ᓄᓇᕗᑦ ᑐᙵᕕᒃᑯᑦ ᐊᖏᔪᖅᑳᖓ ᑳᑎ ᑕᐅᑐᙱ ᐅᑉᓗᒥ ᐅᖃᖅᑲᐅᔪᑦ ᓄᑖᒡᒍᖅ ᐊᕙᑎᓕᕆᔨᒃᑯᑦ ᑲᓇᑕᒥ ᖃᐅᔨᓴᕈᑕᐅᓯᒪᔪᓂᒃ ᓇᓗᓇᐃᕆᓚᐅᕐᐳᑦ ᑭᕙᓪᓕᐅᑉ ᐃᒪᖓᓂ ᓇᓄᐃᑦ ᓄᖑᒃᐸᓪᓕᐊᓂᕋᖅᑕᐅᓇᑎᒃ. ᑕᐅᑐᙱ ᐅᖃᓚᐅᖅᑐᖅ ᑲᑎᒪᔭᕇᖅᑎᓪᓗᒋᑦ ᑲᖏᖅᖠᓂᕐᒥ ᓄᓇᕗᖕᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ, ᑲᑎᒪᑎᓪᓗᒋᑦ ᐅᓂᒃᑳᕐᕕᐅᓚᐅᕐᒪᑕ ᐅᑯᓄᖓ ᐊᕙᑎᓕᕆᔨᒃᑯᑦ ᑲᓇᑕᒥ ᐱᔾᔪᑎᒋᓪᓗᒋᑦ ᓇᓄᐃᑦ ᐅᓄᕐᓂᖏᑦ ᑭᕙᓪᓕᕐᒥ. ᒪᓐᓇᕐᓂᓴᐅᓂᖅᐹᑦ ᖃᐅᔨᓴᖅᑎᓄᑦ ᖃᐅᔨᓴᕈᑎᒥᓃᑦ ᖃᐅᔨᓇᕐᓯᒍᑎᐅᓯᒪᒻᒪᑕ ᓇᓄᐃᑦ ᓄᖑᒃᐸᓪᓕᐊᓯᒪᙱᓐᓂᖏᓐᓂᒃ ᐅᑭᐅᓂ ᖁᓕᓂ ᐊᓂᒍᖅᑐᓂ. ᓄᓇᕗᑦ ᒐᕙᒪᒃᑯᑦᑕᐅᖅ ᐅᓂᒃᑳᓚᐅᕆᓪᓗᑎᒃ ᑎᖕᒥᓲᒃᑯᑦ ᖃᐅᔨᓴᕈᑎᒥᓂᕐᒥᓂᒃ ᖃᐅᔨᓇᕐᓯᒍᑕᐅᓚᐅᕐᑐᓂᓪᓗ ᓇᓄᐃᑦ ᐅᓄᕐᓂᖏᑦ ᖃᓂᒋᔭᖓᓃᓐᓇᓱᒋᔭᐅᓪᓗᑎᒃ 1,030 ᓇᓄᐃᑦ.
