ᓴᒃᑯᑕᐅᑲᐅᑎᒋᔭᕆᐊᓕᒃ
(ᕖᕝᕗᐊᕆ 6, 2025 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓ ᔨᐅᓚᒥ ᑑᕐᖔᓗᒃ ᓴᖅᑭᑎᑦᑎᓚᐅᖅᐳᖅ 2022-23−ᒥ ᐃᓄᐃᑦ ᐃᓕᖅᑯᓯᖓ ᐊᒻᒪᓗ ᐃᓅᓯᖏᑦᑕ ᖃᓄᐃᓕᖓᓕᕐᓂᖏᑦ ᐊᕐᕌᒍᑕᒫᑦ ᐅᓂᒃᑳᓕᐊᕆᔭᐅᓲᖅ ᐸᓖᓯᓕᕆᓂᕐᒧᑦ ᓄᓇᕗᒻᒥ: ᐸᓖᓯᓕᕆᓂᖅ ᓄᓇᕗᒻᒥ: ᐅᐊᑦᑎᐊᕈ, ᐅᓪᓗᒥ, ᐊᒻᒪᓗ ᓯᕗᓂᒃᓴᒥ. ᐃᓄᐃᑦ ᐃᓕᖅᑯᓯᖓ ᐊᒻᒪᓗ ᐃᓅᓯᖏᑦ ᖃᓄᐃᓕᖓᓕᕐᓂᖏᑕ ᐅᓂᒃᑳᖅ ᐅᓂᒃᑳᓕᐅᕈᑕᐅᔭᕆᐊᖃᓲᖅ ᒪᓕᑦᑐᒍ ᐊᕕᑦᑐᖅᓯᒪᓂᖓ 32 ᓄᓇᕗᑦ ᓄᓇᑖᕐᓂᕐᒧᑦ ᐊᖏᕈᑎᑎᒍᑦ ᓴᖅᑭᖅᑎᑕᐅᔭᕆᐊᖃᓲᖅ ᓄᓇᕗᑦ ᒪᓕᒐᓕᐅᕐᕕᖓᓂ ᐊᒻᒪᓗ ᑲᓇᑕᒥ ᒪᓕᒐᓕᐅᕐᕕᕐᔪᐊᖓᓂ.
ᓄᓇᕗᒻᒥ ᐊᒥᓲᓂᖅᐹᖑᓲᑦ ᑲᓇᑕᓕᒫᕐᒥ ᐃᓅᒍᓐᓃᖅᐸᑦᑐᑦ ᐸᓖᓯᒃᑯᓐᓃᑦᑎᓪᓗᒋᑦ, ᐃᓄᖏᑦ ᐊᒻᒪᓗ ᐱᕋᔭᒃᓯᒪᔪᑦ ᐊᒥᓲᓂᖏᑦ ᐊᕐᕌᒍᑕᒫᑦ ᐊᒥᓱᕈᖅᐸᓪᓕᐊᑐᐃᓐᓇᓲᖑᕗᑦ; ᑭᓯᐊᓂᓕ, ᑲᒪᒋᔭᐅᓇᓱᐊᓲᖑᕗᖅ ᑕᒪᓐᓇ ᑮᓇᐅᔭᖅᑐᕈᑎᒃᓴᑦ ᐊᒥᓱᕈᖅᑎᑕᐅᑐᐃᓐᓇᖅᑐᑎᑦ ᐊᒻᒪᓗ ᐳᑭᖅᑕᓕᓐᓂᒃ ᐊᒥᓲᓂᖅᓴᓂᒃ ᓄᓇᕗᒻᒨᖅᑎᑕᐅᑐᐃᓐᓇᖅᑐᑎᑦ. ᑕᒪᓐᓇ ᖃᓄᐃᓕᐅᕈᑎᒋᔭᐅᒐᓱᐊᕆᐊᕐᓂᕆᓲᖓ ᑲᔪᓯᓂᖃᑦᑎᐊᙱᒻᒪᑦ. 2021-ᒥ ᖃᐅᔨᓵᖑᓯᒪᔪᑦ ᒪᓕᑦᑐᒋᑦ ᓄᓇᕗᒻᒥ ᐸᓖᓯᓕᕆᔭᐅᑎᓪᓗᒋᑦ ᐃᓄᐃᑦ ᐃᓅᔪᓐᓃᖅᓯᒪᔪᑦ ᐊᑯᕐᖓᖏᓐᓂ ᐊᕐᕌᒍᑦ 2000 ᐊᒻᒪᓗ 2020 ᐊᒥᓲᓂᖅᐹᖑᓚᐅᖅᓯᒪᔪᑦ ᑲᓇᑕᒥ, ᖁᓖᕋᖅᑎᒃᑲᓐᓂᒻᒪᕇᑦ ᐊᒥᓲᓂᖏᑦ ᑲᓇᑕᓕᒫᕐᒥ ᑕᑯᓐᓇᙳᐊᕐᓗᒋᑦ.
