦ ᐱᓕᕆᐊᖅ, ᐊᒻᒪᓗ ᐋᓐᓂᐊᖅᑕᐃᓕᒪᓂᕐᒧᑦ ᓇᓕᒧᒌᓕᖅᑎᑦᑎᔭᕆᐊᖃᕐᓂᖅ ᐱᔨᑦᑎᖅᑕᐅᓂᖏᑦ ᐃᓄᐃᑦ, ᐃᓱᒪᒃᑯᑦ ᖃᓄᐃᑦᑕᐃᓕᒪᓂᖅ, ᐃᒻᒥᓃᖅᑕᐃᓕᒪᑎᑦᑎᓂᖅ, ᐊᒻᒪᓗ ᑲᒪᒋᔭᐅᓗᓂ ᐋᙵᔮᕐᓇᖅᑐᓅᖓᔪᑦ ᐋᓐᓂᕈᑎᒋᔭᐅᓕᕐᓂᖏᑦ ᓄᓇᓕᓐᓂ
“ᓄᓇᕗᑦ ᑐᙵᕕᒃ ᑎᒥᖓ ᑲᒪᒋᔭᖃᕐᓂᐊᕐᓂᕋᖅᓯᒪᕗᑦ ᐃᖅᑲᓇᐃᔭᖃᑎᖃᓛᖅᑐᑎᑦ ᑭᖑᓪᓕᐅᓂᐊᖅᑐᒥᒃ ᒐᕙᒪᒥ ᓴᙱᔪᒥᒃ ᑐᙵᕕᓕᐅᕈᒪᓪᓗᑎᑦ ᐃᓄᖕᓄᑦ,” ᐅᖃᖅᖢᓂ ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓ ᔨᐅᓚᒥ ᑑᕐᖔᓗᒃ. “ᑕᑯᔪᒪᒐᑦᑕ ᒐᕙᒪᐅᔪᒥᒃ ᓯᕗᒧᐊᑦᑎᑦᑎᓂᖃᖅᑐᒥᒃ ᐃᓄᒃᑐᑦ ᐊᑐᕐᓗᑎᑦ ᐃᓕᓐᓂᐊᖅᑎᑦᑎᔪᓂᒃ, ᖃᐅᔨᒪᑦᓯᐊᕐᓗᑎᑦ ᐊᖏᕐᕋᕆᔭᐅᔪᑦ ᓂᕿᖃᑦᓯᐊᕋᓗᐊᕐᒪᖔᑕ, ᐊᒻᒪᓗ ᓴᖅᑮᓗᑎᑦ ᐱᕕᖃᕈᑎᓪᓚᑦᑖᕐᓂᒃ ᐃᓄᒻᒪᕆᖕᓄᑦ ᐱᕈᖅᐸᓪᓕᐊᖁᓪᓗᒋᑦ ᐅᓪᓗᒥ ᐊᒻᒪᓗ ᓯᕗᓂᒃᓴᒥ.”
ᑕᒪᒃᑯᐊ ᑎᑭᑕᐅᓇᓱᐊᖅᑐᑦ ᑎᑭᑕᐅᖁᓪᓗᒋᑦ ᓄᓇᕗᑦ ᑐᙵᕕᒃ ᑎᒥᖓᑕ ᑲᑎᒪᔨᖏᑦ ᑭᖑᓪᓕᕐᒥᒃ ᒐᕙᒪᐅᓂᐊᖅᑐᑦ ᓄᓇᕗᑦ ᑐᙵᕕᒃ ᑎᒥᖓᓂᒃ ᐃᖅᑲᓇᐃᔭᖃᑎᖃᖁᔨᕗᑦ ᓄᓇᕗᒻᒥᐅᑦ ᐃᓄᐃᑦ ᐃᓱᒫᓘᑎᖏᑦ ᐱᔪᓐᓇᐅᑎᖏᓪᓗ ᓯᕗᓪᓕᖅᐹᖑᓗᑎᑦ ᑲᒪᒋᔭᐅᖃᑦᑕᕐᓂᐊᕐᒪᑕ. ᑐᐊᕕᕐᓇᓛᖑᔪᖅ ᑲᒪᒋᔭᐅᔭᕆᐊᓕᒃ ᐃᓄᒃᑐᑦ ᖃᐅᑕᒫᑦ ᐊᑐᖅᑕᐅᖃᑦᑕᕐᓂᖓ ᐃᓅᓯᕐᒥ ᓲᕐᓗᒃ ᐱᕙᓪᓕᐊᔪᒃᑰᕈᑎᑎᒍᑦ, ᐃᓕᓐᓂᐊᓕᓵᖅᑐᑦ ᐃᓕᓐᓂᐊᕋᒃᓴᖏᖕᓂ, ᐊᒻᒪᓗ ᒐᕙᒪᒃᑯᑦ ᐱᔨᑦᑎᖅᑎᓪᓗᒋᑦ.
