(ᔪᓚᐃ 14, 2025 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓ ᖁᕕᐊᓱᒃᑐᑦ ᑐᓴᖅᑎᑦᑎᔭᕆᐊᒃᓴᖅ ᓵᓚᒃᓴᖅᑐᒥᓂᕐᓂᒃ 2025-ᒥ ᓄᓇᕗᑦ ᐅᓪᓗᖓᓂ ᖃᒧᑕᐅᔭᓂᒃ ᐱᓲᑎᓂᓪᓗ ᐊᒧᓯᔪᖃᖅᑐᒥᓂᐅᑎᓪᓗᒍ.
ᓄᓇᕗᒻᒥᐅᑦ ᐃᓄᖏᑦ ᐊᑎᓕᐅᖅᑕᐅᖃᑕᐅᓯᒪᔪᑦ ᓄᓇᕗᑦ ᐊᖏᕈᑎᖓᓄᑦ ᐊᑎᖏᑦ ᐴᖅᑕᐅᑦᑕᐅᑎᒋᓚᐅᖅᑐᑦ ᓵᓚᒃᓴᕈᓐᓇᖅᑎᑕᐅᓪᓗᑎᑦ ᐊᑕᐅᓯᕐᒥᒃ ᑕᒪᐃᓐᓂ ᒪᕐᕉᓐᓂᒃ ᐱᔾᔪᓯᐊᓐᓂᒃ ᐊᑐᓂ ᓄᓇᓕᐅᔪᒧᑦ, ᔮᒪᕼᐋ ᓴᐃᑦᕕᓐᑐᕐ L-TX-GT ᖃᒧᑕᐅᔭᖅ, ᐅᕝᕙᓘᓐᓃᑦ ᐳᓕᐅᕆᔅ ᔅᐳᐊᑦᒪᓐ 570 ᑐᕋᐃᔪᓪ ᐱᓲᑎᒥᒃ. ᐊᒧᔭᐅᖃᑦᑕᓚᐅᖅᑐᑦ ᐊᑐᖅᑐᑎᑦ ᓂᕈᐊᖅᓯᑎᑦᑎᒍᑎᒥᒃ ᐊᒻᒪᓗ ᓇᓗᓇᐃᖅᑕᐅᓪᓗᑎᑦ ᔪᓚᐃ 9-ᖑᑎᓪᓗᒍ, ᓄᓇᕗᑦ ᐅᓪᓗᖓᓂ. ᐊᒧᓯᖃᑦᑕᕐᓂᕗᑦ ᑮᓇᐅᔭᖃᖅᑎᑕᐅᓚᐅᖅᑐᖅ ᓂᕿᑦᑎᐊᕙᖃᕐᓂᖓ ᐅᑭᐅᖅᑕᖅᑐᖅ ᑲᓇᑕᒥ ᐊᖑᓇᓱᒃᑏᑦ ᐃᑲᔪᖅᑐᖅᑕᐅᔾᔪᑎᖏᑦ ᐊᐃᑦᑑᓯᐊᖅᑎᒍᑦ.
ᓵᓚᒃᓴᖅᑐᑦ ᐊᐱᕆᔭᐅᕗᑦ ᖃᐅᔨᒃᑲᖅᑕᐅᔾᔪᑎᖏᑕ ᑐᑭᓯᒋᐊᕈᑎᖏᑦ ᑐᓂᓗᒋᑦ ᓄᓇᓕᓐᓂ ᑐᓴᐅᒪᑎᑦᑎᔨᓄᑦ, ᖃᐅᔨᒪᑦᑎᐊᕐᓂᐊᕐᒪᑕ ᖃᐅᔨᒃᑲᐃᓗᑎᑦ ᐱᔾᔪᓯᐊᑦ ᐊᐅᓪᓚᖅᑎᑕᐅᔪᓐᓇᖅᓯᑎᓪᓗᒋᑦ. ᖃᒧᑕᐅᔭᐃᑦ ᐊᒻᒪᓗ ᐱᓲᑏᑦ ᐅᒥᐊᕐᔪᐊᒃᑯᑦ ᐅᓯᔭᐅᒻᒪᑕ, ᑎᑭᕝᕕᒃᓴᖏᑦ ᐅᓪᓗᖏᑦ ᐊᔾᔨᒌᙱᑦᑐᒡᒍᑕᐅᓪᓗᑎᑦ ᓄᓇᓕᑎᒍᑦ.
ᑕᒪᐃᓐᓂ ᐱᔾᔪᓯᐊᖅᑖᖅᑐᑦ ᑐᓂᓯᔭᐅᒐᔭᖅᑐᑦ ᐊᔾᔨᖏᓐᓂᒃ ᓄᓇᕗᑦ ᐅᓪᓗᖓᓂ ᐱᔾᔪᓯᐊᕐᓂᕐᒧᑦ ᒪᓕᒐᕋᓛᖏᓐᓂᒃ. ᒪᓕᒐᕋᓛᑦ ᓇᓗᓇᐃᔭᐃᓯᒪᔪᑦ ᑭᒃᑯᑦ ᐱᓇᓱᒍᓐᓇᕐᒪᖔᑕ, ᖃᖓᒃᑯᑦ ᐊᐅᓪᓚᖅᑎᑦᑎᒐᔭᕐᒪᖔᑦᑕ, ᐊᒻᒪᓗ ᐱᒻᒪᕆᐅᔪᑦ ᒪᓕᑦᑕᐅᔭᕆᐊᓖᑦ ᐱᔾᔪᓯᐊᖅᑖᕐᓂᕐᒧᑦ, ᐱᖃᓯᐅᑎᓪᓗᒋᑦ ᓱᓇᒃᑯᑖᑦ ᑐᓂᔭᐅᒻᒪᑕ ᒪᓕᑦᑐᒋᑦ “ᖃᓄᐃᓕᖓᓂᖏᑦ” ᓇᓪᓕᐅᒃᑯᒫᖅᓯᒪᙱᑦᑐᑎᑦ ᐅᕝᕙᓘᓐᓃᑦ ᐱᓪᓚᑦᑖᕋᔭᕐᓂᕋᖅᑕᐅᓪᓗᑎᑦ ᓄᓇᕗᑦ ᑐᙵᕕᒃ ᑎᒥᖓᓂᑦ.
ᓄᓇᕗᑦ ᑐᙵᕕᒃ ᑎᒥᖓ ᑲᔪᖏᖅᓴᐃᕗᖅ ᑕᒪᐃᓐᓂ ᓄᓇᕗᑦ ᐃᓄᖏᓐᓂᒃ ᐊᑎᓕᐅᖅᑕᐅᖃᑕᐅᓯᒪᔪᓂᒃ ᑐᕌᕈᑎᖏᑦ ᑎᑎᖅᑲᓂᐊᕐᕕᒃᑯᑎᒍᑦ ᐅᓪᓗᒥᒨᖓᓛᖑᒐᓗᐊᕐᒪᖔᑕ ᐅᖓᕙᕆᐊᖅᑐᖃᖁᓇᒍ ᓯᕗᓂᒃᓴᒥ ᑎᑎᕋᕐᕕᐅᔾᔪᑎᖏᓐᓂᒃ ᐅᕝᕙᓘᓐᓃᑦ ᐱᔾᔪᓯᐊᖅᑖᕈᓐᓇᔭᕋᔭᖅᑕᖏᓐᓂᒃ.
. ᐱᖃᓯᐅᑎᓗᒋᑦ ᐊᑎᓕᒫᑦ, ᓄᓇᕗᑦ ᑐᙵᕕᒃ ᑎᒥᖓᓄᑦ ᐊᑎᓕᐅᖅᑕᐅᔾᔪᑎᕕᑦ ᓈᓴᐅᑎᖓ, ᐊᒻᒪᓗ ᓄᑖᕈᖅᑎᓯᒪᔪᖅ ᑎᑎᖅᑲᓂᐊᕐᕕᒃᑯᑎᒍᑦ ᑐᕌᕈᑏᑦ. ᐱᓕᕆᔨᐅᔪᑦ ᑐᓂᓯᑐᐃᓐᓇᕆᐊᖃᕐᒥᔪᑦ ᓇᐃᑦᑐᒥᒃ ᓈᑎᕆᐊᓕᒻᒥᒃ ᐱᓯᒪᑦᑎᙱᒃᑯᑎᑦ ᑐᑭᓯᒋᐊᕈᑎᓂᑦ.ᑕᒪᐃᓐᓂ ᓵᓚᒃᓴᖅᑐᑦ ᓄᓇᕗᒻᒥᐅᑕᐅᔭᕆᐊᓖᑦ, ᐃᓄᐃᑦ ᓄᓇᕗᑦ ᓯᓚᑖᓃᑦᑐᑦ ᓵᓚᒃᓴᕈᓐᓇᖅᑎᑕᐅᓚᐅᕐᒥᔪᑦ $5,000−ᓂᒃ ᐱᔾᔪᓯᐊᕐᒥᒃ, ᑮᓇᐅᔭᖃᖅᑎᑕᐅᒻᒥᔪᖅ ᓄᓇᕗᑦ ᑐᙵᕕᒃ ᑎᒥᖓᓄᑦ.
ᖁᕕᐊᓲᑎᒋᕙᕗᑦ ᑕᒪᐃᓐᓂ 2025-ᒥ ᓵᓚᒃᓴᖅᑐᒥᓃᑦ!
-30-
ᐱᕙᓪᓕᐊᔪᓕᕆᔨᒃᑯᓐᓄᑦ ᖃᐅᔨᒃᑲᕋᒃᓴᖅ:
ᒨᓴ ᕘᓪᔪ
ᑐᑭᒧᐊᑦᑎᑦᑎᔨᐅᑲᐃᓐᓇᖅᑐᖅ ᑐᓴᐅᒪᑎᑦᑎᓂᕐᒧᑦ
ᓄᓇᕗᑦ ᑐᙵᕕᒃ ᑎᒥᖓ
