ᑲᑐᑎᔭᑦ ᐅᖃᐅᓯᒃᓴᖏᑦ
(ᐋᒡᒌᓯ 13, 2025 – ᓅᒃ, ᑲᓛᑦᖡᑦ ᓄᓇᖓ) ᑕᐃᑲᓂ ᐋᒡᒌᓯ 2, 2025, ᒐᕙᒪᒃᑯᖏᑦ ᑲᓛᑦᖡᑦ, ᓄᓇᕗᑦ ᒐᕙᒪᒃᑯᑦ, ᓄᓇᕗᑦ ᑐᙵᕕᒃ ᑎᒥᖓ, ᐊᒻᒪᓗ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᓅᒃᒥ ᑲᑎᒪᓚᐅᖅᑐᑦ ᑎᒥᖑᖅᑎᑕᐅᓪᓗᑎᒃ ᑖᒃᑯᐊ ᑲᓛᑦᖡᑦ ᓄᓇᖓᑕ-ᓄᓇᕗᑦ ᐃᖃᓗᒐᓱᒃᑎᑦ ᑲᑎᒪᔨᕋᓛᑦ, ᑕᐃᒪᓐᓇᐅᔭᕆᐅᑦᑎᐊᖅᑐᑦ ᐃᒻᒪᑲᓪᓚᓂᑦ ᐅᑭᐅᖅᑕᖅᑐᒥ ᐃᖃᓗᒐᓱᒃᑎᓂᒃ ᑯᐊᐳᕆᓴᖃᕆᐅᖅᖢᑎᒃ.
ᓴᖖᒋᒃᑎᒋᐊᕐᓗᒍ ᐅᑭᐅᖅᑕᖅᑐᒥ ᐱᓕᕆᖃᑎᒌᖕᓂᖅ
ᐅᑯᐊ ᑲᑎᒪᔨᕋᓛᑦ ᓴᕿᑦᑎᓚᐅᖅᐳᑦ ᖃᓄᐃᓕᐅᕈᑎᒃᓴᓂᒃ ᑲᔪᓯᓂᐊᕐᒪᑕ ᑐᑭᓯᓇᓱᖃᑎᒌᖃᑦᑕᕐᓗᑎᒃ ᐊᕙᑖᓂᑦ ᑲᓛᑦᖡᑦ ᐊᒻᒪᓗ ᓄᓇᕗᑦ. ᑭᒡᒐᖅᑐᖅᑎᑦ ᑕᒪᐃᓐᓂᑦ ᑎᓴᒪᓂᑦ ᐊᐅᓚᑦᓯᔨᓂᑦ ᑐᓴᖅᑎᑦᑎᓚᐅᖅᑐᑦ ᑕᒪᐃᓐᓂᒃ ᑕᑯᔪᒪᔭᒥᖕᓂᒃ ᐊᑐᓂ ᐃᖃᓗᒐᓱᒃᑎᑦ ᐱᓇᓱᐊᕐᓂᖏᑦ, ᓴᕿᑕᐅᓚᐅᖅᑐᑦ ᑕᒪᕐᒥᒃ ᐱᔭᕐᓂᓐᖏᑦᑐᑦ ᐊᒻᒪᓗ ᐱᕕᖃᖅᑎᑦᑎᔪᑦ ᐃᖃᓗᒐᓱᖕᓂᕐᒥ ᐊᒻᒪᓗ ᐃᖃᓗᒐᓱᖕᓂᕐᒧᑦ ᐊᑑᑎᖃᖅᑐᑦ.
ᐱᔭᕇᖅᑕᐅᑦᑎᐊᓚᐅᖅᑐᑦ
ᒪᓕᒃᑕᐅᒋᐊᓕᑦ ᐱᓕᕆᖃᑎᒌᖕᓂᕐᒧᑦ ᐊᖏᖅᑕᐅᔪᑦ: ᐅᑯᐊ ᑲᑎᒪᔨᕋᓛᑦ ᐱᔭᕇᖅᓯᓚᐅᖅᑐᑦ ᐊᒻᒪᓗ ᐊᖏᖅᓯᓪᓗᑎᒃ ᒪᓕᒋᐊᖃᖅᑐᓂᒃ ᐱᓕᕆᖃᑎᒌᖕᓂᕐᒧᑦ ᐅᑯᐊ ᑐᑭᒧᐊᒍᑎᒋᓂᐊᖅᑐᑦ ᓯᕗᓂᒃᓴᑦᑎᓐᓂᒃ ᑐᑭᓯᓇᓱᖃᑎᒌᖃᑦᑕᕐᓂᕐᒧᑦ ᐊᒻᒪᓗ ᐃᓱᒪᓕᐅᕆᓂᕐᒧᑦ.