ᐃᓄᒃᑐᑦ ᐅᖃᐅᓯᖅ ᐊᑐᖅᑕᐅᖃᑦᑕᓕᕐᓗᓂ ᒐᕙᒪᒃᑯᓐᓂ ᐃᓄᓐᓂᒃ ᐃᖅᑲᓇᐃᔭᖅᑎᖃᒃᑲᓐᓂᕆᐊᓖᑦ ᒐᕙᒪᒃᑯᑦ. ᐊᐅᓚᓂᖃᑦᑎᐊᓛᒃᑯᑦ ᐱᕚᓪᓕᕋᑦᓴᐅᔪᖅ ᑕᒪᓐᓇ ᐃᓄᓐᓅᖓᔪᓂᒃ ᐱᓕᒻᒪᒃᓴᐃᒍᑎᑕᖃᓕᕐᓗᓂ ᐱᓕᕆᐊᕐᓂᒃ ᐊᒻᒪᓗ ᓴᙵᑦᑎᑕᐅᓗᓂ ᐃᓄᐃᑦ ᐃᖅᑲᓇᐃᔭᖅᑎᑖᕆᔭᐅᓂᖏᑦ ᐸᕐᓇᐅᑎᖓ ᓴᙵᑦᑎᑕᐅᒃᑲᓐᓂᒻᒪᕆᓪᓗᓂ ᐃᑲᔪᖅᑕᐅᖁᓪᓗᒋᑦ ᒪᑭᒪᔪᓐᓇᑦᓯᐊᖅᑐᒃᑯᑦ ᐃᓄᐃᑦ ᐃᖅᑲᓇᐃᔮᖃᕐᓂᐊᕐᒪᑕ.
ᐃᒡᓗᖃᕐᓂᖅ ᑐᕌᖓᓂᖃᓲᖑᒋᕗᖅ ᐃᖅᑲᓇᐃᔮᕐᓄᑦ, ᓄᓇᕗᑦ ᑐᙵᕕᒃ ᑎᒥᖓ ᐃᖅᑲᓇᐃᔮᖃᕐᓂᐊᕆᕗᑦ ᓇᖕᒥᓂᖅ ᐃᒡᓗᑖᕆᔭᑦᓴᓂᒃ ᐊᒻᒪᓗ ᐊᑐᖅᑐᐊᕋᑦᓴᑦ ᐋᖅᑭᒍᑎᓂᑦ ᓄᓇᕗᒻᒥᐅᑦ ᐃᓄᐃᑦ ᐃᒡᓗᑖᖁᓪᓗᒋᑦ ᐃᖅᑲᓇᐃᔮᕐᒨᖓᓂᖃᐅᙱᑦᑐᓂᒃ. ᑭᖑᓪᓕᕐᒥᒃ ᒐᕙᒪᒃᑯᑦ ᓇᓕᒧᒌᓕᖅᑎᑦᑎᔭᕆᐊᓖᑦ ᓄᓇᕗᑦ 3000−ᖑᔪᒥᒃ ᐃᒡᓗᓕᐅᕐᓂᕐᒧᑦ ᖃᓄᖅᑑᕈᑎ ᓄᑖᕐᒥᒃ ᐃᓄᓐᓄᑦ ᓯᕗᒃᑲᖅᑖᖑᔪᑦ ᐃᒡᓗᓕᐅᕈᑕᐅᒐᔭᖅᑐᓄᑦ ᐋᖅᑭᒍᑎᒋᔭᐅᓗᑎᑦ, ᐃᖅᑲᓇᐃᔭᖃᑎᖃᕐᓗᑎᑦ ᓄᓇᕗᑦ ᑐᙵᕕᒃ ᑎᒥᖓᓂᒃ ᐃᓄᐃᑦ ᓴᓇᔪᓐᓇᖅᓯᑎᑕᐅᓗᑎᑦ ᐊᒻᒪᓗ ᐃᖅᑲᓇᐃᔮᖅᑖᕐᓗᑎᑦ ᓴᓇᔨᐅᕙᑦᑐᓂ ᐃᓚᓯᒋᐊᖅᓯᓐᓈᑦ ᐱᔭᐅᔭᕆᐊᖃᓪᓚᕆᑦᑐᓂᒃ ᓄᓇᕗᑦ ᐃᒡᓗᖁᑎᖏᓐᓂᒃ.
