(ᑲᖏᖅᖠᓂᖅ, ᓄᓇᕗᑦ — ᐊᒃᑑᕝᕙ 22, 2025) ᐅᓪᓗᒥ, ᓄᓇᕗᑦ ᑐᙵᕕᒃ ᑎᒥᖓᑕ ᐃᓚᒋᔭᐅᔪᖁᑎᖏᑦ ᑐᓴᖅᑎᑦᑎᖅᑲᐅᕗᑦ ᐱᕚᓪᓗᕈᑎᒋᔭᒻᒪᕆᐊᓗᒻᒥᓂᒃ ᐊᑐᓕᖅᑎᑕᐅᓪᓗᓂ ᐊᖏᕐᕋᑦᓴᓕᐅᓚᐅᖅᑕ ᐊᒻᒪᓗ ᐋᖅᑭᒃᑕᐅᓪᓗᓂ ᐃᒡᓗᕗᑦ ᑯᐊᐳᕇᓴᓐ.
ᐊᖏᕐᕋᑦᓴᓕᐅᓚᐅᖅᑕ, ᓯᕗᓪᓕᖅᐹᑦᑎᐊᖅ ᓄᓇᕗᒻᒥ ᐃᓄᐃᑦ ᐃᒡᓗᓕᐅᖅᑕᐅᓂᖏᓐᓄᑦ ᖃᓄᐃᓕᐅᕈᑎᖓᑕ ᐸᕐᓇᐅᑎ, ᓴᓇᔭᐅᓯᒪᔪᖅ ᐃᓄᓐᓄᑦ, ᐊᑑᑕᐅᒐᔭᖅᑐᓂ ᐃᓄᓐᓄᑦ, ᓯᕗᓪᓕᐅᔾᔨᓂᓕᒃ ᐃᓐᓇᒻᒪᕆᓐᓂᒃ, ᐊᕐᓇᓂᒃ ᐊᒻᒪᓗ ᓄᑕᖅᑲᓂᒃ ᕿᒫᔪᑦ ᐋᓐᓂᖅᑎᕆᔪᓂᒃ, ᐊᒻᒪᓗ ᒪᒃᑯᑦᑐᓄᑦ ᐊᒃᓱᕈᖅᑐᒃᑰᖅᑐᓂᒃ, ᑲᒪᒋᔭᖃᖅᓯᓐᓈᖅᑐᓂ ᑐᐊᕕᕐᓇᖅᑐᒥᒃ ᐊᑭᑐᓗᐊᙱᑦᑐᒥᒃ ᐃᒡᓗᖃᕆᐊᖃᕐᓂᖏᑦ ᐃᖅᑲᓇᐃᔭᖅᑐᑦ ᐃᓄᐃᑦ ᐃᒡᓗᓂᒃ ᓂᕈᐊᕋᑦᓴᓂᒃ ᐊᔾᔨᒌᙱᑦᑐᓂᒃ ᐱᔭᕆᐊᓖᑦ ᑐᕌᖓᓂᖃᙱᓪᓗᑎᑦ ᐃᖅᑲᓇᐃᔮᕐᒧᑦ ᐅᕝᕙᓘᓐᓃᑦ ᑭᒃᑯᑐᐃᓐᓇᕐᓄᑦ ᐃᒡᓗᓄᑦ ᐊᑐᖅᑐᐊᖅᑕᐅᓲᓄᑦ.
“ᑕᐅᑐᙳᐊᒐᖃᕋᑦᑕ ᐊᓯᔾᔨᕐᓗᒍ ᐃᒡᓗᖃᕐᓂᖅ ᓄᓇᕗᒻᒥ ᐃᓄᓐᓄᑦ,” ᐅᖃᖅᑐᓂ ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓ ᔨᐅᓚᒥ ᑑᕐᖔᓗᒃ. “ᖁᕕᐊᓇᒻᒪᕆᑦᑐᖅ ᑕᑯᓪᓗᒍ ᑕᐅᑐᙳᐊᖅᓯᒪᔭᕗᑦ ᐃᓅᓯᕆᒍᒪᓛᖅᑐᒍ ᐃᓄᐃᑦ ᐃᒡᓗᖃᖅᑎᑕᐅᓂᖏᓐᓄᑦ ᓄᓇᕗᒻᒥ ᐊᑐᓕᖅᑎᑕᐅᕙᓪᓕᐊᒻᒪᑦ ᐋᖅᑭᒃᑕᐅᓂᖓᒍᑦ ᐃᒡᓗᕗᑦ, ᐊᒻᒪᓗ ᐃᓄᐃᑦ ᐃᒡᓗᓕᐅᖅᑕᐅᓂᖏᖕᓄᑦ ᑮᓇᐅᔭᖃᕐᕕᖓᒍᑦ.”
