(Kangirhiniq, Nunavut — October 23, 2025) Ublumi, Nunavut Tunngavik katimayiit tohaktitiyot angiyomik apluktamingnik ihuaghaotikhanik haffuma Angirratsaliulauqta angmaktigamitku una Igluvut Timingat.
Angirratsaliulauqta, Una hivulikpanguyok Nunavumi Inuit Iglulikinikut Havaghanik Parnaiyaotat, hannayaohimayok Inuinaknit, iglughaitnik Inuit, hivuliotiyumayait anigakvighait hapkua Inniknigit, aknait nuttakatlo kimavighait ningaktuniit, inolgamiit ayoghaktot, ihoaghagomavlutjuktaok ihagiagiyaoyot akikitkiyanik iglughaitnik hapkua Inuinait havaktot kinniktot nayogaaktaghamingnik iglunik pitjutaongitunik havamingnut uvalunin iglulikiyiitkunut.
“Ihomagiyavut ihuaghaklugo tahamna iglulikinik tahamani Nunavumi tugaaklugo Inuinaknun,” ukkalaktok NTI-kut Angayokangat Jeremy Tunraluk. “Kovianakpiaktok tautokhugu tahamna ihomagiyavut Inuit iglutakutikhaitnik Nunavumi hivumuvalialikmat ihuaghaktaohimaghuni tatvuna Igluvut, tatvalu tatvuna Inuit Iglulikinikut Manighagiyaitnit.”
Igluvut Timingat Inuinait hivuliktat maniliokutikangitot iglulioknikut timioyot havaginiaktat tahamna igluliokutikhanik Nunavutmiut Inuinait iglukhaitnik. Ataniktokaoyut Katimayiitnit tahapkua malguyok NTI-kunit, ataohik tamaitnit hapkua Aviktoghimayoni Inuit Katuyikatigitkunit (RIA-kut), Igluvut Timingat havakakniaktot hatkikhikataklotik akikitkiyanik akiliktoktaolutik iglukhanik, tatvalu ikkayoklogit hapkua igluut ilingaiyaotikhaitnik nanminikagomayot iglughamingnik hapkua Nunavumiut.
Tahamna Inuit Iglulikinikut Manighagiyaoyot, ihuaghaktaohimayok August 2025-mi hatkitjutikakhutik $135 million tallanik,ikkayotaoniaktot ukkua Igluvut havagiyaghaitnik tatvalu pitjutaoluni akikitkiyanik attogakhat iglut akiliktotikhaitnik. Una manighagiyaoyok illaliotivlugo $63 million tallat tatvanga uttiktitaoyagiakaktot Nunavumi Angikutat Aivatjutaita Attokiotaitnit, tatvalutaok una $72 million tallat tatvanga Manighaghaitnit 2022-mi iglulikinikut manighagiyaoyonit ikkayotaongmata iglulikinikut.
“Pimagioyok kanganguktok havagiyaoliktok, ikkayokatigikhutik, tatvalu kiotiakutikhaitlo tahapkua ihagiagiyaongmata iglulikinikut Nunavumi naunaitiakhimayagiakakmat Inuit hivuliotiyagiakaktitlogit tatvalu piyomayaitnik,” ukaktok una NTI=kut Toglia Angatokap Paul Irngaut. “Tahamna Inuit ataniktotat havagiyaoyok, Ihuaghaivlutik akikitkiyanik igluliokutikhanik hatkitinahuakhugit Inuit ihagiagiyait, tatvalu hakkugikhivaliotikhaitnik nunaliitni.”
NTI-kut Inungnik Makipalliatittiniq 2025 akungani 2029 hivuliotihimayat tatva Inuit hivuligiakaktot tatvalu pikataotiagiakaktot hatikitjutihanik hivunighaptingni. Pitjutigivlugu tahamna iglulikinik, tahapkua pitjutaoyot titigaoyaknik hannatjutikhanik ihuaghailutik nunaliitni atokhimagiangita Inuit iliitkuhiit, pikuhitokait, innuhigiyaitlo.
Inungnik Makipalliatittiniq ihomagiyaoyok “Pivaliotikhaitnik Inuit Nunaliitni tatvalu ilihatiakhimayonik Inuinaknik Havainagialakiyonik,” Ihuaghaktaongmatlo una Igluvut unalo Inuit Iglulikinikut Manigagiyaoyok, NTI-kut tatvalu hapkua Inuit Katuyikatigit hivumuvaliayot pivaliotikhaitnik Inuit havaghanik, ilihautikhanik, tatvalu havagiyomayamingnik ilihakhimaakutikhanik iglulioknikut.
-30-
Pivalialikiyiit Tohakvikhaat:
Ivaluarjuk Merritt
Ataniat Tohaktitilikiyiit
Nunavut Tunngavik Timingat