2022/23 ᐃᓄᐃᑦ ᐃᓕᖅᑯᓯᖓ ᐊᒻᒪᓗ ᐃᓅᓯᖏᑦ ᖃᓄᐃᓕᖓᓕᕐᓂᖏᑦ ᐅᓂᒃᑳᖅ ᖃᓄᐃᓕᐅᕈᑕᐅᓯᒪᔪᒥᓂᕐᓂᒃ ᖃᐅᔨᓴᖅᓯᒪᔪᑦ ᐸᓖᓯᓕᕆᓂᕐᒥᒃ ᓄᓇᕗᒻᒥ ᐅᖃᖅᓯᒪᓪᓗᑎᑦ ᐅᓂᒃᑳᓕᐊᕆᔭᐅᔪᖃᖅᓯᒪᔪᓂᒃ ᕿᑭᖅᑕᓂ ᓱᓕᔪᕐᓂᐊᕐᓂᕐᒧᑦ ᑲᒥᓴᙵᓂᒃ, ᓄᐊᑦᑎᓯᒪᓪᓗᑎᑦ ᑐᑭᓯᒋᐊᕈᑎᓂᑦ ᓴᖅᑭᖅᑎᑕᐅᖁᓪᓗᒋᑦ ᐅᓪᓗᒥᒨᖓᔪᑦ ᐊᒻᒪᓗ ᐅᒡᒍᕐᓇᓪᓚᕆᑦᑐᐊᓗᐃᑦ ᑕᒪᒃᑯᐊ ᑭᒡᓕᓯᓂᐊᖅᑕᐅᓯᒪᔪᑦ ᐸᓖᓯᓕᕆᓂᐅᕙᑦᑐᒥ ᐅᓪᓗᒥᐅᓕᖅᑐᖅ, ᐊᒻᒪᓗ ᓴᖅᑮᓯᒪᔪᑦ ᖃᐅᔨᓵᖑᓯᒪᔪᓂᒃ ᐊᑐᖅᑕᐅᖃᑦᑕᖅᑐᒥᓂᕐᓂᒃ ᓄᓇᖃᖅᑳᖅᓯᒪᔪᑦ ᐸᓖᓯᖏᑦ ᐊᒻᒪᓗ ᐋᖅᑭᒃᓱᖅᓯᒪᓂᖏᑦ ᑲᓇᑕᓕᒫᕐᒥ, ᑕᐃᒪᐃᑦᑎᓪᓗᒋᑦ ᑕᑯᒃᓴᐅᑎᑦᑎᔪᑦ ᐊᓯᖏᑦ ᐋᖅᑭᒃᓱᖅᓯᒪᐅᖅᑐᑦ ᓇᒻᒥᓂᖅᓱᖅᑐᑎᑦ ᐸᓖᓯᓕᕆᔪᖃᓲᖑᒻᒪᑦ ᐊᒻᒪᓗ ᐊᐅᓚᓂᖃᑦᑎᐊᕈᓐᓇᖅᑐᑎᑦ.
