Kilamik Toniyakhak
(June 17-mi 2024-mi – Ikalokni, Nonavumi) Ipakhani, Nonavut Tungavik Timeoyok (NTI) Katimayet Hivolikhoktit katihimayut Ikalokni, atoligomayamiknik upalogaeyaotikaktut ahikpanetok Nuuk-mi Akokitokmi. Malguk pigeagotik aniguktitaohimayuk Katimayinit, agiktaovlonilo 1.5-mileatala aolanikateakneakmaga ilitokhaonmik Inoenaktut ilihateakvikageagani, pikoevlotiklo Kavamanik Kanatami kinikheayagani manikhakhanik atoktukhanik Kanatami Titigakakvilikiyit aolaniginik Nonavumi ajikenik Nonavumi nunagiyaoyonit.
“Akitokniginik nikit ahelo pikotit atogeakaktut ublotoagagat inuyuhikmi Nonavumi, atoknikateaktok tamaeni ilaoyut ilaovageagani kinikheayagani tamaenik atolaktonik akikhigeagotikhanik piyagani,” okaktok NTI-koni Ikhivaotalik Aluki Kotierk. “Kanatami Titigakakvilikiyit havakatikageakaktut tikmealikiyinik, neovikveoyonik aheniklo ilaoyonik ihoakhivaligeagani maligoagakhat akikhivaligeagani akyaotit akitonigin ublotoagagat atogeakaktonik Nonavumi ilalo ukikliyagani manilikiyotinik aktoktaoyut Nonavumi Inoenaknit ilagenit.”
Atoligomayoayonik upalogaeyaknikmi ahikpani katimanikmi Nuuk-mi, katimayit nalonaektivaktaet Nigeoktaoyunik atokaktakhanik inikhimayut 2018-I, ilakaktut havakatigiyagani Kavamaoyut piyagani tamat atolikniganik Nakatani 23-mi Nonavumi Agikatigegumi; hakogikhivaliktilogo Inoenaktut tamaeni piyotaoyoni inuyohikmi Nonavumi; havakatigilogit Kavamaoyut hanayagani ilihaotikhanik atoktukhami takupkaeyotaoyomik atokpaligotaoyomiklo Inoet atokagomayaenik Inoelo ilitkohenik; havakatigilogit Kavamat ikiklivaleayagani iglolikiyotini ahenilo hanayakhani ilagoenaoyut Nonavumi, tutkikhivaligeaganilo hanahimayoni atoktakhanik Nonavumi kanatami atoktoni; havakatigilogilo Kavamat hanayagani Nakatani 32-mi havaohikhanik atoktitpaligeagani nakogotaoyut Inoet ilaonigit pivaleayotini inuyohikmi ilitkohikmilo pitkoheoyonik havaniklo Nonavumilo. Katimayit okateaktut ataotimik ihomagiyakaknikmik havakatigekniklo okonani Inoet timigiyaeni tungaveokmat nanminik aolanikageami pivaligotaokmat ayogiyotigiyakut uktogeagani ilikugotit havami inuhikmi manikhakheogotini, ilitkohikmilo ayikeligeagani ukonani Inoenakni ahenilo Kanatameotani.
Katimayit okavaktolo NTI-kot ilaoniga monagiyagani ihomakhutaoyut Nonavumi Inoenaknit okaklotiklo ikayokhimaknigaklotik maligalikinikut upiyotaoyok atoktaonahoaktok taemaetagani, maligatiguktitiyotilo malguknit Inoenaknit ilagenit NTI-kolo kivgaktokhogit Nonavumi Inoet pikageagani Kavamat Nonavumi atoktitivikhakageagani ilihaktonit ilihageagani Inoenaktut Ilihakaktonit Ayoeniginut 12.
Nuuk-mi, Katimayit katimakatikaktut Akogitomi atangoyanik polakhotiklo atokloaktonik iglonik pihimagitaptiknik ayikotakagitonik Nonavumi Kanatamilunet, Nonavumilo Inoet tukhikhakhimaliktaenik amihoni ukeoni.
Katimayit polakhimayut Akogitomi Tutkomavikmik Igilgaknitanik, takoyaoteaktut ihageagiyaoniganik Inoet Ilitkohenik Havakveoyomik, atogeakaktomik Nonavumi Agikatigegunmi, hanayaoyagani Noavumi kilamik ayoknaetpat. Polakhimayolo malguknik ilihakveoyuknik ilihakaliktut ilihakveni, ila Akokitukmeot hivoleoyok okaoheat ilihaotaovloni, takupkaktaoteaktok atolakniganik Inoenaktut okaohik atogeagani ilihaotini Nonavumi ilihakvikni. Katimayit ihivgeokhihimayut Ilihimatukhakvik Ilihakvikyoamik Akogitukmi, Okaohilikivikmik-miklo, nonakyoami okaohilikiyit, hivolikhoktit kanok Akogitukmeotut ilipkamaenageagani nonaonikhalikiyotinilo Akogitukmi. Ilagiyani, polakhimayut imakmit algoyaktutilikiyotimik atagoniklo monagiyotimik pikotinik, Agonahoaktit Ikalokheoktilo Neovaveanik Tamayakakveaniklo, Inutkoakakvikmiklo iglomik, ayikotaenik hanahimayonik ila, hanahimagomik Nonavumi, agiyomik ihoakhivaligotaoneakmata inuheni Nonavumi Inoet.
Tuklik atoligomayamiknik upalogaeyaknikmik katimanikhat NTI-koni Katimayit inigektaoyok upingami 2025-mi, kigoani NTI-kot ikhivaotakhamik vutikniginit inigektok atogeagani December 9-mi 2024-mi. Nutat atokagomayaoyut tikutineagaet havagit NTI-kot.
-30-
Tohagakhalikiyit Okakvikhat:
Ivaluarjuk Merritt
Hivolikhokti Tohaomayotinik
Nonavut Tungavik Timeoyomi
-mi
