ᓄᓇᕗᑦ ᑐᓐᖓᕕᒃ ᑎᒥᖓᑦᑕ ᐊᖏᔪᖅᑳᑉ ᑐᖏᓕᐊ ᔭᐃᒻᔅ ᐃᑦᑐᓗᒃ ᐊᒻᒪᓗ ᐊᓯᖏᑦ ᓄᓇᕗᒥ ᐆᒪᔪᓕᕆᓂᕐᒧᑦ ᑭᒡᒐᖅᑐᖅᑎᖏᑦ ᐊᐅᓪᓚᕐᓂᐊᕐᑐᑦ ᐃᓄᒡᔪᐊᖅ ᓄᓇᕕᖕᒧᑦ ᐱᓇᓱᐊᕈᓯᐊᓂᐊᖅᑐᒥ ᕕᕝᕗᐃᕆ 12-14, ᐃᓚᐅᓂᐊᖅᖢᑎᒃ ᓄᓇᕕᖕᒥ ᐳᐃᔨᓕᕆᓂᕐᒧᑦ ᐊᕕᒃᑐᖅᓯᒪᔪᑦ ᐆᒪᔪᓕᕆᔨᖏᑦᑕ ᑲᑎᒪᔨᖏᑦ ᑭᒃᑯᓕᒫᓂᒃ ᓈᓚᒃᑎᑦᑎᓂᕆᓂᐊᖅᑕᖓᓐᓄᑦ ᐃᒪᓐᓇᓗ ᐃᓱᒪᒃᓴᖅᓯᐅᕈᑕᐅᓂᐊᖅᑐᑦ ᓴᖅᑭᑦᑎᓂᕐᒥᑦ ᐱᑕᖅᑕᐅᔪᓐᓇᖅᑐᑦ ᐅᓄᕐᓂᖏᓐᓂᒃ ᒪᑯᓄᖓ ᓇᓄᕐᓄᑦ ᑕᐅᓇᓂ ᓂᒋᖅᐸᓯᐊᓂ ᑕᓯᐅᔭᕐᒧᐊᑉ ᐃᒪᖓᓂ ᐃᓚᖏᑦ-ᐊᒥᓲᓂᖏᑕ ᐃᓗᐊᓂ ᓄᓇᕕᒃ ᑕᕆᐅᖓᓂᓐ.
ᓄᓇᕗᑦ ᐊᑐᖅᓯᒪᔪᑐᖃᐃᑦ ᓇᓄᕐᓄᑦ ᐊᐅᓚᑦᑎᓂᕐᒧᑦ ᐃᓕᖓᔪᑎᒍᑦ ᐊᒻᒪᓗ ᑰᑕᖃᖅᑎᑦᑎᓂᕐᒥᑦ ᐱᑕᖅᑕᐅᔪᓐᓇᑐᓂᒃ ᐃᓕᖓᓕᖅᑐᑦ ᐅᑭᐅᓄᑦ 40, ᓄᓇᕕᒃᓕ ᐱᒋᐊᓕᑕᐃᓐᓇᖅᑐᑦ ᐊᑐᕐᓂᐊᕐᓂᕐᒥᖕᓂᑦ ᑕᒪᑦᓱᒧᖓ ᐊᒃᑐᐊᔪᓂᑦ. ᐃᑦᑐᓗᒃ ᐅᖃᖅᑐᖅ ᓄᓇᕗᑦ ᑭᒡᒐᖅᑐᖅᑎᖏᑦ ᐃᓚᐅᓚᐅᖅᑐᑦ ᑭᒃᑯᓕᒫᓂᑦ ᓈᓚᒃᑎᑦᑎᑕᐅᓂᖏᓐᓂᒃ ᐊᒻᒪᓗ ᓈᓚᒃᖢᑎᒃ ᐊᒥᖄᕈᑎᒋᓂᐊᕐᓗᒋᓪᓗ ᓇᖕᒥᓂ ᐊᑐᖅᓯᒪᔭᖏᓐᓂ ᐊᒻᒪᓗ ᖃᐅᔨᒪᓂᖏᓐᓂᒃ ᐊᐅᓚᑦᑎᔨᐅᓂᕐᒧᑦ ᐋᖅᑭᐅᒪᑎᑕᐅᔪᓂᑦ ᓄᓇᕗᒥ. ᓂᒋᐊᖅᐸᓯᐊᓂ ᑕᓯᐅᔭᕐᔪᐊᑉ ᐃᒪᖓᓂ ᐃᓚᖏᑦ ᐊᒥᓲᓂᖏᑕ ᓇᓄᐃᑦ ᐊᒥᖄᕈᑕᐅᓂᐊᖅᑐᑦ ᐊᑯᓐᓂᖏᓐᓂ ᐊᒥᓯᕙᑏᑦ ᐊᖑᓇᓱᒃᑏᑦ ᓴᓂᑭᓗᐊᒥ ᐊᒻᒪᓗ ᓄᓇᕕᖕᒥ ᓄᓇᓕᖕᒥᐅᑕᓄᑦ.
