(ᐊᒃᑑᕝᕙ 20, 2020 –ᐃᖃᓗᑦᑑᑦᑎᐊᖅ ᓄᓇᕗᑦ) ᐊᕐᕌᒍᑕᒫᑦ ᑖᓐᓇ ᐊᖓᔪᖅᑳᖓᑦ ᓄᓇᕗᑦ ᑐᙵᕕᒃ ᑎᒥᖓᑦᑕ ᐊᐃᑦᑑᑎᖃᖃᑦᑕᕐᒪᑦ ᐱᖓᓱᓄᑦ ᐃᓄᖕᓄᑦ ᐃᑲᔪᖅᓯᒪᒻᒪᕆᒃᑐᓂᒃ ᓴᖅᑭᔮᖅᑎᑦᓯᓪᓗᑎᒃ ᑮᓇᐅᔭᓕᐅᕈᓐᓇᕐᓂᕐᒥᒃ, ᐃᓅᓯᓕᕆᓂᕐᒥᑦ ᐊᒻᒪ ᐃᓕᖅᑯᓰᖏᑦ ᖃᓄᐃᙱᑦᓯᐊᕆᐊᖃᕐᓂᖏᓐᓄᑦ ᐃᓄᐃᑦ. ᐊᑐᓂ ᑐᓂᔭᐅᔪᑦ ᑐᓂᔭᐅᓂᐊᖅᑐᑦ ᐊᐃᑦᑑᑎᒥᒃ ᐅᓄᕐᓂᖃᖅᑐᓂᒃ $500.
ᑕᒡᕙᓂ 2020 ᐊᕐᕌᒍᑕᒫᖅᓯᐅᒻᒥᒃ ᑲᑎᒪᑎᓪᓗᒋᑦ ᐃᖃᓗᒃᑑᑦᑎᐊᒥ, ᐊᖓᔪᖅᑳᖅ ᑰᑦᑎᖅ ᐃᓕᑕᖅᓯᔪᖅ ᒪᑯᓂᖓ ᐃᓄᖕᓂᑦ ᐃᑲᔫᑎᓯᒪᔪᓂᒃ:
ᓗᐃ ᕗᕉᔅ, ᓴᓪᓕᕐᓂ
ᓗᐃ ᕗᕉᔅ ᐱᓕᕆᒻᒪᕆᖃᑦᑕᖅᑐᖅ ᓯᕗᒃᑲᑕᖅᑎᐅᓪᓗᓂ ᓄᓇᓕᒥᓂ ᓴᓪᓕᖅ, ᓄᓇᕗᒥ. ᐸᕐᓇᐃᓯᒪᔪᑦ, ᐱᓕᕆᐊᖃᖅᓯᔪᖅ ᐊᒻᒪ ᐱᕙᓪᓕᐊᑎᑦᓯᓪᓗᓂ ᑕᑭᔪᒥᒃ ᐊᖅᑯᑕᐅᓂᐊᖅᑐᒥᒃ ᓴᓪᓕᕐᓂᒃ, ᐊᕿᐊᕈᖕᓴᕐᒧᑦ, ᓇᖕᒥᓂᖅ ᑲᒻᐸᓂᓂ ᐊᑐᖅᑐᒍ ᓴᓕᖅ ᐱᕙᓪᓕᐊᑎᑦᓯᓂᕐᒧᑦ ᓕᒥᑎᑦ. ᑖᓐᓇ ᐊᖅᑯᑦ ᓴᓪᓕᕐᒥᐅᓄᑦ ᐊᑐᖅᑕᐅᔪᓐᓇᖅᑐᑦ ᐊᖑᓇᓱᒡᕕᑦᓯᐊᕙᖕᒧᑦ ᑕᒪᒃᑮᖕᓂ ᑕᕆᐅᕐᒥ ᐊᒻᒪ ᐃᖃᓗᖕᓂᑦ. ᐊᕿᐊᕈᖕᓇᒃ ᐊᑑᑎᖃᑦᓯᐊᖅᑐᓂ ᐃᓂᐅᓯᒪᔪᖅ ᐱᔾᔪᑎᒋᓪᓗᒍ ᐆᒪᔪᖃᑦᓯᐊᕐᓂᖓ ᐃᓚᐅᓪᓗᑎᒃ ᓇᓄᐃᑦ, ᕿᓇᓗᒐᐃᑦ, ᐊᓪᓚᓐᖑᐊᑦ ᐊᒻᒪ ᓇᑦᓰᑦ. ᑕᒪᑐᒪ ᖄᖓᒍᑦ ᑖᓐᓇ ᐊᖅᑯᑦ ᐱᑕᖃᕈᑕᐅᔪᖅ ᐊᑕᓕᕈᑕᐅᓪᓗᓂ ᓇᐅᔮᕐᒥᐅᑦ, ᑖᑦᓱᒥᖓ ᐊᑐᖅᐸᒃᑐᑦ. ᓯᕗᓕᖅᑎᐅᓪᓗᓂ ᓗᐃ ᕗᕉᔅ ᒪᑐᐃᖅᓯᓯᒪᔪᖅ ᐊᖅᑯᒻᒃ ᑕᒪᒃᑯᐊ ᑭᖑᕚᖑᔪᑦ ᐃᑲᔪᖅᑕᐅᔪᓐᓇᖁᓪᓗᒋᑦ ᑕᒪᒃᑮᑎᒍᑦ ᐃᓕᖅᑯᓯᒃᑯᑦ ᐊᒻᒪ ᑮᓇᐅᔭᓕᐅᕈᑎᖃᕐᓂᒃᑯᑦ.
