ᓴᒃᑯᑕᐅᑲᐅᑎᒋᔭᕆᐊᓕᒃ
(ᐊᒃᑑᕝᕙ 31, 2024 — ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓ ᐃᓱᒫᓗᒍᑎᖃᓪᓚᕆᑦᑐᑦ ᓄᓇᕗᑦ ᒐᕙᒪᖏᑦ ᖁᔭᓈᖅᓯᒐᓱᐊᖏᓐᓇᕐᓂᖏᖕᓂᒃ ᐃᓄᒃᑐᑦ ᐊᑐᕐᓗᑎᑦ ᐃᓕᓐᓂᐊᖅᑎᑦᑎᑦᑕᐃᓕᒪᓪᓗᑎᑦ ᓇᓕᒧᒌᑎᑦᑎᙱᖦᖢᑎᑦ ᐃᖅᑲᖅᑐᐃᕕᒻᒨᖅᑎᑦᑎᓂᕆᓯᒪᔭᑦᑎᓐᓂᒃ ᓄᖅᑲᖅᑎᑦᑎᓇᓱᐊᖅᑐᑎᑦ ᐃᖅᑲᖅᑐᐃᕕᒃᑯᑎᒎᖅᑎᑦᑎᑦᑕᐃᓕᒪᔪᑦ. ᓄᓇᕗᑦ ᒐᕙᒪᖏᑦ ᐊᔪᐃᓐᓈᕆᐊᕈᑎᒥᒃ ᖁᔭᓈᖅᓯᑎᑦᑎᒐᓱᐊᖅᑐᑦ ᐋᒡᒌᓯ 28, 2024 ᓄᓇᕗᑦ ᐊᔪᐃᓐᓈᕆᐊᕐᕕᒃᑯᑦ ᐃᖅᑲᖅᑐᐃᕕᖓᓐᓂ ᐃᓱᒪᓕᐅᕈᑕᐅᓚᐅᖅᓯᒪᔪᒥᒃ, ᐃᖅᑲᖅᑐᐃᕕᒻᒨᖅᑎᑦᑎᓂᕆᓯᒪᔭᕗᑦ ᑲᔪᓯᑎᑕᐅᒍᓐᓇᓕᓚᐅᖅᓯᒪᓪᓗᓂ, ᑲᓇᑕᒥ ᐊᔪᐃᓐᓈᕆᐊᕐᕕᒃ ᐃᖅᑲᖅᑐᐃᕕᖓᖕᓄᑦ (SCC).
ᐃᓄᒻᒪᕇᑦ ᐊᓯᐅᔨᓕᕐᒪᑕ ᐅᖃᐅᓯᑦᑎᓐᓂ ᖁᐊᖅᓵᕐᓇᒻᒪᕆᑦᑐᒃᑯᑦ ᓱᑲᑦᑐᒥᒃ. ᐃᖅᑲᖅᑐᐃᕕᒻᒨᖅᑎᑕᐅᓯᒪᔪᖅ, ᓄᓇᕗᑦ ᑐᙵᕕᒃ ᑎᒥᖓ ᓄᓇᕗᑦ ᒐᕙᒪᒃᑯᓐᓂ ᐃᓄᓐᓂᒃ ᑭᒃᑯᑐᐃᓐᓇᕐᓂᒃ ᐃᓕᓐᓂᐊᖅᑎᑦᑎᑦᑕᐃᓕᒪᓂᖏᑦ ᐃᓄᒃᑑᕐᓗᑎᑦ (ᐅᓪᓗᒥᐅᔪᖅ ᖃᓪᓗᓈᑎᑐᑐᐃᓐᓇᖅ ᐅᐃᕖᑎᑐᓪᓘᓐᓃᑦ ᐃᓕᓐᓂᐊᖅᑎᑦᑎᓲᑦ ᖁᑦᑎᓐᓂᓕᒃ 3 ᐅᖓᑖᓂ ᐃᓕᓐᓂᐊᓕᕋᐃᒻᒪᑕ, ᑕᐃᒪᐃᖃᑦᑕᕈᑎᑦ) ᓇᓕᒧᒌᑎᑦᑎᙱᑦᑐᑦ ᐃᓄᒻᒪᕆᖕᓂᒃ ᐊᒻᒪᓗ ᓯᖁᒥᑦᑎᔪᑦ ᑲᓇᑕᒥ ᐱᔪᓐᓇᐅᑏᑦ ᐊᒻᒪᓗ ᐃᓱᒪᖅᓲᑏᓪᓗ (ᐱᖁᔭᕐᔪᐊᕐᒥᒃ). ᐱᖁᔭᕐᔪᐊᖅ ᑲᓇᑕᒥ ᐱᔪᓐᓇᐅᑎᖃᖅᑎᑦᑎᔪᖅ ᑲᓇᑕᒥᐅᑕᕐᓂᒃ ᐊᒻᒪᓗ ᓇᓕᒧᒌᙱᑦᑐᒃᑯᑦ ᖃᓄᐃᓕᐅᖅᑕᐃᓕᑎᑦᑎᔪᖅ ᑐᙵᕕᒋᔭᐅᓪᓗᑎᑦ ᐅᕕᓂᖏᑦᑕ ᐊᒥᐊᖏᑦ ᐊᒻᒪᓗ ᖃᓄᐃᑦᑑᓂᖏᑦ ᐃᓅᑎᓪᓗᒋᑦ.
