ᓴᒃᑯᑕᐅᑲᐅᑎᒋᔭᕆᐊᓕᒃ
(ᔫᓂ 17, 2024 – ᐃᖃᓗᐃᑦ, ᓄᓇᕗᑦ) ᐱᓇᓱᐊᕈᓯᐅᓚᐅᖅᑐᒥ, ᓄᓇᕗᑦ ᑐᙵᕕᒃ ᑎᒥᖓᑕ ᑲᑎᒪᔨᖏᑦ ᑲᑎᒪᔪᔪᑦ ᐃᖃᓗᓐᓂ, ᐊᒻᒪᓗ ᖃᓄᐃᖅᑑᕈᑎᓕᐅᖅᓯᒪᔪᒥᒃ ᐸᕐᓇᐅᑎᓕᐅᕆᐊᖅᑐᖅᓯᒪᓪᓗᑎᑦ ᓅᒃ, ᑲᓛᖡᑦ ᓄᓈᓐᓄᑦ. ᐊᒥᓱᑦ ᐱᖁᔨᕗᖔᕈᑏᑦ ᐊᖏᖅᑕᐅᓚᐅᖅᑐᑦ ᑲᑎᒪᔨᓄᑦ, ᐱᖃᓯᐅᑎᓪᓗᒍ ᐊᖏᖅᑕᐅᓪᓗᑎᑦ $1.5 ᒥᓕᐊᓐ ᑮᓇᐅᔭᑦ ᑲᔪᓯᓂᖃᑦᑎᐊᕈᓐᓇᕋᔭᕐᒪᖔᖅ ᖃᐅᔨᓵᖑᒐᔭᖅᑐᒥᒃ ᐃᓄᒃᑐᑦ ᐃᓕᓐᓂᐊᕐᕕᑦᑕᖃᕐᓂᕈᓂ ᐊᒻᒪᓗ ᑲᓇᑕᒥ ᒐᕙᒪᒃᑯᓐᓂ ᖃᐅᔨᓴᖁᔨᓪᓗᒋᑦ ᑮᓇᐅᔭᖅᑖᕐᕕᒃᓴᒃᑲᓐᓂᐅᒐᔭᖅᑐᑦ ᑲᓇᑕᒥ ᑎᑎᖅᑲᓂᐊᕐᕕᖏᑦ ᐊᐅᓚᓂᖏᑦᑕ ᓄᓇᕗᒻᒥ ᐅᓯᔭᐅᔾᔪᑎᖏᑦᑕ ᐊᑭᖏᑦ ᓇᓕᒧᓐᓂᖃᕐᓂᖅᓴᐅᑦᑎᐊᕐᓂᐊᕐᒪᑕ ᓄᓇᕗᑦ ᓄᓇᓕᖏᖕᓄᑦ.
“ᓂᖀᑦ ᐊᓯᖏᓪᓗ ᑭᓱᑐᐃᓐᓇᐃᑦ ᐊᑭᑐᔪᒻᒪᕆᐅᑎᓪᓗᒋᑦ ᖃᐅᑕᒫᑦ ᐃᓅᓯᕐᒧᑦ ᐊᑐᖅᑕᐅᔭᕆᐊᓖᑦ ᓄᓇᕗᒻᒥ, ᐱᒻᒪᕆᐅᕗᖅ ᑕᒪᐃᓐᓂ ᑎᒥᐅᔪᑦ ᐃᓚᐅᖃᑕᐅᔪᑦ ᖃᐅᔨᓵᖃᕐᓗᑎᑦ ᑕᒪᐃᓐᓂᓕᒫᑦᑎᐊᖅ ᐱᕕᖃᕈᑎᒋᔭᐅᔪᓐᓇᖅᑐᓂᑦ ᑕᒪᒃᑯᐊ ᐅᓯᔭᐅᔾᔪᑏᑦ ᐊᑭᑭᓪᓕᒋᐊᖅᑎᑕᐅᕝᕕᒃᓴᖏᖕᓂᒃ,” ᐅᖃᖅᑐᓂ ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓ ᐊᓗᑭ ᑰᑦᑎᖅ. “ᑲᓇᑕᒥ ᑎᑎᖅᑲᓂᐊᕐᕕᒃᑯᑦ ᐃᖅᑲᓇᐃᔭᖃᑎᖃᕆᐊᖃᓪᓚᕆᑦᑐᑦ ᖃᖓᑕᓲᓕᕆᔨᒃᑯᓐᓂ, ᓂᐅᕕᕐᕕᓂᑦ ᐊᒻᒪᓗ ᐊᓯᖏᖕᓂᒃ ᑎᒍᒥᐊᖅᑎᐅᔪᓂᑦ ᐊᑐᐊᒐᕋᓛᑦ ᐱᐅᓯᕚᓪᓕᖅᑎᑕᐅᖁᓪᓗᒋᑦ ᐅᓯᔭᐅᔾᔪᑏᑦ ᐊᑭᑭᓐᓂᖅᓴᐅᓕᖁᓪᓗᒋᑦ ᖃᐅᑕᒫᑦ ᐊᑐᖅᑕᐅᔭᕆᐊᖃᓲᕐᓄᑦ ᓄᓇᕗᒻᒥ ᐊᒻᒪᓗ ᑮᓇᐅᔭᖅᑎᒍᑦ ᐅᖁᒪᐃᑦᑐᒃᑰᓗᐊᖅᑕᐃᓕᒪᓕᖅᑎᑦᑎᓂᐊᕐᒪᑕ ᓄᓇᕗᒻᒥᐅᑦ ᐃᓄᐃᑦ ᐃᓚᒌᑦᑐᓄᑦ.”
