(ᓄᕖᕝᕙ 14, 2025 – ᐃᖃᓗᐃᑦ, ᓄᓇᕗᑦ) ᐃᑉᐸᖦᓴᖅ, ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓ ᔨᐅᓚᒥ ᑑᕐᖔᓗᒃ ᐃᓚᐅᓚᐅᖅᑐᖅ ᒥᓂᔅᑕᒥᒃ ᒐᕙᒪᑐᖃᒃᑯᑦ−ᓄᓇᖃᖅᑳᖅᓯᒪᔪᑦ ᐱᓕᕆᖃᑎᒌᓐᓂᖏᖕᓄᑦ ᐊᓪᑎ, ᓯᕗᓕᖅᑎ ᐸᐅᓗᓯ ᐊᕿᐊᕈᕐᒥᒃ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᐊᖓᔪᖅᑳᖓ ᐅᓛᔪᖅ ᐊᑭᓱᒃ, ᓄᓇᕗᑦ ᓄᒃᑭᒃᓴᐅᑏᑦ ᑯᐊᐳᕇᓴᙵ ᐊᖓᔪᖅᑳᖓ ᕼᐃᐅᕆ ᕕᓕᐅᕆᑎᒥᒃ ᐃᖃᓗᓐᓂ ᐆᒻᒪᖅᑯᑎᓕᐅᕐᕕᖓᓂᒃ ᑲᓇᑕ ᒐᕙᒪᖓ ᑐᓴᖅᑎᑦᒃᑎᓚᐅᖅᑎᓪᓗᒋᑦ ᐃᑲᔪᖅᑐᐃᓂᐊᕐᓂᖏᖕᓂᒃ ᐃᖃᓗᓐᓂ ᓄᒃᑭᒃᓴᐅᑏᑦ ᑰᒻᒧᑦ ᐆᒻᒪᖅᑯᑎᓕᐅᕈᑎ ᐱᓕᕆᐊᖓᓂᒃ.
“ᐅᓪᓗᒥ ᑐᓴᖅᑎᑦᑎᓂᖓ ᑕᑯᒃᓴᐅᑎᑦᑎᔪᖅ ᐃᓄᐃᑦ ᓯᕗᓕᖅᑎᖏᑦ ᐱᕙᓪᓕᐊᓂᖃᖅᑎᓪᓗᒋᑦ ᐱᖁᑎᕐᔪᐊᓂᒃ ᐱᕐᔪᐊᕌᓘᕗᖅ ᑲᓇᑕᑉ ᐅᑭᐅᖅᑕᖅᑐᕆᔭᐅᓂᕋᕐᓂᖓᓂᒃ,” ᐅᖃᖅᖢᓂ ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖅ ᔨᐅᓚᒥ ᑑᕐᖔᓗᒃ. “ᐃᓇᖐᓪᓗᑕ ᐅᖅᓱᐊᓗᒃᓴᒥᒃ ᑕᑎᒋᒃᓴᖔᕐᒥᒃ ᑰᒻᒥᒃ ᐆᒻᒪᖅᑯᑎᓕᐅᕈᑎᖃᖔᓕᕐᓗᑕ ᐃᖃᓗᓐᓂ ᓯᓚᒧᑦ ᐃᑲᔪᑎᖃᕈᑎᒋᔭᐅᕗᖅ; ᐸᕐᓇᐅᑎᐅᒋᕗᖅ ᐱᕈᖅᐸᓪᓕᐊᓕᕐᓂᑦᑎᓐᓄᑦ. ᐊᑭᖓ ᐃᓅᓇᓱᐊᕐᓗᓂ, ᐋᓐᓂᐊᖅᑕᐃᓕᒪᓂᕐᒧᑦ ᐸᕐᓇᐅᑎᐅᓪᓗᓂ, ᐊᒻᒪᓗ ᐱᕈᖅᐸᓪᓕᐊᓂᕐᒧᑦ ᐸᕐᓇᐅᑎᒋᔭᐅᓪᓗᓂ. ᐊᑭᑐᓗᐊᙱᑦᑐᖅ, ᑕᑎᒋᔭᒃᓴᖅ ᐆᒻᒪᖅᑯᑎ ᑐᙵᕕᒋᔭᐅᕗᖅ ᓄᑖᕐᒧᑦ ᐃᒡᓗᓕᕆᓂᕐᒧᑦ, ᐋᓐᓂᐊᕐᕕᓄᑦ, ᐱᓕᒻᒪᒃᓴᐃᕕᓄᑦ, ᐊᒻᒪᓗ ᓇᖕᒥᓂᖁᑎᒋᔭᐅᔪᓄᑦ. ᐊᑭᑭᓐᓂᖅᓴᐅᓕᖅᑎᑦᑎᓂᐊᖅᑐᑦ ᓄᓇᕗᓕᒫᕐᒥ, ᐆᒻᒪᖅᑯᑏᑦ ᐊᑭᖏᑦ ᓱᕐᕋᓗᐊᖃᑦᑕᕈᓐᓃᕐᓗᑎᑦ, ᐊᒻᒪᓗ ᖃᐅᔨᒪᑦᑎᐊᕈᑎᒋᔭᐅᓗᓂ ᐆᒻᒪᖅᑯᑎᖃᑦᓯᐊᕐᓂᐊᓕᕐᒪᑦ ᓄᓇᓕᐸᐅᔭᑦᑎᓐᓂ. ᑖᓐᓇ ᐊᑯᓂᐅᔪᒧᑦ ᐊᑐᖅᑕᐅᔪᓐᓇᕐᓂᐊᖅᑐᖅ ᓱᓕᔪᕆᔭᐅᔪᓐᓇᕐᓗᑎᑦ ᐅᑭᐅᖅᑕᖅᑐᒧᑦ ᐱᔭᐅᔪᒪᔪᑦ, ᐊᒻᒪᓗ ᐱᑕᖃᕆᐊᖃᓪᓚᕆᖦᖢᓂ ᐱᕈᖅᐸᓪᓕᐊᖁᓪᓗᑕ ᐅᑭᐅᖅᑕᖅᑐᒥ ᐊᐅᓚᑦᑎᓂᕐᒧᑦ ᐃᑲᔪᖅᑐᐃᕝᕕᐅᖁᓪᓗᑕ.”
ᓄᓇᕗᑦ ᓄᓇᑖᕐᓂᕐᒧᑦ ᐊᖏᕈᑎ, ᐱᖁᔭᕐᔪᐊᖅᑎᒍᑦ ᓴᐳᒻᒥᐅᑎᑦᑎᓯᒪᔪᖅ ᓄᓇᑖᕈᑎ, ᐃᓕᓴᖅᓯᓯᒪᕗᖅ ᐃᓄᐃᑦ ᐅᑭᐅᖅᑕᖅᑐᒥ ᐱᕐᔪᐊᕌᓘᒻᒪᑕ ᑲᓇᑕ ᓇᒻᒥᓂᖁᑎᒋᔭᐅᓂᕋᕐᓂᖓᓂᒃ. ᐃᓄᐃᑦ ᐅᑭᐅᖅᑕᖅᑐᒦᑦᑐᑦ ᐱᔾᔪᑕᐅᕗᑦ ᑲᓇᑕ ᓇᖕᒥᓂᖅ ᐅᑭᐅᖅᑕᖅᑐᒥ ᓄᓇᓕᕐᔪᐊᖑᓂᕋᕈᓐᓇᕐᓂᖓᓂᒃ. ᐊᑭᑐᓗᐊᙱᑦᑑᓪᓗᓂ, ᑕᑎᒋᔭᒃᓴᐅᓕᕐᓗᓂ ᐆᒻᒪᖅᑯᑎ ᐅᑭᐅᖅᑕᖅᑐᒥ ᐱᔪᓐᓇᖅᑎᑦᑎᓂᖃᕐᓂᐊᖅᑐᖅ ᓄᑖᕐᓂᒃ ᐃᒡᓗᒃᑕᖃᐅᓕᕐᓗᓂ, ᐋᓐᓂᐊᕕᓂᒃ, ᐱᓕᒻᒪᒃᓴᐃᕕᓐᓂᒃ, ᐱᖁᑎᕐᔪᐊᓂᓪᓗ ᐃᑲᔪᖅᑐᖅᑕᐅᖁᓪᓗᒍ ᑲᓇᑕ ᓇᖕᒥᓂᖁᑎᒋᔭᐅᓂᕋᕐᓂᖓᓂᒃ, ᐊᒻᒪᓗ ᓇᖕᒥᓂᖁᑎᖏᔭᐅᔪᑦ, ᐊᒻᒪᓗ ᐊᓯᔾᔨᓗᐊᕐᔭᐃᑎᑦᑎᓂᐊᖅᑐᖅ ᓴᐳᒻᒥᐅᓯᖅᑕᐅᖁᓪᓗᒍ ᑲᓱᖅᓯᒪᓂᖓ ᓄᓇᕗᑦ ᑲᓇᑕᒧᑦ.
