(October 20mi 2020-mi – Iqaloktutiami, Nunavumi) Aipagutuaraagat Ikhivautalik Nunavut Tungavik Timiuyumi aituivaktuq pigahunik Inuinaqnik agiyumik ikayuqtuiyujiqaqtunik atuqpaaliriagani manikhaqhiurutikhat, inuujuhiqmi ilitquhiqmilu inuutiarutainik Inuinauqatimiknit. Atuni aituuhiaqnahuaq talvaniiniaqtuq aituuhiaqlutik 5-hanatalamik.
Uvani 2020-mit NTI-kut Aipagutuaraagat Katimaqyuaqnigani Iqaloktutiami, Ikhivautalik Kotierk ilitaqhiyuq ukuniga Inuinaqnik ikayutuijutainit.:
Louie Bruce, Saliqnit
Louie Bruce aulariqtuq hivuliqhuqti nunagiyamini Saliqni, Nunavumi. Upalugaiyaqtaa, hanavlugu pivaliavlugulu takiniqhaq nanminiriyauyuq aulaqvikhat apqut Saliqnit Akearuqnak-mut, Duke of York Bay-mi atuqhugu naninik havakvigiyani Sadliq Pivaliajutinik Timiuyuq. Apqut pipkaiyuq Saliqmiunit tikitpagiagani amihunik aguniaqvikhamut tamakni taqyumiutanik iqalukniklu. Akearuqnaq taimanit atutauluaqtuq inikhaq amigaitunik umayuqaqmat ukunigalu nanunik, tugaaliknik, qilalukanik, nattiqniklu. Ilagiyaa, apqut pipkaiyuq ilaliutiniganik Naujaaqmiut atuqmajuklu una. Hivuliqhuqnigagut, Louie Bruce akmaiyuq aulaqvikhamik apqunmik ukua kigulikhavut inuit ikayuqtuqtauyaagani ilitquhiqmivut manikhaqhiurutimigulu.
Agnes Panioyak, Quqluqtumit
Agnes Panioyak qauyimayautiaqtuq atuqhimavlunilu miqhuqtiuyaamini Quqluqtumit, Nunavumi. Aliahukpaktuq ayuqiqturiagani aqnarutit Inuinait aliagiyaqaqtunik ilitaamikni igilraat pigiarutainik miqhuqniqmi ukualu, iliqtiqniqmi, upalugaiyaqniginik miqhakhat atuqniginiklu aalatqiit igilrutit. Qaganuaq Agnes havakhimayuq puhitiuriami ilihaiyiuvluni. Puhitaq aqnat atuliqpagait agiyut qauyimayauyut nakuuniqhauniginik ahiinit, pijutaukmat munaritiaqniganik ihumagitiaqlugulu hanayaagani. Agnes ayugijutaagut atuqtitiyumaniganiklu aalanit, Inuinaqnit ilitquhiq uqauhiqlu uqautauniganik atulaaqmat ukunani aqnarutini Inuinaqnit Qitiqmiuni Inuvialuknilu.
Leena Evic, Iqaluknit
Leena Evic aulaqtitigiaqtuq Ikhivautauvlunilu Pirurvik Iglumi, Nunavumit, iglugiyauyuq ayuruirutinik Inuit uqauhiinik, ilitquhiqnik, inuuhiqatiaqmiklu. Leena agiklipkaiyuq Piruurvik aulaniqatiaqniga akhuurutigihimaaqhugu ilihainiqmik Inuinaqtut Inuilu pigiarutainik ukuniga uqauhiqut ilitquhiquhiqulu hakugikhimainariagani. Atuqhimayumi ukiumi Pirurvik Iglu agiklihimayuq atuqtitiyaagani pigahunik Inuinaqtut ilihainaqvikhanik uqauhiqmik ilihautinik ikayuqtiqaqhutik Ilihaqvikyuamit Victoria-mi. Qayaknaqtilugu Nunavuqaqnigani, Inuinaqtut uqauhiq atuqtauniga ikiklivaliakmata 1%-mik ukiutuaraagat, Pirurvik Iglu aulaqtitivaliaqmata havaanik ihuaqhiyaagani una ayuqhautauyuq hatqiqhivlutik pigahunik havaariyauluaqtunik: Inuinaqtut Tukliriyaanik Uqauhiqmik ilitaqhijunmik ilihautimik, Inuinaqtut Hivuliqmik Uqauhiqmik Pivaaliqniganik Ilihautimik Inuinaqtulu Ilihaiyiuyaagani Ilitaqhijutiqaqtumik ilihauhiq.
Umanmit aliahuutit quyayutilu Louie Bruch-mut, Agnes Panioyak-mut, Leena Evic-mulu. Ikayuqtuutihi pijutauyuq Nunavumik inikhatiaguliqniganik tamaptiknit.
Karen Flaherty
Ikayuqti Hivuliqhuqtimik Tuhaumajutiliqiyini
Nunavut Tunngavik Timiuyuq
Hivayauta: (867) 975-4900 Akiitumik: 1-888-646-0006