ᖃᓄᖅᑑᕈᓘᔭᖅᑐᑎᑦ ᐸᕐᓇᐅᑎᓕᐅᖅᑐᑎᑦ ᓅᒻᒥ, ᑲᑎᒪᔩᑦ ᐃᓕᓴᖅᓯᒃᑲᓐᓂᓕᓚᐅᕐᒥᔪᑦ ᓂᕆᐅᑦᑖᕆᔭᑦ ᓯᕗᓪᓕᐅᔾᔭᐅᖁᔭᐅᓯᒪᔪᑦ 2018−ᖑᑎᓪᓗᒍ, ᐱᖃᓯᐅᔾᔨᔪᑦ ᐃᖅᑲᓇᐃᔭᖃᑎᒋᔭᐅᓗᑎᑦ ᒐᕙᒪᐃᑦ ᐊᑐᓕᖅᑎᑕᐅᑦᑎᐊᖁᓪᓗᒍ ᐊᕕᑦᑐᖅᓯᒪᓂᖓ 23 ᓄᓇᕗᑦ ᓄᓇᑖᕐᓂᕐᒧᑦ ᐊᖏᕈᑎᒥ; ᓴᙵᑦᑎᑕᐅᓗᓂ ᐃᓄᒃᑐᑦ ᑕᒪᐃᓐᓂᓕᒫᑦᑎᐊᖅ ᐃᓅᓯᕆᔭᐅᔪᓂ ᓄᓇᕗᒻᒥ; ᐃᖅᑲᓇᐃᔭᖃᑎᒋᔭᐅᓗᑎᑦ ᒐᕙᒪᒃᑯᑦ ᐋᖅᑭᒃᓱᐃᖁᓪᓗᒋᑦ ᐃᓕᓐᓂᐊᕐᓂᓕᕆᔾᔪᓯᕐᒥᒃ ᐊᔾᔨᖃᕐᔫᒥᔪᒥᒃ ᐃᓄᐃᑦ ᓯᕗᓪᓕᐅᑎᖁᔭᕐᒥᓂᒃ ᐊᒻᒪᓗ ᐃᓄᐃᑦ ᐃᓕᖅᑯᓯᕐᒥᖕᓂᒃ ᐊᑐᖅᑕᐅᒃᑲᖅᑕᐅᑎᒐᓱᐊᖅᑕᐅᖃᑦᑕᕐᓗᑎᓪᓗ ᑕᒪᒃᑯᓂᖓ; ᐃᖅᑲᓇᐃᔭᖃᑎᒋᔭᐅᓗᑎᑦ ᒐᕙᒪᐃᑦ ᐃᒡᓗᓕᕆᓂᕐᒧᑦ ᐊᒻᒪᓗ ᐱᖁᑎᕐᔪᐊᓕᕆᓂᕐᒧᑦ ᐃᓚᑰᔪᑦ ᐃᓚᑰᙱᓐᓂᖅᓴᐅᓕᖅᑎᑕᐅᓗᑎᑦ, ᐊᒻᒪᓗ ᖁᕝᕙᕆᐊᕐᓗᒋᑦ ᐱᖁᑎᕐᔪᐊᖑᔪᑦ ᖃᓄᐃᑦᑑᔭᕆᐊᖃᕐᓂᖏᑦ ᓄᓇᕗᒻᒥ ᑲᓇᑕᒥ ᖁᑦᑎᓐᓂᖏᖕᓄᑦ ᒪᓕᓕᖁᓪᓗᒋᑦ ᐊᔾᔨᖃᓕᕐᓗᑎᑦ; ᐊᒻᒪᓗ ᐃᖅᑲᓇᐃᔭᖃᑎᒋᔭᐅᓗᑎᑦ ᒐᕙᒪᒃᑯᑦ ᐋᖅᑭᒃᓱᐃᖁᓪᓗᒋᑦ ᐊᕕᑦᑐᖅᓯᒪᓂᖓ 32 ᐃᓕᖅᑯᓯᕆᔭᐅᔭᕆᐊᖃᖅᑐᑦ ᐊᑑᑎᖃᑦᑎᐊᕐᔫᒥᔪᖅᑎᒍᑦ ᐃᓄᐃᑦ ᐃᓚᐅᖃᑕᐅᖁᓪᓗᒋᑦ ᐱᕙᓪᓕᐊᒍᑎᒋᔭᐅᓂᖓᓂᒃ ᐃᓅᓯᓕᕆᓂᕐᒧᑦ ᐊᒻᒪᓗ ᐃᓕᖅᑯᓯᓕᕆᓂᕐᒧᑦ ᐊᑐᐊᒐᑦ ᐊᒻᒪᓗ ᐱᓕᕆᐊᑦ ᓄᓇᕗᒻᒥ. ᑲᑎᒪᔩᑦ ᐅᖃᓚᐅᖅᑐᑦ ᐃᓕᒌᓕᕈᑎᑦ ᐊᒻᒪᓗ ᐱᓕᕆᖃᑎᒌᓕᕈᑎᑦ ᐃᓄᐃᑦ ᑲᑐᔾᔨᖃᑎᒌᖏᑦ ᑐᙵᕕᐅᓂᐊᕐᒪᑦ ᓇᖕᒥᓂᖅ ᐊᐅᓚᑦᑎᓕᖁᓪᓗᒋᑦ ᐱᐅᓯᕚᓪᓕᖅᑎᒍᑕᐅᓂᐊᕐᒪᑦ ᓇᒻᒥᓂᖅᓱᕐᓂᑦᑎᓐᓂ ᐃᖅᑲᓇᐃᔮᖃᖅᑎᓪᓗᑕ ᐃᓅᓯᕆᔭᐅᔪᑦ−ᑮᓇᐅᔭᓕᐅᕈᑎᒋᔭᐅᔪᓪᓗ ᐊᒻᒪᓗ ᐃᓕᖅᑯᓯᕗᑦ ᓇᓕᒧᒌᑦᑎᑕᐅᓂᐊᕐᒪᑕ ᐱᐅᓯᓂᖅᓴᐅᓂᖏᖕᓂᒃ ᐃᓄᐃᑦ ᐊᒻᒪᓗ ᐊᓯᖏᑦ ᑲᓇᑕᒥᐅᑕᐅᔪᑦ.
ᑲᑎᒪᔩᑦ ᐃᓕᓴᖅᓯᒃᑲᓐᓂᓚᐅᕆᕗᑦ ᓄᓇᕗᑦ ᑐᙵᕕᒃ ᑎᒥᖓᑕ ᐱᓕᕆᐊᖃᕈᑎᒋᒻᒪᒍ ᓴᐳᔾᔨᓗᑎᑦ ᓄᓇᕗᒻᒥᐅᑦ ᐃᓄᐃᑦ ᐱᔪᓐᓇᐅᑎᒥᓂᒃ ᐊᒻᒪᓗ ᐅᖃᖅᑐᑎᑦ ᐃᑲᔪᖅᑐᐃᒃᑲᓐᓂᕐᓂᐊᕐᓂᖏᖕᓂᒃ ᐃᖅᑲᖅᑐᐃᕕᒃᑯᑎᒎᕈᑕᐅᓯᒪᔪᑦ ᑕᒪᒃᑯᐊ ᐱᓪᓗᒋᑦ, ᐱᖃᓯᐅᑎᓪᓗᒋᑦ ᐃᖅᑲᖅᑐᐃᕕᒻᒨᕈᑕᐅᓯᒪᔪᑦ ᒪᕐᕉᓐᓄᒃ ᐃᓄᐃᑦ ᐃᓚᒌᑦᑐᓄᑦ ᐊᒻᒪᓗ ᓄᓇᕗᑦ ᑐᙵᕕᒃ ᑎᒥᖓᓄᑦ ᑭᒡᒐᖅᑐᐃᓪᓗᑎᑦ ᓄᓇᕗᒻᒥᐅᑕᕐᓂᒃ ᐃᓄᖕᓂᒃ ᓄᓇᕗᑦ ᒐᕙᒪᖏᑦ ᓂᕈᐊᕋᒃᓴᖃᖅᑎᑦᑎᓗᑎᑦ ᐃᓕᓐᓂᐊᖅᑎᖏᖕᓂᒃ ᐃᓕᓐᓂᐊᖅᑎᑕᐅᔪᓐᓇᕐᓂᖏᖕᓂᒃ ᐃᓄᒃᑑᖅᑐᒃᑯᑦ ᒥᑭᔫᑕᐅᓂᖅᐹᓂ ᑎᑭᓪᓗᒍ ᖁᕝᕙᓯᓐᓂᖅᐹᖅ 12−ᖓᓄᑦ.