ᐃᒡᓗᕗᑦ ᑯᐊᐳᕇᓴᙵ ᐃᓄᖕᓄᑦ ᓯᕗᒃᑲᖅᑖᖑᔪᖅ ᑮᓇᐅᔭᓕᐅᕈᑎᖃᕋᓱᐊᙱᑦᑑᓪᓗᓂ ᐃᒡᓗᓕᕆᓂᕐᒧᑦ ᑲᑐᔾᔨᖃᑎᒌᖑᔪᖅ ᐋᖅᑮᒋᐊᖅᓯᓇᓱᑦᑐᓂ ᐃᒡᓗᖃᕐᓂᖏᓐᓂᒃ ᓄᓇᕗᒻᒥᐅᑦ ᐃᓄᖏᑦ. ᐊᐅᓚᑕᐅᔪᖅ ᑲᑎᒪᔨᓄᑦ ᒪᕐᕉᓐᓂᒃ ᑭᒡᒐᖅᑐᐃᔨᖃᖅᑐᑎᑦ ᓄᓇᕗᑦ ᑐᙵᕕᒃ ᑎᒥᖓᓂᒃ, ᐊᒻᒪᓗ ᐊᑕᐅᓯᖅ ᐊᑐᓂ ᐊᕕᑦᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖓᓃᙶᖅᑐᑎᒃ, ᐃᒡᓗᕗᑦ ᑯᐊᐳᕇᓴᓐ ᑲᒪᒋᔭᖃᓗᐊᕋᔭᖅᑐᖅ ᐊᐅᓚᑦᑎᓗᑎᑦ ᐊᑭᑐᓗᐊᙱᑦᑐᓂᒃ ᐊᑐᖅᑐᐊᕋᑦᓴᓂᒃ ᐃᒡᓗᓂᑦ ᓂᕈᐊᕈᑕᐅᒐᔭᖅᑐᑎᑦ ᖃᓄᐃᑦᑑᒻᒪᖔᑖ, ᐊᒻᒪᓗ ᐃᑲᔪᖅᑐᖅᑕᐅᓗᓂ ᐊᖏᕐᕋᑦ ᓴᓇᔭᐅᒋᐊᕈᑎᖏᓐᓂᒃ ᐊᒻᒪᓗ ᓇᒻᒥᓂᖃᕐᓂᕐᒧᑦ ᐃᒡᓗᒥ ᐱᓕᕆᐊᖃᕐᓗᓂ ᓄᓇᕗᒻᒥᐅᑦ ᐃᓄᖏᖕᓄᑦ.
