ᓴᒃᑯᑕᐅᑲᐅᑎᒋᔭᕆᐊᓕᒃ
(ᐄᐳᕈᓪ 24, 2025 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓ ᖁᕕᐊᓱᒃᑐᑦ ᑐᓴᖅᑎᑦᑎᔭᕆᐊᒃᓴᖅ ᑐᒃᓯᕋᐅᑎᓕᐅᖁᔨᔾᔪᑎᒥᓂᒃ ᐃᓄᒃᑐᑦ ᐃᓕᓐᓂᐊᖅᑎᑦᑎᓂᕐᒧᑦ ᖃᓄᖅᑑᕈᑎ ᑮᓇᐅᔭᖃᕐᕕᖃᓕᕐᒪᑕ, ᐱᓕᕆᐊᖅ ᐋᖅᑭᒃᓱᖅᑕᐅᓯᒪᔪᖅ ᓯᕗᒧᐊᑦᑎᑕᐅᖁᓪᓗᒍ ᐃᓄᐃᑦ ᐅᖃᐅᓯᖓ ᐊᒻᒪᓗ ᐃᓕᖅᑯᓯᖓ ᐃᓕᓐᓂᐊᖅᑎᑕᐅᓂᖓᓂᒃ ᓄᓇᕗᑦ ᐃᓕᓐᓂᐊᕐᓂᓕᕆᓂᖓᓂᒃ. ᑖᒃᑯᐊ ᑮᓇᐅᔭᑦ ᐱᒻᒪᕆᐅᔪᓂᒃ ᐱᕕᖃᖅᑎᑦᑎᔪᑦ ᐃᓄᓐᓂᒃ ᖃᓄᖅᑑᓕᖅᑎᑕᐅᖁᓪᓗᒋᑦ ᐊᒻᒪᓗ ᐱᕈᖅᐸᓪᓕᐊᖁᓪᓗᒋᑦ ᐊᐅᓚᑕᐅᓂᖓᓂᒃ ᐃᓕᓐᓂᐊᕐᓂᓕᕆᓂᑉ ᐃᓄᒃᑑᕐᓗᑎᑦ.
ᑮᓇᐅᔭᑦ ᐃᑲᔪᖅᑐᐃᓂᖃᕈᑕᐅᓇᓱᐊᖅᑐᖅ ᖃᐅᔨᓴᕐᓗᑎᑦ ᖃᓄᖅᑑᖅᓯᒪᔪᓂᒃ ᐃᓕᓐᓂᐊᖅᑎᑦᑎᒍᓯᕐᓂᒃ, ᐃᓕᓐᓂᐊᕈᑎᒃᓴᓂᒃ ᐋᖅᑭᒃᓱᐃᔪᖃᕐᓗᓂ, ᐊᒻᒪᓗ ᐱᐅᓛᕐᓂᒃ ᐊᑐᖅᑕᐅᕙᑦᑐᓂᒃ ᐃᓕᓐᓂᐊᖅᑎᑦᑎᓗᑎᑦ ᐃᓄᐃᑦ ᐅᖃᐅᓯᖓᓂᒃ ᐊᑐᕐᓗᑎᑦ ᐊᒻᒪᓗ ᐃᓕᖅᑯᓯᖓᓂᒃ, ᐱᖃᓯᐅᑎᓗᒋᑦ ᓯᕗᒧᐊᑦᑎᑕᐅᓂᖏᑦ ᐱᒻᒪᕆᐅᔪᑦ ᐃᑲᔫᑎᒃᓴᑦ, ᐃᓕᓴᐃᔩᑦ ᐃᓕᓐᓂᐊᖅᑎᑦᑎᒍᑎᖃᖅᑎᑕᐅᓗᑎᑦ, ᐃᓕᓐᓂᐊᕈᑎᒃᓴᓕᐅᕐᓗᑎᑦ ᐊᒻᒪᓗ ᐱᓕᕆᖃᑎᒌᒍᓐᓇᕐᓗᑎᑦ ᐃᑲᔪᖅᑐᖅᑕᐅᖁᓪᓗᒋᑦ ᐃᓄᐃᑦ ᐃᓕᓴᐃᔨᖏᑦ.