ᐋᒡᓂᔅ ᐸᓂᐅᔭᖅ, ᖁᕐᓗᖅᑐᒥ
ᐋᒡᓂᔅ ᐸᓂᐅᔭᖅ ᖃᐅᔨᒪᔭᐅᑦᓯᐊᖅᑐᖅ ᐊᒻᒪ ᒥᖅᓱᖅᑎᒻᒪᕆᐅᓪᓗᓂ ᖁᓪᓗᖅᑐᖅ, ᓄᓇᕗᑦ. ᖁᕕᐊᒋᔭᖃᖅᑐᖅ ᐃᓕᓐᓂᐊᖅᑎᑦᓯᒋᐊᒃᓴᖅ ᐃᓄᖕᓂᑦ ᐊᕐᓇᓂᒃ ᐃᓕᒍᒪᔪᓂᒃ ᐃᓄᐃᑦ ᐱᖅᑯᓯᑐᖃᖏᑎᒍᑦ ᒥᑦᓱᕐᓂᕐᒥᑦ ᐃᓚᐅᓪᓗᑎᒃ ᐊᓐᓄᕌᒃᓴᓕᐅᕐᓂᖅ, ᐸᕐᓇᐃᓂᖅ ᓴᓇᔭᒃᓴᓂᒃ ᐊᒻᒪ ᐊᑐᖅᑐᓂ ᐊᔾᔨᒌᓐᖏᑦᑐᓂᒃ ᓴᓇᕐᕈᑎᓂᒃ. ᒫᓐᓇᒫᖅ ᐋᒡᓂᔅ ᐱᓕᕆᓚᐅᖅᑐᖅ ᓄᐃᓚᓕᐅᕐᓂᕐᒥᑦ ᐃᓕᓴᐃᔨᐅᓪᓗᓂ. ᑖᒃᑯᐊ ᓄᐃᓚᓕᐅᕆᕙᒃᑕᖏᑦ ᖃᐅᔨᒪᔭᐅᑦ ᐱᐅᔪᒻᒪᕆᐅᓂᖏᓐᓂᒃ ᑕᑯᒥᓇᖅᑐᑎᒃ ᓴᓂᖏᓐᓂᒃ ᐊᓯᖏᑦᑕ, ᑲᒪᒋᑦᓯᐊᕆᐊᓖᑦ ᐊᒻᒪ ᐃᒃᐱᒋᑦᓯᐊᕐᓗᒋᑦ. ᐋᒡᓂᔅ ᖃᐅᔨᒪᓂᖓ ᐊᒻᒪ ᐱᓕᕆᖃᑎᖃᕈᒪᓂᖓ ᐃᓄᐃᓐᓇᐃᑦ ᐃᓕᖅᑯᓯᖏᓐᓂᒃ ᐊᒻᒪ ᐅᖃᐅᓯᖏᓐᓂᒃ ᑐᓂᓯᔪᖅ ᒪᒃᑯᒃᓂᖅᓴᓄᑦ ᐃᓄᐃᓐᓇᕐᓄᑦ ᕿᑎᕐᒥᐅᓂ ᐊᒻᒪ ᐃᓄᕕᐊᓗᖕᓂ.