ᐃᓄᐃᑦ ᐃᒡᓗᓕᐅᖅᑕᐅᓂᖏᖕᓄᑦ ᑮᓇᐅᔭᖃᕐᕕᖓ, ᐋᖅᑭᒃᑕᐅᓚᐅᖅᓯᒪᔪᖅ ᐋᒡᒌᓯ 2025-ᖑᑎᓪᓗᒍ ᑮᓇᐅᔭᖃᕐᕕᒃ ᑮᓇᐅᔭᖃᖅᑎᑕᐅᒋᐊᙵᓚᐅᖅᓯᒪᓪᓗᓂ $135 ᒥᓕᐊᓐᓂᒃ ᑮᓇᐅᔭᓂᒃ, ᐃᑲᔪᖅᑐᐃᓂᖃᕐᓂᐊᖅᑐᖅ ᐃᒡᓗᕗᑦ ᑯᐊᐳᕇᓴᙵᑕ ᐊᐅᓚᓂᖏᓐᓂᒃ ᐊᒻᒪᓗ ᐊᑭᑐᓗᐊᙱᑦᑐᓂᒃ ᐃᒡᓗᓂᑦ ᐊᑐᖅᑐᐊᓂᕐᒧᑦ ᐊᑭᖃᖅᑎᑦᑎᒐᔭᖅᑐᓂ. ᑮᓇᐅᔭᖃᕐᕕᒃ ᐱᖃᓯᐅᔾᔨᔪᖅ $63 ᒥᓕᐊᓐ ᑮᓇᐅᔭᓂᒃ ᐅᑎᕐᕕᐅᔾᔪᑎᖏᑦ ᓄᓇᕗᑦ ᓄᓇᑖᕐᓂᕐᒧᑦ ᐊᖏᕈᑎᒥᒃ ᐋᔩᕋᕈᑕᐅᓂᖓᓄᑦ ᐊᑐᖅᑐᐊᖅᑕᐅᓚᐅᖅᓯᒪᔪᓂᒃ, ᐊᒻᒪᓗᑦᑕᐅᖅ $72 ᒥᓕᐊᓐ ᑮᓇᐅᔭᓂᒃ ᑮᓇᐅᔭᖅᑐᕈᑎᒃᓴᓃᙶᖅᑐᑦ 2022-ᒥ ᐃᒡᓗᓕᐅᕐᓂᕐᒧᑦ ᑮᓇᐅᔭᑦ ᐊᑐᖅᑕᐅᓂᐊᖅᓯᒪᔪᑦ ᐃᑲᔪᖅᑐᐃᔾᔪᑎᓕᐅᕐᓗᑎᑦ ᐃᒡᓗᓂᑦ.
“ᑕᒪᓐᓇ ᐱᒻᒪᕆᐊᓘᕗᖅ ᐱᕚᓪᓕᕈᑎᒋᔭᕗᑦ ᐋᖅᑭᑦᓱᐃᓪᓗᑕ ᐊᑐᖅᑕᐅᖃᑦᑕᒍᓯᕐᓂᒃ, ᐱᓕᕆᖃᑎᒌᓐᓂᕐᒥᒃ, ᐊᒻᒪᓗ ᓵᑕᐅᓯᒪᔭᕆᐊᖃᕐᓂᖏᓐᓂᒃ ᖃᐅᔨᒪᓇᑦᑎᐊᐊᖁᓪᓗᒋᑦ ᐃᒡᓗᐃᑦ ᓄᓇᕗᒻᒥ ᐊᔾᔨᖃᕋᓗᐊᕐᒪᖔᕐᒥᒃ ᐃᓄᐃᑦ ᓯᕗᓪᓕᐅᑎᖁᔭᕐᒥᓂᒃ ᐊᒻᒪᓗ ᐱᒻᒪᕆᒋᔭᖏᓐᓂᒃ,” ᐅᖃᖅᑐᓂ ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓᑕ ᑐᖏᓕᐊ ᐹᓪ ᐃᕐᖓᐅᑦ. “ᑕᒪᓐᓇ ᐃᓄᐃᑦ ᓇᒻᒥᓂᖅ ᐱᓇᓱᐊᒐᕆᒻᒪᒍ ᐃᓱᒪᓕᐅᕈᑎᖃᖅᐸᑦᑎᓪᓗᒋᑦ ᖃᓄᐃᓕᐅᕐᓂᖏᑎᒍᑦ, ᐊᑭᑐᓗᐊᙱᑦᑐᓂᒃ ᐃᒡᓗᖃᕐᓂᕐᒧᑦ ᐋᖅᑭᒍᑎᓕᐅᖅᑐᑦ ᐃᓄᐃᑦ ᑭᙴᒪᒋᔭᖏᑦ ᒪᓕᑦᑐᒋᑦ, ᐊᒻᒪᓗ ᓴᙵᑦᑎᑦᑐᒋᑦ ᓄᓇᓕᕗᑦ.”