ᐊᕐᕌᒎᓕᖅᑐᓄᑦ ᐊᒥᓱᓄᑦ, ᓄᓇᕗᑦ ᒐᕙᒪᖏᑦ ᐅᖓᕙᕆᐊᖅᑎᑦᑏᓐᓇᐅᔭᐃᓐᓇᖅᓯᒪᔪᑦ ᐃᖅᑲᖅᑐᐃᕕᒻᒨᖅᑎᑦᑎᓯᒪᓂᕆᔭᑦᑎᓐᓂ ᖁᔭᓈᖅᑕᐅᒃᑲᐃᕋᓱᐊᖅᑐᑎᑦ ᐃᖅᑲᖅᑐᖅᑕᐅᓂᕆᖏᑦ. ᓄᓇᕗᑦ ᒐᕙᒪᖏᑦ ᐅᖃᖅᓯᒪᔪᑦ ᐱᖁᔭᕐᔪᐊᖅ ᓴᐳᔾᔨᓯᒪᙱᑦᑐᖅ ᐃᓄᒻᒪᕆᖕᓂᒃ ᓇᓕᒧᒌᑎᑕᐅᙱᔾᔪᑎᒥᒃ ᑕᒪᒃᑯᑎᒎᓇ. ᒪᕐᕈᐃᓕᖅᑲᖓᔫᒃ ᖁᑦᑎᓐᓂᓖᑦ ᐃᖅᑲᖅᑐᐃᕖᒃ ᐊᖏᕈᑎᖃᖅᓯᒪᙱᑦᑐᑦ ᓄᓇᕗᑦ ᒐᕙᒪᖏᖕᓂᒃ ᐊᒻᒪᓗ ᖃᓄᐃᓕᖓᓂᐊᕐᓂᕆᔭᓂ ᖁᔭᓈᖅᓯᓯᒪᔪᑦ ᐊᖏᕈᑎᖃᖅᖢᑎᑦ ᓄᓇᕗᑦ ᑐᙵᑯᒃ ᑎᒥᖓᓂᒃ ᐃᖅᑲᖅᑐᐃᔾᔪᑎᒋᔭᐅᔪᖅ ᑲᔪᓯᔭᕆᖃᐊᕐᓂᕋᐃᓪᓗᑎᑦ ᐃᖅᑲᖅᑐᖅᑕᐅᔾᔪᑎᒋᔭᐅᓗᓂ.
ᓇᒡᒐᔾᔭᐅᒥ, ᓄᓇᕗᑦ ᒐᕙᒪᖏᑦ ᐊᔪᐃᓐᓇᕆᐊᓚᐅᖅᑐᑦ ᑲᓇᑕᒥ ᐃᖅᑲᖅᑐᐃᕕᖓᓄᑦ ᐊᔪᐃᓐᓈᕆᐊᕐᕕᒻᒧᑦ ᐊᒻᒪᓗ ᑕᐃᒪᐃᒃᑲᓐᓂᓕᖅᖢᑎᑦ ᐃᖅᑲᖅᑐᐃᕕᒻᒨᕈᔾᔨᓯᒪᓂᑦᑎᓐᓂ ᖁᔭᓈᖅᑕᐅᒃᑲᐃᒐᓱᐊᖅᑐᑦ ᐃᖅᑲᖅᑐᖅᑕᐅᔾᔪᑕᐅᒍᓐᓃᕐᓗᓂ ᓇᓗᓇᐃᕈᑎᓂᑦ ᐊᐃᕙᐅᑎᒋᔭᑦᑎᓐᓂ. ᑲᓇᑕᒥ ᐊᔪᐃᓐᓈᕆᐊᕐᕕᒃ ᐃᖅᑲᖅᑐᐃᕕᕐᔪᐊᖓ ᖁᔭᓈᖅᓯᑎᑦᑎᔭᕆᐊᓕᒃ ᐊᔪᐃᓐᓈᕆᐊᕈᑎᒋᔭᐅᔪᒥᒃ ᐊᖏᓚᐅᙱᓐᓂᕐᒥᓂᒃ ᐅᕙᓘᓐᓃᑦ ᐋᒃᑳᓚᐅᙱᓐᓂᕐᒥᓂᒃ ᓈᓚᒡᓗᑎᑦ ᐊᔪᐃᓐᓈᕆᐊᕈᑎᒥᒃ. ᑲᓇᑕᒥ ᐊᔪᐃᓐᓈᕆᐊᕐᕕᒃ ᐃᖅᑲᖅᑐᐃᕕᕐᔪᐊᖓ ᖁᔭᓈᖅᓯᑎᑦᑎᔭᕆᐊᖃᕈᑎᑦ ᐊᔪᐃᓐᓈᕆᐊᕈᑎᒥᒃ, ᐊᓯᐊᒎᕐᕕᒃᓴᖃᒃᑲᓐᓂᕐᕕᒃᓴᖃᕋᔭᙱᑦᑐᖅ ᓄᓇᕗᑦ ᒐᕙᒪᖏᖕᓄᑦ − ᓄᓇᕗᑦ ᐃᖅᑲᖅᑐᐃᕕᖓ ᐊᔪᐃᓐᓈᕆᐊᕐᕕᒃ ᐃᓱᒪᓕᐊᕕᓂᖓ ᐊᓱᔾᔨᖅᑕᐅᒐᔭᙱᓚᖅ.