ᑐᒃᑎᕋᐅᑎ ᐅᑯᓄᖓ ᐊᕙᑎᓕᕆᔨᒃᑯᓐᓄᑦ ᑲᓇᑕᒥ ᐊᖅᑭᒃᓯᖁᔨᓂᕐᒥᑦ ᐱᑕᖅᑕᐅᔪᓐᓇᖅᑦ ᐅᓄᕐᓂᖃᕐᓗᑎᒃ ᓄᓇᕕᖕᒥ ᑕᒪᓐᓇ ᓴᖅᑭᓕᓚᐅᖅᑐᖅ ᑭᖑᓂᐊᒍᑦ ᐅᓄᖅᓯᒋᐊᖅᑕᐅᓂᖏᑦ ᐊᒥᓲᓂᖏᑕ ᓇᓄᐃᑦ ᐱᑕᖅᑕᐅᕙᒃᑐᑦ ᐊᖑᓇᓱᐊᖅᑎᓄᑦ ᓄᓇᕕᖕᒥᐅᑕᓄᑦ ᐅᑭᐅᖑᖃᐅᔪᑦ ᐊᒥᓱᓗᐊᖏᑦᑐᑦ ᖄᖏᖅᓯᒪᓕᖅᑎᓪᓗᒋᑦ. ᐃᓄᐃᑦ ᓄᓇᕗᒥ ᐊᒻᒪᓗ ᓄᓇᕕᖕᒥ ᐋᖅᑭᒃᓯᓗᑎᒃ ᐃᓱᒪᒥᖕᓂᑦ ᐊᒥᖄᕈᑎᒋᓗᒋᑦ ᐊᖏᕈᑏᑦ ᑕᐃᓱᒪᓂ 2011-ᒥ, ᑭᓯᐊᓂ ᓄᓇᕕᖕᒥ ᐳᐃᔨᓕᕆᓂᕐᒧᑦ ᐊᕕᒃᑐᖅᓯᒪᔪᐊᓐᓂ ᐆᒪᔪᓕᕆᔨᑦ ᑲᑎᒪᔨᖏᑦ ᒫᓐᓇ ᐸᕐᓇᓕᖅᑐᑦ ᐋᖅᑭᒃᓯᓗᑎᒃ ᐊᑐᖅᑕᐅᖏᓐᓇᕐᓂᐊᓕᖅᑐᒥᑦ ᐊᐅᓚᑦᑎᓂᕐᒥᑦ ᐃᓕᖓᔪᓂᑦ ᐋᖅᑭᐅᒪᓕᕐᓗᑎᒃ ᐃᓚᐅᑎᑕᐅᓗᑎᒃ ᐃᓄᐃᑦ, ᐊᓪᓚᐃᑦ, ᐊᒻᒪᓗ ᒐᕙᒪᒃᑯᑦ.
“ᓄᓇᕗᑦ ᐆᒪᔪᓕᕆᓂᕐᒧᑦ ᑭᒡᒐᖅᑐᖅᑎᖏᑦ ᖁᕕᐊᓱᒻᒪᕆᒃᑐᑦ ᐃᓚᐅᓂᕐᒥᑦ ᑕᒪᑦᓱᒧᖓ ᑲᔪᓯᓂᐅᔪᓂᑦ. ᓴᖅᑭᑎᑦᑎᓯᒪᔪᒍᑦ ᐋᖅᑭᒃᓯᒪᔪᓂᒃ ᐊᒻᒪᓗ ᐱᒪᑐᑦᑎᐊᖅᖢᒋᑦ ᐊᐅᓚᑎᓂᕐᒥᑦ ᐊᑐᖅᑕᐅᕙᒃᑐᓂᒃ ᐊᐅᓚᓂᖃᑦᑎᐊᖅᖢᑎᒃᓗ ᐱᑦᑎᐊᔪᓴᕐᓂᕐᒥᑦ ᐊᒻᒪᓗ ᐅᐱᓪᓗᒋᑦ ᐃᓄᐃᑦ ᐊᓯᖅᑏᑦ ᐊᖑᓇᓱᐊᖅᑏᑦ ᐱᔪᓐᓇᐅᑎᖏᑦ, ᐊᒻᒪᓗ ᓂᕆᐅᖕᓂᖃᑦᑎᐊᖅᑐᒍᑦ ᐊᒥᖄᕈᑎᖃᕐᓂᕐᒥᑦ ᖃᐅᔨᒪᓂᑦᑐᓐᓂᒃ ᐊᓯᖏᓐᓂ ᐃᓅᑲᑎᑦᑎᓐᓄᑦ ᓄᓇᕗᑦ ᐊᓯᐊᓂ, ᓇᓗᓇᐃᑦᑎᐊᕐᓂᐊᕈᑎᑦᑎᒍᑦ ᐊᓐᓇᒃᑐᐃᓂᕐᒧᑦ ᓇᓄᕐᓂᑦ” ᐅᖃᖅᑐᖅ ᐃᑦᑐᓗᒃ.
-30-