ᓄᓇᕗᑦ ᑐᙵᕕᒃ ᑎᒥᖓᑕ ᐃᓄᖕᓂᒃ ᒪᑭᑉᐸᓪᓕᐊᑎᑦᑎᓂᖅ 2025-2029 ᓯᕗᓪᓕᐅᑎᓐᓇᓱᐊᖅᑕᖏᑦ ᐅᖃᐅᓯᖃᓗᐊᕐᒪᑕ ᐃᓄᐃᑦ ᓯᕗᓕᖅᑎᐅᔭᕆᐊᖃᕐᒪᑕ ᐊᒻᒪᓗ ᐃᓚᐅᖃᑕᐅᖏᓐᓇᕐᓗᑎᑦ ᐋᖅᑮᑎᓪᓗᑕ ᓯᕗᓂᒃᓴᑦᑎᓐᓂ. ᐃᒡᓗᓕᕆᓂᕐᒧᓪᓕ ᐱᔾᔪᑎᖃᖅᑎᓪᓗᑕ, ᑕᒪᓐᓇ ᑐᑭᓕᒃ ᐋᖅᑮᓗᑎᑦ ᐊᒻᒪᓗ ᐱᕙᓪᓕᐊᑎᑦᑎᓗᑎᑦ ᓄᓇᓕᓐᓂ ᐊᔾᔨᖃᐅᖅᑐᓂᒃ ᐃᓄᐃᑦ ᐃᓕᖅᑯᓯᖏᓐᓂᒃ, ᐱᒻᒪᕆᒋᔭᖏᓐᓂᒃ, ᐊᒻᒪᓗ ᐃᓅᓯᖏᓐᓂᒃ.
ᐃᓄᖕᓂᒃ ᒪᑭᑉᐸᓪᓕᐊᑎᑦᑎᓂᖅ ᑕᐅᑐᙳᐊᒐᖃᕐᒪᑦ ᐊᑐᖅᑕᐅᖁᔭᐅᓛᖅᑐᓂᑦ ᐃᓅᓯᕐᒥᒃ “ᐃᓄᐃᑦ ᓄᓇᓕᖏᑦ ᐱᕈᖅᐸᓪᓕᐊᔪᑯᓘᓗᑎᑦ ᐊᒻᒪᓗ ᐊᔪᙱᑦᑐᒡᒍᑏᑦ ᐃᓄᐃᑦ ᐅᐸᓗᖓᐃᖅᓯᒪᓗᑎᑦ ᐃᖅᑲᓇᐃᔭᕐᓂᕐᒧᑦ,” ᐊᒻᒪᓗ ᐋᖅᑭᑦᑕᐅᓂᖓ ᐃᒡᓗᕗᑦ ᐊᒻᒪᓗ ᐃᓄᐃᑦ ᐃᒡᓗᓕᐅᖅᑕᐅᓂᖏᖕᓄᑦ ᑮᓇᐅᔭᖃᕐᕕᖓ, ᓄᓇᕗᑦ ᑐᙵᕕᒃ ᑎᒥᖓ ᐊᒻᒪᓗ ᐊᕕᑦᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᑦ ᓯᕗᒧᐊᒃᐸᓪᓕᐊᔪᑦ ᐊᒥᓱᕈᕆᐊᖁᓪᓗᒋᑦ ᐃᓄᐃᑦ ᐱᕕᖃᑦᓯᐊᕐᓂᖏᑦ ᐃᖅᑲᓇᐃᔭᕈᓐᓇᖅᑐᑦ, ᐱᓕᒻᒪᒃᓴᖃᑦᑕᕐᓗᑎᑦ, ᐊᒻᒪᓗ ᓴᓇᔨᐅᒋᐅᖅᓴᓕᕐᓗᑎᑦ ᐃᖅᑲᓇᐃᔭᖅᓯᓐᓈᑦ ᐃᒡᓗᓕᕆᓂᕐᒥᒃ.
-30-
ᐱᕙᓪᓕᐊᔪᓕᕆᔨᒃᑯᑦ ᖃᐅᔨᒋᐊᕈᓐᓇᖅᑐᑦ:
ᐃᕙᓗᐊᕐᔪᒃ ᒥᐅᕆᑦ
ᑐᑭᒧᐊᑦᑎᑦᑎᔨ ᑐᓴᐅᒪᑎᑦᑎᓂᕐᒧᑦ
ᓄᓇᕗᑦ ᑐᙵᕕᒃ ᑎᒥᖓ