ᓖᓇ ᐃᕕᒃ, ᐃᖃᓗᐃᑦ
ᓖᓇᐃᕕᒃ ᐱᒋᐊᖅᑎᑦᓯᓯᒪᔪᖅ ᐊᖓᔪᖅᑳᖑᓪᓗᓂ ᐱᕈᕐᕕᖕᒥᑦ, ᓄᓇᕗᒦᑦᑐᖅ ᐃᓄᒃᑐᑦ ᐅᖃᕈᓐᓇᑦᓯᐊᖅᑐᑦ, ᐃᓕᖅᑯᓯᕐᓂᒃ ᐊᒻᒪ ᖃᓄᐃᓐᖏᑦᓯᐊᕆᐊᖃᕐᓂᕐᒥᒃ. ᓖᓇ ᐱᕈᖅᓴᐃᓯᒪᔪᖅ ᐱᕈᕐᕕᖕᒥᑦ ᑎᒍᒥᐊᖏᓐᓇᖅᑐᓂ ᐃᓄᒃᑎᑐᑦ ᐅᖃᐅᓯᓕᕆᓂᕐᒥᑦ, ᐃᓕᖅᑯᓯᓕᕆᓂᕐᒥᓪᓗ ᐊᒻᒪ ᖃᓄᐃᓐᖏᑦᓯᐊᕆᐊᖃᕐᓂᕐᒥᑦ. ᐊᕐᕌᒎᓚᐅᖅᑐᒥ ᐱᕈᕐᕕᒃ ᐱᕈᖅᐹᓪᓕᖅᓯᒪᔪᖅ ᐱᖓᓱᓂᒃ ᐃᓄᖕᓂᑦ ᐃᓕᓴᐃᔾᔪᑎᒃᓴᖃᖅᑐᑎᒃ ᐃᓄᒃᑐᑦ ᐃᓕᓴᐃᔾᔪᑕᐅᓂᐊᖅᑐᓂᒃ ᐱᖃᑎᒋᓪᓗᒋᑦ ᓯᓇᑦᑐᖅᑕᕐᕕᒡᔪᐊᖓ ᕕᒃᑐᐊᕆᔭ. ᐊᒃᓱᕈᕐᓇᖅᑐᒦᑎᓪᓗᒍ ᓄᓇᕗᑦ ᓇᑭᓐᖔᓂᖓ, ᐃᓄᒃᑐᑦ ᓄᖑᑉᐸᓪᓕᐊᑎᓪᓗᒍ 1%−ᒥᑦ ᐊᕐᕌᒍᑕᒫᑦ, ᐱᕈᕐᕈᒃ ᖁᒡᕙᕆᐊᕆᓚᐅᖅᑐᖅ ᐱᓕᕆᐊᒥᒃ ᐅᖃᐅᓯᖃᕈᑎᒋᓪᓗᒍ ᑕᒪᓐᓇ ᑐᐊᕕᕐᓇᕐᓂᖓᓂᒃ ᓴᖅᑭᑎᑦᓯᓪᓗᓂ ᐱᖓᓲᓕᖓᔪᓂᒃ ᐃᓕᓐᓂᐊᒐᒃᓴᓂᒃ; ᐃᓄᒃᑐᑦ ᐅᖃᐅᓯᓐᖓᐅᑎᒋᓇᒍ ᐃᓕᑕᕆᔭᐅᔾᔪᑎᑖᕈᑎᒃᓴᑦ, ᐃᓄᒃᑐᑦ ᐅᖃᐅᓯᓐᖓᐅᑎᒋᓪᓗᒍ ᖁᒡᕙᕆᐊᕈᑏᑦ ᐊᒻᒪ ᐃᓄᒃᑐᑦ ᐃᓴᐃᔨᐅᓂᕐᒧᑦ ᐃᓕᓐᓂᐊᕈᑏᑦ ᐃᓕᑕᕆᔭᐅᔾᔪᑎᑖᕈᑕᐅᔪᓐᓇᖅᑐᖅ.
ᐃᒃᐱᒋᓪᓗᒋᑦ ᖁᕕᐊᓲᑎᕙᒃᑲ ᐊᒻᒪ ᖁᔭᒋᓪᓗᒋᑦ ᓗᐃ ᕗᕉᔅ, ᐊᒡᓂᔅ ᐸᓂᐅᔭᖅ ᐊᒻᒪ ᓖᓇ ᐃᕕᒃ. ᐃᑲᔫᑎᓂᓯ ᐃᑲᔫᑎᔪᖅ ᓄᓇᕗᒥ ᐃᓂᑦᓯᐊᕙᐅᓂᖅᓴᐅᖁᓪᓗᒋᑦ ᐃᓘᓐᓇᑎᓐᓄᑦ.
ᓇᐅᓚᕐᒃ ᕙᓚᐅᕋᑎ
ᑐᑭᒧᐊᒃᑎᑦᑎᔨ ᑐᒡᓕᐊ ᑐᓴᐅᒪᔾᔪᑎᓕᕆᔨᒃᑯᑦ
ᓄᓇᕗᑦ ᑐᙵᕕᒃ ᑎᒥᖓᑦ
ᐅᖃᓘᑖ: (867) 975-4900 ᐊᑭᖃᓐᖏᑦᑐᖅ: 1-888-646-0006