ᐃᓄᐃᑦ ᑕᐅᑐᙳᐊᖅᓯᒪᕗᑦ ᓄᓇᕗᑦ ᐱᕙᓪᓕᐊᓂᖃᕐᓗᓂ ᓄᓇᓕᒃ ᐅᓗᕆᐊᓇᖅᑐᒦᑦᑕᙱᓪᓗᓂ ᐊᒻᒪᓗ ᖃᓄᐃᑦᑕᐃᓕᓗᑎᑦ. ᐃᓄᐃᑦ ᐱᕙᓪᓕᐊᓂᖃᕇᖅᓯᒪᔪᑦ ᐊᓯᖏᖕᓂᒃ ᑲᓇᑕᒥᓕᐅᕐᓂᕐᒧᑦ ᐱᓕᕆᐊᕐᓂᒃ ᐅᐸᓗᖓᐃᖅᓯᒪᔪᑦ ᐱᒋᐊᑐᐃᓐᓇᕆᐊᖃᓕᖅᖢᑎᑦ, ᐱᖃᓯᐅᑎᓪᓗᒍ ᐅᑭᐅᖅᑕᖅᑐᒥ ᐱᕙᓪᓕᐊᔪᓕᕆᓂᖅ ᐊᒻᒪᓗ ᐊᑦᑕᕐᓇᕐᔭᐃᖅᓯᒪᓗᓂ ᐊᖅᑯᑎ ᐃᒪᒃᑯᑦ, ᕿᑭᖅᑕᕐᔪᐊᕐᒥ ᐃᑎᔪᒥᒃ ᑕᕆᐅᕐᒥᒃ ᑐᓚᒃᑕᕐᕕᒃ, ᐊᒻᒪᓗ ᑭᕙᓪᓕᕐᒥ ᐃᒪᒃᑯᑦ−ᐃᑭᐊᖅᑭᔾᔪᑏᑦ ᑲᓱᕈᑎᖓ. ᑕᒪᒃᑯᐊ ᐱᓕᕆᐊᑦ ᑲᓇᑕᒧᑦ ᐱᔭᐅᔪᒪᓂᖃᕋᔭᕐᒪᑕ ᐋᖅᑮᓂᐊᖅᖢᑎᑦ ᓄᓇᕗᒻᒥ ᐊᒻᒪᓗ ᓴᙵᑦᑎᕆᓗᑎᑦ ᑲᓇᑕᑉ ᐅᑭᐅᖅᑕᖅᑐᒦᓐᓂᖓᓂᒃ. ᐃᑲᔫᑎᖃᕐᓂᐊᖅᖢᑎᑦ ᓄᓇᕗᒻᒥᐅᑦ ᐃᓄᖏᖕᓄᑦ ᐊᒻᒪᓗ ᑲᓇᑕᒧᑦ.
-30-
ᐱᕙᓪᓕᐊᔪᓕᕆᓂᕐᒧᑦ ᖃᐅᔨᒋᐊᕈᓐᓇᖅᑐᑦ:
ᐃᕙᓗᐊᕐᔪᒃ ᒥᐅᕆᑦ
ᑐᑭᒧᐊᑦᑎᑦᑎᔨ ᑐᓴᐅᒪᑎᑦᑎᓂᕐᒧᑦ
ᓄᓇᕗᑦ ᑐᙵᕕᒃ ᑎᒥᖓ