ᓈᒻᒪᑦᑐᒥᒃ ᐃᒡᓗᖃᙱᓐᓂᐊᓗᐊ ᓄᓇᕗᒻᒥ ᐃᓱᒪᒃᑯᑦ ᐋᓐᓂᐊᓕᕈᑕᐅᓯᒪᓕᕐᒪᑦ ᐊᒻᒪᓗ ᐃᓅᓯᕐᒥᒃ ᐋᓐᓂᖅᓯᓯᒪᓪᓗᓂ ᐊᒥᓱᓄᑦ ᐃᓄᓐᓄᑦ. ᐃᓚᖓᑦ ᐃᓱᒫᓘᑎᒋᔭᐅᔪᖅ ᐋᙵᔮᕐᓇᖅᑐᓂᒃ ᐊᑐᑲᒻᒪᖃᑦᑕᕐᓂᖅ ᑲᒪᒋᔭᐅᑲᐅᑎᒋᔭᕆᐊᖃᖅᑐᓂ, ᐊᒻᒪᓗ ᑭᖑᓪᓕᕐᒥᒃ ᒐᕙᒪᐅᓂᐊᖅᑐᑦ ᐊᑐᓕᖅᑎᑦᑎᔭᕆᐊᓖᑦ ᓴᙱᓂᖅᓴᓂᒃ ᖃᓄᖅᑑᕈᑎᓂᒃ ᓴᐳᔾᔭᐅᖁᓪᓗᒋᑦ ᐃᓄᐃᑦ ᓄᓇᓕᖏᑦ ᐋᙵᔮᕐᓇᖅᑐᒻᒪᕆᐅᔪᓂᒃ ᓴᙱᓂᖅᓴᓂᒃ, ᑮᓇᐅᔭᓂᒃ ᐊᑐᖅᓯᓐᓈᕐᓗᑎᑦ ᒪᒥᓴᕐᓂᕐᒧᑦ, ᐋᓐᓂᓗᐊᕐᔭᐃᕐᓂᕐᒥᒃ, ᐊᒻᒪᓗ ᐃᓱᒪᒃᑯᑦ ᖃᓄᐃᑦᑕᐃᓕᒪᔾᔪᑏᑦ ᐃᑲᔪᖅᑑᑎᓂᒃ.
ᑭᖑᓪᓕᖅᐹᒥᒃ, ᓄᓇᕗᑦ ᑐᙵᕕᒃ ᑎᒥᖓᑕ ᑲᑎᒪᔨᖏᑦ ᓄᑖᕐᒥᒃ ᒐᕙᒪᒥ ᐃᖅᑲᓇᐃᔭᖃᑎᖃᖁᔨᒋᕗᑦ ᐊᔭᐅᕆᖃᑎᒌᓐᓂᐊᕐᒪᑎᒃ ᑭᒡᒐᖅᑐᐃᓗᑎᑦ ᐃᓄᓐᓂᒃ ᐊᑐᕈᓐᓇᕐᓗᑎᑦ ᐃᓄᐃᑦ ᓄᑕᖅᑲᑦ ᓯᕗᓪᓕᐅᔾᔭᐅᓂᖓᓄᑦ ᐱᓕᕆᐊᕐᒥᒃ ᒐᕙᒪᑐᖃᒃᑯᑦ ᐊᔭᐅᖅᑕᐅᓗᑎᑦ, ᖃᐅᔨᒪᓇᑦᑎᐊᖁᓪᓗᒍ ᐃᓄᐃᑦ ᓄᑕᖅᑲᑦ ᓈᒻᒪᑦᑐᓂᒃ ᐸᖅᑭᔭᐅᖃᑦᑕᕐᓂᐊᕐᒪᑕ ᐊᒻᒪᓗ ᐱᔨᑦᑎᖅᑕᐅᓗᑎᑦ.
ᑲᑎᒪᔩᑦ ᐅᖃᐅᓯᖃᒻᒪᕆᒃᓯᒪᒋᕗᑦ ᑕᒪᒃᑯᐊ ᐱᔾᔪᑏᑦ ᑲᒪᒋᔭᐅᔭᕆᐊᖃᕐᒪᑕ ᑕᒪᐃᓐᓂ ᖁᑦᑎᓐᓂᓕᓐᓂᒃ ᒐᕙᒪᓂ ᐅᐸᓗᖓᐃᔭᑦᑎᐊᖅᓯᒪᔪᒃᑯᑦ ᓯᕗᓕᖅᑎᖃᐅᕐᓗᑎᑦ ᖃᐅᔨᒪᓇᑦᑎᐊᖁᓪᓗᒋᑦ ᐊᓯᔾᔨᖅᑕᐅᓪᓚᑦᑖᕐᓂᐊᕐᒪᑕ ᐃᓄᐃᑦ ᐃᓅᓯᖏᑦ, ᐊᒻᒪᓗ ᓄᓇᕗᑦ ᑐᙵᕕᒃ ᑎᒥᖓ ᐃᖅᑲᓇᐃᔭᖃᑎᖃᕐᓂᐊᕐᓂᕋᖅᓯᒪᕗᑦ ᒐᕙᒪᐅᔪᓂᑦ ᐱᐅᓯᕚᓪᓕᖁᓪᓗᒋᑦ ᓄᓇᕗᒻᒥᐅᑦ ᐃᓄᐃᑦ ᐃᓅᓯᖏᑦ.
-30-
ᐱᕙᓪᓕᐊᔪᓕᕆᔨᒃᑯᑦ ᖃᐅᔨᒋᐊᕈᓐᓇᖅᑐᑦ:
ᐃᕙᓗᐊᕐᔪᒃ ᒥᐅᕆᑦ
ᑐᑭᒧᐊᑦᑎᑦᑎᔨ ᑐᓴᐅᒪᑎᑦᑎᓂᕐᒧᑦ
ᓄᓇᕗᑦ ᑐᙵᕕᒃ ᑎᒥᖓ