ᐃᑲᔪᖅᑎᒌᒍᑎᒃᓴᑦ ᓇᓗᓇᐃᖅᑕᐅᓪᓗᑎᒃ: ᐃᓚᐅᔪᑦ ᓇᓗᓇᐃᖅᓯᓚᐅᖅᑐᑦ ᐊᒥᓱᓂᒃ ᓯᕗᓪᓕᐅᑎᒋᐊᓕᖕᓂᒃ ᑲᑐᔾᔨᓗᑎᒃ ᐃᑲᔪᖅᑎᒌᒍᑎᒃᓴᓂᒃ, ᐃᓚᒋᔭᐅᔪᑦ ᖃᐅᔨᒪᔭᒥᖕᓂᒃ ᑐᓴᖅᑎᑦᑎᖃᑎᒌᖃᑦᑕᕐᓗᑎᒃ, ᐃᖃᓗᒐᓱᒃᑕᐅᔪᓐᓇᖅᑐᓂᒃ ᐱᕙᓪᓕᐊᑎᑦᑎᓗᑎᒃ, ᖃᐅᔨᓴᕐᓗᑎᒃ ᐊᒻᒪᓗ ᒥᐊᓂᕆᓗᑎᒃ ᐊᒻᒪᓗ ᓄᑖᑎᒍᑦ ᐱᓕᕆᔾᔪᑕᐅᓕᖅᑐᑎᒍᑦ ᐊᒻᒪᓗ ᑕᐅᖅᓰᓂᕐᒧᑦ ᐱᕕᖃᖅᑎᑦᑎᓂᖅ. ᐅᑯᐊ ᐃᑲᓗᒐᓱᖕᓂᕐᒧᑦ ᑲᑎᒪᔨᕌᑦ ᓴᕿᑦᑎᓂᐊᕐᒥᔪᑦ ᐱᓕᕆᑎᑦᑎᔾᔪᑎᒃᓴᓂᒃ ᑐᓴᐅᒪᖃᑎᒌᒍᑎᒃᓴᓂᒃ ᐊᐅᓚᑦᓯᔨᖏᓐᓄᑦ.
ᐊᖏᖅᓯᒪᔪᑦ ᓄᖑᑕᐅᕙᓪᓕᐊᓐᖏᑦᑐᓂᒃ ᐃᖃᓗᒐᓱᖕᓂᕐᒧᑦ
ᑕᒪᕐᒥᒃ ᐱᓕᕆᖃᑎᒌᑦ ᐊᖏᖅᓯᒪᕗᑦ ᓄᖑᑕᐅᕙᓪᓕᐊᓐᖏᑦᑐᓂᒃ ᐃᖃᓗᒐᓱᒡᓗᑎᒃ ᐊᐅᓚᑦᑎᓗᑎᒃ ᐅᑯᐊ ᐃᒃᐱᒋᑦᑎᐊᕐᓗᒋᑦ ᐃᓄᐃᑦ ᐱᔪᓐᓇᐅᑎᖏᑦ, ᓄᓇᓕᖕᓂ ᐊᒻᒪᓗ ᐃᓄᐃᑦ ᖃᐅᔨᒪᔭᖏᑦ, ᐊᒻᒪᓗ ᐊᕙᑎᑦᑎᓂᒃ ᐸᕿᑦᑎᐊᕐᓂᖅ. ᑲᑎᒪᔨᕋᓛᑦ ᐅᖃᓚᐅᖅᑐᑦ ᐱᒻᒪᕆᐅᓂᖓᓂ ᓇᓕᖃᕇᓕᖅᓯᒪᓗᒋᑦ ᒪᑭᒪᓇᓱᐊᕈᑎᑦ ᑮᓇᐅᔭᓕᐅᕈᑕᐅᔪᓐᓇᖅᑐᑦ ᓴᐳᒻᒥᓂᕐᒧᑦ ᐱᔭᒃᓴᑎᒃ ᐅᑭᐅᖅᑕᖅᑐᖅ ᐃᒪᖏᓐᓂ.