ᑕᐃᒪᐃᓚᐅᖅᑳᖅᑎᓐᓇᒋᑦ, ᐃᓄᒻᒪᕇᑦ ᓱᓕ ᐃᓄᒃᑐᑦ ᐅᖃᐅᓯᖃᖅᑐᒥᒃ ᐃᓕᓐᓂᐊᕈᓐᓇᙱᑦᑐᑦ, ᐊᓯᐅᔨᕙᓪᓕᐊᑎᑦᑎᓂᖃᖅᑐᖅ ᐃᓄᒃᑐᑦ ᐅᖃᐅᓯᕐᒥᒃ. ᐃᓄᒻᒪᕇᑦ ᐊᒃᓱᒻᒪᕆᐅᓗᒃ ᐱᐅᙱᑦᑐᒃᑰᖅᑎᑕᐅᓯᒪᔪᑦ ᓇᓕᒧᒌᙱᑦᑐᒃᑯᑦ ᑲᒪᒋᔭᐅᖃᑦᑕᖅᑐᕕᓂᐅᓂᖏᖕᓄᑦ ᐊᒻᒪᓗ ᐅᖃᐅᓯᖅ ᐊᓯᐅᔨᔭᐅᓪᓗᓂ ᐊᕝᕕᐊᕈᑎᖃᓕᖅᑎᑦᑎᓂᖃᓲᖑᖕᒪᑦ ᐃᓕᖅᑯᓯᕗᑦ ᐃᓕᓐᓂᐊᖅᑕᐅᒐᓱᐊᕐᓗᓂ, ᐊᒻᒪᓗ ᓇᓕᒧᒌᑦᑐᒃᑯᑦ ᐃᓕᓐᓂᐊᕈᓐᓇᕐᓂᖃᕐᓗᑕ ᐃᖅᑲᓇᐃᔭᕈᓐᓇᕐᓗᑕᓗ.
ᐊᖓᔪᖅᑳᖅ ᐊᓗᑭ ᑰᑦᑎᖅ ᐅᖃᖅᓯᒪᔪᖅ: “ᓄᓇᕗᑦ ᒐᕙᒪᖏᑦ ᐱᙳᖅᑎᑕᐅᓚᐅᖅᓯᒪᔪᑦ ᓄᓇᕗᑦ ᓄᓇᑖᕐᓂᕐᒧᑦ ᐊᖏᕈᑎᖓᒍᑦ ᐱᔨᑦᑎᕐᓂᐊᕐᓗᑎᑦ ᐊᒥᓲᓂᖅᓴᓂᒃ ᐃᓄᒻᒪᕇᑦ ᐃᓄᖁᑎᖏᖕᓂᒃ. ᑐᑭᓯᙱᑦᑎᐊᖅᑐᒍᑦ ᖃᓄᐃᓕᐅᖅᓯᒪᓂᖏᖕᓂᒃ, ᐊᒻᒪᓗ ᓄᓇᕗᑦ ᒐᕙᒪᖏᑦ ᑮᓇᐅᔭᖃᙱᓐᓂᕋᕋᓗᐊᖅᑎᓪᓗᒋᑦ, ᐊᑐᐃᓐᓇᖅᑐᑦ ᐊᑐᐃᓐᓇᐅᒪᔪᓂᑦ ᑮᓇᐅᔭᓂᑦ ᐅᖓᕙᕆᐊᖅᓯᓗᑎᑦ ᐃᖅᑲᖅᑐᐃᕕᒻᒨᕈᔾᔭᐅᓯᒪᓂᕐᒥᓄᑦ ᓄᓇᕗᑦ ᑐᙵᕕᒃ ᑎᒥᖓᓄᑦ, ᐃᓄᒻᒪᕇᑦ ᐃᓕᓐᓂᐊᖅᑏᑦ ᐃᓚᖏᓪᓗ, ᐊᐱᕆᓯᒪᑐᐃᓐᓇᖅᑐᑦ ᑲᒪᒋᔭᐅᓗᑎᑦ ᓇᓕᒧᒌᑦᑐᒃᑯᑦ.”
ᐱᕙᓪᓕᐊᔪᓕᕆᔨᒃᑯᑦ ᖃᐅᔨᒃᑲᐃᔪᓐᓇᖅᑐᑦ:
ᐃᕙᓗᐊᕐᔪᒃ ᒥᐅᕆᑦ
ᑐᑭᒧᐊᑦᑎᑦᑎᔨ ᑐᓴᐅᒪᑎᑦᑎᓂᕐᒧᑦ
ᓄᓇᕗᑦ ᑐᙵᕕᒃ ᑎᒥᖓ
