(ᐄᑉᕈ 30, 2021 – ᐃᖃᓗᐃᑦ, ᓄᓇᕗᑦ) ᐊᓗᑭ ᑰᑦᑎᖅ, ᓄᓇᕗᑦ ᑐᙵᕕᒃ ᑎᒥᖓᑕ (ᑐᙵᕕᒃ) ᐊᖓᔪᖅᑳᖓ ᐅᓪᓗᒥ ᓇᒡᓕᒍᓱᓐᓂᕐᒥᓂᒃ ᓂᓪᓕᐅᔾᔨᖅᑲᐅᕗᖅ ᐃᓚᖏᓐᓂᒃ ᑖᒪᔅ ᕋ. ᕘᔾᔪᓚᐅᖅᑑᑉ ᐃᓅᒍᓐᓃᓚᐅᖅᑐᖅ ᐱᖓᑦᓯᕐᒥ.
ᑖᒪᔅ ᕘᔾᔪ ᐱᖕᒪᕆᐅᓚᐅᖅᐳᖅ ᒐᕙᒪᑐᖃᒃᑯᓐᓂᒃ ᐊᓯᔾᔩᑎᑦᓯᓂᖓ ᐊᑐᐊᒐᖏᓐᓂᒃ ᐊᒻᒪᓗ ᐃᓕᓴᕆᔭᐅᓂᖏᓐᓂᒃ ᓄᓇᖃᖅᑳᖅᓯᒪᔪᓄᑦ ᐱᔪᓐᓇᐅᑏᑦ ᐊᒻᒪᓗ ᑕᐃᔭᐅᔾᔪᑎ ᐱᓕᕆᐊᖑᒋᐊᖃᕐᓂᖓᓂᒃ. ᐱᓕᕆᐊᕆᑦᓯᐊᑕᒻᒪᕆᓚᐅᖅᑕᖏᑦ ᐱᓇᓱᐊᒐᑦᓴᓂᒃ ᒪᓕᒐᕐᓂᐅᖅᑎᐅᓂᕐᒥᓄᑦ ᐊᓪᓚᐃᑦ ᓂᔅ’ᒐ ᐊᓪᓚᐃᑦ ᑲᑎᒪᔨᖏᑦ ᖃᐅᔨᒪᔮᖑᑦᓯᐊᖅᑐᒥᒃ ᑭᒃᑯᑐᐃᓐᓇᕐᓄᑦ ᑕᐃᔭᐅᔪᖅ ᑲᐅᑕ ᐃᖅᑲᖅᑐᐃᕕᒻᒦᒍᑕᐅᓂᖓ, ᑎᑭᐅᑎᓚᐅᖅᑐᖅ ᑲᓇᑕᒥ ᖁᑦᓯᓂᖅᐹᓄᑦ ᐃᖅᑲᖅᑐᐃᔨᕐᔪᐊᓄᑦ. ᑖᓐᓇ ᐃᖅᑲᖅᑐᐃᕕᒻᒦᒍᑕᐅᔪᖅ ᑎᑭᐅᑎᒍᑕᐅᓚᐅᖅᑐᖅ ᒐᕙᒪᑐᖃᒃᑯᓐᓄᑦ ᐋᔩᕋᕈᑎᖃᖅᐸᓪᓕᐊᓂᕐᒥᒃ ᓄᓇᑖᕐᓂᕐᒧᑦ ᐊᖏᖃᑎᒌᒍᑎᓂᒃ ᓄᓇᖃᖅᑳᖅᓯᒪᔪᓄᑦ, ᐃᓚᒋᔭᐅᓪᓗᑎᒃ ᐃᓄᐃᑦ.