ᓯᕗᒧᑉᐸᓪᓕᐊᓂᖅ
ᑲᑎᒪᔨᕋᓛᑦ ᓴᕿᑦᑎᓚᐅᖅᑐᑦ ᑐᑭᓯᓇᑦᑎᐊᖅᑐᒥᒃ ᐅᓂᒃᑳᓕᐅᕈᓯᕐᒥᒃ ᐊᒻᒪᓗ ᖃᖓᒃᑯᑦ ᑐᑭᓯᓇᓱᖃᑎᒌᖃᑦᑕᕐᓂᐊᕐᒪᖔᑕ. ᐅᓇ ᑎᒥᖑᐃᓂᖅ ᑲᑎᒪᓂᖅ ᑭᒡᒐᖅᑐᐃᔪᖅ ᐊᖏᔪᒥᒃ ᐱᒋᐊᕈᑎᒃᓴᓄᑦ ᓯᕗᒻᒧᑦ ᐅᑭᐅᖅᑕᖅᑐᒥ ᐃᑲᔪᖅᑎᒌᖕᓂᕐᒥᒃ, ᑲᑎᖓᑎᑦᑎᕗᑦ ᑲᓛᑦᖡᑦ ᐊᒻᒪᓗ ᓄᓇᕗᑦ ᖃᐅᔨᒪᑦᑎᐊᖅᑐᒥᒃ ᐱᓕᕆᐊᕆᓗᒋᑦ ᑕᒪᐃᓐᓂᑦ ᐃᖃᓗᒐᓱᒃᑕᐅᕙᒃᑐᓂᒃ ᐱᔭᕐᓂᓐᖏᑦᑐᓂᒃ ᐊᒻᒪᓗ ᐱᕕᖃᖅᑎᑦᑎᔪᓂᒃ ᐊᓯᖑᖅᐸᓪᓕᐊᖏᓐᓇᖅᑐᒥ ᐅᑭᐅᖅᑕᖅᑐᑦᑎᓐᓂ ᐊᕙᑎᖓᓂᒃ.
-30-
ᑐᓴᒐᒃᓴᓕᕆᔨᒃᑯᓂᑦ ᐅᖃᕐᕕᐅᔪᓐᓇᖅᑐᑦ:
ᐃᕙᓗᐊᕐᔪᒃ ᒥᐅᓕᑦ
ᑐᑭᒧᐊᒃᑎᖓ ᑐᓴᐅᑎᓕᕆᔨᒃᑯᑦ
ᓄᓇᕗᑦ ᑐᙵᕕᒃ ᑎᒥᖓ
ᑕᓂᓴ ᐳᑎᓐ
ᐊᐅᓚᑦᓯᔨᖓ ᑐᓴᒐᒃᓴᓕᕆᔨᒃᑯᑦ
ᐊᐅᓚᑦᓯᕕᖓ ᓄᓇᓕᖕᓂ ᐱᔨᑦᑎᕋᖅᑎᒃᑯᑦ
ᓄᓇᕗᑦ ᒐᕙᒪᒃᑯᑦ
ᑲᑕᕆ ᑲᐃᒑᑦ
ᐊᖓᔪᖅᑳᖃᕐᕕᖓᑦ
ᒥᓂᔅᑕᖓ ᐃᖃᓗᒐᓱᒃᑎᑦ, ᐊᖑᓇᓱᒃᑎᑦ, ᐱᕈᖅᑐᑦ ᓂᕿᒃᓴᑦ, ᐊᒻᒪᓗ ᐃᒻᒥᒍᑦ-ᓂᕿᖃᖅᑎᑦᑎᓂᖅ
ᑲᓛᑦᖡᑦ ᒐᕙᒪᒃᑯᑦ
ᑭᐅᕋᓐ ᐱᓕᐅᕆᑎ
ᑐᑭᒧᐊᒃᑎᖓ, ᐸᕐᓇᐃᓂᖅ ᑐᓴᐅᑎᓕᕆᔨᒃᑯᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
(867) 975-8398