“ᐊᒃᓱᕈᕐᓇᓪᓚᕆᒃᑲᓗᐊᖅᑎᓪᓗᒍ ᓴᖅᑭᑦᑎᓪᓗᒋᑦ ᐱᐅᙱᓪᓚᕆᑦᑐᑦ ᑲᑕᓐᓇᒻᒪᕆᑦᑐᑦ ᓱᓕᔫᓂᖏᑦ ᐸᓖᓯᓕᕆᓂᕐᒥᒃ ᓄᓇᕗᒻᒥ, ᐱᒻᒪᕆᐅᕗᖅ ᑲᒪᒋᓗᑎᒍᑦ ᑕᒪᓐᓇ ᐊᑯᓂᐊᓗᒃ ᐱᔾᔪᑕᐅᓕᖅᑐᖅ ᐊᑦᑐᐃᓂᖃᖅᑐᖅ ᐃᓄᒻᒪᕇᑦ ᐃᓅᓯᖏᓐᓂᒃ ᐊᒻᒪᓗ ᐃᖅᑲᓇᐃᔭᖃᑎᒋᓗᒋᑦ ᒐᕙᒪᒃᑯᑦ ᐊᒻᒪᓗ ᐳᑭᖅᑕᓕᒃᑯᑦ ᖃᐅᔨᒪᓇᑦᑎᐊᖁᓪᓗᒍ ᐃᓄᒻᒪᕇᑦ ᐊᑦᑕᕐᓇᙱᑦᑐᒦᑦᑑᔮᖃᑦᑕᕐᓂᐊᕐᒪᑕ ᓄᓇᓕᑦᑎᓐᓂ.” ᐅᖃᖅᑐᓂ ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓ ᔨᐅᓚᒥ ᑑᕐᖔᓗᒃ.
ᐅᓂᒃᑳᖅ ᐊᑐᖁᔨᓯᒪᒋᕗᖅ ᐃᓄᐃᑦ ᑲᑐᔾᔨᖃᑎᒌᖏᑦ, ᐅᑭᐅᖅᑕᖅᑐᒥ ᐊᕕᑦᑐᖅᓯᒪᔪᖅ ᒐᕙᒪᖏᑦ ᐊᒻᒪᓗ ᒐᕙᒪᑐᖃᒃᑯᑦ ᐊᒻᒪᓗ ᐳᑭᖅᑕᓕᒃᑯᑦ ᐃᖅᑲᓇᐃᔭᖃᑎᒌᓪᓗᑎᑦ ᐱᕙᓪᓕᐊᒍᑎᖃᑲᐅᑎᒋᓂᐊᕐᒪᑕ ᐳᑭᖅᑕᓕᒃᑯᑦ ᐃᑲᔪᖅᑐᐃᓂᕐᒥᒃ ᐱᓕᕆᐊᖃᖅᑎᐅᖔᓕᕐᓗᑎᑦ ᐃᓄᒻᒪᕆᖕᓄᑦ ᓯᕗᒃᑲᖅᑖᕆᔭᐅᔪᒥᒃ ᐸᓖᓯᖃᓕᕐᓗᓂ.
-30-
ᐱᕙᓪᓕᐊᔪᓕᕆᔨᒃᑯᑦ ᖃᐅᔨᒃᑲᐃᒍᓐᓇᖅᑐᑦ:
ᐃᕙᓗᐊᕐᔪᒃ ᒥᐅᕆᑦ
ᑐᑭᒧᐊᑦᑎᑦᑎᔨ ᑐᓴᐅᒪᔪᓕᕆᔨᒃᑯᓐᓄᑦ
ᓄᓇᕗᑦ ᑐᙵᕕᒃ ᑎᒥᖓ