“ᑖᒃᑯᐊ ᑮᓇᐅᔭᑦ ᑭᒡᒐᖅᑐᐃᔪᑦ ᐱᓕᕆᐊᖃᐃᓐᓇᕐᓂᐊᕐᓂᕋᕐᓂᑦᑎᓐᓂᒃ ᖃᐅᔨᒪᑦᑎᐊᖅᑎᑦᑎᓗᑕ ᓯᕗᓂᒃᓴᒥ ᑭᖑᕚᕗᑦ ᐊᑑᑎᖃᑦᑎᐊᕐᓂᐊᕐᒪᑕ ᓄᓇᕐᔪᐊᕐᒥ ᐅᖃᐅᓯᑦᑎᓐᓂᒃ ᐃᓕᖅᑯᓯᒃᑎᓐᓂᓪᓗ ᑐᑦᑕᕐᕕᐅᓂᐊᕐᓗᑎᑦ ᑭᓇᐅᓂᑦᑎᓐᓂᒃ ᐊᒻᒪᓗ ᑲᔪᓯᓂᖃᕐᓂᐊᕐᓂᑦᑎᓐᓂᒃ,“ ᐅᖃᖅᖢᓂ ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓ ᔨᐅᓚᒥ ᑑᕐᖔᓗᒃ. “ᐃᑲᔪᖅᑐᐃᓪᓗᑕ ᖃᓄᖅᑑᖅᓯᒪᔪᓂᒃ ᐱᓕᕆᐊᕐᓂᒃ ᐊᒻᒪᓗ ᐃᓕᓴᐃᔩᑦ ᐃᓕᓐᓂᐊᕐᓂᖏᓐᓂᒃ, ᐱᓕᕆᐊᖃᕈᒪᓕᖅᑎᑦᑎᓂᖃᖅᑐᒍᑦ ᐃᓄᓐᓂᒃ ᐃᓕᓴᐃᔨᓂᒃ, ᖃᐅᔨᓴᖅᑎᓂᒃ, ᐊᒻᒪᓗ ᓄᓇᓕᓐᓂ ᓯᕗᓂᒃᓴᓕᐅᖁᓪᓗᒋᑦ ᐃᓄᒃᑐᑦ ᐃᓕᓐᓂᐊᕐᓂᕐᒥᒃ.”
ᐱᓇᓱᐊᖅᑐᑦ ᑐᓂᓯᔪᓐᓇᖅᑐᑦ ᑐᒃᓯᕋᐅᑎᒥᓂᒃ ᐊᑕᐅᓯᕐᒧᑦ ᐊᕐᕌᒍᒧᑦ ᐅᕝᕙᓘᓐᓃᑦ ᒪᕐᕉᓐᓄᒃ ᐊᕐᕌᒎᓐᓄᒃ ᐱᓕᕆᐊᕆᒐᔭᖅᑕᒥᓂᒃ. ᓄᓇᕗᑦ ᑐᙵᕕᒃ ᑎᒥᖓ ᐃᓱᒪᖅᓱᕐᓂᐊᖅᑐᑦ ᓇᓗᓇᐃᖅᓯᓗᑎᑦ ᐱᓕᕆᐊᕐᒥᒃ ᐱᓇᓱᒍᓐᓇᕋᔭᖅᑐᓂᒃ ᐊᒻᒪᓗ ᖃᑦᑎᓂᒃ ᑮᓇᐅᔭᓂᑦ ᑐᓂᓯᓗᑎᑦ.
ᑐᑭᓯᒋᐊᒃᑲᓐᓂᖁᓪᓗᑎᑦ ᐊᒻᒪᓗ ᑐᓂᓯᓗᑎᑦ ᑐᒃᓯᕋᐅᑎᓂᑦ, ᐱᓇᓱᐊᖅᑐᑦ ᑲᔪᖏᖅᓴᖅᑕᐅᕗᑦ ᐃᓕᑉᐹᓪᓕᕐᓗᑎᑦ ᑕᒪᒃᑯᓂᖓ ᐅᕙᓂ Inuktut Education Innovation Fund.
-30-
ᐱᕙᓪᓕᐊᔪᓕᕆᔨᒃᑯᓐᓄᑦ ᖃᐅᔨᒋᐊᕐᕕᒃᓴᖅ:
ᐃᕙᓗᐊᕐᔪᒃ ᒥᐅᕆᑦ
ᑐᑭᒧᐊᑦᑎᑦᑎᔨ ᑐᓴᐅᒪᔪᓕᕆᓂᕐᒧᑦ
ᓄᓇᕗᑦ ᑐᙵᕕᒃ ᑎᒥᖓ
