(March 22, 2012 — Iqaluit, Nunavut) Taima TB-nut ikayuqtigiiktut tuhaqtittiyut aulattiaqniagut ukiumit taaffuminngat Taima TB aulapkaiyaat Aanniaqtailiyinit havaktit Iqalungni. Ikayuqtigiiktut taapkua Ottawa-mi Aanniaqvianit Qauyihaqtit taapkualu Ilihaqpaalliviat Ottawa-mi, Nunavut Tunngavikkut Timingat Kavamatkullu Nunavunmi.
TAIMA TB-nik qauyihaiyut ilitturipkaivallianahuaqtut aanniarutinik TB-mik Iqalungni uukturahuaqhugulu taamna TB-nik aanniarutinik nalvaaqhiurahuaqnik munaqhinahuaqniqlu pulaaqtaqhutik tamangnut aimavingnut ilihaiplutik munaqhiniqmik aanniarutinigahuqquuqtunut TB-mik.
“Hakugighutik ikayuqtigiikpaktut NTI-kut, Kavamatkut Nunavunmi taamnalu Dr. Gonzalo Alvarez Ottawa-mi Aanniaqvianit Qauyihaqtit taapkualu Ilihaqpaalliviat Ottawa-mi aulapkaihimayut hapkuninngat, ihumavugullu taimaa havaqatigiighutik ihuatqiyauvaktuq qauyihaitillugit nunallaanit,” uqaqtuq Towtongie.
“Qauyihaqtavut iniqhimaliqtavut imaalu quviahuttiaqtunga kiuvakkamik nunallaat,” uqaqtuq Dr. Alvarez. “Aturianaqpiaqtuq. Inuit ihumagiyainik TB mighaagut tuhaqvigivaktavut, ilitturipkainiq aanniarutinik ihuatqiyauvaktuq hapkua mighaagut Nunavunmi. Havaaptingnik hapkuninnga ilitturivalliayumayugut,” uqaqtuq.
Taamna TAIMA TB havaangat kiinauyaghaqpaktut Kavamatuqanit Kanatami, ikayuqtiqaqhutik NTI-kunnik, Kavamatkunnit Nunavunmi, Ottawa-mi Aanniaqvianit Qauyihaqtiinik taapkualu Ilihaqpaalliviat Ottawa-mi. Ahiit ikayuqtigiiktut taapkua Inuit Tapiriit Kanatami (ITK), New Brunswick-mi Puvangnik Qauyihaqtit taapkualu Kanatami Nunaqaqqaaqhimayut Aanniaqtuliqiyit. Havaangit qaritauyanunngaqpagait, Facebook-mullu, qunngialiuqpaghutiklu akimayuniklu qunngianik YouTube-munngaqpagait niripkaivaghutiklu nunallaanit. 444-nguyut inuit TB-nik ilittuqhitiyauvaktut aimavingnit, taapkuninngalu 300-nguyut qauyihaqtauvaktut aanniarutiqariaghait TB-mik.