“ᓄᓇᕗᑦ ᐊᖏᕈᑎᖏᑦ ᑲᔪᓯᑎᑕᐅᓚᐅᖅᑐᖅ ᐊᕐᕌᒍᓂ ᐱᔭᕆᐊᑐᔪᒃᑯᑦ ᐋᔩᕋᕈᑕᐅᖃᑦᑕᕐᓂᖏᑎᒍᑦ ᒐᕙᒪᑐᖃᒃᑯᑦ ᐊᖏᕈᓐᓇᖅᓯᕋᑕᓚᐅᖅᑐᑦ ᐃᓕᓴᖅᓯᓂᕐᒥᒃ ᐱᖅᑯᓯᑦᑎᓐᓂᒃ ᐊᒻᒪᓗ ᒫᓐᓇ ᐊᑐᖅᑕᐅᓂᖏᓐᓂᒃ ᓄᓇᑦᑕ ᐃᒪᑦᑕᓗ ᐃᓚᒋᔭᐅᓪᓗᓂ ᐃᑭᕐᒥ,” ᐊᖓᔪᖅᑳᖅ ᑰᑦᑎᖅ ᐅᖃᖅᑐᖅ. “ᑖᒪᔅ ᕘᔾᔪ ᐃᖅᑲᓇᐃᔮᕆᓚᐅᖅᑕᖓ ᐃᓯᖅᑎᑦᓯᓂᕐᒧᑦ ᑖᑦᓱᒥᖓ ᐊᓯᔾᔨᕐᓂᐅᔪᒥᒃ ᒐᕙᒪᑐᖃᒃᑯᑦ ᐱᓇᓱᐊᕋᕆᔭᖏᓐᓂ ᐱᖕᒪᕆᕐᔪᐊᕌᓘᓚᐅᖅᐳᖅ.”
ᐊᖓᔪᖅᑳᖅ ᑰᑦᑎᖅ ᐅᖃᒃᑲᓐᓂᓚᐅᖅᑐᖅ ᑖᒪᔅ ᕘᔾᔪ ᐋᖅᑭᒋᐊᒃᑲᐃᔨᑖᖑᓯᒪᓚᐅᕐᒥᔪᖅ 2005-ᒥ ᒐᕙᒪᑐᖃᒃᑯᑦ ᑲᔪᓯᑎᑦᓯᓯᒪᙱᓐᓂᖏᓐᓄᑦ ᐃᓘᓐᓇᖏᓐᓂᒃ ᑲᔪᓯᑎᑕᐅᓯᒪᒋᐊᓕᓐᓂᒃ ᓄᓇᕗᑦ ᐊᖏᕈᑎᖏᓐᓂᒃ. “ᐱᖕᒪᕆᐊᓘᔪᓂᒃ ᐊᑐᓕᖁᔨᔾᔪᑎᓕᐅᓚᐅᖅᑐᖅ, ᐊᒻᒪᓗ ᑐᑭᓯᒪᓂᖃᑦᓯᐊᖅᑐᓂ ᓱᒻᒪᑦ ᐃᓄᒃᑐᑦ, ᐊᐅᓚᑦᓯᕕᒋᔭᐅᔪᒥ ᐃᓄᓕᒫᖏᓐᓂ ᐅᓄᕐᓂᖅᓴᐅᑎᓪᓗᒋᑦ ᐃᓄᐃᑦ, ᐅᖃᐅᓯᖅ ᐃᖅᑲᓇᐃᔭᐅᑕᐅᒋᐊᓕᒃ ᐃᖅᑲᓇᐃᔭᕐᕕᓐᓂ ᐊᒻᒪᓗ ᐅᖃᐅᓯᖅ ᐃᓕᓴᐃᔾᔪᑕᐅᒋᐊᓕᒃ ᐃᓕᓴᕕᑦᑎᓐᓂ.”
“ᐅᐱᒋᓗᑎᒍ ᑲᔪᓯᑎᓪᓚᕗᑦ ᕿᒪᐃᓂᖓ ᐃᖅᑲᓇᖅᑐᒥᒃ ᐆᒻᒪᑎᓪᓗᒋᑦ 2006-ᒥ ᐋᖅᑭᒋᐊᒃᑲᐃᔨᐅᑉ ᑭᖑᓪᓕᖅᐹᖅᓯᐅᑏᑦ ᐅᓂᒃᑳᖏᓐᓂ,” ᐊᖓᔪᖅᑳᖅ ᑰᑦᑎᖅ ᐅᖃᖅᑐᖅ.
https://www.tunngavik.com/files/2021/04/2006-03-01-Thomas-Berger-Final-Report-INUK.pdf
-30-
ᑐᑭᓯᒋᐊᒃᑲᓂᕐᕕᒃᓴᖅ:
ᒪᓚᐃᔭ ᒥᑭᔾᔪᒃ
ᑐᑭᒧᐊᒃᑎᑦᑎᔨᐅᓂᕐᒥᒃ ᑐᓴᐅᒪᔾᔪᑎᓕᕆᔨᒃᑯᓐᓂ ᐃᓕᓐᓂᐊᖅᑐᖅ
ᓄᓇᕗᑦ ᑐᙵᕕᒃ ᑎᒥᖓ
ᐅᖄᓚᐅᑖ: (867) 975-4900/ᐊᑭᖃᙱᑦᑐᖅ: 1-888-646-0006
