(October 21, 2025 – Kangirhiniq, Nunavut) Ippaghak, ukkua Nunavut Tunngavik Katimayiit tohaktitiyot tahapkuninga ihomagiyamingnik hivuliotitkuvlugit havagiyakhait ukkua Nunavumi nigoakniaktitlugit nigoagaghanguktitaoyot tatvalu nutaat kavamtauniaktot, ihomagitkuvlugit NTI-kut tunnighimayaitnik ikkayokatigiklutik pivaliotikhaitnik Inuit innulikinikut, iliitkuhilikinikut tatvalu pivalialikinikut innutiakutikhaitnik.
Ukkua Katimayiit ihomagitkuyait kaffioyunik hivuliotitkuvlugit havagiyakhait pikatigiklutik ihomaliokatigigiakaktot, illaliotivlugit Inuktut ilihainik, Inuit havaghakhiokutikhait tatvalu ilihautikhaitnik, iglulikinikut tatvalu pikutaitnik ihuakutikhaitnik, nikkailiokataknik, una Inuit Nuttakat Hivuliotiyagiakaktok Havagiyaoyok, tatvalu anniaktailitjutikhat ajikigiakaktot, ilaliotivlugo ihomapkut innutiakutikhat, inminiiktailitjutikhat tatvalu ihuaghaklugit hapkua ayoghaotaovaliayot higgakluknikut ulluagianaktonik nunaliitni.
“NTI-kut tunnighimayot havakatigiyomavlugit tahapkua kavamauniaktot nigoaktaonigomik hannakatigiyomavlugit hakkugiktunik tungavikhaitnik Inuit,” ukaktok NTI-kut Angayokangat Jeremy Tunraluk. “Takkuyumayavut ukkua kavamatkut pivalikovlugit Inuktut ilihainik, piyagiakaliktot angilgakvioyot nikkailiokatagiakagoiktot tatvalu hapkua nunaliit kayangaitomigiakaliktot, tatvalu hatkiktiyagiakaliktot uktotikhanik pivaliotikhaitnik Inuit pivaliotighaitnik ublumi hivunighamilo.”
Tahapkua havaginahuaklogit piyomayaoyot, ukkua NTI-kut Katimayiit tohaktiyomayait ukkua nutangukniaktot kavamakhat havakatigiyagiakaktait ukkua NTI-kut pivaligahoaklugit Nunavumiut Inuit ihomalotait pivaliotikhaitlo hivuliotinahuaklogit. Una ihagianighaoyok havaghak hivuliotiyagiakaktok Inuktut atokaoyagiakaliktok ukkauhikut nanituinak tatkani havakvioyoni, pivalialikinikut unipkaktioyoni kagitaoyakutlo, innuhaat nuttakat ilihakviitni, ilihagiakpalikviitni ilihainik tatvalu kavamatkut ikkayutaitni.
Atokulikpalialugo Inuktut ukkauhiit kavamatkuni piyagiakakniaktot amigaikpaliklugit Inuit havaktot Kavamatkuni. Tatva nakunigauniaktok ihuaghaotikhak amigaikpaliklugit hapkua Inuinaknun-tugangayot ilihautikhat tatvalu ihuaghivaliklugit hapkua havakvioyot Inuit Havaghakhiokutikhaitnik Parnaiyaotait ikkayotaoniakmata Inuit havaligomik.
Tahamna iglukaknik illaliotihimangmat havakaktunut, NTI-kut havaginiaktait ihuaghaitjutikhanik iglunik nanminiktakutikhanik tatvalu akkiliktoiyot iglunik ihuaghaotikhaitnik taimatot Nunavumiut Inuit iglutakatagiangita nalliaknik havakagaloaklutik. Tahapkua nigoaktaoyot kavamauniaktot nallaumayagiakaktat tahamna Nunavut 3000 Iglulioknikut Parnaiyaotat nutanik Inuit-hivuliktaitnik iglukilioknikut ihuaghaotikhaitnik, havakatigilugit ukkua NTI-kut Inuinaknik havaktikaklutik iglulioknikut tatvalu hannayionikutlo iglunik. Taimatot hapkua Nunavumiutat Inuit ilihakpalikniakmata havagiyaghamingnik iglulioknikut tatva hannavalialutik ihagiagiyaoloaktonik iglughanik tahamani Nunavumi igluliokhimaaktitlogit.
Iglukatiangititlugit tahamani Nunavumi pitjutaoloaktok ihumakut ayoghaotikaknikut tatvalu innuhikmingnik anniktigitjutaovaliayok amighunik Inuinaknik. Ataohik una ihomalotaoloaliktok nuttaktitagiakaliktok nangayaknaktunik hivugannaktonik atoktaovalialikmat, ukkua kavamauniaktot ihuaghaiyagiakaktot hakkugitkiyanik pitailitjutikhanik happuniakutikhanik Inuit nunaliitni uuitayaaknaktunik higgakluknik, anniktigiyut ikkilivaligiangita, tatvalu ihumakut ayoghaktot ikkayotikhaitnik.
Kingulikpak, ukkua NTI-kut Katimayiit tohaktitkuyait ukkua nutaat kavamauniaktot havakatigilugit ukkua NTI-kut ikkayokatigiklutik havagilutjuk tahamna Inuit ikkayotikhaitnik Inuit Nuttakat Hivuliotilugit Ikkayotaoniaktonik tatvani Kavamatokatkuni taima hapkua Inuit Nuttakat munagitjutikhaitnik tatvalu hunanut ikkayotikhaitnik.
Ukkua Katimayiit aghughaktait tahapkua ihomalutauyot havagiyaoyagiakaktot ikkayokatigiklutik hapkua hivuliktiit tamaitnit kuligiiktunit kavamauyunit taima allangutaoniaktugaloak innuhiitnik Inuinait, tatvalu NTI-kut tunnighimayut havakatigiyomavlugit hapkua kuligiiktot kavamauyot huli ingilgaiyagomavlutjuk hapkua innugiit Nunavunmiutat.
-30-
Pivalialikiyiit Tohakvikhat:
Ivaluarjuk Merritt
Ataniat Tohaktitilikiyiit
Nunavut Tunngavik Timingat
