(October 4, 2012 — Iqaluit, Nunavut)  Nunavut Tunngavikkut Timingat Tuklia Angayuqqaangat James Eetoolook uplumi uqaqtuq taimaa mamiahukturiplutik Amialikait tughirautainut nanuit titirarumaplugit Appendix II-mit talvunga Appendix I-mut talvani Katimayiit Nunaqyuami Niuviqtittiniqmut Amiriyauyunik Anngutighanik (CITES).  Tughirautinut niruaqtarahuat March, 2013-mi, Thailand-mi 176-nguyunit nunanit katimagumik taapkua CITES-kunnut katimaqatauyut.

Una aippariyaat tughiraut Amialikait kavamangat titiranunngarumaplugit nanuit.  Hivulliq akitauhimayuq 2010-mi taapkua nunaqyuamiut ilihimagamik taimaa niuviqtittiniq nanuqnik amiqnaittuq aulaniigut taamnalu tughiraut inittiaqtauhimainmat Appendix I-munngariami.

“Amialikat kavamangat nutqaqtittiyumayut niuviqtittiniqmik nanuqnik nunaqyuaptingnit hila aallannguqpalliayuriplugu, atauttikkullu nutqaqtittivalliayuittut huliyamingnik aallannguqtirutauyunut hilamut,’ uqaqtuq Eetoolook.  “NTI-kut ikayuqtuinngittut tughirautainut titiranunngaquplugit nanuit CITES-kut titirautainut Appendix I-mut.  Taapkua tughirautit ihuinaarutaungmata munattiaqhiniqmut nanuqnik atuqtaughaaqtunik Kanatami 40-nik ukiunik.”

Havaqatigiyumaplugit Amialikait Kavamangat Ihumaliuqtiillu, NTI-kut, Inuit Tapiriit Kanatami, Inuvialuit Anngutighanut Katimayiit, Kavamatkut Nunavunmi taapkualu Kavamatuqait Kanatami kivgaqtiit aullaaqhimayut Washington, DC-mut ilihaiyumaplutik Amialikait maligaliuqtiinik qanurininganut humaanngittunik nanuit Kanatami, ilitturipkaiyumaplugillu qanuq Inuit niqighaqhiuqpaktut ihuaqnighatut.  Katimattiarutigivaghugit uqaqtuq Eetoolook, taapkua Amialikait kihimi aulahimmaaqtut tuhattiaqhimaitkaluaqhutik titiranunngarumaplugit nanuit amiqnaqhiyutut, atauttikkuuqtillugit taapkualu tigers, panda bears-niklu, nutqaqtitjutaulaaqtut niuviqtittiniqmik nunaqyuaptingnit.

Eetoolook uqaqtuq taimaa NTI-kut havaqatigivagait nunaqyuaqmiutat munattiaquplugit nanuit.