ᓴᒃᑯᑕᐅᑲᐅᑎᒋᔭᕆᐊᓕᒃ
(ᒪᐃ 1, 2025 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓ ᔨᐅᓚᒥ ᑑᕐᖔᓗᒃ ᖁᕕᐊᓱᑦᑐᖅ ᑲᑐᔾᔨᔭᕆᐊᒃᓴᖅ ᑐᑭᓯᒋᐊᕈᑏᑦ ᓄᐊᑕᐅᕙᓪᓕᐊᓂᖏᑦ ᖃᓄᐃᑉᐱᑕ? ᑲᓇᑕᒥ ᐃᓄᐃᑦ ᖃᓄᐃᑦᑕᐃᓕᓂᖏᓐᓄᑦ ᖃᐅᔨᓵᖅ ᐱᔭᕇᖅᓯᒪᓕᕐᒪᑕ.
ᖃᓄᐃᑉᐱᑕ? ᐋᖅᑭᒃᑕᐅᓚᐅᖅᓯᒪᔪᖅ ᐃᓄᒻᒪᕆᖕᓄᑦ. ᐃᒻᒪᖄ 3,600 ᖃᐅᔨᓵᑦ ᐊᐱᖅᑯᑏᑦ ᐱᔭᕇᖅᑕᐅᓚᐅᖅᑐᑎᑦ ᓄᓇᕗᓕᒫᕐᒥ, ᑐᑭᓯᒋᐊᕈᑏᑦ ᓄᐊᑕᐅᓯᒪᔪᑦ ᐱᒻᒪᕆᐅᓂᐊᖅᑐᑦ ᑐᑭᓯᐅᒪᓕᕐᓗᒋᑦ ᐋᓐᓂᐊᖅᑕᐃᓕᒪᓂᕗᑦ, ᓴᙱᓂᕗᑦ ᐊᒻᒪᓗ ᖃᓄᐃᑦᑐᑦ ᑲᒪᒋᔭᐅᔭᕆᐊᖃᕐᒪᖔᑕ ᐅᔾᔨᖅᓲᑕᐅᓗᑎᓪᓗ ᓄᓇᓕᑦᑎᓐᓄᑦ. ᑐᑭᓯᒋᐊᕈᑏᑦ ᐃᑲᔪᕐᓂᖃᕐᓂᐊᕐᒥᔪᑦ ᑐᑭᒧᐊᑦᑎᑦᑎᓗᑎᑦ ᐊᓯᔾᔨᕐᓂᐅᔭᕆᐊᓕᓐᓂᒃ ᐱᔨᑦᑎᕋᕈᑎᓂᑦ, ᐊᑐᐊᒐᕐᓂᒃ, ᐊᒻᒪᓗ ᐃᑲᔪᖅᑐᐃᔾᔪᑎᓂᒃ ᐃᓄᒻᒪᕇᑦ ᐋᓐᓂᐊᖅᑕᐃᓕᒪᓂᖏᖕᓄᑦ ᐊᒻᒪᓗ ᖃᓄᐃᑦᑕᐃᓕᒪᓂᖏᖕᓄᑦ.
ᓴᖅᑭᖅᓯᒪᓂᖏᑦ ᖃᐅᔨᓵᑦ ᑲᑐᔾᔭᐅᒐᔭᖅᑐᑦ ᑐᑭᖃᕐᓗᑎᑦ ᓄᓇᓕᑦᑎᓐᓄᑦ − ᐅᖃᐅᓯᖏᑦ ᑐᑭᓯᔭᒃᓴᐅᑦᑎᐊᖅᑐᑯᓘᓗᑎᑦ, ᖃᕋᓴᐅᔭᒃᑯᑦ ᑕᑯᓂᐊᕋᒃᓴᐅᓗᑎᑦ, ᐊᒻᒪᓗ ᐊᑐᐃᓐᓇᐅᒪᓗᑎᑦ ᑕᒪᐃᓐᓄᑦ ᐃᓄᖕᒪᕆᓐᓄᑦ. ᓂᐱᕗᑦ ᐊᑑᑎᖃᕐᒪᑕ, ᐊᒻᒪᓗ ᖃᐅᔨᒪᓂᕗᑦ ᑲᑐᔾᔭᒥᓃᑦ ᐱᖁᑎᒋᒐᑦᑎᒍᑦ.
“ᑭᒃᑯᓕᒫᑦ ᖁᔭᓐᓇᒦᕈᒪᕙᒃᑲ ᐅᖃᐅᓯᕐᒥᓂᒃ ᑲᑐᔾᔨᔪᓐᓇᓚᐅᖅᑐᑦ ᐅᕙᑦᑎᓐᓄᑦ ᐊᒻᒪᓗ ᐊᑐᖃᑦᑕᕐᓂᑯᒥᓂᖏᓐᓂᒃ,” ᐅᖃᖅᑐᓂ ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓ ᑑᕐᖔᓗᒃ. “ᑖᓐᓇ ᖃᐅᔨᓵᖅ ᓴᙱᔪᐊᓘᕗᖅ ᓯᕗᒧᐊᒋᐊᕈᑎᒋᔭᐅᒍᓐᓇᖅᓯᓪᓗᓂ ᑐᑭᓯᒋᐊᕈᑏᑦ ᑕᓱᕐᓗᑎᒍᑦ ᐊᒻᒪᓗ ᐅᖃᐅᓯᖃᕐᓗᑕ ᓇᖕᒥᓂᖅ ᐅᓂᒃᑳᑦᑎᓐᓂ ᐃᓄᐃᑦ ᐋᓐᓂᐊᖅᑕᐃᓕᒪᓂᖏᖕᓅᖓᔪᓂᒃ.”
ᑕᒪᓐᓇ ᐱᕚᓪᓕᖅᓯᒪᓂᕗᑦ ᓇᓗᓇᐃᖁᓪᓗᒍ, ᓄᓇᕗᑦ ᑐᙵᕕᒃ ᑎᒥᖓ ᐊᒻᒪᓗ ᖃᓄᐃᑉᐱᑕ? ᐃᖅᑲᓇᐃᔭᖅᑎᖏᑦ ᖃᐃᖁᔨᕗᑦ ᓄᓇᓕᒻᒥᐅᓂᒃ ᓂᕆᕕᔾᔪᐊᕐᓂᐅᓛᖅᑐᒧᑦ ᐊᒻᒪᓗ ᓇᓪᓕᐅᓂᖅᓯᐅᕐᓗᑎᑦ ᓂᕆᕕᔾᔪᐊᓛᖅᑐᑦ ᒪᐃ 6, 2025-ᖑᓕᖅᐸᑦ ᐃᓄᒃᓱᒃ ᐃᓕᓐᓂᐊᕐᕕᐊᓗᒃ ᐱᙳᐊᕐᕕᖓᓂ ᐃᖃᓗᓐᓂ. ᓇᓗᓇᐃᔭᖅᓯᒪᓂᖏᑦ ᐅᓂᒃᑲᐅᑕᐅᒐᔭᖅᑐᑦ ᑭᒃᑯᑐᐃᓐᓇᕐᓄᑦ ᑐᓴᕋᒃᓴᑎᒍᑦ.
-30-
ᐱᕙᓪᓕᐊᔪᓕᕆᔨᒃᑯᓐᓄᑦ ᖃᐅᔨᒃᑲᕋᒃᓴᖅ:
ᐃᕙᓗᐊᕐᔪᒃ ᒥᐅᕆᑦ
ᑐᑭᒧᐊᑦᑎᑦᑎᔨ ᑐᓴᐅᒪᔪᓕᕆᓂᕐᒧᑦ
ᓄᓇᕗᑦ ᑐᙵᕕᒃ ᑎᒥᖓ