ᓅᒻᒦ, ᑲᑎᒪᔩᑦ ᑲᑎᒪᖃᑎᖃᓚᐅᕐᒥᔪᑦ ᑲᓛᖡᑦ ᓄᓈᓐᓂ ᓂᕈᐊᖅᑕᐅᓯᒪᔪᓂᑦ ᐊᒻᒪᓗ ᑕᑯᔭᖅᑐᖅᑐᑎᑦ ᐱᓕᕆᕝᕕᓪᓗᐊᑕᕆᔭᐅᔪᓂᑦ ᓱᓕ ᐱᓯᒪᙱᑕᑦᑎᓐᓂ ᓄᓇᕗᒻᒥ ᑲᓇᑕᒥᓗ, ᐊᒻᒪᓗ ᓄᓇᕗᒻᒥᐅᑦ ᐃᓄᐃᑦ ᐱᔪᒪᓯᒪᓂᕋᐃᓐᓇᖅᑕᑐᖄᓗᖏᑦ ᐊᒥᓱᒻᒪᕆᓐᓂᒃ ᐅᑭᐅᖑᓕᖅᑐᓂᑦ.
ᑲᑎᒪᔩᑦ ᑕᑯᔭᖅᑐᓚᐅᕆᕗᑦ ᑲᓛᖡᑦ ᓄᓈᓐᓂ ᑕᑯᔭᒐᖃᕐᕕᖓᓂᒃ ᐊᒻᒪᓗ ᑐᖅᑯᐃᕕᖓᓂᒃ, ᖃᐅᔨᐊᓪᓚᒍᑕᐅᓪᓗᓂ ᐃᓄᐃᑦ ᑕᑯᔭᒐᖃᕐᕕᖃᕆᐊᖃᕐᓂᖓᓂᒃ ᐱᖅᑯᓯᑐᖃᖏᖕᓅᖓᔪᓂᑦ, ᑕᐃᒪᐃᑦᑕᕆᖃᐊᖅᑐᓂᓗ ᒪᓕᑦᑐᒍ ᓄᓇᕗᑦ ᓄᓇᑖᕈᑎᖓᑕ ᐊᖏᕈᑎᖓ, ᓴᓇᔭᐅᑲᐅᑎᒋᔭᕆᐊᖃᖅᑐᓂ ᓄᓇᕗᒻᒥ. ᑕᑯᔭᖅᑐᓚᐅᕆᕗᑦ ᒪᕐᕉᓐᓂᒃ ᐃᓕᓐᓂᐊᕐᕕᑉ ᐃᒡᓗᕈᓯᖏᖕᓂᒃ ᒥᑭᔫᑕᐅᓂᖅᓴᓃᑦᑐᓂᑦ ᐃᓕᓐᓂᐊᕐᕕᒻᒥ, ᑲᓛᖠᓱᑦ ᐊᑐᖅᑕᐅᓲᖑᓪᓗᓂ ᐃᓕᓐᓂᐊᖅᑎᑦᑎᖃᑦᑕᖅᑐᑎᑦ, ᖃᐅᔨᒃᑲᓐᓂᕈᑕᐅᓪᓗᓂᓗ ᐃᓄᒃᑐᑦ ᐊᑐᖅᑕᐅᓗᓂ ᐃᓕᓐᓂᐊᖅᑎᑦᑎᔪᖃᕆᐊᖃᕐᓂᖓᓂᒃ ᓄᓇᕗᑉ ᐃᓕᓐᓂᐊᕐᕕᖏᖕᓂ. ᑲᑎᒪᔩᓪᓗ ᕿᒥᕐᕈᓚᐅᕆᕗᑦ ᐃᓕᓯᒪᑐᓴᕐᕕᒻᒥ ᑲᓛᖡᑦ ᓄᓈᓐᓂ ᓯᓚᑦᑐᖅᓴᕐᕕᕐᔪᐊᖅ, ᐊᒻᒪᓗ ᑕᑯᔭᖅᑐᓚᐅᖅᑐᑎᑦ ᐅᖄᓯᓕᕆᕝᕕᒥ, ᑲᓛᖡᑦ ᓄᓈᓐᓂ ᐅᖃᐅᓯᓕᕆᓂᕐᒧᑦ ᑎᒥᖓ, ᓯᕗᒃᑲᖅᑕᖅᑎᐅᓯᒪᔪᑦ ᑲᓛᖡᑦ ᐅᖃᐅᓯᖓ ᐸᐸᑕᐅᓗᓂ ᐊᒻᒪᓗ ᖃᓄᖅᑑᕈᑕᐅᓯᒪᓪᓗᓂ ᑲᓛᖡᑦ ᓄᓈᓐᓂ. ᐊᒻᒪᓗᒃᑲᓐᓂᖅ, ᑕᑯᔭᖅᑐᓚᐅᕆᕗᑦ ᐃᒥᕐᒧᑦ ᐆᒻᒪᖅᑯᑎᓕᐅᕐᕕᒻᒥ ᐊᒻᒪᓗ ᐊᔅᓯᕕᒻᒥ ᐊᐅᓚᑦᑎᕕᒻᒥ, ᐊᖑᔭᐅᕙᑦᑐᑦ ᐃᖃᓗᒃᑕᐅᕙᑦᑐᓪᓗ ᓂᐅᕕᕐᕕᖓ ᓯᕐᓗᐊᖓᓗ, ᐊᒻᒪᓗ ᐃᓐᓇᒻᒪᕇᑦ ᐊᑯᓂᐅᔪᒧᑦ ᐸᖅᑭᕕᖓ, ᐆᑦᑑᑎᐅᔪᑦ ᐱᖁᑎᕐᔪᐊᑦ, ᐋᖅᑭᒃᓱᖅᑕᐅᒍᑎᑦ ᓄᓇᕗᒻᒥ, ᐱᐅᓯᕚᓪᓕᖅᑎᑦᑎᓂᖃᕋᔭᖅᑐᑦ ᓄᓇᕗᒻᒥᐅᑕᐅᔪᓂ ᐃᓄᖕᓂᒃ.
ᑭᖑᓪᓕᕐᒥᒃ ᖃᓄᖅᑑᕈᑎᓕᐅᕐᓂᕐᒧᑦ ᐸᕐᓇᐅᑎᓕᐅᓛᓕᕐᒥᔪᑦ ᑲᑎᒪᓗᑎᑦ ᓄᓇᕗᑦ ᑐᙵᕕᒃ ᑎᒥᖓᑕ ᑲᑎᒪᔨᖏᑦ ᐸᕐᓇᑕᐅᓯᒪᕗᖅ ᐅᐱᕐᖔᖅ 2025-ᖑᓕᖅᐸᑦ, ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓᓄᑦ ᓂᕈᐊᖅᑐᖃᓚᐅᖅᑎᓪᓗᒍ ᓂᕈᐊᖅᑐᖃᓛᖅᑐᓂ ᑎᓰᕝᕙ 9, 2024-ᖑᓕᖅᐸᑦ. ᓄᑖᑦ ᓯᕗᓪᓕᐅᔾᔭᐅᖁᔭᐅᔪᑦ ᑐᑭᒧᐊᑦᑎᑦᑎᓂᖃᕋᔭᖅᑐᑦ ᐃᖅᑲᓇᐃᔮᖏᑕ ᓄᓇᕗᑦ ᑐᙵᕕᒃ.
-30-
ᐱᕙᓪᓕᐊᔪᓕᕆᔨᒃᑯᑦ ᖃᐅᔨᒋᐊᕈᓐᓇᖅᑐᑦ:
ᐃᕙᓗᐊᕐᔪᒃ ᒥᐅᕆᑦ
ᑐᑭᒧᐊᑦᑎᑦᑎᔨ ᑐᓴᐅᒪᑎᑦᑎᓂᕐᒧᑦ
ᓄᓇᕗᑦ ᑐᙵᕕᒃ ᑎᒥᖓ