“ᑭᕙᓪᓕᕐᒥ ᓇᓄᐃᑦ ᐅᓄᕐᓂᖏᑦ ᓄᖑᓛᓐᓂᐊᕐᓂᕋᖅᑕᐅᖃᑦᑕᕐᓯᒪᒻᒪᑕ ᓯᓚᐅᑉ ᐆᒃᑯᓯᕙᓪᓕᐊᓂᖓᓂᒃ ᐱᔾᔪᑎᖃᓐᓂᕋᖅᑕᐅᓪᓗᑎᒃ. ᓇᓪᓕᒍᓱᒃᑏᑦ ᐊᑐᕋᓱᖃᑦᑕᕐᓯᒪᒻᒪᑕ ᑭᕙᓪᓕᕐᒥ ᓇᓄᕐᓂᒃ ᖃᓄᕈᓗᔮᓗᒃ ᐊᑦᑐᐃᓂᖃᕈᑕᐅᔪᓂᒃ ᐅᑭᐅᖅᑕᕐᑐᒥ ᐊᒻᒪ ᑕᒪᐃᓐᓂᒃ ᐆᒪᔪᓂᒃ, ᑭᓯᐊᓂᓕ ᖃᐅᔨᓴᕈᑎᑎᒍᑦ ᖃᐅᔨᓇᕐᓯᓯᒪᕗᖅ ᓇᓄᐃᑦ ᓄᖑᑉᐸᓪᓕᐊᓂᖃᖅᓯᒪᙱᒻᒪᑕ,” ᐅᖃᓚᐅᖅᑐᖅ ᑕᐅᑐᙱ. “ᑖᒪᓐᓇ ᓇᓗᓇᐃᕈᑕᐅᕗᖅ ᐃᓄᐃᑦ ᐅᖃᐅᓯᕆᖃᑦᑕᕐᓯᒪᔭᖏᓐᓄᒃ. ᓇᓄᐃᑦ ᐅᓄᕐᓂᖏᓐᓂᒃ ᐅᓄᕈᓐᓃᐸᓪᓕᐊᓂᕋᐃᔪ ᑕᒻᒪᕐᓯᒪᒻᒪᑕ, ᐊᒻᒪᓗ ᑕᒪᓐᓇ ᐊᑦᑐᐃᓂᖃᖅᓯᒪᓪᓗᓂ ᐃᓄᖕᓂᒃ ᐊᒻᒪ ᐱᖁᑎᖏᓐᓂᒃ.”
ᑕᐅᑐᙱ ᐅᖃᓚᐅᕐᑐᖅ ᐊᕐᕕᐊᕐᒥᐅᑦ, ᐃᒡᓗᓕᒑᕐᔪᖕᒥᐅᑦ ᐊᒻᒪ ᑎᑭᕋᕐᔪᐊᕐᒥᐅᑦ ᐅᖃᖃᑦᑕᕐᓯᒪᒻᒪᑕ ᓇᓄᐃᑦ ᐅᓄᕐᓯᕙᓪᓕᐊᓂᕋᖅᑕᐅᓪᓗᑎᒃ ᓄᓇᒥᓐᓂ, ᓄᓇᒥᑕᓘᓐᓃᑦ ᖃᓂᒋᔮᓂ, ᐊᒻᒪᓗ ᐅᖃᖃᑦᑕᕐᓯᒪᔪᑦ ᐊᒥᓱᐊᕐᑎᖅᖢᑎᒃ ᐃᓄᖕᓄᑦ ᐊᑦᑕᓇᕐᓂᕋᖅᑕᐅᓪᓗᑎᒃ. ᑕᐃᒪᓕ ᓄᓇᓕᖕᓂ ᐆᒪᔪᓕᕆᔨᒃᑯᑦ ᑲᑎᒪᔨᖏᑦ ᑖᒃᑯᓇᓂ ᓄᓇᓕᖕᓂ ᐱᖓᓱᐃᓂ ᑭᕙᓪᓕᕐᒥ ᓄᓇᕗᖕᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓄᑦ ᐅᓄᖅᓯᒋᐊᖁᔨᓯᒪᓕᖅᐳᑦ ᓇᓐᓄᒍᓐᓇᕐᑕᒥᓐᓂ ᐊᑦᑕᓇᙱᓂᕐᓴᒥᖁᓪᓗᒋᑦ ᓄᓇᖅᑲᑎᖏᑦ ᓄᓇᒥᓐᓂ.
ᓄᓇᕗᖕᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐃᓱᒪᒃᓴᕐᓯᐅᕈᑎᖃᓐᓂᐊᖅᐳᑦ ᓄᓇᓕᖕᓂ ᐆᒪᔪᓕᕆᔨᒃᑯᑦ ᑐᒃᓯᕋᕈᑎᒋᓯᒪᔭᖏᓐᓂᒃ ᐊᒻᒪ ᐃᓱᒪᓕᐅᕈᑎᒥᓂᒃ ᑐᓂᓯᔪᒫᕐᑐᑎᒃ ᓄᓇᕘᒥ ᒐᕙᒪᒃᑯᑦ ᐊᕙᑎᓕᕆᔨᒃᑯᑦ ᒥᓂᔅᑕᖓᓐᓄᑦ.
